ਮੈਲਬੌਰਨ – ਵਿਕਟੋਰੀਆ ਦੀ ਲੇਬਰ ਸਰਕਾਰ ਬਹੁ-ਸੱਭਿਆਚਾਰਕ ਭਾਈਚਾਰੇ ਲਈ ਲਗਾਤਾਰ ਕੰਮ ਕਰ ਰਹੀ ਹੈ। ਸਰਕਾਰ ਨੇ ਮੈਲਬੌਰਨ ਦੇ ਇੰਡੀਅਨ ਫਿਲਮ ਫੈਸਟੀਵਲ (IFFM) ਨੂੰ ਹੋਰ ਦੋ ਸਾਲਾਂ ਲਈ ਜਾਰੀ ਰੱਖਣ ਦਾ ਐਲਾਨ ਕੀਤਾ ਹੈ। ਰਚਨਾਤਮਕ ਉਦਯੋਗਾਂ ਦੀ ਮੰਤਰੀ ਵਿੱਕੀ ਵਾਰਡ ਨੇ ਅੱਜ ਇਸ ਫੈਸਟੀਵਲ ਲਈ 600,000 ਦੀ ਫੰਡਿੰਗ ਦਾ ਐਲਾਨ ਕੀਤਾ ਹੈ। ਇਹ ਰਕਮ ਚੋਣ ਦੌਰਾਨ ਕੀਤੇ ਵਾਅਦੇ ਤਹਿਤ ਦਿੱਤੀ ਜਾ ਰਹੀ ਹੈ। IFFM ਦੱਖਣੀ ਗੋਲਾਰਧ ਵਿੱਚ ਭਾਰਤੀ ਸਿਨੇਮਾ ਦਾ ਸਭ ਤੋਂ ਵੱਡਾ ਫੈਸਟੀਵਲ ਮੰਨਿਆ ਜਾਂਦਾ ਹੈ। ਇਸ ਸਾਲ ਇਹ ਆਪਣੇ 17ਵੇਂ ਸਾਲ ਵਿੱਚ ਦਾਖਲ ਹੋ ਗਿਆ ਹੈ।
38 ਭਾਸ਼ਾਵਾਂ ਵਿੱਚ 130 ਤੋਂ ਵੱਧ ਫਿਲਮਾਂ
ਇਸ ਸਾਲ ਫੈਸਟੀਵਲ ਵਿੱਚ 38 ਭਾਸ਼ਾਵਾਂ ਦੀਆਂ 130 ਤੋਂ ਵੱਧ ਫਿਲਮਾਂ ਦਿਖਾਈਆਂ ਜਾਣਗੀਆਂ। ਫੈਸਟੀਵਲ ਵਿੱਚ ਫਿਲਮਾਂ ਤੋਂ ਇਲਾਵਾ ਕਈ ਹੋਰ ਪ੍ਰੋਗਰਾਮ ਵੀ ਹੋਣਗੇ। ਇਨ੍ਹਾਂ ਵਿੱਚ ਅਵਾਰਡ ਨਾਈਟ, ਪ੍ਰਾਈਡ ਡੇਅ ਅਤੇ ਫੈਡ ਸਕੁਏਅਰ ’ਤੇ ਡਾਂਸ ਮੁਕਾਬਲਾ ਸ਼ਾਮਲ ਹਨ। ਇਸ ਸਾਲ ਫੈਸਟੀਵਲ ਵਿੱਚ 30,000 ਤੋਂ ਵੱਧ ਲੋਕਾਂ ਦੇ ਆਉਣ ਦੀ ਉਮੀਦ ਹੈ।
ਰੇਖਾ ਨੂੰ ਮਿਲੇਗਾ ਖਾਸ ਸਨਮਾਨ
ਭਾਰਤੀ ਸਿਨੇਮਾ ਦੀ ਮਸ਼ਹੂਰ ਅਦਾਕਾਰਾ ਰੇਖਾ ਇਸ ਸਾਲ ਦੇ ਫੈਸਟੀਵਲ ਦੀਆਂ ਖਾਸ ਹਸਤੀਆਂ ਵਿੱਚ ਸ਼ਾਮਲ ਹਨ।
ਉਨ੍ਹਾਂ ਨੂੰ ਸਿਨੇਮਾ ਵਿੱਚ ਲੰਬੇ ਸਮੇਂ ਤੋਂ ਕੀਤੇ ਜਾ ਰਹੇ ਯੋਗਦਾਨ ਲਈ IFFM Excellence in Cinema Award ਨਾਲ ਸਨਮਾਨਿਤ ਕੀਤਾ ਜਾਵੇਗਾ।
ਰਾਣੀ ਮੁਖਰਜੀ ਨੂੰ ਆਨਰੇਰੀ ਡਾਕਟਰੇਟ
ਮਸ਼ਹੂਰ ਅਦਾਕਾਰਾ ਰਾਣੀ ਮੁਖਰਜੀ ਨੂੰ ਲਾ ਟ੍ਰੋਬ ਯੂਨੀਵਰਸਿਟੀ ਵੱਲੋਂ ਆਨਰੇਰੀ ਡਾਕਟਰੇਟ ਦਿੱਤੀ ਜਾਵੇਗੀ। ਇਹ ਸਨਮਾਨ ਉਨ੍ਹਾਂ ਦੇ ਸਿਨੇਮਾ ਵਿੱਚ ਸ਼ਾਨਦਾਰ ਯੋਗਦਾਨ ਲਈ ਦਿੱਤਾ ਜਾ ਰਿਹਾ ਹੈ।
ਕਈ ਹੋਰ ਵੱਡੇ ਕਲਾਕਾਰ ਵੀ ਹੋਣਗੇ ਸ਼ਾਮਲ
ਇਸ ਸਾਲ ਦੇ ਫੈਸਟੀਵਲ ਵਿੱਚ ਕਈ ਹੋਰ ਮਸ਼ਹੂਰ ਫਿਲਮੀ ਹਸਤੀਆਂ ਵੀ ਹਿੱਸਾ ਲੈਣਗੀਆਂ। ਇਨ੍ਹਾਂ ਵਿੱਚ ਨਿਰਦੇਸ਼ਕ ਰੀਮਾ ਦਾਸ, ਅਦਾਕਾਰ ਅਤੇ ਨਿਰਮਾਤਾ ਦੁਲਕਰ ਸਲਮਾਨ ਅਤੇ ਅਦਾਕਾਰ ਪੰਕਜ ਤ੍ਰਿਪਾਠੀ ਸ਼ਾਮਲ ਹਨ।
ਨਵੀਆਂ ਫਿਲਮਾਂ ਦੇ ਪ੍ਰੀਮੀਅਰ
ਫੈਸਟੀਵਲ ਵਿੱਚ ਕਈ ਖਾਸ ਫਿਲਮਾਂ ਵੀ ਦਿਖਾਈਆਂ ਜਾਣਗੀਆਂ। ਇਨ੍ਹਾਂ ਵਿੱਚ “Members of the Problematic Family” ਦਾ ਆਸਟ੍ਰੇਲੀਆਈ ਪ੍ਰੀਮੀਅਰ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਮੈਲਬੌਰਨ ਵਿੱਚ ਬਣੀ ਛੋਟੀ ਫਿਲਮ “Graveyard Shift” ਅਤੇ ਫੀਚਰ ਫਿਲਮ “Full Plate” ਦੇ ਪ੍ਰੀਮੀਅਰ ਵੀ ਹੋਣਗੇ।
ਖੇਤਰੀ ਵਿਕਟੋਰੀਆ ਵਿੱਚ ਵੀ ਹੋਵੇਗੀ ਸਕ੍ਰੀਨਿੰਗ
IFFM ਦਾ ਪ੍ਰੋਗਰਾਮ ਸਿਰਫ਼ ਮੈਲਬੌਰਨ ਤੱਕ ਹੀ ਸੀਮਿਤ ਨਹੀਂ ਰਹੇਗਾ। IFFM Regional Rhapsody ਤਹਿਤ ਫੈਸਟੀਵਲ ਨੂੰ ਵਿਕਟੋਰੀਆ ਦੇ ਖੇਤਰੀ ਸ਼ਹਿਰਾਂ ਵਿੱਚ ਵੀ ਲਿਜਾਇਆ ਜਾਵੇਗਾ। ਇਸ ਤਹਿਤ ਗੀਲੋਂਗ, ਬੈਂਡਿਗੋ ਅਤੇ ਸ਼ੈਪਰਟਨ ਵਿੱਚ ਫਿਲਮਾਂ ਦੀ ਸਕ੍ਰੀਨਿੰਗ ਹੋਵੇਗੀ। ਇਸ ਨਾਲ ਖੇਤਰੀ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕਾਂ ਨੂੰ ਵੀ ਭਾਰਤੀ ਸਿਨੇਮਾ ਦੇਖਣ ਦਾ ਮੌਕਾ ਮਿਲੇਗਾ।
ਵਿਕਟੋਰੀਆ ਸਰਕਾਰ ਨੇ ਕਿਹਾ ਹੈ ਕਿ ਉਹ ਸੂਬੇ ਦੇ ਰਚਨਾਤਮਕ ਖੇਤਰ ਅਤੇ ਬਹੁ-ਸੱਭਿਆਚਾਰਕ ਭਾਈਚਾਰੇ ਨੂੰ ਮਜ਼ਬੂਤ ਕਰਨ ਲਈ ਨਿਵੇਸ਼ ਕਰ ਰਹੀ ਹੈ। ਸਰਕਾਰ ਨੇ ਵਿਰੋਧੀ ਪਾਰਟੀਆਂ ਦੀਆਂ ਨੀਤੀਆਂ ’ਤੇ ਵੀ ਸਵਾਲ ਚੁੱਕੇ ਹਨ ਅਤੇ ਕਿਹਾ ਹੈ ਕਿ ਰਚਨਾਤਮਕ ਖੇਤਰ ਵਿੱਚ ਨਿਵੇਸ਼ ਜਾਰੀ ਰੱਖਣਾ ਜ਼ਰੂਰੀ ਹੈ।
ਰਚਨਾਤਮਕ ਉਦਯੋਗਾਂ ਦੀ ਮੰਤਰੀ ਵਿੱਕੀ ਵਾਰਡ ਨੇ ਕਿਹਾ ਕਿ, “ਮਜ਼ਬੂਤ ਵਿਕਟੋਰੀਆ ਉਹ ਹੈ ਜਿੱਥੇ ਹਰ ਕੋਈ ਆਪਣਾ ਯੋਗਦਾਨ ਪਾ ਸਕੇ, ਆਪਣੇ ਆਪ ਨੂੰ ਇਸ ਸਮਾਜ ਦਾ ਹਿੱਸਾ ਸਮਝੇ ਅਤੇ ਆਪਣੀਆਂ ਕਹਾਣੀਆਂ ਨੂੰ ਵੀ ਪਰਦੇ ’ਤੇ ਦੇਖ ਸਕੇ। ਉਨ੍ਹਾਂ ਕਿਹਾ ਕਿ ਲੇਬਰ ਸਰਕਾਰ ਨੂੰ ਮੈਲਬੌਰਨ ਦੇ ਇੰਡੀਅਨ ਫਿਲਮ ਫੈਸਟੀਵਲ ਦਾ ਸਮਰਥਨ ਕਰਨ ’ਤੇ ਮਾਣ ਹੈ। ਉਨ੍ਹਾਂ ਮੁਤਾਬਕ ਇਹ ਫੈਸਟੀਵਲ ਵਿਕਟੋਰੀਆ ਦੇ ਬਹੁ-ਸੱਭਿਆਚਾਰਕ ਸਮਾਜ ਦੀ ਖੂਬਸੂਰਤੀ ਨੂੰ ਦਰਸਾਉਂਦਾ ਹੈ ਅਤੇ ਵਿਕਟੋਰੀਆ ਨੂੰ ਦੁਨੀਆ ਦੇ ਮਹੱਤਵਪੂਰਨ ਫਿਲਮ ਅਤੇ ਸਕ੍ਰੀਨ ਕੇਂਦਰਾਂ ਵਿੱਚੋਂ ਇੱਕ ਬਣਾਉਣ ਵਿੱਚ ਮਦਦ ਕਰਦਾ ਹੈ।”
ਬਹੁ-ਸੱਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਪਾਲ ਐਡਬਰੂਕ ਨੇ ਕਿਹਾ ਕਿ ਵਿਕਟੋਰੀਆ ਆਸਟ੍ਰੇਲੀਆ ਦੇ ਸਭ ਤੋਂ ਵੱਡੇ ਅਤੇ ਸਰਗਰਮ ਭਾਰਤੀ ਭਾਈਚਾਰੇ ਦਾ ਘਰ ਹੈ। ਉਨ੍ਹਾਂ ਕਿਹਾ ਕਿ ਇਸ ਲਈ ਇਹ ਬਿਲਕੁਲ ਢੁੱਕਵਾਂ ਹੈ ਕਿ ਦੱਖਣੀ ਗੋਲਾਰਧ ਵਿੱਚ ਭਾਰਤੀ ਸਿਨੇਮਾ ਦਾ ਸਭ ਤੋਂ ਵੱਡਾ ਫੈਸਟੀਵਲ ਵਿਕਟੋਰੀਆ ਵਿੱਚ ਕਰਵਾਇਆ ਜਾਂਦਾ ਹੈ।
IFFM ਦੀ ਫੈਸਟੀਵਲ ਡਾਇਰੈਕਟਰ ਮਿਤੂ ਭੌਮਿਕ ਲੈਂਜ ਨੇ ਕਿਹਾ ਕਿ IFFM ਦਾ ਮੰਨਣਾ ਹੈ ਕਿ ਚੰਗੀਆਂ ਕਹਾਣੀਆਂ ਕਿਸੇ ਇੱਕ ਭਾਸ਼ਾ, ਦੇਸ਼ ਜਾਂ ਪਛਾਣ ਤੱਕ ਸੀਮਿਤ ਨਹੀਂ ਹੁੰਦੀਆਂ। IFFM ਵਿੱਚ ਸਾਡਾ ਮੰਨਣਾ ਹੈ ਕਿ ਚੰਗੀ ਕਹਾਣੀ ਭਾਸ਼ਾ, ਭੂਗੋਲ ਅਤੇ ਪਛਾਣ ਦੀਆਂ ਹੱਦਾਂ ਤੋਂ ਪਰੇ ਜਾਂਦੀ ਹੈ।”
23 ਅਗਸਤ ਤੱਕ ਚੱਲੇਗਾ ਫੈਸਟੀਵਲ
ਭਾਰਤੀ ਸਿਨੇਮਾ, ਕਲਾ ਅਤੇ ਸੱਭਿਆਚਾਰ ਨੂੰ ਆਸਟ੍ਰੇਲੀਆ ਵਿੱਚ ਵੱਡਾ ਮੰਚ ਦੇਣ ਵਾਲਾ IFFM ਇਸ ਸਾਲ ਵੀ ਮੈਲਬੌਰਨ ਅਤੇ ਵਿਕਟੋਰੀਆ ਦੇ ਲੋਕਾਂ ਲਈ ਖਾਸ ਖਿੱਚ ਦਾ ਕੇਂਦਰ ਬਣਨ ਜਾ ਰਿਹਾ ਹੈ। ਇਸ ਸਾਲ ਦਾ ਇੰਡੀਅਨ ਫਿਲਮ ਫੈਸਟੀਵਲ ਆਫ ਮੈਲਬੌਰਨ 13 ਅਗਸਤ ਤੋਂ ਸ਼ੁਰੂ ਹੋ ਕੇ ਐਤਵਾਰ, 23 ਅਗਸਤ 2026 ਤੱਕ ਚੱਲੇਗਾ।