ਐਡੀਲੇਡ – South Australia ਦੇ ਮੌਜੂਦਾ Police Commissioner Grant Stevens ਨੂੰ ਸੂਬੇ ਦਾ ਅਗਲਾ Governor ਨਿਯੁਕਤ ਕੀਤਾ ਗਿਆ ਹੈ। ਉਹ ਮੌਜੂਦਾ Governor Frances Adamson ਦੀ ਥਾਂ ਲੈਣਗੇ। Adamson ਦਾ ਪੰਜ ਸਾਲਾ ਕਾਰਜਕਾਲ ਅੱਜ ਖ਼ਤਮ ਹੋ ਰਿਹਾ ਹੈ।
SA Premier Peter Malinauskas ਨੇ ਅੱਜ ਐਲਾਨ ਕਰਦਿਆਂ ਕਿਹਾ ਕਿ Grant Stevens South Australia ਦੇ 37ਵੇਂ Governor ਹੋਣਗੇ। Premier ਨੇ ਦੱਸਿਆ ਕਿ ਉਨ੍ਹਾਂ ਦੀ ਸਰਕਾਰੀ ਤੌਰ ’ਤੇ 9 ਦਸੰਬਰ ਨੂੰ ਸਹੁੰ ਚੁੱਕਣ ਦੀ ਉਮੀਦ ਹੈ।
Grant Stevens ਨੇ 2015 ਤੋਂ South Australia ਦੇ Police Commissioner ਵਜੋਂ ਸੇਵਾ ਨਿਭਾਈ ਹੈ। COVID-19 ਮਹਾਮਾਰੀ ਦੌਰਾਨ ਉਹ ਸੂਬੇ ਦੇ State Coordinator ਵੀ ਰਹੇ ਸਨ। ਉਹ 23 ਅਕਤੂਬਰ ਨੂੰ Police Commissioner ਦੇ ਅਹੁਦੇ ਤੋਂ ਰਸਮੀ ਤੌਰ ’ਤੇ ਹਟ ਜਾਣਗੇ। ਇਸ ਤੋਂ ਬਾਅਦ Deputy Commissioner Linda Williams ਕਾਰਜਕਾਰੀ Police Commissioner ਦੀ ਜ਼ਿੰਮੇਵਾਰੀ ਸੰਭਾਲਣਗੇ।
Grant Stevens ਨੇ Governor ਬਣਨ ਦੀ ਨਵੀਂ ਜ਼ਿੰਮੇਵਾਰੀ ਨੂੰ ਲੈ ਕੇ ਖੁਸ਼ੀ ਅਤੇ ਮਾਣ ਦਾ ਪ੍ਰਗਟਾਵਾ ਕੀਤਾ। ਉਨ੍ਹਾਂ ਕਿਹਾ ਕਿ ਜਦੋਂ Premier ਨੇ ਪਹਿਲੀ ਵਾਰ ਉਨ੍ਹਾਂ ਨਾਲ ਇਸ ਅਹੁਦੇ ਬਾਰੇ ਗੱਲ ਕੀਤੀ ਤਾਂ ਉਹ ਇਸ ਮੌਕੇ ਨੂੰ ਲੈ ਕੇ ਬਹੁਤ ਮਾਣ ਮਹਿਸੂਸ ਕਰ ਰਹੇ ਸਨ। Stevens ਨੇ ਦੱਸਿਆ ਕਿ ਇਸ ਨਿਯੁਕਤੀ ਦੀਆਂ ਚਰਚਾਵਾਂ ਕੁਝ ਸਮੇਂ ਤੋਂ ਚੱਲ ਰਹੀਆਂ ਸਨ ਅਤੇ ਉਨ੍ਹਾਂ ਨੇ ਆਪਣੀ ਪਤਨੀ Emma ਨਾਲ ਇਸ ਬਾਰੇ ਵਿਚਾਰ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਦੋਵਾਂ ਨੇ ਇਸ ਨੂੰ South Australian ਭਾਈਚਾਰੇ ਨਾਲ ਜੁੜੇ ਰਹਿਣ ਅਤੇ ਲੋਕਾਂ ਦੀ ਜ਼ਿੰਦਗੀ ’ਤੇ ਸਕਾਰਾਤਮਕ ਪ੍ਰਭਾਵ ਪਾਉਣ ਦੇ ਇੱਕ ਹੋਰ ਮੌਕੇ ਵਜੋਂ ਦੇਖਿਆ। Stevens ਨੇ ਮੌਜੂਦਾ Governor Frances Adamson ਵੱਲੋਂ ਆਪਣੇ ਕਾਰਜਕਾਲ ਦੌਰਾਨ ਕੀਤੇ ਕੰਮ ਦੀ ਵੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ Adamson ਵੱਲੋਂ ਦਿਖਾਈ ਗਈ ਮਿਹਨਤ ਨੂੰ ਦੇਖਦਿਆਂ ਉਹ ਨਵੀਂ ਜ਼ਿੰਮੇਵਾਰੀ ਨੂੰ ਲੈ ਕੇ ਕੁਝ ਹੱਦ ਤੱਕ ਚਿੰਤਤ ਵੀ ਹਨ।
Stevens ਨੇ ਦੱਸਿਆ ਕਿ Police Commissioner ਵਜੋਂ ਉਨ੍ਹਾਂ ਦੇ ਕਰਾਰ ਵਿੱਚ ਅਜੇ ਲਗਭਗ ਇੱਕ ਸਾਲ ਅਤੇ ਨੌਂ ਮਹੀਨੇ ਬਾਕੀ ਸਨ, ਪਰ ਸਤੰਬਰ ਦੇ ਸ਼ੁਰੂ ਜਾਂ ਵਿਚਕਾਰ ਉਨ੍ਹਾਂ ਨਾਲ Governor ਦੇ ਅਹੁਦੇ ਬਾਰੇ ਸੰਪਰਕ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਜਦੋਂ ਉਨ੍ਹਾਂ ਨੂੰ ਇਸ ਨਿਯੁਕਤੀ ਬਾਰੇ ਪਤਾ ਲੱਗਾ ਤਾਂ ਉਹ ਹੈਰਾਨ ਰਹਿ ਗਏ ਅਤੇ ਉਨ੍ਹਾਂ ਨੂੰ ਅਹਿਸਾਸ ਹੋਇਆ ਕਿ ਪਿਛਲੇ ਕੁਝ ਸਮੇਂ ਤੋਂ ਚੱਲ ਰਹੀਆਂ ਅਫਵਾਹਾਂ ਸੱਚ ਸਨ। Stevens ਨੇ ਕਿਹਾ ਕਿ ਜਦੋਂ ਉਹ 1982 ਵਿੱਚ 17 ਸਾਲ ਦੀ ਉਮਰ ਵਿੱਚ Police Academy ਵਿੱਚ ਦਾਖਲ ਹੋਏ ਸਨ, ਉਸ ਸਮੇਂ ਉਨ੍ਹਾਂ ਨੇ ਕਦੇ ਨਹੀਂ ਸੋਚਿਆ ਸੀ ਕਿ ਇੱਕ ਦਿਨ ਉਹ Police Commissioner ਬਣਨਗੇ ਅਤੇ ਫਿਰ South Australia ਦੇ Governor ਦਾ ਅਹੁਦਾ ਸੰਭਾਲਣ ਲਈ ਵੀ ਕਿਹਾ ਜਾਵੇਗਾ।