ਸਭ ਤੋਂ ਵੱਧ ਗੋਲ ਕਰਨ ਵਾਲਾ ਭਾਰਤੀ ਫੁੱਟਬਾਲਰ ਸੁਨੀਲ ਛੇਤਰੀ

ਨਵੀਂ ਦਿੱਲੀ – ਭਾਰਤ ਸਰਕਾਰ ਵੱਲੋਂ ਅਰਜਨ ਐਵਾਰਡ, ਪਦਮਸ਼੍ਰੀ ਅਤੇ ਖੇਡ ਰਤਨ ਐਵਾਰਡ ਨਾਲ ਸਨਮਾਨਿਆ ਜਾ ਚੁੱਕਾ ਸੁਨੀਲ ਛੇਤਰੀ ਭਾਰਤ ਦਾ ਸ਼ਾਨਦਾਰ ਫੁੱਟਬਾਲ ਖਿਡਾਰੀ ਹੈ। ਇੰਡੀਅਨ ਸੁਪਰ ਲੀਗ ਦੇ ਬੈਂਗਲੁਰੂ ਫੁੱਟਬਾਲ ਕਲੱਬ ਤੇ ਭਾਰਤੀ ਕੌਮੀ ਟੀਮ ਦੋਵਾਂ ਦੀ ਕਪਤਾਨੀ ਕਰਨ ਵਾਲਾ ਸੁਨੀਲ ਫੁੱਟਬਾਲ ਦਾ ਜ਼ਬਰਦਸਤ ਫਾਰਵਰਡ ਖਿਡਾਰੀ ਹੈ। ਕੌਮਾਂਤਰੀ ਪੱਧਰ ਦੇ ਸਭ ਤੋਂ ਵੱਧ ਗੋਲ ਕਰਨ ਵਾਲੇ ਮੌਜੂਦਾ ਖਿਡਾਰੀਆਂ ਦੀ ਸ਼੍ਰੇਣੀ ’ਚ ਉਸ ਦਾ ਰੋਨਾਲਡੋ ਤੋਂ ਬਾਅਦ ਦੂਜਾ ਨੰਬਰ ਆਉਂਦਾ ਹੈ।
ਫੁੱਟਬਾਲ ਦੇ ਹੁਣ ਤੱਕ ਦੇ ਇਤਿਹਾਸ ’ਚ ਉਹ ਭਾਰਤ ਦਾ ਸਭ ਤੋਂ ਵੱਧ ਗੋਲ ਕਰਨ ਵਾਲਾ ਖਿਡਾਰੀ ਹੈ। ਉਸ ਦਾ ਜਨਮ ਭਾਰਤੀ ਫ਼ੌਜ ਦੀ ਈਐੱਮਈ ਕੋਰ ਦੇ ਅਫ਼ਸਰ ਕੇਬੀ ਛੇਤਰੀ ਦੇ ਘਰ 3 ਅਗਸਤ, 1984 ਨੂੰ ਆਂਧਰਾ ਪ੍ਰਦੇਸ਼ ਦੇ ਸਿਕੰਦਰਾਬਾਦ ਸ਼ਹਿਰ ਵਿਖੇ ਹੋਇਆ ਸੀ।
ਉਸ ਨੂੰ ਫੁੱਟਬਾਲ ਖੇਡਣ ਦੀ ਗੁੜ੍ਹਤੀ ਘਰ ਤੋਂ ਹੀ ਮਿਲ ਗਈ ਸੀ ਕਿਉਂਕਿ ਉਸ ਦਾ ਪਿਤਾ ਭਾਰਤੀ ਫ਼ੌਜ ਵੱਲੋਂ ਤੇ ਮਾਂ ਨੇਪਾਲ ਦੀ ਮਹਿਲਾ ਕੌਮੀ ਟੀਮ ਵੱਲੋਂ ਫੁੱਟਬਾਲ ਖੇਡਦੀ ਸੀ। ਉਸ ਦੀ ਜੂਨੀਅਰ ਖੇਡ ਦੀ ਸ਼ੁਰੂਆਤ ਦਿੱਲੀ ਦੀ ਸਿਟੀ ਕਲੱਬ ਵੱਲੋਂ ਖੇਡਦਿਆਂ 2001 ’ਚ ਹੋਈ ਸੀ। ਉਸ ਦੀ ਸਖ਼ਤ ਮਿਹਨਤ ਸਦਕਾ ਉਸ ਦੀ ਖੇਡ ਹੁਨਰ ’ਚ ਸ਼ਾਨਦਾਰ ਸੁਧਾਰ ਹੋਇਆ ਤੇ 2002 ’ਚ ਉਸ ਨੂੰ ਭਾਰਤੀ ਫੁੱਟਬਾਲ ਲੀਗ ਦੀ ਮੋਹਨ ਬਗਾਨ ਟੀਮ ’ਚ ਬਤੌਰ ਸੀਨੀਅਰ ਖਿਡਾਰੀ ਖੇਡਣ ਦਾ ਮੌਕਾ ਮਿਲਿਆ। 2002 ਤੋਂ 2005 ਤੱਕ ਉਸ ਨੇ ਇਸ ਟੀਮ ਵੱਲੋਂ 18 ਮੈਚ ਖੇਡ ਕੇ 8 ਗੋਲ ਕੀਤੇ। 2005 ਤੋਂ ਹੁਣ ਤੱਕ ਵੱਖ-ਵੱਖ ਕਲੱਬਾਂ ਵੱਲੋਂ ਖੇਡਦਿਆਂ ਉਹ ਆਪਣੀ ਖੇਡ ਕਲਾ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕਰ ਚੁੱਕਾ ਹੈ।
ਉਸ ਨੇ 2005 ਤੋਂ 2008 ਤੱਕ ਜੇਸੀਟੀ ਕਲੱਬ ਵੱਲੋਂ 48 ਮੈਚ ਖੇਡ ਕੇ 21 ਗੋਲ ਕੀਤੇ ਸਨ। ਉਸ ਨੇ 2008-2009 ਸੀਜ਼ਨ ਦੌਰਾਨ ਈਸਟ ਬੰਗਾਲ ਵੱਲੋਂ 17 ਮੈਚ ਖੇਡ ਕੇ 9 ਗੋਲ , 2009-2010 ਸੀਜ਼ਨ ਦੌਰਾਨ ਡੈਂਪੋ ਕਲੱਬ ਵੱਲੋਂ 13 ਮੈਚਾਂ ’ਚ 8 ਗੋਲ, 2013-15 ਦੌਰਾਨ ਬੈਂਗਲੁਰੂ ਵੱਲੋਂ 43 ਮੈਚਾਂ ’ਚ 16 ਗੋਲ ਤੇ 2015-16 ਸੀਜ਼ਨ ਦੌਰਾਨ ਮੁੰਬਈ ਸਿਟੀ ਦੀ ਟੀਮ ਵੱਲੋਂ ਖੇਡਦਿਆਂ 11 ਮੈਚਾਂ ’ਚ ਸੱਤ ਗੋਲ ਕੀਤੇ ਸਨ।
2016 ਤੋਂ ਹੁਣ ਤੱਕ ਉਹ ਬੈਂਗਲੁਰੂ ਫੁੱਟਬਾਲ ਕਲੱਬ ਵੱਲੋਂ ਖੇਡ ਰਿਹਾ ਹੈ, ਜਿੱਥੇ ਹੁਣ ਤੱਕ 113 ਮੈਚ ਖੇਡ ਕੇ ਉਹ 51 ਸ਼ਾਨਦਾਰ ਗੋਲਾਂ ਦਾ ਯੋਗਦਾਨ ਪਾ ਚੁੱਕਾ ਹੈ। ਉਸ ਨੇ 2005 ਤੋਂ ਹੁਣ ਤੱਕ 125 ਮੈਚ ਖੇਡ ਕੇ 80 ਬਿਹਤਰੀਨ ਗੋਲਾਂ ਦਾ ਯੋਗਦਾਨ ਪਾਇਆ ਤੇ ਭਾਰਤ ਨੂੰ ਅਨੇਕਾਂ ਕੌਮਾਂਤਰੀ ਮੈਚਾਂ ’ਚ ਜਿੱਤ ਹਾਸਲ ਕਰਵਾਈ ਹੈ।
ਇਸੇ ਤਰ੍ਹਾਂ 2015 ਦੀ ਸੈਫ ਚੈਂਪੀਅਨਸ਼ਿਪ ’ਚ ਉਸ ਨੇ ਤਿੰਨ ਗੋਲ ਕਰਨ ਦੀ ਅਹਿਮ ਭੂਮਿਕਾ ਨਿਭਾਈ ਤੇ ਇਸ ਟੂਰਨਾਮੈਂਟ ’ਚ ਵੀ ਭਾਰਤ ਨੂੰ ਜੇਤੂ ਕਰਾਰ ਦਿੱਤਾ ਗਿਆ ਸੀ। ਉਸ ਨੂੰ ਇਕ ਵਾਰ ਫਿਰ ‘ਬੈਸਟ ਪਲੇਅਰ ਆਫ ਦਾ ਟੂਰਨਾਮੈਂਟ’ ਐਲਾਨਿਆ ਗਿਆ ਸੀ। 2021 ਦੀ ਸੈਫ ਚੈਂਪੀਅਨਸ਼ਿਪ ’ਚ ਭਾਰਤ ਨੇ ਨੇਪਾਲ ਨੂੰ ਫਾਈਨਲ ’ਚ ਹਰਾ ਕੇ ਚੈਂਪੀਅਨਸ਼ਿਪ ਆਪਣੇ ਨਾਂ ਕੀਤੀ ਸੀ। ਇਸ ਚੈਂਪੀਅਨਸ਼ਿਪ ’ਚ ਉਹ ਪੰਜ ਗੋਲ ਕਰ ਕੇ ‘ਟਾਪ ਸਕੋਰਰ’ ਰਿਹਾ ਸੀ ਤੇ ਉਸ ਨੂੰ ‘ਬੈਸਟ ਪਲੇਅਰ ਆਫ ਦਾ ਟੂਰਨਾਮੈਂਟ’ ਦਾ ਖਿਤਾਬ ਦਿੱਤਾ ਗਿਆ ਸੀ। ਉਹ ਹੁਣ ਤੱਕ ਭਾਰਤ ਵੱਲੋਂ 125 ਕੌਮਾਂਤਰੀ ਮੈਚ ਖੇਡ ਕੇ 80 ਗੋਲਾਂ ਦਾ ਮਹੱਤਵਪੂਰਨ ਯੋਗਦਾਨ ਪਾ ਚੁੱਕਾ ਹੈ। ਉਹ ਹੁਣ ਤੱਕ ਕਈ ਵੱਕਾਰੀ ਮਾਣ-ਸਨਮਾਨ ਹਾਸਲ ਕਰ ਚੁੱਕਿਆ ਹੈ।
ਸੁਨੀਲ ਛੇਤਰੀ ਦੇ ਜ਼ਬਰਦਸਤ ਯੋਗਦਾਨ ਸਦਕਾ ਭਾਰਤ 2008 ਦੀ ਏਸ਼ੀਆਈ ਫੁੱਟਬਾਲ ਫੈਡਰੇਸ਼ਨ ਚੈਂਪੀਅਨਸ਼ਿਪ ’ਚ ਉਪ ਜੇਤੂ ਰਿਹਾ ਸੀ। ਦਿੱਲੀ ਵਿਖੇ ਖੇਡੀ ਗਈ ਸਾਲ 2011 ਦੀ ਸੈਫ ਚੈਂਪੀਅਨਸ਼ਿਪ ’ਚ ਉਸ ਨੇ ਸਭ ਤੋਂ ਵੱਧ ਸੱਤ ਗੋਲ ਕੀਤੇ ਸਨ ਅਤੇ ਭਾਰਤ ਨੂੰ ਟੂਰਨਾਮੈਂਟ ਦਾ ਜੇਤੂ ਬਣਾਉਣ ’ਚ ਅਹਿਮ ਭੂਮਿਕਾ ਨਿਭਾਈ ਸੀ। ਉਸ ਨੂੰ ਇਸ ਟੂਰਨਾਮੈਂਟ ਦਾ ‘ਬੈਸਟ ਪਲੇਅਰ’ ਐਲਾਨਿਆ ਗਿਆ ਸੀ।