ਨਵੀਂ ਦਿੱਲੀ – ਵਰਧਮਾਨ ਮਹਾਵੀਰ ਮੈਡੀਕਲ ਕਾਲਜ ਅਤੇ ਸਫਦਰਜੰਗ ਹਸਪਤਾਲ ਨੇ ਗੁਰਦਾ ਟ੍ਰਾਂਸਪਲਾਂਟ ਦੇ ਖੇਤਰ ਵਿੱਚ ਇੱਕ ਵੱਡੀ ਪ੍ਰਾਪਤੀ ਹਾਸਲ ਕੀਤੀ ਹੈ। ਹਸਪਤਾਲ ਵਿੱਚ ਪਹਿਲੀ ਵਾਰ ਦੋਹਰਾ ਗੁਰਦਾ ਟ੍ਰਾਂਸਪਲਾਂਟ ਸਫਲਤਾਪੂਰਵਕ ਕੀਤਾ ਗਿਆ। ਖਾਸ ਗੱਲ ਇਹ ਹੈ ਕਿ ਕਿਸੇ ਕੇਂਦਰ ਸਰਕਾਰ ਦੇ ਹਸਪਤਾਲ ਵਿੱਚ ਇਹ ਪਹਿਲਾ ਦੋਹਰਾ ਗੁਰਦਾ ਟ੍ਰਾਂਸਪਲਾਂਟ ਦੱਸਿਆ ਗਿਆ ਹੈ।
ਇਸ ਟ੍ਰਾਂਸਪਲਾਂਟ ਵਿੱਚ ਇੱਕ ਹੀ ਦਾਨੀ ਦੇ ਦੋਵੇਂ ਗੁਰਦੇ ਇੱਕ ਮਰੀਜ਼ ਵਿੱਚ ਲਗਾਏ ਗਏ। ਮਾਹਿਰਾਂ ਨੇ ਇਹ ਫੈਸਲਾ ਇਸ ਲਈ ਲਿਆ ਕਿਉਂਕਿ ਦਾਨੀ ਦੇ ਗੁਰਦਿਆਂ ਨੂੰ ਡਾਕਟਰੀ ਮਾਪਦੰਡਾਂ ਮੁਤਾਬਕ ਸੀਮਾਂਤ ਦਾਨੀ ਅੰਗ ਮੰਨਿਆ ਗਿਆ ਸੀ। ਅਜਿਹੇ ਮਾਮਲਿਆਂ ਵਿੱਚ ਇੱਕ ਗੁਰਦੇ ਨਾਲ ਮਿਲਣ ਵਾਲਾ ਇਲਾਜੀ ਲਾਭ ਸੀਮਤ ਹੋ ਸਕਦਾ ਹੈ। ਇਸ ਲਈ ਦੋਵੇਂ ਗੁਰਦੇ ਇੱਕੋ ਮਰੀਜ਼ ਵਿੱਚ ਲਗਾਉਣ ਦਾ ਫੈਸਲਾ ਕੀਤਾ ਗਿਆ।
19 ਸਤੰਬਰ ਦੀ ਰਾਤ ਚੰਡੀਮੰਦਰ ਦੇ ਕਮਾਂਡ ਹਸਪਤਾਲ ਵਿੱਚ ਇੱਕ 62 ਸਾਲਾ ਵਿਅਕਤੀ ਨੂੰ ਦਿਮਾਗੀ ਤੌਰ ’ਤੇ ਮ੍ਰਿਤਕ ਐਲਾਨਿਆ ਗਿਆ। ਉਸ ਦੇ ਪਰਿਵਾਰ ਨੇ ਅੰਗ ਦਾਨ ਕਰਨ ਦਾ ਮਹੱਤਵਪੂਰਨ ਫੈਸਲਾ ਲਿਆ। ਦਾਨੀ ਦੀ ਉਮਰ ਅਤੇ ਹੋਰ ਸਿਹਤ ਸਬੰਧੀ ਹਾਲਾਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਉਸ ਦੇ ਗੁਰਦਿਆਂ ਨੂੰ ਸੀਮਾਂਤ ਦਾਨੀ ਅੰਗਾਂ ਵਜੋਂ ਸ਼੍ਰੇਣੀਬੱਧ ਕੀਤਾ ਗਿਆ। ਅੰਗਾਂ ਨੂੰ ਸਮੇਂ ਸਿਰ ਦਿੱਲੀ ਪਹੁੰਚਾਉਣ ਵਿੱਚ ਭਾਰਤੀ ਹਵਾਈ ਸੈਨਾ ਦੀ ਪੱਛਮੀ ਕਮਾਂਡ ਨੇ ਮਹੱਤਵਪੂਰਨ ਮਦਦ ਕੀਤੀ। ਦਾਨੀ ਦਾ ਜਿਗਰ ਆਰਮੀ ਹਸਪਤਾਲ ਰਿਸਰਚ ਐਂਡ ਰੈਫਰਲ ਨੂੰ ਦਿੱਤਾ ਗਿਆ, ਜਦਕਿ ਦੋਵੇਂ ਗੁਰਦੇ ਸਫਦਰਜੰਗ ਹਸਪਤਾਲ ਨੂੰ ਅਲਾਟ ਕੀਤੇ ਗਏ। ਇਹ ਜਟਿਲ ਟ੍ਰਾਂਸਪਲਾਂਟ ਯੂਰੋਲੋਜੀ ਅਤੇ ਰੀਨਲ ਟ੍ਰਾਂਸਪਲਾਂਟ ਵਿਭਾਗ ਦੇ ਮੁਖੀ ਡਾ. ਪਵਨ ਵਾਸੂਦੇਵ ਦੀ ਅਗਵਾਈ ਹੇਠ ਇੱਕ ਬਹੁ-ਮਾਹਿਰ ਟੀਮ ਨੇ ਕੀਤਾ। ਇਸ ਵਿੱਚ ਨੈਫਰੋਲੋਜੀ, ਅਨੱਸਥੀਸੀਆ ਅਤੇ ਕ੍ਰਿਟੀਕਲ ਕੇਅਰ ਦੇ ਮਾਹਿਰਾਂ ਨੇ ਵੀ ਅਹਿਮ ਭੂਮਿਕਾ ਨਿਭਾਈ। ਹਸਪਤਾਲ ਨੇ ਇਸ ਪ੍ਰਕਿਰਿਆ ਨੂੰ ਸਫਲ ਬਣਾਉਣ ਵਿੱਚ ਰਾਸ਼ਟਰੀ ਅੰਗ ਅਤੇ ਟਿਸ਼ੂ ਟ੍ਰਾਂਸਪਲਾਂਟ ਸੰਗਠਨ (NOTTO), ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਅਤੇ ਹਸਪਤਾਲ ਦੇ ਟ੍ਰਾਂਸਪਲਾਂਟ ਕੋਆਰਡੀਨੇਟਰਾਂ ਦੇ ਸਹਿਯੋਗ ਨੂੰ ਵੀ ਮਹੱਤਵਪੂਰਨ ਦੱਸਿਆ।
ਭਾਰਤ ਵਿੱਚ ਅੰਗਾਂ ਦੀ ਲੋੜ ਅਤੇ ਉਪਲਬਧਤਾ ਵਿਚਕਾਰ ਵੱਡਾ ਫਰਕ ਹੈ। ਅਜਿਹੇ ਵਿੱਚ ਉਪਲਬਧ ਅੰਗਾਂ ਦੀ ਸੁਰੱਖਿਅਤ ਅਤੇ ਸਹੀ ਵਰਤੋਂ ਨਾਲ ਹੋਰ ਮਰੀਜ਼ਾਂ ਨੂੰ ਟ੍ਰਾਂਸਪਲਾਂਟ ਦਾ ਮੌਕਾ ਮਿਲ ਸਕਦਾ ਹੈ। ਸਫਦਰਜੰਗ ਹਸਪਤਾਲ ਦੀ ਇਹ ਪ੍ਰਾਪਤੀ ਉਸ ਦੇ ਗੁਰਦਾ ਟ੍ਰਾਂਸਪਲਾਂਟ ਪ੍ਰੋਗਰਾਮ ਲਈ ਇੱਕ ਮਹੱਤਵਪੂਰਨ ਕਦਮ ਹੈ। ਇਸ ਨਾਲ ਡਾਇਲਸਿਸ ’ਤੇ ਨਿਰਭਰ ਮਰੀਜ਼ਾਂ ਲਈ ਵੀ ਨਵੀਂ ਉਮੀਦ ਪੈਦਾ ਹੋਈ ਹੈ।