ਦੁਨੀਆ ਦੇ ਸਮੁੰਦਰੀ ਫੋਟੋਗ੍ਰਾਫੀ ਦੇ ਪ੍ਰਮੁੱਖ ਮੁਕਾਬਲਿਆਂ ਵਿੱਚੋਂ ਇੱਕ Ocean Photographer of the Year 2026 ਦੇ ਜੇਤੂਆਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਇਸ ਸਾਲ ਫਰਾਂਸ ਦੇ ਫੋਟੋਗ੍ਰਾਫਰ ਜੂਲੀਅਨ ਐਂਟੋਨ ਨੇ ਮੁੱਖ ਪੁਰਸਕਾਰ ਜਿੱਤਿਆ, ਜਦਕਿ ਦੋ ਆਸਟ੍ਰੇਲੀਅਨ ਫੋਟੋਗ੍ਰਾਫਰਾਂ ਨੇ ਵੀ ਆਪਣੀਆਂ ਸ਼੍ਰੇਣੀਆਂ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ ਹੈ।
ਫਰਾਂਸੀਸੀ ਫੋਟੋਗ੍ਰਾਫਰ ਜੂਲੀਅਨ ਐਂਟੋਨ ਨੂੰ ਇੱਕ ਨਰ ਸਮੁੰਦਰੀ ਘੋੜੇ ਅਤੇ ਉਸ ਦੇ ਨਾਲ ਮੌਜੂਦ ਦੋ ਛੋਟੇ ਬੱਚਿਆਂ ਦੀ ਸ਼ਾਨਦਾਰ ਤਸਵੀਰ ਲਈ Ocean Photographer of the Year 2026 ਚੁਣਿਆ ਗਿਆ। ਇਹ ਤਸਵੀਰ ਪਹਿਲਾਂ Ocean Wildlife ਸ਼੍ਰੇਣੀ ਦੀ ਜੇਤੂ ਬਣੀ ਸੀ, ਜਿਸ ਤੋਂ ਬਾਅਦ ਇਸ ਨੂੰ ਮੁੱਖ ਪੁਰਸਕਾਰ ਲਈ ਚੁਣਿਆ ਗਿਆ। ਐਂਟੋਨ ਨੇ ਕਿਹਾ ਕਿ ਇਹ ਪੁਰਸਕਾਰ ਉਨ੍ਹਾਂ ਲਈ ਬਹੁਤ ਵੱਡਾ ਸਨਮਾਨ ਹੈ। ਉਨ੍ਹਾਂ ਨੇ ਤਾਹੀਤੀ ਅਤੇ ਮੂਰੇਆ ਦੇ ਸਥਾਨਕ ਲੋਕਾਂ, ਕੁਦਰਤ ਪ੍ਰੇਮੀਆਂ ਅਤੇ ਮਛੇਰਿਆਂ ਦਾ ਧੰਨਵਾਦ ਕੀਤਾ, ਜਿਨ੍ਹਾਂ ਦੀ ਜਾਣਕਾਰੀ ਨੇ ਇਹ ਤਸਵੀਰ ਖਿੱਚਣ ਵਿੱਚ ਮਦਦ ਕੀਤੀ। ਉਨ੍ਹਾਂ ਕਿਹਾ ਕਿ ਉਹ ਕਈ ਘੰਟਿਆਂ ਤੱਕ ਮੁਸ਼ਕਲ ਹਾਲਾਤਾਂ ਵਿੱਚ ਸਮੁੰਦਰੀ ਘੋੜੇ ਦੀ ਭਾਲ ਕਰਦੇ ਰਹੇ ਅਤੇ ਉਨ੍ਹਾਂ ਨੂੰ ਇਹ ਵੀ ਪਤਾ ਨਹੀਂ ਸੀ ਕਿ ਉਹ ਇਸ ਨੂੰ ਲੱਭ ਸਕਣਗੇ ਜਾਂ ਨਹੀਂ। ਉਨ੍ਹਾਂ ਦੀ ਉਮੀਦ ਹੈ ਕਿ ਇਹ ਤਸਵੀਰ ਵਿਗਿਆਨ, ਸਮੁੰਦਰੀ ਜੀਵਾਂ ਦੀ ਸੰਭਾਲ ਅਤੇ ਲੋਕਾਂ ਨੂੰ ਸਮੁੰਦਰ ਦੀ ਰੱਖਿਆ ਦੀ ਲੋੜ ਬਾਰੇ ਜਾਗਰੂਕ ਕਰਨ ਵਿਚਕਾਰ ਇੱਕ ਪੁਲ ਬਣੇਗੀ।
ਲਗਾਤਾਰ ਦੂਜੇ ਸਾਲ ਦੋ ਆਸਟ੍ਰੇਲੀਅਨ ਫੋਟੋਗ੍ਰਾਫਰਾਂ ਨੇ ਇਸ ਮੁਕਾਬਲੇ ਵਿੱਚ ਆਪਣੀਆਂ ਸ਼੍ਰੇਣੀਆਂ ਵਿੱਚ ਜਿੱਤ ਦਰਜ ਕੀਤੀ ਹੈ। ਸਿਡਨੀ ਦੇ ਫੋਟੋਗ੍ਰਾਫਰ ਗੇਰਗੋ ਰੁਗਲੀ ਨੇ Adventure ਸ਼੍ਰੇਣੀ ਜਿੱਤੀ। ਉਨ੍ਹਾਂ ਦੀ ਤਸਵੀਰ ਵਿੱਚ ਸਿਡਨੀ ਦੇ ਟਾਮਾਰਾਮਾ ਬੀਚ ਨੇੜੇ ਸਰਫ਼ਿੰਗ ਕਰਨ ਵਾਲਿਆਂ ਦੇ ਨਾਲ ਲਹਿਰਾਂ ਉੱਪਰ ਛਾਲਾਂ ਮਾਰਦੀਆਂ ਡਾਲਫਿਨਾਂ ਦਿਖਾਈ ਦਿੰਦੀਆਂ ਹਨ। ਇਹ ਤਸਵੀਰ ਸਮੁੰਦਰ ਨੂੰ ਸਾਂਝਾ ਕਰਨ ਵਾਲੇ ਮਨੁੱਖਾਂ ਅਤੇ ਸਮੁੰਦਰੀ ਜੀਵਾਂ ਦੀ ਖੁਸ਼ੀ ਭਰੀ ਝਲਕ ਪੇਸ਼ ਕਰਦੀ ਹੈ।
ਨਿਊ ਸਾਊਥ ਵੇਲਜ਼ ਦੇ ਨਿਊਕੈਸਲ ਵਿੱਚ ਰਹਿਣ ਵਾਲੇ ਮੈਟੀ ਸਮਿਥ ਨੇ Fine Art ਸ਼੍ਰੇਣੀ ਦਾ ਪੁਰਸਕਾਰ ਜਿੱਤਿਆ। ਉਨ੍ਹਾਂ ਦੀ ਕਾਲੇ-ਚਿੱਟੇ ਰੰਗ ਦੀ ਤਸਵੀਰ ਵਿੱਚ ਇੱਕ ਨਰਸ ਸ਼ਾਰਕ ਦਿਖਾਈ ਗਈ ਹੈ, ਜਿਸ ਦੇ ਆਲੇ-ਦੁਆਲੇ ਰੀਮੋਰਾ ਮੱਛੀਆਂ ਬਹੁਤ ਸੁੰਦਰ ਢੰਗ ਨਾਲ ਤੈਰ ਰਹੀਆਂ ਹਨ। ਇਹ ਤਸਵੀਰ ਸਮੁੰਦਰ ਦੀ ਸ਼ਾਂਤੀ, ਸੁੰਦਰਤਾ ਅਤੇ ਕੁਦਰਤੀ ਅਦਭੁੱਤਤਾ ਨੂੰ ਦਰਸਾਉਂਦੀ ਹੈ।
ਇਸ ਮੁਕਾਬਲੇ ਵਿੱਚ ਕੁੱਲ 10 ਆਸਟ੍ਰੇਲੀਅਨ ਜਾਂ ਆਸਟ੍ਰੇਲੀਆ ਵਿੱਚ ਰਹਿੰਦੇ ਫੋਟੋਗ੍ਰਾਫਰ ਫਾਈਨਲਿਸਟ ਬਣੇ ਸਨ।
ਦੁਨੀਆ ਭਰ ਦੇ ਸਮੁੰਦਰੀ ਫੋਟੋਗ੍ਰਾਫਰਾਂ ਵੱਲੋਂ ਇਸ ਸਾਲ 15,000 ਤੋਂ ਵੱਧ ਤਸਵੀਰਾਂ ਮੁਕਾਬਲੇ ਲਈ ਭੇਜੀਆਂ ਗਈਆਂ ਸਨ।
ਮੁਕਾਬਲੇ ਦੇ ਸਾਰੇ ਫਾਈਨਲਿਸਟਾਂ ਦੀਆਂ ਤਸਵੀਰਾਂ Ocean Photographer of the Year ਦੀ ਵਿਸ਼ੇਸ਼ ਪ੍ਰਦਰਸ਼ਨੀ ਵਿੱਚ ਦਿਖਾਈਆਂ ਜਾਣਗੀਆਂ। ਇਹ ਪ੍ਰਦਰਸ਼ਨੀ Australian National Maritime Museum ਵਿੱਚ 19 ਨਵੰਬਰ ਤੋਂ ਸ਼ੁਰੂ ਹੋਵੇਗੀ।
ਮਿਊਜ਼ੀਅਮ ਦੀ ਡਾਇਰੈਕਟਰ ਅਤੇ CEO ਡੈਰਿਲ ਕਾਰਪ ਨੇ ਕਿਹਾ ਕਿ ਮਿਊਜ਼ੀਅਮ ਨੂੰ Oceanographic Magazine ਨਾਲ ਮਿਲ ਕੇ ਇਹ ਸ਼ਾਨਦਾਰ ਪ੍ਰਦਰਸ਼ਨੀ ਲੋਕਾਂ ਤੱਕ ਪਹੁੰਚਾਉਣ ‘ਤੇ ਮਾਣ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਦਰਸ਼ਨੀ ਸਮੁੰਦਰ ਦੇ ਅੰਦਰਲੀ ਦੁਨੀਆ ਦੀ ਅਸਾਧਾਰਣ ਸੁੰਦਰਤਾ ਨੂੰ ਦਿਖਾਉਂਦੀ ਹੈ ਅਤੇ ਇਹ ਵੀ ਯਾਦ ਦਿਵਾਉਂਦੀ ਹੈ ਕਿ ਸਮੁੰਦਰਾਂ ਦੀ ਸੰਭਾਲ ਅਤੇ ਸੁਰੱਖਿਆ ਕਿੰਨੀ ਜ਼ਰੂਰੀ ਹੈ।
Ocean Photographer of the Year ਦੇ ਡਾਇਰੈਕਟਰ ਵਿਲ ਹੈਰੀਸਨ ਨੇ ਕਿਹਾ ਕਿ ਜਦੋਂ ਜੱਜਾਂ ਨੇ ਪਹਿਲੀ ਵਾਰ ਜੂਲੀਅਨ ਐਂਟੋਨ ਦੀ ਜੇਤੂ ਤਸਵੀਰ ਦੇਖੀ ਤਾਂ ਕੁਝ ਪਲਾਂ ਲਈ ਸਾਰੇ ਚੁੱਪ ਹੋ ਗਏ। ਉਨ੍ਹਾਂ ਮੁਤਾਬਕ ਤਸਵੀਰ ਲੋਕਾਂ ਨੂੰ ਰੁਕ ਕੇ ਸੋਚਣ ਲਈ ਮਜਬੂਰ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ ਤਸਵੀਰ ਵਿੱਚ ਨਰ ਸਮੁੰਦਰੀ ਘੋੜੇ ਦਾ ਝੁਕਿਆ ਸਿਰ, ਉਸ ਵੱਲ ਮੁੜਦੇ ਛੋਟੇ ਬੱਚੇ ਅਤੇ ਉਨ੍ਹਾਂ ਦਾ ਅਣਜਾਣ ਭਵਿੱਖ ਇੱਕ ਡੂੰਘਾ ਸਵਾਲ ਖੜ੍ਹਾ ਕਰਦੇ ਹਨ—ਅਸੀਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਕਿਹੋ ਜਿਹਾ ਸਮੁੰਦਰ ਛੱਡ ਕੇ ਜਾ ਰਹੇ ਹਾਂ?
Ocean Photographer of the Year, ਜੋ Oceanographic Magazine ਅਤੇ Blancpain ਵੱਲੋਂ ਪੇਸ਼ ਕੀਤਾ ਜਾਂਦਾ ਹੈ, ਦਾ ਮੁੱਖ ਉਦੇਸ਼ ਸਮੁੰਦਰ ਦੀ ਸੁੰਦਰਤਾ ਅਤੇ ਉਸ ਦੀ ਨਾਜ਼ੁਕ ਹਾਲਤ ਵੱਲ ਦੁਨੀਆ ਦਾ ਧਿਆਨ ਖਿੱਚਣਾ ਅਤੇ ਉਨ੍ਹਾਂ ਫੋਟੋਗ੍ਰਾਫਰਾਂ ਨੂੰ ਸਨਮਾਨ ਦੇਣਾ ਹੈ ਜੋ ਆਪਣੀਆਂ ਤਸਵੀਰਾਂ ਰਾਹੀਂ ਸਮੁੰਦਰ ਦੀ ਆਵਾਜ਼ ਦੁਨੀਆ ਤੱਕ ਪਹੁੰਚਾਉਂਦੇ ਹਨ।
Adventure ਸ਼੍ਰੇਣੀ ਦੇ ਜੇਤੂ ਆਸਟ੍ਰੇਲੀਅਨ ਫੋਟੋਗ੍ਰਾਫਰ ਗੇਰਗੋ ਰੁਗਲੀ ਦੀ ਤਸਵੀਰ ਵਿੱਚ ਸਿਡਨੀ ਦੇ ਟਾਮਾਰਾਮਾ ਬੀਚ ਨੇੜੇ ਸਰਫ਼ਿੰਗ ਕਰਨ ਵਾਲਿਆਂ ਦੇ ਨਾਲ ਲਹਿਰਾਂ ਉੱਪਰ ਛਾਲਾਂ ਮਾਰਦੀਆਂ ਡਾਲਫਿਨਾਂ ਦਿਖਾਈ ਦਿੰਦੀਆਂ ਹਨ।