ਨਿਊਯਾਰਕ – ਸਪੇਨ ਦੇ ਕਾਰਲੋਸ ਅਲਕਰਾਜ ਨੇ ਯੂਐੱਸ ਓਪਨ ਦੇ ਮਰਦ ਸਿੰਗਲਜ਼ ਫਾਈਨਲ ਵਿਚ ਨਾਰਵੇ ਦੇ ਕੈਸਪਰ ਰੂਡ ਨੂੰ ਚਾਰ ਸੈੱਟ ਵਿਚ ਹਰਾ ਕੇ 19 ਸਾਲ ਦੀ ਉਮਰ ਵਿਚ ਆਪਣਾ ਪਹਿਲਾ ਗਰੈਂਡ ਸਲੈਮ ਖ਼ਿਤਾਬ ਜਿੱਤਿਆ। ਇਸ ਨਾਲ ਹੀ ਉਹ ਸਭ ਤੋਂ ਘੱਟ ਉਮਰ ਵਿਚ ਏਟੀਪੀ ਰੈਂਕਿੰਗ ਵਿਚ ਸਿਖਰ ‘ਤੇ ਪੁੱਜਣ ਵਾਲੇ ਖਿਡਾਰੀ ਬਣ ਗਏ। ਅਲਕਰਾਜ ਰੂਸ ਦੇ ਡੇਨਿਲ ਮੇਦਵੇਦੇਵ ਨੂੰ ਪਛਾੜ ਕੇ ਨੰਬਰ ਇਕ ਰੈਂਕਿੰਗ ‘ਤੇ ਪੁੱਜੇ।
ਤੀਜਾ ਦਰਜਾ ਹਾਸਲ ਅਲਕਰਾਜ ਨੇ ਪੰਜਵਾਂ ਦਰਜਾ ਹਾਸਲ ਰੂਡ ਨੂੰ 6-4, 2-6, 7-6 (1), 6-3 ਨਾਲ ਹਰਾਇਆ। ਬਾਰਿਸ਼ ਤੇ 26 ਡਿਗਰੀ ਸੈਲਸੀਅਸ ਤਾਪਮਾਨ ਵਿਚਾਲੇ ਆਰਥਰ ਐਸ਼ ਸਟੇਡੀਅਮ ਦੀ ਛੱਤ ਨੂੰ ਬੰਦ ਕਰ ਕੇ ਇਹ ਮੁਕਾਬਲਾ ਕਰਵਾਇਆ ਗਿਆ। ਅਲਕਰਾਜ ਲਈ ਇੱਥੇ ਟਰਾਫੀ ਜਿੱਤਣਾ ਓਨਾ ਵੀ ਸੌਖਾ ਸਫ਼ਰ ਨਹੀਂ ਰਿਹਾ। ਉਨ੍ਹਾਂ ਨੇ ਚੌਥੇ ਗੇੜ ਵਿਚ ਪੰਜ ਸੈੱਟਾਂ ਤਕ ਚੱਲੇ ਮੈਚ ਵਿਚ ਮਾਰਿਨ ਸਿਲਿਕ ਨੂੰ ਹਰਾਇਆ ਫਿਰ ਕੁਆਰਟਰ ਫਾਈਨਲ ਵਿਚ ਇਟਲੀ ਦੇ ਜਾਨਿਕ ਸਿਨਰ ਨੂੰ ਮਾਤ ਦਿੱਤੀ ਤੇ ਸੈਮੀਫਾਈਨਲ ਵਿਚ ਅਮਰੀਕਾ ਦੇ ਫਰਾਂਸਿਸ ਟਿਆਫੋ ਦੀ ਚੁਣੌਤੀ ਨੂੰ ਪਾਰ ਕੀਤਾ।
ਰੂਡ ਦੀਆਂ ਨਜ਼ਰਾਂ ਇਸ ਮੈਚ ਨੂੰ ਜਿੱਤ ਕੇ ਆਪਣੇ ਕਰੀਅਰ ਦਾ ਪਹਿਲਾ ਗਰੈਂਡ ਸਲੈਮ ਜਿੱਤਣ ਤੇ ਰੈਂਕਿੰਗ ਵਿਚ ਸਿਖਰ ‘ਤੇ ਪੁੱਜਣ ਵਾਲੇ ਨਾਰਵੇ ਦੇ ਪਹਿਲੇ ਖਿਡਾਰੀ ਬਣਨ ‘ਤੇ ਸਨ ਪਰ ਅਲਕਰਾਜ ਨੇ ਉਨ੍ਹਾਂ ਦੇ ਇਸ ਸੁਪਨੇ ਨੂੰ ਪੂਰਾ ਨਹੀਂ ਹੋਣ ਦਿੱਤਾ। ਅਲਕਰਾਜ ਨੇ ਜਿੱਥੇ ਪਹਿਲਾ ਸੈੱਟ ਆਪਣੇ ਨਾਂ ਕੀਤਾ ਜਦਕਿ ਰੂਡ ਨੇ ਦੂਜਾ ਸੈੱਟ ਜਿੱਤ ਕੇ ਮੈਚ ਵਿਚ ਬਰਾਬਰੀ ਕੀਤੀ। ਤੀਜੇ ਸੈੱਟ ਵਿਚ ਇਕ ਮਹੱਤਵਪੂਰਨ ਸਮਾਂ ਆਇਆ ਜਦ ਅਲਕਰਾਜ 5-6 ਨਾਲ ਪੱਛੜਦੇ ਹੋਏ ਸਰਵਿਸ ਕਰ ਰਹੇ ਸਨ ਤੇ ਰੂਡ ਨੂੰ ਦੋ ਸੈੱਟ ਪੁਆਇੰਟ ਮਿਲੇ। ਅਲਕਰਾਜ ਨੇ ਫਿਰ ਨਾ ਸਿਰਫ਼ ਦੋਵੇਂ ਸੈੱਟ ਪੁਆਇੰਟ ਬਚਾਏ, ਬਲਕਿ ਟਾਈਬ੍ਰੇਕਰ ਵਿਚ ਸੈੱਟ ਵੀ ਜਿੱਤ ਲਿਆ। ਅਲਕਰਾਜ ਨੇ ਟਾਈਬ੍ਰੇਕਰ ਵਿਚ ਕਾਫੀ ਬਿਹਤਰ ਪ੍ਰਦਰਸ਼ਨ ਕੀਤਾ ਤੇ 2-1 ਦੀ ਬੜ੍ਹਤ ਬਣਾਈ। ਉਨ੍ਹਾਂ ਨੇ ਚੌਥੇ ਸੈੱਟ ਨੂੰ ਆਸਾਨੀ ਨਾਲ ਜਿੱਤ ਕੇ ਮੁਕਾਬਲਾ ਤੇ ਟਰਾਫੀ ਨੂੰ ਆਪਣੇ ਨਾਂ ਕਰ ਲਿਆ।