ਸ਼੍ਰੀਕ੍ਰਿਸ਼ਨ ਜਨਮ ਅਸਥਾਨ ‘ਤੇ ਬੰਦ ਹੋਇਆ ਲਾਊਡਸਪੀਕਰ, ਈਦਗਾਹ ‘ਚ ਸ਼ਾਸਨ ਆਦੇਸ਼ ਦਾ ਇੰਤਜ਼ਾਰ

ਮਥੁਰਾ – ਯੋਗੀ ਸਰਕਾਰ ਦੇ ਧਾਰਮਿਕ ਸਥਾਨਾਂ ਦੇ ਅੰਦਰ ਹੀ ਲਾਊਡ ਸਪੀਕਰ ਵਜਾਉਣ ਦੇ ਹੁਕਮਾਂ ਤੋਂ ਬਾਅਦ ਸ਼੍ਰੀਕ੍ਰਿਸ਼ਨ ਜਨਮ ਅਸਥਾਨ ਨੇ ਇਸ ਦੇ ਲਈ ਪਹਿਲ ਕੀਤੀ ਹੈ। ਸ਼੍ਰੀਕ੍ਰਿਸ਼ਨ ਜਨਮ ਅਸਥਾਨ ਮੈਨੇਜਮੈਂਟ ਨੇ ਮੰਦਰ ਦੇ ਟਾਪ ‘ਤੇ ਲੱਗੇ ਲਾਊਡ ਸਪੀਕਰ ਮੰਗਲਵਾਰ ਨੂੰ ਬੰਦ ਕਰ ਦਿੱਤੇ ਜਦਕਿ ਮੰਦਰ ਦੇ ਅੰਦਰ ਲੱਗੇ ਮਾਈਕ ਦੀ ਆਵਾਜ਼ ਵੀ ਹੌਲੀ ਕਰ ਦਿੱਤੀ ਹੈ। ਉੱਥੇ ਹੀ ਮੰਦਰ ਕੰਪਲੈਕਸ ਨਾਲ ਲਗਦੀ ਸ਼ਾਹੀ ਮਸਜਿਦ ਈਦਗਾਹ ਮੈਨੇਜਮੈਂਟ ਨੂੰ ਫਿਲਹਾਲ ਸਰਕਾਰੀ ਹੁਕਮਾਂ ਦਾ ਇੰਤਜ਼ਾਰ ਹੈ। ਸ਼੍ਰੀਕ੍ਰਿਸ਼ਨ ਜਨਮਭੂਮੀ ਟਰੱਸਟ ਦੇ ਸਕੱਤਰ ਕਪਿਲ ਸ਼ਰਮਾ ਨੇ ਦੱਸਿਆ ਕਿ ਮੰਦਰ ਦੇ ਸਿਖਰ ‘ਤੇ ਲੱਗੇ ਲਾਊਡ ਸਪੀਕਰ ਨੂੰ ਬੰਦ ਕਰ ਦਿੱਤਾ ਗਿਆ ਹੈ। ਇਸ ਲਾਊਡ ਸਪੀਕਰ ਤੋਂ ਸਵੇਰੇ ਮੰਗਲਾ ਆਰਤੀ ਦੀ ਆਵਾਜ਼ ਗੂੰਜਦੀ ਸੀ। ਮੰਦਰ ਦੇ ਅੰਦਰ ਭਾਗਵਤ ਭਵਨ ‘ਚ ਲੱਗੇ ਛੋਟੇ ਸਪੀਕਰ ਦੀ ਆਵਾਜ਼ ਵੀ ਹੌਲੀ ਕਰ ਦਿੱਤੀ ਗਈ ਹੈ ਤਾਂ ਜੋ ਆਵਾਜ਼ ਮੰਦਰ ਤੋਂ ਬਾਹਰ ਨਾ ਜਾਵੇ। ਇਸੇ ਕੰਪਲੈਕਸ ਨਾਲ ਲਗਦੀ ਸ਼ਾਹੀ ਮਸਜਿਦ ਈਦਗਾਹਗ ‘ਚ ਲਾਊਡਸਪੀਕਰ ਬੰਦ ਨਹੀਂ ਕੀਤੇ ਗਏ ਹਨ। ਸ਼ਾਹੀ ਮਸਜਿਦ ਈਦਗਾਹ ਕਮੇਟੀ ਦੇ ਸਕੱਤਰ ਤਨਵੀਰ ਅਹਿਮਦ ਨੇ ਦੱਸਿਆ ਕਿ ਇਸ ਵੇਲੇ ਰਮਜ਼ਾਨ ਚੱਲ ਰਹੇ ਹਨ। ਪੰਜਾਂ ਵੇਲਿਆਂ ਦੀ ਨਮਾਜ਼ ਲਈ ਲਾਊਡਸਪੀਕਰ ਤੋਂ ਅਜਾਨ ਹੁੰਦੀ ਹੈ। ਇਹ ਵੀ ਕੁਝ ਮਿੰਟ ਲਈ, ਅਜੇ ਸਾਨੂੰ ਹੁਕਮ ਨਹੀਂ ਮਿਲੇ ਹਨ। ਹੁਕਮ ਮਿਲਦਿਆਂ ਹੀ ਉਸਦਾ ਪਾਲਣ ਕੀਤਾ ਜਾਵੇਗਾ ਤੇ ਲਾਊਡਸਪੀਕਰ ਬੰਦ ਕਰਵਾ ਦਿੱਤਾ ਜਾਵੇਗਾ।