ਭਾਰਤ ਵਿੱਚ ਸਟਾਰਲਿੰਕ ਦਾ ਪ੍ਰਵੇਸ਼ ਇਸ ਸਮੇਂ ਰੋਕਿਆ ਹੋਇਆ ਹੈ। ਈਰਾਨ ਟਕਰਾਅ ਦੌਰਾਨ ਆਪਣੇ ਟਰਮੀਨਲਾਂ ਦੀ ਕਥਿਤ ਵਰਤੋਂ ਅਤੇ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ‘ਤੇ ਚਿੰਤਾਵਾਂ ਦੇ ਵਿਚਕਾਰ ਸਰਕਾਰ ਨੇ ਅੰਤਿਮ ਪ੍ਰਵਾਨਗੀ ਨੂੰ ਰੋਕ ਦਿੱਤਾ ਹੈ। ਇਸ ਨਾਲ ੲੈਲੋਨ ਮਸਕ ਦੀ ਇੰਟਰਨੈੱਟ ਸੇਵਾ ਨੂੰ ਝਟਕਾ ਲੱਗਾ ਹੈ।
ੲੈਲੋਨ ਮਸਕ ਦੀ ਸੈਟੇਲਾਈਟ ਇੰਟਰਨੈੱਟ ਸੇਵਾ ਸਟਾਰਲਿੰਕ ਨੂੰ ਸਰਕਾਰ ਨੇ ਦੇਸ਼ ਵਿੱਚ ਵਪਾਰਕ ਸੇਵਾਵਾਂ ਸ਼ੁਰੂ ਕਰਨ ਲਈ ਸਟਾਰਲਿੰਕ ਦੀ ਪ੍ਰਵਾਨਗੀ ਨੂੰ ਅਸਥਾਈ ਤੌਰ ‘ਤੇ ਰੋਕ ਦਿੱਤਾ ਹੈ। ਬਲੂਮਬਰਗ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਭਾਰਤ ਨੇ ਇਹ ਫੈਸਲਾ ਈਰਾਨ ਟਕਰਾਅ ਦੌਰਾਨ ਸਟਾਰਲਿੰਕ ਟਰਮੀਨਲਾਂ ਦੀ ਕਥਿਤ ਵਰਤੋਂ ‘ਤੇ ਚਿੰਤਾਵਾਂ ਦੇ ਵਿਚਕਾਰ ਲਿਆ ਹੈ। ਹਾਲਾਂਕਿ, ਇਸ ਮਾਮਲੇ ‘ਤੇ ਸਰਕਾਰ ਵੱਲੋਂ ਤੁਰੰਤ ਕੋਈ ਬਿਆਨ ਨਹੀਂ ਆਇਆ ਹੈ।
ਰਿਪੋਰਟ ਦੇ ਅਨੁਸਾਰ, ਗ੍ਰਹਿ ਮੰਤਰਾਲੇ ਦੇ ਅਧੀਨ ਸੁਰੱਖਿਆ ਏਜੰਸੀਆਂ ਨੇ ਸਟਾਰਲਿੰਕ ਦੇ ਲਾਂਚ ਲਈ ਲੋੜੀਂਦੀ ਅੰਤਿਮ ਪ੍ਰਵਾਨਗੀ ਨੂੰ ਰੋਕ ਦਿੱਤਾ ਹੈ। ਰਿਪੋਰਟਾਂ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਸਟਾਰਲਿੰਕ ਟਰਮੀਨਲ (ਸੈਟੇਲਾਈਟ ਇੰਟਰਨੈੱਟ ਚਲਾਉਣ ਵਾਲੇ ਡਿਸ਼ ਅਤੇ ਰਿਸੀਵਰ ਡਿਵਾਈਸ) ਦੀ ਵਰਤੋਂ ਈਰਾਨ ਵਿੱਚ ਲਾਇਸੈਂਸ ਨਾ ਹੋਣ ਦੇ ਬਾਵਜੂਦ ਮੱਧ ਪੂਰਬ ਦੇ ਸੰਘਰਸ਼ ਵਿੱਚ ਕੀਤੀ ਗਈ ਸੀ, ਜਿਸ ਨਾਲ ਭਾਰਤ ਸਰਕਾਰ ਵਿੱਚ ਚਿੰਤਾਵਾਂ ਵਧੀਆਂ ਹਨ। ਸਰਕਾਰ ਇਸ ਗੱਲ ਦਾ ਮੁਲਾਂਕਣ ਕਰ ਰਹੀ ਹੈ ਕਿ ਕੀ ਕੰਪਨੀ ਵਿਦੇਸ਼ੀ ਸਰਕਾਰਾਂ ਦੇ ਦਬਾਅ ਜਾਂ ਮੰਗਾਂ ਦੇ ਬਾਵਜੂਦ ਭਾਰਤ ਦੀਆਂ ਸੁਰੱਖਿਆ ਜ਼ਰੂਰਤਾਂ ਦੀ ਪਾਲਣਾ ਨੂੰ ਯਕੀਨੀ ਬਣਾ ਸਕਦੀ ਹੈ। ਇਹ ਅੱਪਡੇਟ ਸਪੇਸਐਕਸ ਲਈ ਇੱਕ ਅਜਿਹੇ ਮਹੱਤਵਪੂਰਨ ਸਮੇਂ ‘ਤੇ ਆਇਆ ਹੈ, ਜੋ ਕਿ Nasdaq ‘ਤੇ ਸੂਚੀਬੱਧਤਾ ਰਾਹੀਂ ਇਤਿਹਾਸ ਵਿੱਚ ਸਭ ਤੋਂ ਵੱਡੀ ਸ਼ੁਰੂਆਤੀ ਜਨਤਕ ਪੇਸ਼ਕਸ਼ ਕਰਨ ਦੀ ਤਿਆਰੀ ਕਰ ਰਿਹਾ ਹੈ, ਜਿਸਦਾ ਮੁਲਾਂਕਣ ਲਗਭਗ 1.75 ਟ੍ਰਿਲੀਅਨ ਡਾਲਰ ਹੈ। ਸਟਾਰਲਿੰਕ ਕੰਪਨੀ ਲਈ ਮਾਲੀਏ ਦਾ ਇੱਕ ਵੱਡਾ ਸਰੋਤ ਹੈ। ਇਸ ਲਈ ਭਾਰਤ ਵਰਗੇ ਵੱਡੇ ਬਾਜ਼ਾਰ ਵਿੱਚ ਰੈਗੂਲੇਟਰੀ ਰੁਕਾਵਟਾਂ ਅਤੇ ਪ੍ਰਵਾਨਗੀ ਵਿੱਚ ਦੇਰੀ ਕੰਪਨੀ ਲਈ ਇੱਕ ਮਹੱਤਵਪੂਰਨ ਚੁਣੌਤੀ ਪੈਦਾ ਕਰ ਸਕਦੀ ਹੈ। ਰਿਪੋਰਟਾਂ ਦੇ ਅਨੁਸਾਰ, ਸਟਾਰਲਿੰਕ ਨੂੰ ਲਗਭਗ ਇੱਕ ਸਾਲ ਪਹਿਲਾਂ ਭਾਰਤ ਵਿੱਚ GMPCS ਲਾਇਸੈਂਸ ਮਿਲਿਆ ਸੀ, ਪਰ ਅਜੇ ਤੱਕ ਸੁਰੱਖਿਆ ਏਜੰਸੀਆਂ ਤੋਂ ਅੰਤਿਮ ਸੁਰੱਖਿਆ ਪ੍ਰਵਾਨਗੀ ਨਹੀਂ ਮਿਲੀ ਹੈ। ਇਸ ਲਾਇਸੈਂਸ ਨੇ ਕੰਪਨੀ ਨੂੰ ਸੇਵਾ ਲਾਂਚ ਲਈ ਤਿਆਰੀ ਕਰਨ ਅਤੇ ਵਪਾਰਕ ਸਮਝੌਤਿਆਂ ਵਿੱਚ ਦਾਖਲ ਹੋਣ ਦੀ ਆਗਿਆ ਦਿੱਤੀ, ਪਰ ਇਹ ਅਜੇ ਵੀ ਗਾਹਕਾਂ ਲਈ ਇੰਟਰਨੈੱਟ ਸੇਵਾ ਸ਼ੁਰੂ ਕਰਨ ਲਈ ਅੰਤਿਮ ਪ੍ਰਵਾਨਗੀ ਦੀ ਉਡੀਕ ਕਰ ਰਿਹਾ ਹੈ। ਸਟਾਰਲਿੰਕ ਨੇ ਅਧਿਕਾਰੀਆਂ ਨੂੰ ਆਪਣੇ ਸੁਰੱਖਿਆ ਪ੍ਰਬੰਧ ਦਿਖਾਏ ਪਰ ਸਰਕਾਰ ਅਜੇ ਵੀ ਕੁਝ ਮੁੱਦਿਆਂ ‘ਤੇ ਹੋਰ ਸਪੱਸ਼ਟੀਕਰਨ ਅਤੇ ਵਾਧੂ ਸੁਰੱਖਿਆ ਉਪਾਵਾਂ ਦੇ ਵੇਰਵਿਆਂ ਦੀ ਮੰਗ ਕਰ ਰਹੀ ਹੈ। ਰਿਪੋਰਟਾਂ ਦੇ ਅਨੁਸਾਰ ਸਟਾਰਲਿੰਕ ਦੀ ਸੁਰੱਖਿਆ ਪ੍ਰਵਾਨਗੀ ਉਦੋਂ ਤੱਕ ਰੋਕੀ ਰਹੇਗੀ ਜਦੋਂ ਤੱਕ ਇਹ ਸਪੱਸ਼ਟ ਨਹੀਂ ਕਰਦੀ ਕਿ ਇਹ ਭਾਰਤ ਦੇ ਸੁਰੱਖਿਆ ਨਿਯਮਾਂ ਦੀ ਪੂਰੀ ਪਾਲਣਾ ਕਿਵੇਂ ਯਕੀਨੀ ਬਣਾਏਗੀ।