ਕੈਨਬਰਾ – ਆਸਟ੍ਰੇਲੀਅਨ ਫੈਡਰਲ ਪੁਲਿਸ (AFP) ਨੇ ਚੇਤਾਵਨੀ ਦਿੱਤੀ ਹੈ ਕਿ ਇੰਟਰਨੈੱਟ ਅਤੇ ਸੋਸ਼ਲ ਮੀਡੀਆ ਰਾਹੀਂ ਬੱਚਿਆਂ ਵਿੱਚ ਹਿੰਸਕ ਕੱਟੜਪੰਥੀ ਵਿਚਾਰ ਵਧ ਰਹੇ ਹਨ। ਪੁਲਿਸ ਦੇ ਨਵੇਂ ਅੰਕੜਿਆਂ ਮੁਤਾਬਕ ਇਸ ਸਾਲ ਅੱਤਵਾਦ ਨਾਲ ਜੁੜੇ ਸਾਂਝੇ ਜਾਂਚ ਮਾਮਲਿਆਂ ਵਿੱਚ 40 ਫ਼ੀਸਦੀ ਕੇਸ ਨਾਬਾਲਗਾਂ ਨਾਲ ਸਬੰਧਤ ਹਨ।
AFP ਦੀ ਕਾਊਂਟਰ ਟੈਰਰਿਜ਼ਮ ਕਮਾਂਡਰ ਪੌਲਾ ਹਡਸਨ ਨੇ ਦੱਸਿਆ ਕਿ 2020 ਤੋਂ ਹੁਣ ਤੱਕ ਅੱਤਵਾਦੀ ਅਪਰਾਧਾਂ ਲਈ 37 ਨੌਜਵਾਨਾਂ ਖ਼ਿਲਾਫ਼ ਕਾਰਵਾਈ ਕੀਤੀ ਗਈ ਹੈ। ਇਨ੍ਹਾਂ ਵਿੱਚੋਂ 32 ਨੂੰ ਪਿਛਲੇ ਦੋ ਸਾਲਾਂ ਦੌਰਾਨ ਗ੍ਰਿਫ਼ਤਾਰ ਕੀਤਾ ਗਿਆ। ਉਨ੍ਹਾਂ ਮੁਤਾਬਕ TikTok, Instagram, Discord ਅਤੇ Roblox ਵਰਗੇ ਔਨਲਾਈਨ ਪਲੇਟਫਾਰਮਾਂ ਰਾਹੀਂ ਬੱਚਿਆਂ ਤੱਕ ਹਿੰਸਕ ਅਤੇ ਕੱਟੜਪੰਥੀ ਸਮੱਗਰੀ ਤੇਜ਼ੀ ਨਾਲ ਪਹੁੰਚ ਰਹੀ ਹੈ।
ਪੁਲਿਸ ਦੀ ਖੋਜ ਮੁਤਾਬਕ ਕੋਈ ਨੌਜਵਾਨ ਇੰਟਰਨੈੱਟ ਵਰਤਣਾ ਸ਼ੁਰੂ ਕਰਨ ਤੋਂ ਸਿਰਫ਼ 23 ਮਿੰਟਾਂ ਦੇ ਅੰਦਰ ਅਜਿਹੀ ਸਮੱਗਰੀ ਦੇ ਸੰਪਰਕ ਵਿੱਚ ਆ ਸਕਦਾ ਹੈ। ਕਮਾਂਡਰ ਹਡਸਨ ਨੇ ਦੱਸਿਆ ਕਿ 12 ਤੋਂ 17 ਸਾਲ ਦੀ ਉਮਰ ਦੇ ਬੱਚਿਆਂ ਨਾਲ ਜੁੜੇ 55 ਜਾਂਚ ਮਾਮਲਿਆਂ ਵਿੱਚ ਹਰ ਇੱਕ ਵਿੱਚ ਆਨਲਾਈਨ ਸਮੱਗਰੀ ਦੀ ਕੁਝ ਨਾ ਕੁਝ ਭੂਮਿਕਾ ਸਾਹਮਣੇ ਆਈ ਹੈ। ਉਨ੍ਹਾਂ ਕਿਹਾ ਕਿ ਬੱਚਿਆਂ ਵਿੱਚ ਕੱਟੜਪੰਥੀ ਸੋਚ ਵਧਣ ਦੇ ਕੁਝ ਸੰਕੇਤ ਇਹ ਹੋ ਸਕਦੇ ਹਨ:
- ਪਰਿਵਾਰ ਅਤੇ ਦੋਸਤਾਂ ਤੋਂ ਦੂਰ ਰਹਿਣਾ।
- ਇੰਟਰਨੈੱਟ ਉੱਤੇ ਬਹੁਤ ਜ਼ਿਆਦਾ ਸਮਾਂ ਬਿਤਾਉਣਾ।
- ਕਿਸੇ ਖ਼ਾਸ ਭਾਈਚਾਰੇ ਵਿਰੁੱਧ ਨਫ਼ਰਤ ਭਰੀ ਭਾਸ਼ਾ ਵਰਤਣਾ।
- ਰਾਜਨੀਤੀ ਅਤੇ ਸਮਾਜਿਕ ਮੁੱਦਿਆਂ ਬਾਰੇ ਅਚਾਨਕ ਬਹੁਤ ਗੁੱਸੇ ਵਾਲਾ ਵਿਹਾਰ ਕਰਨਾ।
- ਸਕੂਲ ਅਤੇ ਹੋਰ ਸਮਾਜਿਕ ਗਤੀਵਿਧੀਆਂ ਵਿੱਚ ਦਿਲਚਸਪੀ ਘਟਣਾ।
ਪੁਲਿਸ ਨੇ ਮਾਪਿਆਂ ਅਤੇ ਅਧਿਆਪਕਾਂ ਨੂੰ ਬੱਚਿਆਂ ਨਾਲ ਖੁੱਲ੍ਹ ਕੇ ਗੱਲਬਾਤ ਕਰਨ ਅਤੇ ਉਨ੍ਹਾਂ ਦੀਆਂ ਔਨਲਾਈਨ ਗਤੀਵਿਧੀਆਂ ਵੱਲ ਧਿਆਨ ਦੇਣ ਦੀ ਸਲਾਹ ਦਿੱਤੀ ਹੈ। ਪੁਲਿਸ ਨੇ ਇਹ ਵੀ ਕਿਹਾ ਕਿ ਜੇਕਰ ਕੋਈ ਬੱਚਾ ਔਨਲਾਈਨ ਕਿਸੇ ਸਮੱਸਿਆ ਜਾਂ ਖ਼ਤਰੇ ਦਾ ਸਾਹਮਣਾ ਕਰ ਰਿਹਾ ਹੈ ਤਾਂ ਉਸ ਨੂੰ ਕਿਸੇ ਭਰੋਸੇਯੋਗ ਵਿਅਕਤੀ ਨਾਲ ਗੱਲ ਕਰਨ ਲਈ ਉਤਸ਼ਾਹਿਤ ਕੀਤਾ ਜਾਵੇ।
