ਨਵੀਂ ਦਿੱਲੀ – ਕੈਮਰੂਨ ਦੇ ਦੱਖਣ-ਪੱਛਮੀ ਖੇਤਰ ਦੇ ਅਕਵਾਯਾ ਵਿੱਚ ਇੱਕ ਵਾਰ ਫਿਰ ਕਈ ਲੋਕਾਂ ਉੱਤੇ ਹਮਲਾ ਹੋਇਆ ਹੈ। ਵੱਖਵਾਦੀਆਂ ਨੇ ਇੱਕੋ ਸਮੇਂ ਕਈ ਲੋਕਾਂ ਦੀ ਹੱਤਿਆ ਕਰ ਦਿੱਤੀ ਹੈ। ਸਥਾਨਕ ਸੂਤਰਾਂ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਹੋਏ ਹਮਲੇ ‘ਚ ਘੱਟੋ-ਘੱਟ 26 ਪਿੰਡ ਵਾਸੀ ਮਾਰੇ ਗਏ। ਵੱਖਵਾਦੀ ਬਗਾਵਤ ਨੇ ਜ਼ਮੀਨ ਨੂੰ ਲੈ ਕੇ ਲੰਬੇ ਸਮੇਂ ਤੋਂ ਚੱਲ ਰਹੇ ਅੰਤਰ-ਜਾਤੀ ਸੰਘਰਸ਼ਾਂ ਨੂੰ ਹਵਾ ਦਿੱਤੀ ਹੈ।
ਜ਼ਿਲ੍ਹਾ ਮੈਡੀਕਲ ਅਫ਼ਸਰ ਐਨੋ ਡੇਨੀਅਲ ਕੇਵੋਂਗ ਨੇ ਦੱਸਿਆ ਕਿ ਹੁਣ ਤੱਕ 26 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਮਰਨ ਵਾਲਿਆਂ ਦੀ ਗਿਣਤੀ ਅਜੇ ਹੋਰ ਵਧ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਨਾਈਜੀਰੀਆ ਦੀ ਸਰਹੱਦ ਨੇੜੇ ਬਾਲਿਨ ਪਿੰਡ ‘ਤੇ ਹਮਲੇ ਤੋਂ ਬਾਅਦ ਵੀ ਕਈ ਲੋਕ ਲਾਪਤਾ ਹਨ।
ਜ਼ਿਕਰਯੋਗ ਹੈ ਕਿ ਪਿਛਲੇ ਮਹੀਨੇ ਵੀ ਇਸ ਤਰ੍ਹਾਂ ਦਾ ਹਮਲਾ ਹੋਇਆ ਹੈ। ਅਸ਼ਾਂਤ ਐਂਗਲੋਫੋਨ ਖੇਤਰ ਵਿੱਚ, ਵੱਖਵਾਦੀ ਬੰਦੂਕਧਾਰੀਆਂ ਦੇ ਹਮਲੇ ਵਿੱਚ 24 ਨਾਗਰਿਕ ਮਾਰੇ ਗਏ ਸਨ। ਇਸ ਹਮਲੇ ‘ਚ 60 ਲੋਕ ਜ਼ਖਮੀ ਵੀ ਹੋਏ ਹਨ।