ਮਾਸਕੋ – ਰੂਸ ਦੇ ਯੂਕਰੇਨ ਦੀ ਸੀਮਾ ਨੇੜੇ ਸੈਨਿਕ ਵਧਾਉਣ ਨਾਲ ਚਿੰਤਤ ਅਮਰੀਕਾ ਅਤੇ ਨਾਟੋ ਨੇ ਰੂਸ ਅਤੇ ਬੇਲਾਰੂਸ ਦੇ 10 ਦਿਨੀਂ ਸੰਯੁਕਤ ਮਿਲਟਰੀ ਅਭਿਆਸ ਦੀ ਨਿੰਦਾ ਕੀਤੀ ਹੈ। ਸਪੂਤਨਿਕ ਸਮਾਚਾਰ ਏਜੰਸੀ ਨੇ ਰੂਸੀ ਸੁਰੱਖਿਆ ਮੰਤਰਾਲੇ ਦੇ ਹਵਾਲੇ ਨਾਲ ਦੱਸਿਆ ਕਿ ਰੂਸ ਅਤੇ ਬੇਲਾਰੂਸ ਦੀਆਂ ਸੈਨਾਵਾਂ ਨੇ 10 ਫਰਵਰੀ ਤੋਂ ਸੰਯੁਕਤ ਮਿਲਟਰੀ ਅਭਿਆਸ ”ਐਲਾਇਡ ਰਿਸਾਲਵ-2022” ਬੇਲਾਰੂਸ ਦੇ ਪਹਾੜੀ ਇਲਾਕਿਆਂ ਵਿੱਚ ਸ਼ੁਰੂ ਕੀਤਾ ਹੈ।
ਬੇਲਾਰੂਸ ਨਾਲ ਇਸ ਅਭਿਆਸ ਵਿੱਚ ਲਗਭਗ 30,000 ਸੈਨਿਕਾਂ ਦੇ ਸ਼ਾਮਲ ਹੋਣ ਦੀ ਉਮੀਦ ਹੈ। ਨਾਟੋ ਨੇ ਕਿਹਾ ਕਿ ਸੀਤ ਯੁੱਧ ਦੇ ਬਾਅਦ ਤੋਂ ਸੰਯੁਕਤ ਅਭਿਆਸ ਦੇ ਨਾਮ ‘ਤੇ ਸਾਬਕਾ ਸੋਵੀਅਤ ਬੇਲਾਰੂਸ ਵਿੱਚ ਰੂਸੀ ਸੈਨਿਕਾਂ ਦੀ ਇਹ ਸਭ ਤੋਂ ਵੱਡੀ ਮੌਜੂਦਗੀ ਹੈ। ਵ੍ਹਾਈਟ ਹਾਊਸ ਨੇ ਇਸ ਮਿਲਟਰੀ ਅਭਿਆਸ ਨੂੰ ਰੂਸ ਦੀ ਪ੍ਰਸਾਰਵਾਦੀ ਕਾਰਵਾਈ ਦੱਸਿਆ ਹੈ। ਦੂਜੇ ਪਾਸੇ ਰੂਸ ਨੇ ਵਾਰ-ਵਾਰ ਇਹਨਾਂ ਦਾਅਵਿਆਂ ਦਾ ਖੰਡਨ ਕੀਤਾ ਹੈ ਕਿ ਉਹ ਸਰਹੱਦ ‘ਤੇ ਇਕ ਲੱਖ ਤੋਂ ਵੱਧ ਸੈਨਿਕਾਂ ਦੀ ਤਾਇਨਾਤੀ ਕਰ ਕੇ ਯੂਕਰੇਨ ‘ਤੇ ਹਮਲਾ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਹਾਲਾਂਕਿ ਕੁਝ ਪੱਛਮੀ ਦੇਸ਼ਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਰੂਸ ਕਦੇ ਵੀ ਹਮਲਾ ਕਰ ਸਕਦਾ ਹੈ। ਇਸ ਸੰਘਰਸ਼ ਨੂੰ ਹੱਲ ਕਰਨ ਦੇ ਸਬੰਧ ਵਿੱਚ ਵੀਰਵਾਰ ਨੂੰ ਪੂਰੇ ਯੂਰਪ ਵਿੱਚ ਕੂਟਨੀਤਕ ਗੱਲਬਾਤਹੋਣ ਦੀ ਉਮੀਦ ਹੈ।