ਗੁਈਆਂਗ – ਦੱਖਣ-ਪੱਛਮੀ ਚੀਨ ਦੇ ਗੁਈਝੂ ਸੂਬੇ ਦੀ ਇਕ ਅਦਾਲਤ ਵੱਲੋਂ 17 ਬੱਚਿਆਂ ਨੂੰ ਅਗਵਾ ਕਰਨ ਅਤੇ ਉਨ੍ਹਾਂ ਦੀ ਤਸਕਰੀ ਕਰਨ ਦੇ ਦੋਸ਼ ‘ਚ ਇਕ ਔਰਤ ਖ਼ਿਲਾਫ਼ ਮੁੜ ਮੁਕੱਦਮਾ ਚਲਾਇਆ ਗਿਆ। ਸਤੰਬਰ 2023 ਵਿੱਚ, ਗੁਈਆਂਗ ਇੰਟਰਮੀਡੀਏਟ ਪੀਪਲਜ਼ ਕੋਰਟ ਨੇ 1993 ਅਤੇ 1996 ਦਰਮਿਆਨ ਗੁਈਝੋ ਅਤੇ ਚੋਂਗਕਿੰਗ ਤੋਂ 11 ਬੱਚਿਆਂ ਨੂੰ ਅਗਵਾ ਕਰ ਉਨ੍ਹਾਂ ਦੀ ਹੇਬੇਈ ਸੂਬੇ ਦੇ ਹਾਂਡਾਨ ਸ਼ਹਿਰ ਵਿਚ ਤਸਕਰੀ ਕਰਨ ਦਾ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਯੂ ਹੁਆਇੰਗ ਨੂੰ ਮੌਤ ਦੀ ਸਜ਼ਾ ਸੁਣਾਈ। ਇਕ ਏਜੰਸੀ ਮੁਤਾਬਕ ਯੂ ਅਤੇ ਉਸ ਦਾ ਸਾਥੀ, ਜਿਸ ਦੀ ਮੌਤ ਹੋ ਚੁੱਕੀ ਹੈ, ਨੇ ਆਪਣੇ ਫਾਇਦੇ ਲਈ ਬੱਚਿਆਂ ਨੂੰ ਵੇਚ ਦਿੱਤਾ ਸੀ। ਅਦਾਲਤ ਨੇ ਯੂ ਨੂੰ ਜੀਵਨ ਭਰ ਲਈ ਸਿਆਸੀ ਅਧਿਕਾਰਾਂ ਤੋਂ ਵਾਂਝਾ ਕਰ ਦਿੱਤਾ ਅਤੇ ਉਸ ਦੀ ਸਾਰੀ ਨਿੱਜੀ ਜਾਇਦਾਦ ਜ਼ਬਤ ਕਰਨ ਦਾ ਹੁਕਮ ਦਿੱਤਾ। ਅਦਾਲਤ ਵੱਲੋਂ ਫੈਸਲਾ ਸੁਣਾਏ ਜਾਣ ਤੋਂ ਤੁਰੰਤ ਬਾਅਦ ਯੂ ਨੇ ਫੈਸਲੇ ਖਿਲਾਫ ਅਪੀਲ ਦਾਇਰ ਕੀਤੀ। ਨਵੰਬਰ 2023 ਵਿੱਚ, ਗੁਈਝੋ ਸੁਬਾਈ ਹਾਇਰ ਪੀਪਲਜ਼ ਕੋਰਟ ਨੇ ਦੂਜੇ ਕੇਸ ਦੀ ਸੁਣਵਾਈ ਕੀਤੀ ਅਤੇ ਜਨਵਰੀ 2024 ਵਿੱਚ ਕੇਸ ਦੀ ਮੁੜ ਸੁਣਵਾਈ ਦਾ ਹੁਕਮ ਦਿੱਤਾ, ਜਦੋਂ ਪੁਲਸ ਨੂੰ ਪਤਾ ਲੱਗਾ ਕਿ ਯੂ ਨੂੰ ਬਾਲ ਤਸਕਰੀ ਦੇ ਹੋਰ ਮਾਮਲਿਆਂ ਵਿੱਚ ਵੀ ਫਸਾਇਆ ਗਿਆ ਹੈ। ਹਾਈ-ਪ੍ਰੋਫਾਈਲ ਤਸਕਰੀ ਦੇ ਕੇਸ ਵਿੱਚ ਸ਼ਾਮਲ ਬੱਚਿਆਂ ਦੀ ਗਿਣਤੀ 11 ਤੋਂ ਵਧ ਕੇ 17 ਹੋ ਗਈ ਹੈ।
17 ਬੱਚਿਆਂ ਦੀ ਤਸਕਰੀ ਦੇ ਦੋਸ਼ ਚ ਚੀਨੀ ਔਰਤ ਖ਼ਿਲਾਫ਼ ਮੁੜ ਚਲਾਇਆ ਗਿਆ ਮੁਕੱਦਮਾ
