ਦਿਲ ਦੀ ਸਰਜਰੀ ਕਰਵਾਉਣ ਵਾਲੇ ਲਗਭਗ ਹਰ ਚਾਰ ਵਿੱਚੋਂ ਇੱਕ ਮਰੀਜ਼ ਨੂੰ ਗੰਭੀਰ ਫੇਫੜਿਆਂ ਨਾਲ ਜੁੜੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਹੁਣ ਐਡੀਲੇਡ ਦੀ ਅਗਵਾਈ ਹੇਠ ਇੱਕ ਨਵੀਂ ਖੋਜ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਕੀ ਇੱਕ ਸਧਾਰਨ ਅਲਟਰਾਸਾਊਂਡ ਸਕੈਨ ਸਰਜਰੀ ਤੋਂ ਪਹਿਲਾਂ ਹੀ ਇਹ ਦੱਸ ਸਕਦਾ ਹੈ ਕਿ ਕਿਹੜੇ ਮਰੀਜ਼ ਨੂੰ ਵੱਧ ਖ਼ਤਰਾ ਹੈ।
Calvary Adelaide Hospital (CAH) ਅਤੇ Adelaide University ਦੇ ਸਹਿਯੋਗ ਨਾਲ ਕੀਤੀ ਜਾ ਰਹੀ ਇਸ ਖੋਜ ਵਿੱਚ ਮਰੀਜ਼ ਦੀ ਰਾਨ ਦੀ ਮਾਸਪੇਸ਼ੀ ਦਾ ਇੱਕ ਤੇਜ਼ ਅਤੇ ਬਿਨਾਂ ਦਰਦ ਵਾਲਾ ਅਲਟਰਾਸਾਊਂਡ ਕੀਤਾ ਜਾਵੇਗਾ। ਖੋਜਕਰਤਾ ਇਹ ਦੇਖਣਗੇ ਕਿ ਰਾਨ ਦੀ ਇੱਕ ਮੁੱਖ ਮਾਸਪੇਸ਼ੀ rectus femoris ਦੇ ਆਕਾਰ ਨੂੰ ਮਾਪ ਕੇ ਕੀ ਦਿਲ ਦੀ ਵੱਡੀ ਸਰਜਰੀ ਤੋਂ ਬਾਅਦ ਹੋਣ ਵਾਲੀਆਂ ਗੰਭੀਰ ਸਮੱਸਿਆਵਾਂ ਦਾ ਪਹਿਲਾਂ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ। ਇਸ ਪ੍ਰਾਜੈਕਟ ਲਈ Medical Research Future Fund Catalyst Grant Scheme ਰਾਹੀਂ Health Translation SA ਵੱਲੋਂ 60,000 ਡਾਲਰ ਦੀ ਗ੍ਰਾਂਟ ਦਿੱਤੀ ਗਈ ਹੈ।
ਇਸ ਸਮੇਂ ਦਿਲ ਦੀ ਸਰਜਰੀ ਤੋਂ ਬਾਅਦ ਲਗਭਗ 10 ਤੋਂ 25 ਫ਼ੀਸਦੀ ਮਰੀਜ਼ਾਂ ਨੂੰ ਫੇਫੜਿਆਂ ਨਾਲ ਜੁੜੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਅਜਿਹੀਆਂ ਸਮੱਸਿਆਵਾਂ ਕਾਰਨ ਮਰੀਜ਼ ਦੀ ਸਰੀਰਕ ਤਾਕਤ ਤੇਜ਼ੀ ਨਾਲ ਘਟ ਸਕਦੀ ਹੈ, ਤੁਰਨ-ਫਿਰਨ ਵਿੱਚ ਦੇਰੀ ਹੋ ਸਕਦੀ ਹੈ ਅਤੇ ਹਸਪਤਾਲ ਵਿੱਚ ਰਹਿਣ ਦਾ ਸਮਾਂ ਵੱਧ ਸਕਦਾ ਹੈ। ਇਸ ਨਾਲ ਮਰੀਜ਼ ਦੀ ਸਿਹਤ ’ਤੇ ਮਾੜਾ ਅਸਰ ਪੈ ਸਕਦਾ ਹੈ। ਜੇ ਇਹ ਖੋਜ ਸਫਲ ਰਹਿੰਦੀ ਹੈ ਤਾਂ ਦਿਲ ਦੀ ਸਰਜਰੀ ਤੋਂ ਬਾਅਦ ਫੇਫੜਿਆਂ ਦੀਆਂ ਸਮੱਸਿਆਵਾਂ ਦੇ ਵੱਧ ਖ਼ਤਰੇ ਵਾਲੇ ਮਰੀਜ਼ਾਂ ਦੀ ਪਛਾਣ ਕਰਨ ਲਈ ਇਹ ਇੱਕ ਸਧਾਰਨ ਅਤੇ ਵਿਗਿਆਨਕ ਤਰੀਕਾ ਬਣ ਸਕਦਾ ਹੈ।
CAH ਦੀ ਕਲੀਨੀਕਲ ਫਿਜ਼ੀਓਥੈਰੇਪਿਸਟ ਅਤੇ Adelaide University ਦੀ ਖੋਜਕਰਤਾ ਡਾ. ਰੋਜ਼ਾ ਵਿਰਗਾਰਾ ਨੇ ਕਿਹਾ ਕਿ ਖੋਜ ਦਾ ਮਕਸਦ ਦਿਲ ਦੀ ਸਰਜਰੀ ਤੋਂ ਬਾਅਦ ਮਰੀਜ਼ ਦੀ ਰਿਕਵਰੀ ਨਾਲ ਜੁੜੇ ਖ਼ਤਰੇ ਦਾ ਪਹਿਲਾਂ ਹੀ ਪਤਾ ਲਗਾਉਣ ਲਈ ਇੱਕ ਸੌਖਾ ਤਰੀਕਾ ਲੱਭਣਾ ਹੈ। ਉਨ੍ਹਾਂ ਕਿਹਾ ਕਿ ਬੈੱਡਸਾਈਡ ’ਤੇ ਕੀਤਾ ਜਾਣ ਵਾਲਾ ਤੇਜ਼ ਅਤੇ ਘੱਟ ਖ਼ਰਚ ਵਾਲਾ ਅਲਟਰਾਸਾਊਂਡ ਇਹ ਪਛਾਣਨ ਵਿੱਚ ਮਦਦ ਕਰ ਸਕਦਾ ਹੈ ਕਿ ਕਿਹੜੇ ਮਰੀਜ਼ ਨੂੰ ਗੰਭੀਰ ਸਮੱਸਿਆਵਾਂ ਦਾ ਜ਼ਿਆਦਾ ਖ਼ਤਰਾ ਹੈ। ਜੇ ਸਰੀਰ ਵਿੱਚ ਮਾਸਪੇਸ਼ੀ ਦੀ ਕਮੀ ਜਾਂ ਕਮਜ਼ੋਰੀ ਦੇ ਸ਼ੁਰੂਆਤੀ ਸੰਕੇਤ ਮਿਲ ਜਾਣ ਤਾਂ ਡਾਕਟਰ ਅਤੇ ਹੋਰ ਸਿਹਤ ਕਰਮਚਾਰੀ ਜਲਦੀ ਇਲਾਜ ਜਾਂ ਹੋਰ ਸਹਾਇਤਾ ਸ਼ੁਰੂ ਕਰ ਸਕਦੇ ਹਨ। ਖੋਜਕਰਤਾਵਾਂ ਮੁਤਾਬਕ ਮਾਸਪੇਸ਼ੀ ਦੇ ਆਕਾਰ ਵਿੱਚ ਹੋ ਰਹੀ ਕਮੀ ਨੂੰ ਲਗਾਤਾਰ ਦੇਖਣਾ ਮਰੀਜ਼ ਦੀ ਸਿਹਤ ਵਿੱਚ ਗਿਰਾਵਟ ਦੇ ਸ਼ੁਰੂਆਤੀ ਸੰਕੇਤ ਪਛਾਣਨ ਵਿੱਚ ਮਦਦ ਕਰ ਸਕਦਾ ਹੈ। ਇਸ ਨਾਲ ਨਿਮੋਨੀਆ ਜਾਂ ਫੇਫੜਿਆਂ ਦੀਆਂ ਹੋਰ ਸਮੱਸਿਆਵਾਂ ਦਾ ਪਹਿਲਾਂ ਪਤਾ ਲੱਗ ਸਕਦਾ ਹੈ ਅਤੇ ਹਸਪਤਾਲ ਵਿੱਚ ਰਹਿਣ ਦਾ ਸਮਾਂ ਘਟਾਉਣ ਵਿੱਚ ਮਦਦ ਮਿਲ ਸਕਦੀ ਹੈ।
ਇਸ ਖੋਜ ਦਾ ਇੱਕ ਖ਼ਾਸ ਧਿਆਨ ਪੇਂਡੂ ਅਤੇ ਦੂਰ-ਦੁਰਾਡੇ ਇਲਾਕਿਆਂ ਵਿੱਚ ਰਹਿਣ ਵਾਲੇ ਮਰੀਜ਼ਾਂ ’ਤੇ ਵੀ ਹੈ। ਡਾ. ਵਿਰਗਾਰਾ ਨੇ ਕਿਹਾ ਕਿ ਖੇਤਰੀ ਇਲਾਕਿਆਂ ਦੇ ਮਰੀਜ਼ਾਂ ਨੂੰ ਅਕਸਰ ਹਸਪਤਾਲ ਜਾਂ ਫਾਲੋ-ਅੱਪ ਲਈ ਲੰਬਾ ਸਫ਼ਰ ਕਰਨਾ ਪੈਂਦਾ ਹੈ ਅਤੇ ਉਨ੍ਹਾਂ ਕੋਲ ਇਲਾਜ ਤੋਂ ਬਾਅਦ ਲਗਾਤਾਰ ਸਿਹਤ ਸੇਵਾਵਾਂ ਲੈਣ ਦੇ ਮੌਕੇ ਵੀ ਘੱਟ ਹੋ ਸਕਦੇ ਹਨ।
ਜੇ ਇਹ ਸਧਾਰਨ ਬੈੱਡਸਾਈਡ ਤਕਨੀਕ ਸਫਲ ਰਹਿੰਦੀ ਹੈ ਤਾਂ ਮਰੀਜ਼ ਜਿੱਥੇ ਵੀ ਰਹਿੰਦਾ ਹੋਵੇ, ਉਸ ਦੀ ਸਿਹਤ ਵਿੱਚ ਆ ਰਹੀ ਗਿਰਾਵਟ ਦਾ ਜਲਦੀ ਪਤਾ ਲਗਾਉਣ ਅਤੇ ਲਗਾਤਾਰ ਨਿਗਰਾਨੀ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ।
ਇਹ ਪ੍ਰਾਜੈਕਟ ਦੱਖਣੀ ਆਸਟ੍ਰੇਲੀਆ ਵਿੱਚ 12 ਮਹੀਨਿਆਂ ਲਈ ਪਾਇਲਟ ਪੱਧਰ ’ਤੇ ਚਲਾਇਆ ਜਾਵੇਗਾ। ਖੋਜਕਰਤਾ ਇਹ ਦੇਖਣਗੇ ਕਿ ਇਹ ਤਰੀਕਾ ਅਸਲ ਹਸਪਤਾਲੀ ਹਾਲਾਤਾਂ ਵਿੱਚ ਕਿੰਨਾ ਪ੍ਰਭਾਵਸ਼ਾਲੀ ਹੈ। ਮਰੀਜ਼ਾਂ ਅਤੇ ਪੇਂਡੂ ਇਲਾਕਿਆਂ ਤੋਂ ਮਿਲਣ ਵਾਲੀ ਰਾਏ ਨੂੰ ਵੀ ਪ੍ਰਾਜੈਕਟ ਵਿੱਚ ਸ਼ਾਮਲ ਕੀਤਾ ਜਾਵੇਗਾ। ਇਸ ਦਾ ਮਕਸਦ ਇਹ ਯਕੀਨੀ ਬਣਾਉਣਾ ਹੈ ਕਿ ਨਵਾਂ ਤਰੀਕਾ ਮਰੀਜ਼ਾਂ ਲਈ ਸੌਖਾ, ਉਨ੍ਹਾਂ ਦੀਆਂ ਲੋੜਾਂ ਮੁਤਾਬਕ ਅਤੇ ਭਵਿੱਖ ਵਿੱਚ ਵੱਖ-ਵੱਖ ਸਿਹਤ ਸੇਵਾਵਾਂ ਵਿੱਚ ਵਰਤਣ ਯੋਗ ਹੋਵੇ।