ਵਿਕਟੋਰੀਆ ਵਿੱਚ ਕੰਗਾਰੂਆਂ ਦੇ ਗੱਡੀਆਂ ਨਾਲ ਟਕਰਾਉਣ ਦੀਆਂ ਘਟਨਾਵਾਂ ਵਧ ਰਹੀਆਂ ਹਨ ਅਤੇ ਇਨ੍ਹਾਂ ਹਾਦਸਿਆਂ ਕਾਰਨ ਗੱਡੀਆਂ ਨੂੰ ਵੱਡਾ ਨੁਕਸਾਨ ਹੋ ਰਿਹਾ ਹੈ। RACV ਇੰਸ਼ੋਰੈਂਸ ਦੇ ਨਵੇਂ ਅੰਕੜਿਆਂ ਮੁਤਾਬਕ, ਪਿਛਲੇ ਸਾਲ ਵਿਕਟੋਰੀਆ ਦੇ ਡਰਾਈਵਰਾਂ ਨੇ ਔਸਤਨ ਹਰ ਰੋਜ਼ ਲਗਭਗ 20 ਕੰਗਾਰੂ ਐਕਸੀਡੈਂਟਾਂ ਦੇ ਕਲੇਮ ਕੀਤੇ। ਜਨਵਰੀ 2021 ਤੋਂ ਜੂਨ 2026 ਤੱਕ RACV ਮੈਂਬਰਾਂ ਵੱਲੋਂ ਕੰਗਾਰੂ ਐਕਸੀਡੈਂਟਾਂ ਨਾਲ ਜੁੜੇ ਲਗਭਗ 31,000 ਕਲੇਮ ਦਰਜ ਕੀਤੇ ਗਏ। ਸਾਲ 2025 ਵਿੱਚ ਇਹ ਗਿਣਤੀ ਸਭ ਤੋਂ ਵੱਧ ਰਹੀ, ਜਦੋਂ 7,232 ਕਲੇਮ ਕੀਤੇ ਗਏ। ਇਨ੍ਹਾਂ ਹਾਦਸਿਆਂ ਦਾ ਖਰਚਾ ਵੀ ਤੇਜ਼ੀ ਨਾਲ ਵਧਿਆ ਹੈ। 2025 ਵਿੱਚ ਇੱਕ ਕਲੇਮ ਦੀ ਔਸਤ ਲਾਗਤ ਲਗਭਗ 9,000 ਡਾਲਰ ਰਹੀ, ਜੋ 2021 ਦੇ ਮੁਕਾਬਲੇ 48 ਫੀਸਦੀ ਵੱਧ ਹੈ। ਇਸ ਤੋਂ ਇਲਾਵਾ 2025 ਵਿੱਚ ਹਰ ਛੇ ਵਿੱਚੋਂ ਇੱਕ ਕੰਗਾਰੂ ਐਕਸੀਡੈਂਟ ਵਿੱਚ ਗੱਡੀ ਪੂਰੀ ਤਰ੍ਹਾਂ ਨੁਕਸਾਨੀ ਹੋਈ ਅਤੇ ਉਸਨੂੰ ‘ਰਾਈਟ-ਆਫ’ ਕਰਨਾ ਪਿਆ। 2021 ਵਿੱਚ ਇਹ ਗਿਣਤੀ ਹਰ 9 ਵਿੱਚੋਂ 1 ਸੀ।
RACV ਦੇ ਜਨਰਲ ਮੈਨੇਜਰ ਇੰਸ਼ੋਰੈਂਸ ਅਤੇ ਰੋਡਸਾਈਡ ਬਿਲ ਬਲੱਡਵਰਥ ਨੇ ਕਿਹਾ ਕਿ ਮੈਲਬੌਰਨ ਦੇ ਬਾਹਰੀ ਇਲਾਕਿਆਂ ਵਿੱਚ ਵਧ ਰਹੀ ਹਾਊਸਿੰਗ ਡਿਵੈਲਪਮੈਂਟ ਕਾਰਨ ਲੋਕ ਹੁਣ ਉਨ੍ਹਾਂ ਥਾਵਾਂ ਤੋਂ ਵੱਧ ਗੱਡੀਆਂ ਚਲਾ ਰਹੇ ਹਨ ਜਿੱਥੇ ਪਹਿਲਾਂ ਕੰਗਾਰੂ ਰਹਿੰਦੇ ਸਨ। ਉਨ੍ਹਾਂ ਕਿਹਾ ਕਿ ਲੋਕ ਅਕਸਰ ਸੋਚਦੇ ਹਨ ਕਿ ਕੰਗਾਰੂ ਟੱਕਰਾਂ ਸਿਰਫ਼ ਪੇਂਡੂ ਸੜਕਾਂ ਦੀ ਸਮੱਸਿਆ ਹਨ, ਪਰ ਮੈਲਬੌਰਨ ਦੇ ਬਾਹਰੀ ਇਲਾਕਿਆਂ ਦੇ ਫੈਲਾਅ ਨਾਲ ਸੜਕਾਂ ’ਤੇ ਗੱਡੀਆਂ ਅਤੇ ਕੰਗਾਰੂਆਂ ਦਾ ਆਮਣਾ-ਸਾਮਣਾ ਵੱਧ ਰਿਹਾ ਹੈ।
ਜਨਵਰੀ 2021 ਤੋਂ ਜੂਨ 2026 ਤੱਕ RACV ਮੈਂਬਰਾਂ ਵੱਲੋਂ ਕੰਗਾਰੂ ਨਾਲ ਟੱਕਰਾਂ ਦੇ ਸਭ ਤੋਂ ਵੱਧ ਕਲੇਮ ਇਨ੍ਹਾਂ 10 ਇਲਾਕਿਆਂ ਵਿੱਚ ਦਰਜ ਕੀਤੇ ਗਏ:
- ਸਨਬਰੀ – 281 ਕਲੇਮ
- ਵਾਲਨ – 232 ਕਲੇਮ
- ਹੀਥਕੋਟ – 230 ਕਲੇਮ
- ਬੇਨਾਲਾ – 226 ਕਲੇਮ
- ਗਿਸਬੋਰਨ – 209 ਕਲੇਮ
- ਕ੍ਰੇਗੀਬਰਨ – 193 ਕਲੇਮ
- ਬੈਂਡੀਗੋ – 181 ਕਲੇਮ
- ਡੋਰੀਨ – 165 ਕਲੇਮ
- ਵੁੱਡਐਂਡ – 158 ਕਲੇਮ
- ਕੈਸਲਮੇਨ – 155 ਕਲੇਮ
ਮੈਲਬੌਰਨ ਦੇ ਬਾਹਰੀ ਇਲਾਕਿਆਂ ਵਿੱਚ ਕਲੇਮਾਂ ਵਿੱਚ ਸਭ ਤੋਂ ਤੇਜ਼ ਵਾਧਾ ਹੋਇਆ। Wallan ਵਿੱਚ 2021 ਤੋਂ 2025 ਤੱਕ ਕਲੇਮ 112 ਫੀਸਦੀ ਵਧੇ। Kilmore ਵਿੱਚ 193 ਫੀਸਦੀ, Mickleham ਵਿੱਚ 169 ਫੀਸਦੀ ਅਤੇ Gisborne ਵਿੱਚ 93 ਫੀਸਦੀ ਵਾਧਾ ਦਰਜ ਕੀਤਾ ਗਿਆ। RACV ਮੁਤਾਬਕ ਕੰਗਾਰੂਆਂ ਦੀ ਹਿਲਜੁਲ ਠੰਢੇ ਮਹੀਨਿਆਂ ਵਿੱਚ ਵੀ ਵੱਧ ਖਤਰਾ ਪੈਦਾ ਕਰਦੀ ਹੈ। ਅਪ੍ਰੈਲ ਤੋਂ ਅਗਸਤ ਤੱਕ ਕੰਗਾਰੂ ਟੱਕਰਾਂ ਦੇ ਕਲੇਮ ਬਾਕੀ ਮਹੀਨਿਆਂ ਦੇ ਮੁਕਾਬਲੇ 20 ਫੀਸਦੀ ਤੋਂ ਵੱਧ ਰਹਿੰਦੇ ਹਨ। ਸਵੇਰੇ ਸੂਰਜ ਚੜ੍ਹਨ ਵੇਲੇ ਅਤੇ ਸ਼ਾਮ ਨੂੰ ਸੂਰਜ ਡੁੱਬਣ ਵੇਲੇ ਖਤਰਾ ਸਭ ਤੋਂ ਜ਼ਿਆਦਾ ਹੁੰਦਾ ਹੈ।
ਕੰਗਾਰੂ ਟੱਕਰ ਤੋਂ ਬਚਣ ਲਈ RACV ਦੀ ਸਲਾਹ
- ਖਤਰੇ ਦੇ ਸਮੇਂ ਨੂੰ ਜਾਣੋ: ਕੰਗਾਰੂ ਸਵੇਰੇ ਸੂਰਜ ਚੜ੍ਹਨ ਵੇਲੇ, ਸ਼ਾਮ ਨੂੰ ਸੂਰਜ ਡੁੱਬਣ ਵੇਲੇ ਅਤੇ ਰਾਤ ਸਮੇਂ ਸਭ ਤੋਂ ਵੱਧ ਸਰਗਰਮ ਹੁੰਦੇ ਹਨ।
- ਰਫ਼ਤਾਰ ਘੱਟ ਰੱਖੋ: ਜਿੱਥੇ ਜੰਗਲੀ ਜਾਨਵਰਾਂ ਦੇ ਸੰਕੇਤ ਲੱਗੇ ਹੋਣ ਜਾਂ ਦੇਖਣ ਵਿੱਚ ਮੁਸ਼ਕਲ ਆ ਰਹੀ ਹੋਵੇ, ਉੱਥੇ ਗੱਡੀ ਹੌਲੀ ਚਲਾਓ।
- ਸੜਕ ਦੇ ਕਿਨਾਰੇ ਧਿਆਨ ਦਿਓ: ਸੜਕ ਦੇ ਦੋਵੇਂ ਪਾਸਿਆਂ ਅਤੇ ਦਰੱਖਤਾਂ ਵਾਲੇ ਇਲਾਕੇ ਵਿੱਚ ਕਿਸੇ ਵੀ ਹਿਲਜੁਲ ’ਤੇ ਨਜ਼ਰ ਰੱਖੋ।
- ਗੱਡੀ ਅਚਾਨਕ ਨਾ ਮੋੜੋ: ਜੇ ਟੱਕਰ ਤੋਂ ਬਚਣਾ ਮੁਸ਼ਕਲ ਹੋਵੇ ਤਾਂ ਗੱਡੀ ਨੂੰ ਸਿੱਧਾ ਰੱਖ ਕੇ ਜ਼ੋਰ ਨਾਲ ਬ੍ਰੇਕ ਲਗਾਓ। ਅਚਾਨਕ ਗੱਡੀ ਮੋੜਨ ਨਾਲ ਹੋਰ ਵੱਡਾ ਹਾਦਸਾ ਹੋ ਸਕਦਾ ਹੈ।
- ਹਾਈ ਬੀਮ ਦੀ ਵਰਤੋਂ ਕਰੋ: ਜਿੱਥੇ ਸੁਰੱਖਿਅਤ ਹੋਵੇ ਅਤੇ ਸਾਹਮਣੇ ਤੋਂ ਕੋਈ ਗੱਡੀ ਨਾ ਆ ਰਹੀ ਹੋਵੇ, ਹਾਈ ਬੀਮ ਲਾਈਟਾਂ ਨਾਲ ਜਾਨਵਰਾਂ ਨੂੰ ਪਹਿਲਾਂ ਦੇਖਣ ਵਿੱਚ ਮਦਦ ਮਿਲ ਸਕਦੀ ਹੈ।
RACV ਦੇ ਜਨਰਲ ਮੈਨੇਜਰ ਇੰਸ਼ੋਰੈਂਸ ਅਤੇ ਰੋਡਸਾਈਡ ਬਿਲ ਬਲੱਡਵਰਥ ਨੇ ਕਿਹਾ ਕਿ ਕੰਗਾਰੂ ਨਾਲ ਟੱਕਰ ਹੋਣਾ ਡਰਾਈਵਰ ਲਈ ਪਰੇਸ਼ਾਨ ਕਰਨ ਵਾਲਾ ਤਜਰਬਾ ਹੋ ਸਕਦਾ ਹੈ, ਪਰ ਅਜਿਹੀ ਸਥਿਤੀ ਵਿੱਚ ਸਭ ਤੋਂ ਪਹਿਲਾਂ ਸੁਰੱਖਿਆ ਨੂੰ ਤਰਜੀਹ ਦੇਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਡਰਾਈਵਰ ਨੂੰ ਗੱਡੀ ਸੁਰੱਖਿਅਤ ਥਾਂ ’ਤੇ ਰੋਕ ਕੇ ਹੈਜ਼ਰਡ ਲਾਈਟਾਂ ਚਾਲੂ ਕਰਨੀਆਂ ਚਾਹੀਦੀਆਂ ਹਨ ਅਤੇ ਯਾਤਰੀਆਂ ਦੀ ਸੁਰੱਖਿਆ ਜਾਂਚਣੀ ਚਾਹੀਦੀ ਹੈ।
ਹਮੇਸ਼ਾਂ ਚੇਤੇ ਰੱਖੋ:
ਐਮਰਜੈਂਸੀ ਵਿੱਚ ਟ੍ਰਿਪਲ ਜ਼ੀਰੋ (000) ‘ਤੇ ਕਾਲ ਕਰੋ।
ਜੇ ਕੰਗਾਰੂ ਜ਼ਖਮੀ ਹੋਵੇ ਤਾਂ Wildlife Victoria ਦੀ 24 ਘੰਟੇ ਹੈਲਪਲਾਈਨ (03) 8400 7300 ’ਤੇ ਸੰਪਰਕ ਕਰੋ।