ਸੜਕ ਹਾਦਸਿਆਂ ਦੌਰਾਨ ਲੋਕਾਂ ਦੀ ਜਾਨ ਬਚਾਉਣ ਲਈ ਫਾਇਰਫਾਈਟਰਾਂ ਦੀ ਟ੍ਰੇਨਿੰਗ ਨੂੰ ਹੋਰ ਬਿਹਤਰ ਬਣਾਉਣ ਲਈ Fire and Rescue NSW (FRNSW) ਅਤੇ ਵੱਡੀਆਂ ਬੀਮਾ ਕੰਪਨੀਆਂ ਨੇ ਨਵੀਂ ਸਾਂਝੇਦਾਰੀ ਸ਼ੁਰੂ ਕੀਤੀ ਹੈ। ਇਸ ਪ੍ਰੋਗਰਾਮ ਤਹਿਤ ਉਹ ਗੱਡੀਆਂ, ਜੋ ਹਾਦਸਿਆਂ ਤੋਂ ਬਾਅਦ ਇੰਨੀ ਨੁਕਸਾਨੀ ਹੋ ਚੁੱਕੀਆਂ ਹਨ ਕਿ ਉਨ੍ਹਾਂ ਨੂੰ ਮੁੜ ਸੜਕ ‘ਤੇ ਨਹੀਂ ਚਲਾਇਆ ਜਾ ਸਕਦਾ, ਹੁਣ ਫਾਇਰਫਾਈਟਰਾਂ ਦੀ ਵਿਸ਼ੇਸ਼ ਟ੍ਰੇਨਿੰਗ ਲਈ ਵਰਤੀਆਂ ਜਾਣਗੀਆਂ। Insurance Council of Australia (ICA) ਦੀ ਹਮਾਇਤ ਨਾਲ ਸ਼ੁਰੂ ਕੀਤੇ ਗਏ ਇਸ ਪ੍ਰੋਗਰਾਮ ਲਈ Allianz, NRMA Insurance, QBE ਅਤੇ Suncorp ਨੇ ਲਗਭਗ 100 ਨੁਕਸਾਨੀ ਹੋਈਆਂ ਗੱਡੀਆਂ ਦਾਨ ਕੀਤੀਆਂ ਹਨ।
ਨਵੀਆਂ ਤਕਨੀਕਾਂ ਵਾਲੀਆਂ ਆਧੁਨਿਕ ਗੱਡੀਆਂ ਨਾਲ ਅਸਲੀ ਹਾਦਸਿਆਂ ਵਰਗੇ ਹਾਲਾਤ ਬਣਾਕੇ ਟ੍ਰੇਨਿੰਗ ਕਰਨ ਨਾਲ ਫਾਇਰਫਾਈਟਰਾਂ ਨੂੰ ਮੁਸ਼ਕਲ ਸਥਿਤੀਆਂ ਨਾਲ ਨਜਿੱਠਣ ਦੀ ਬਿਹਤਰ ਤਿਆਰੀ ਮਿਲੇਗੀ। ਟ੍ਰੇਨਿੰਗ ਦੌਰਾਨ ਫਾਇਰਫਾਈਟਰ ਸਿੱਖਣਗੇ ਕਿ ਨੁਕਸਾਨੀ ਹੋਈ ਗੱਡੀ ਨੂੰ ਕਿਵੇਂ ਸਥਿਰ ਕਰਨਾ ਹੈ, ਅੰਦਰ ਫਸੇ ਲੋਕਾਂ ਤੱਕ ਕਿਵੇਂ ਪਹੁੰਚਣਾ ਹੈ ਅਤੇ ਗੰਭੀਰ ਤੇ ਜਟਿਲ ਹਾਦਸਿਆਂ ਵਿੱਚ ਕਿਵੇਂ ਕੰਮ ਕਰਨਾ ਹੈ। ਇਸ ਤਰ੍ਹਾਂ ਦੀ ਟ੍ਰੇਨਿੰਗ ਫਾਇਰਫਾਈਟਰਾਂ ਨੂੰ ਦਬਾਅ ਹੇਠ ਤੁਰੰਤ ਅਤੇ ਸਹੀ ਫੈਸਲੇ ਲੈਣ ਅਤੇ ਜ਼ਰੂਰੀ ਬਚਾਅ ਤਕਨੀਕਾਂ ਨੂੰ ਅਮਲ ਵਿੱਚ ਲਿਆਉਣ ਵਿੱਚ ਮਦਦ ਕਰੇਗੀ। 2025 ਦੌਰਾਨ FRNSW ਨੇ 14,075 ਵਾਹਨ ਹਾਦਸਿਆਂ ਵਿੱਚ ਹਿੱਸਾ ਲਿਆ। ਇਨ੍ਹਾਂ ਵਿੱਚੋਂ 4,794 ਹਾਦਸਿਆਂ ਵਿੱਚ ਲੋਕ ਜ਼ਖਮੀ ਹੋਏ ਜਾਂ ਬਚਾਅ ਕਾਰਵਾਈ ਦੀ ਲੋੜ ਪਈ। ਫਾਇਰਫਾਈਟਰਾਂ ਦੀ ਸੜਕ ਹਾਦਸਾ ਬਚਾਅ ਅਤੇ ਆਮ ਲੈਂਡ ਰੈਸਕਿਊ ਟ੍ਰੇਨਿੰਗ ਲਈ ਹਰ ਸਾਲ ਲਗਭਗ 400 ਗੱਡੀਆਂ ਦੀ ਲੋੜ ਪੈਂਦੀ ਹੈ। ਨਵੀਂ ਸਾਂਝੇਦਾਰੀ ਨਾਲ FRNSW ਨੂੰ ਇਸ ਲਗਾਤਾਰ ਲੋੜ ਨੂੰ ਪੂਰਾ ਕਰਨ ਵਿੱਚ ਮਦਦ ਮਿਲ ਰਹੀ ਹੈ ਅਤੇ ਗੱਡੀਆਂ ਦੀ ਨਿਯਮਤ ਸਪਲਾਈ ਲਈ ਇੱਕ ਸੁਚੱਜਾ ਪ੍ਰਬੰਧ ਵੀ ਬਣਾਇਆ ਜਾ ਰਿਹਾ ਹੈ। FRNSW ਨੇ ਹੋਰ ਬੀਮਾ ਕੰਪਨੀਆਂ ਨੂੰ ਵੀ ਇਸ ਪਹਿਲ ਵਿੱਚ ਸ਼ਾਮਲ ਹੋਣ ਦੀ ਅਪੀਲ ਕੀਤੀ ਹੈ।
Emergency Services ਦੀ Parliamentary Secretary Charishma Kaliyanda ਨੇ ਕਿਹਾ ਕਿ ਜਿਹੜੀਆਂ ਗੱਡੀਆਂ ਹੁਣ ਸੜਕ ‘ਤੇ ਵਾਪਸ ਨਹੀਂ ਆ ਸਕਦੀਆਂ, ਉਹ ਇਸ ਪ੍ਰੋਗਰਾਮ ਰਾਹੀਂ ਲੋਕਾਂ ਦੀ ਜਾਨ ਬਚਾਉਣ ਵਿੱਚ ਇੱਕ ਹੋਰ ਤਰੀਕੇ ਨਾਲ ਯੋਗਦਾਨ ਪਾ ਰਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਅਸਲੀ ਹਾਦਸਿਆਂ ਵਰਗੀ ਟ੍ਰੇਨਿੰਗ ਫਾਇਰਫਾਈਟਰਾਂ ਨੂੰ NSW ਭਰ ਵਿੱਚ ਗੰਭੀਰ ਸੜਕ ਹਾਦਸਿਆਂ ਨਾਲ ਨਜਿੱਠਣ ਲਈ ਲੋੜੀਂਦੇ ਹੁਨਰ ਮਜ਼ਬੂਤ ਕਰਨ ਵਿੱਚ ਮਦਦ ਕਰੇਗੀ।
FRNSW ਦੇ Deputy Commissioner Paul McGuiggan ਨੇ ਕਿਹਾ ਕਿ ਨੁਕਸਾਨੀ ਹੋਈਆਂ ਗੱਡੀਆਂ ਰਾਹੀਂ ਵੱਖ-ਵੱਖ ਤਰ੍ਹਾਂ ਦੇ ਅਸਲੀ ਬਚਾਅ ਹਾਲਾਤ ਤਿਆਰ ਕੀਤੇ ਜਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਰਿਕਰੂਟ ਅਤੇ ਰਿਫ੍ਰੈਸ਼ਰ ਟ੍ਰੇਨਿੰਗ ਦੌਰਾਨ ਮਿਲਿਆ ਇਹ ਤਜਰਬਾ ਅਸਲ ਹਾਦਸਿਆਂ ਵਿੱਚ, ਜਿੱਥੇ ਹਰ ਸਕਿੰਟ ਮਹੱਤਵਪੂਰਨ ਹੁੰਦਾ ਹੈ, ਜਾਨ ਬਚਾਉਣ ਵਿੱਚ ਵੱਡਾ ਫਰਕ ਪਾ ਸਕਦਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਗੱਡੀਆਂ ਦਾ ਡਿਜ਼ਾਈਨ ਅਤੇ ਤਕਨਾਲੋਜੀ ਲਗਾਤਾਰ ਬਦਲ ਰਹੀ ਹੈ। ਇਸ ਲਈ ਫਾਇਰਫਾਈਟਰਾਂ ਨੂੰ ਵੀ ਵਧੇਰੇ ਜਟਿਲ ਬਚਾਅ ਹਾਲਾਤਾਂ ਲਈ ਤਿਆਰ ਰਹਿਣਾ ਜ਼ਰੂਰੀ ਹੈ।
Insurance Council of Australia ਦੇ CEO Andrew Hall ਨੇ ਕਿਹਾ ਕਿ ਬੀਮਾ ਕੰਪਨੀਆਂ ਗੰਭੀਰ ਸੜਕ ਹਾਦਸਿਆਂ ਦੇ ਦਰਦਨਾਕ ਪ੍ਰਭਾਵਾਂ ਨੂੰ ਚੰਗੀ ਤਰ੍ਹਾਂ ਸਮਝਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਫਾਇਰਫਾਈਟਰਾਂ ਨੂੰ ਅਜਿਹੇ ਮੁਸ਼ਕਲ ਬਚਾਅ ਕਾਰਜਾਂ ਲਈ ਤਿਆਰ ਕਰਨ ਵਿੱਚ ਮਦਦ ਕਰਨਾ NSW ਦੀਆਂ ਸੜਕਾਂ ਨੂੰ ਹੋਰ ਸੁਰੱਖਿਅਤ ਬਣਾਉਣ ਵਿੱਚ ਇੱਕ ਵਿਹਾਰਕ ਯੋਗਦਾਨ ਹੈ। ਉਨ੍ਹਾਂ ਕਿਹਾ ਕਿ ਜਿਹੜੀਆਂ ਗੱਡੀਆਂ ਨੂੰ ਸੁਰੱਖਿਅਤ ਢੰਗ ਨਾਲ ਮੁੜ ਸੜਕ ‘ਤੇ ਨਹੀਂ ਲਿਆਂਦਾ ਜਾ ਸਕਦਾ, ਉਹ ਫਿਰ ਵੀ ਐਮਰਜੈਂਸੀ ਸੇਵਾਵਾਂ ਲਈ ਬਹੁਤ ਕੀਮਤੀ ਹੋ ਸਕਦੀਆਂ ਹਨ। ਇਨ੍ਹਾਂ ਰਾਹੀਂ ਫਾਇਰਫਾਈਟਰਾਂ ਨੂੰ ਅਸਲੀ ਗੱਡੀਆਂ ਅਤੇ ਅਸਲੀ ਹਾਲਾਤਾਂ ਵਰਗੀ ਟ੍ਰੇਨਿੰਗ ਮਿਲਦੀ ਹੈ। ਇਹ ਸਾਂਝੇਦਾਰੀ ਸਰਕਾਰ, ਐਮਰਜੈਂਸੀ ਸੇਵਾਵਾਂ ਅਤੇ ਬੀਮਾ ਉਦਯੋਗ ਵੱਲੋਂ ਮਿਲ ਕੇ ਕੰਮ ਕਰਨ ਦੀ ਇੱਕ ਮਿਸਾਲ ਹੈ, ਜਿਸ ਦਾ ਮੁੱਖ ਮਕਸਦ ਹਾਦਸਿਆਂ ਦੇ ਸਮੇਂ ਲੋਕਾਂ ਦੀ ਜਾਨ ਬਚਾਉਣ ਲਈ ਬਿਹਤਰ ਤਿਆਰੀ ਕਰਨਾ ਹੈ।