ਐਡੀਲੇਡ – ਐਡੀਲੇਡ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਨੂੰ ਨੈਸ਼ਨਲ ਹੈਲਥ ਐਂਡ ਮੈਡੀਕਲ ਰਿਸਰਚ ਕੌਂਸਲ (NHMRC) ਵੱਲੋਂ 26.3 ਮਿਲੀਅਨ ਡਾਲਰ ਤੋਂ ਵੱਧ ਦੀ ਗ੍ਰਾਂਟ ਮਿਲੀ ਹੈ। ਇਸ ਰਕਮ ਨਾਲ 16 ਅਜਿਹੇ ਖੋਜ ਪ੍ਰੋਜੈਕਟਾਂ ਨੂੰ ਸਮਰਥਨ ਮਿਲੇਗਾ, ਜੋ ਆਸਟ੍ਰੇਲੀਆ ਦੀਆਂ ਵੱਡੀਆਂ ਸਿਹਤ ਚੁਣੌਤੀਆਂ ਦਾ ਹੱਲ ਲੱਭਣ ‘ਤੇ ਕੇਂਦਰਿਤ ਹਨ।
ਇਹ ਗ੍ਰਾਂਟ ਐਡੀਲੇਡ ਯੂਨੀਵਰਸਿਟੀ ਦੇ ਗਠਨ ਤੋਂ ਬਾਅਦ ਮਿਲੀ ਪਹਿਲੀ NHMRC ਇਨਵੈਸਟੀਗੇਟਰ ਗ੍ਰਾਂਟ ਹੈ। ਇਸ ਸਾਲ ਮਿਲੀ ਫੰਡਿੰਗ ਪਿਛਲੇ ਪੰਜ ਸਾਲਾਂ ਦੀ ਔਸਤ ਨਾਲੋਂ ਦੋਗੁਣੀ ਤੋਂ ਵੀ ਵੱਧ ਹੈ, ਜਿਸ ਨਾਲ ਯੂਨੀਵਰਸਿਟੀ ਦੀ ਸਿਹਤ ਅਤੇ ਮੈਡੀਕਲ ਖੋਜ ਵਿੱਚ ਮਜ਼ਬੂਤ ਸਥਿਤੀ ਹੋਰ ਮਜ਼ਬੂਤ ਹੋਈ ਹੈ।
ਯੂਨੀਵਰਸਿਟੀ ਦੇ ਡਿਪਟੀ ਵਾਈਸ ਚਾਂਸਲਰ (ਰਿਸਰਚ ਐਂਡ ਇਨੋਵੇਸ਼ਨ) ਪ੍ਰੋਫੈਸਰ ਐਂਟਨ ਮਿਡਲਬਰਗ ਨੇ ਕਿਹਾ ਕਿ ਇਹ ਸਫ਼ਲਤਾ ਖੋਜਕਰਤਾਵਾਂ ਦੀ ਉੱਚ ਯੋਗਤਾ ਅਤੇ ਉਨ੍ਹਾਂ ਦੇ ਸ਼ਾਨਦਾਰ ਕੰਮ ਦਾ ਸਬੂਤ ਹੈ। ਉਨ੍ਹਾਂ ਕਿਹਾ ਕਿ ਇਹ ਗ੍ਰਾਂਟਾਂ ਦੇਸ਼ ਦੀਆਂ ਸਭ ਤੋਂ ਮੁਕਾਬਲੇ ਵਾਲੀਆਂ ਖੋਜ ਗ੍ਰਾਂਟਾਂ ਵਿੱਚੋਂ ਇੱਕ ਹਨ ਅਤੇ ਇਹ ਨਤੀਜੇ ਦਰਸਾਉਂਦੇ ਹਨ ਕਿ ਐਡੀਲੇਡ ਯੂਨੀਵਰਸਿਟੀ ਵਿਸ਼ਵ ਪੱਧਰੀ ਸਿਹਤ ਖੋਜ ਦਾ ਮਹੱਤਵਪੂਰਨ ਕੇਂਦਰ ਬਣ ਰਹੀ ਹੈ।
ਗ੍ਰਾਂਟ ਹਾਸਲ ਕਰਨ ਵਾਲੇ ਖੋਜ ਪ੍ਰੋਜੈਕਟਾਂ ਵਿੱਚ ਕੈਂਸਰ ਦੇ ਨਵੇਂ ਇਲਾਜ, ਇਮਿਊਨੋਥੈਰੇਪੀ, ਲੰਬੇ ਸਮੇਂ ਦੀਆਂ ਬਿਮਾਰੀਆਂ ਤੋਂ ਬਚਾਅ, ਮੋਟਾਪੇ ਅਤੇ ਪੋਸ਼ਣ, ਆਂਤਾਂ ਦੇ ਦਰਦ, ਐਂਡੋਮੀਟ੍ਰਿਓਸਿਸ, ਡਿਮੈਂਸ਼ੀਆ, ਸਿਸਟਿਕ ਫਾਈਬ੍ਰੋਸਿਸ, ਮਲੇਰੀਆ ਅਤੇ ਹੋਰ ਗੰਭੀਰ ਬਿਮਾਰੀਆਂ ਨਾਲ ਜੁੜੀਆਂ ਖੋਜਾਂ ਸ਼ਾਮਲ ਹਨ। ਇਨ੍ਹਾਂ ਵਿੱਚ ਨੈਨੋ-ਟੈਕਨਾਲੋਜੀ, ਆਰਟੀਫ਼ੀਸ਼ਲ ਇੰਟੈਲੀਜੈਂਸ (AI), ਨਵੀਆਂ ਦਵਾਈਆਂ ਪਹੁੰਚਾਉਣ ਦੀਆਂ ਤਕਨੀਕਾਂ ਅਤੇ ਬਾਇਓਮੈਟੀਰੀਅਲ ਦੀ ਵਰਤੋਂ ਕੀਤੀ ਜਾਵੇਗੀ।
ਸਭ ਤੋਂ ਵੱਡੀ ਗ੍ਰਾਂਟ 3,035,320 ਲੱਖ ਡਾਲਰ ਪ੍ਰੋਫੈਸਰ ਟਿਮੋਥੀ ਹਿਊਜ਼ ਨੂੰ ਮਿਲੀ ਹੈ। ਉਹ ਕ੍ਰੋਨਿਕ ਮਾਇਲੋਇਡ ਲਿਊਕੀਮੀਆ ਦੇ ਇਲਾਜ ਲਈ ਨਵੀਆਂ ਥੈਰੇਪੀਆਂ ‘ਤੇ ਕੰਮ ਕਰਨਗੇ, ਤਾਂ ਜੋ ਮਰੀਜ਼ਾਂ ਨੂੰ ਲੰਬੇ ਸਮੇਂ ਤੱਕ ਦਵਾਈਆਂ ‘ਤੇ ਨਿਰਭਰ ਨਾ ਰਹਿਣਾ ਪਵੇ।
ਇਸ ਤੋਂ ਇਲਾਵਾ ਪ੍ਰੋਫੈਸਰ ਕੈਰੋਲ ਮਹੇਰ ਏਆਈ ਆਧਾਰਿਤ ਵਰਚੁਅਲ ਹੈਲਥ ਕੋਚ ਤਿਆਰ ਕਰਨਗੇ, ਜੋ ਲੋਕਾਂ ਨੂੰ ਸਹੀ ਖੁਰਾਕ, ਕਸਰਤ ਅਤੇ ਵਜ਼ਨ ਘਟਾਉਣ ਵਿੱਚ ਮਦਦ ਕਰੇਗਾ। ਹੋਰ ਖੋਜਾਂ ਵਿੱਚ ਕੈਂਸਰ ਲਈ ਨਵੀਆਂ ਵੈਕਸੀਨਾਂ, ਲੰਬੇ ਸਮੇਂ ਦੇ ਦਰਦ ਦਾ ਇਲਾਜ, ਅਤਿ-ਪ੍ਰੋਸੈਸਡ ਖਾਣੇ ਅਤੇ ਮਿੱਠੇ ਪੇਅ ਘਟਾਉਣ ਲਈ ਨੀਤੀਆਂ, ਅਤੇ ਗੰਭੀਰ ਬਿਮਾਰੀਆਂ ਤੋਂ ਠੀਕ ਹੋ ਰਹੇ ਮਰੀਜ਼ਾਂ ਲਈ ਬਿਹਤਰ ਪੋਸ਼ਣ ਯੋਜਨਾਵਾਂ ਸ਼ਾਮਲ ਹਨ।
ਯੂਨੀਵਰਸਿਟੀ ਦਾ ਕਹਿਣਾ ਹੈ ਕਿ ਇਹ ਖੋਜਾਂ ਭਵਿੱਖ ਵਿੱਚ ਮਰੀਜ਼ਾਂ ਦੀ ਬਿਹਤਰ ਦੇਖਭਾਲ, ਨਵੀਆਂ ਦਵਾਈਆਂ ਦੇ ਵਿਕਾਸ ਅਤੇ ਆਸਟ੍ਰੇਲੀਆ ਦੀ ਸਿਹਤ ਪ੍ਰਣਾਲੀ ਨੂੰ ਹੋਰ ਮਜ਼ਬੂਤ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੀਆਂ।