ਕਲਯੁਗੀ ਪੋਤੇ ਨੇ ਗੰਡਾਸਾ ਮਾਰ ਕੇ ਕੀਤਾ ਦਾਦਾ ਦਾਦੀ ਦਾ ਕਤਲ

ਸਮਰਾਲਾ – ਸਮਰਾਲਾ ਦੇ ਨੇੜਲੇ ਪਿੰਡ ਲੱਲਕਲਾਂ ‘ਚ ਅੱਜ 17 ਸਾਲਾਂ ਦੇ ਨੌਜਵਾਨ ਨੇ ਘਰ ਵਿਚ ਹੀ ਤੇਜਧਾਰ ਗੰਡਾਸੇ ਨਾਲ ਆਪਣੇ ਬਜੁਰਗ ਦਾਦਾ ਤੇ ਦਾਦੀ ਦਾ ਕਤਲ ਕਰ ਦਿੱਤਾ। ਕਤਲ ਕੀਤੇ ਗਏ ਬਜੁਰਗ ਜੋੜੇ ਦੀ ਪਛਾਣ ਦਰਸ਼ਨ ਸਿੰਘ (75) ਪੁੱਤਰ ਬਖਸ਼ੀਸ਼ ਸਿੰਘ ਤੇ ਸੁਰਿੰਦਰ ਕੌਰ (70) ਪਤਨੀ ਦਰਸ਼ਨ ਸਿੰਘ ਵਾਸੀ ਲੱਲਕਲਾਂ ਵਜੋਂ ਹੋਈ ਹੈ। ਡੀ.ਐਸ.ਪੀ ਹਰਵਿੰਦਰ ਸਿੰਘ ਖਹਿਰਾ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕਤਲ ਕਰਨ ਵਾਲਾ ਮਨਪ੍ਰੀਤ ਸਿੰਘ (17) ਪੁੱਤਰ ਜਤਿੰਦਰਪਾਲ ਸਿੰਘ ਗਿਆਰਵੀਂ ਜਮਾਤ ਦਾ ਵਿਦਿਆਰਥੀ ਹੈ ਤੇ ਪਿੰਡ ਲੱਲਕਲਾਂ ‘ਚ ਆਪਣੇ ਮਾਤਾ ਪਿਤਾ ਤੇ ਦਾਦਾ ਦਾਦੀ ਨਾਲ ਹੀ ਸਾਂਝੇ ਘਰ ‘ਚ ਰਹਿੰਦਾ ਹੈ। ਉਸਦਾ ਪਿਤਾ ਟਰੱਕ ਡਰਾਈਵਰ ਹੈ ਤੇ ਮਾਤਾ ਘਰੇਲੂ ਕੰਮਕਾਰ ਕਰਦੀ ਹੈ। ਨੌਜਵਾਨ ਮਨਪ੍ਰੀਤ ਸਿੰਘ ਦੇ ਪਰਿਵਾਰਕ ਮੈਂਬਰਾਂ ਦਾ ਉਸਦੇ ਦਾਦਾ ਦਾਦੀ ਨਾਲ ਰਿਹਾਇਸ਼ੀ ਮਕਾਨ ਤੇ ਕਿਸੇ ਪਲਾਟ ਨੂੰ ਆਪਣੇ ਨਾਂਅ ਕਰਵਾਉਣ ਲਈ ਝਗੜਾ ਚੱਲ ਰਿਹਾ ਸੀ ਤੇ ਇਸ ਸਬੰਧੀ ਅਦਾਲਤ ਵਿਚ ਕੇਸ ਵੀ ਚੱਲਦਾ ਸੀ। ਅੱਜ ਦੁਪਿਹਰ ਤੋਂ ਬਾਅਦ ਕਰੀਬ ਸਾਢੇ ਚਾਰ ਵਜੇ ਜਦੋਂ ਉਕਤ ਨੌਜਵਾਨ ਦੀ ਮਾਤਾ ਕਿਸੇ ਖਰੀਦਦਾਰੀ ਦੇ ਸਿਲਸਿਲੇ ‘ਚ ਘਰੋਂ ਬਾਹਰ ਗਈ ਤਾਂ ਉਸ ਵੇਲੇ ਮਨਪ੍ਰੀਤ ਘਰ ਵਿਚ ਇਕੱਲਾ ਸੀ। ਇਸੇ ਦੌਰਾਨ ਹੀ ਦਾਦਾ ਦਾਦੀ ਨਾਲ ਹੋਈ ਕਿਸੇ ਬਹਿਸ ਦੌਰਾਨ ਮਨਪ੍ਰੀਤ ਨੇ ਗੁੱਸੇ ‘ਚ ਆਕੇ ਘਰ ਪਏ ਗੰਡਾਸੇ ਨਾਲ ਉਨਾਂ ਦੋਹਾਂ ਦੇ ਚਿਹਰੇ ਤੇ ਤਾਬੜਤੋੜ ਵਾਰ ਕਰ ਦਿੱਤੇ। ਜਿਸਦੇ ਨਾਲ ਉਹ ਮੌਕੇ ਤੇ ਹੀ ਦਮ ਤੋੜ ਗਏ। ਪੁਲਿਸ ਪ੍ਰਸ਼ਾਸਨ ਵੱਲੋਂ ਮਿ੍ਰਤਕਾਂ ਦੀਆਂ ਦੇਹਾਂ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਸਮਰਾਲਾ ਵਿਖੇ ਲਿਆਂਦਾ ਗਿਆ। ਪੁਲਿਸ ਨੇ ਕਥਿਤ ਦੋਸ਼ੀ ਮਨਪ੍ਰੀਤ ਸਿੰਘ ਦੇ ਖਿਲਾਫ਼ ਕਤਲ ਕਰਨ ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ਼ ਕਰਕੇ ਅਗ਼ਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।