ਸਿਡਨੀ – ਦੁਨੀਆ ਭਰ ਤੋਂ ਆਏ ਵਿਦਿਆਰਥੀਆਂ ਨੇ ਹੌਰਨਸਬੀ ਪਾਰਕ ਵਿੱਚ ਪੌਦੇ ਲਗਾ ਕੇ ਵਾਤਾਵਰਣ ਦੀ ਸੰਭਾਲ ਲਈ ਇੱਕ ਯਾਦਗਾਰ ਵਿਰਾਸਤ ਛੱਡੀ ਹੈ। ਇਹ ਗਤੀਵਿਧੀ ਆਸਟ੍ਰੇਲੀਆ ਵਿੱਚ ਹੋਈਆਂ ਵੱਡੀਆਂ ਅੰਤਰਰਾਸ਼ਟਰੀ ਸਿੱਖਿਆ ਸੰਬੰਧੀ ਕਾਨਫਰੰਸਾਂ ਵਿੱਚੋਂ ਇੱਕ ਦੇ ਹਿੱਸੇ ਵਜੋਂ ਕਰਵਾਈ ਗਈ।
ਬਾਰਕਰ ਕਾਲਜ ਵੱਲੋਂ ਕਰਵਾਈ ਗਈ ਰਾਊਂਡ ਸਕੁਏਅਰ ਇੰਟਰਨੈਸ਼ਨਲ ਕਾਨਫਰੰਸ 2026 ਵਿੱਚ ਦੁਨੀਆ ਭਰ ਦੇ 150 ਤੋਂ ਵੱਧ ਸਕੂਲਾਂ ਤੋਂ 1,000 ਤੋਂ ਵੱਧ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੇ ਹਿੱਸਾ ਲਿਆ। ਕਾਨਫਰੰਸ ਦੇ ਸੇਵਾ ਪ੍ਰੋਗਰਾਮ ਤਹਿਤ ਵਿਦਿਆਰਥੀ 30 ਸਤੰਬਰ ਅਤੇ 1 ਅਕਤੂਬਰ ਨੂੰ ਹੌਰਨਸਬੀ ਪਾਰਕ ਪਹੁੰਚੇ। ਇੱਥੇ ਉਨ੍ਹਾਂ ਨੇ ਪੌਦੇ ਲਗਾਉਣ ਦੇ ਨਾਲ-ਨਾਲ ਇਸ ਸਥਾਨ ਦੇ ਮੂਲਵਾਸੀ ਇਤਿਹਾਸ, ਉਦਯੋਗਿਕ ਵਿਰਾਸਤ ਅਤੇ ਵਾਤਾਵਰਣ ਨਾਲ ਜੁੜੇ ਇਤਿਹਾਸ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਹੌਰਨਸਬੀ ਪਾਰਕ ਵਿੱਚ ਵਿਦਿਆਰਥੀਆਂ ਨੇ ਇੰਡੀਜਿਨਸ ਕਹਾਣੀਆਂ ਸੁਣੀਆਂ ਅਤੇ ਜਾਣਿਆ ਕਿ ਪਹਿਲਾਂ ਖੱਡ (quarry) ਰਹੀ ਇਹ ਜਗ੍ਹਾ ਕਿਵੇਂ ਇੱਕ ਜਨਤਕ ਪਾਰਕ ਵਿੱਚ ਬਦਲੀ। ਵਿਦਿਆਰਥੀਆਂ ਨੇ ਕਵਾਰੀ ਲੂਪ ਦੇ ਨੇੜੇ 800 ਦੇ ਕਰੀਬ ਸਥਾਨਕ ਕਿਸਮਾਂ ਦੇ ਪੌਦੇ ਲਗਾਏ। ਇਹ ਕੰਮ ਹੌਰਨਸਬੀ ਸ਼ਾਇਰ ਕੌਂਸਲ ਵੱਲੋਂ ਚਲਾਏ ਜਾ ਰਹੇ ਵਾਤਾਵਰਣ ਸੁਧਾਰ ਪ੍ਰੋਗਰਾਮ ਦਾ ਹਿੱਸਾ ਸੀ।
ਇਸ ਸਾਲ ਦੀ ਕਾਨਫਰੰਸ ਦਾ ਮੁੱਖ ਵਿਸ਼ਾ “Visions of the Future from an Ancient Land” ਸੀ। ਹੌਰਨਸਬੀ ਪਾਰਕ ਵਿੱਚ ਹੋਈਆਂ ਗਤੀਵਿਧੀਆਂ ਨੇ ਸੱਭਿਆਚਾਰਕ ਵਿਰਾਸਤ, ਵਾਤਾਵਰਣ ਦੀ ਸੰਭਾਲ ਅਤੇ ਭਵਿੱਖ ਲਈ ਕੁਦਰਤੀ ਥਾਵਾਂ ਨੂੰ ਬਿਹਤਰ ਬਣਾਉਣ ਦੇ ਵਿਚਾਰਾਂ ਨੂੰ ਆਪਸ ਵਿੱਚ ਜੋੜਿਆ। ਆਸਟ੍ਰੇਲੀਆ ਵਿੱਚ ਖੱਡ ਤੋਂ ਪਾਰਕ ਵਿੱਚ ਬਦਲੇ ਗਏ ਮਹੱਤਵਪੂਰਨ ਸਥਾਨਾਂ ਵਿੱਚ ਹੌਰਨਸਬੀ ਪਾਰਕ ਦਾ ਨਾਮ ਵੀ ਸ਼ਾਮਲ ਹੈ। ਇਸ ਕਰਕੇ ਇਹ ਥਾਂ ਵਿਦਿਆਰਥੀਆਂ ਲਈ ਲੀਡਰਸ਼ਿਪ, ਸੇਵਾ, ਵਾਤਾਵਰਣ ਦੀ ਸੰਭਾਲ ਅਤੇ ਸੱਭਿਆਚਾਰਕ ਜੁੜਾਅ ਵਰਗੇ ਕਾਨਫਰੰਸ ਦੇ ਵਿਸ਼ਿਆਂ ਨੂੰ ਸਮਝਣ ਲਈ ਢੁਕਵੀਂ ਰਹੀ।
ਹੌਰਨਸਬੀ ਸ਼ਾਇਰ ਦੇ ਮੇਅਰ ਵਾਰਨ ਵੈਡਲ ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਦੁਨੀਆ ਭਰ ਤੋਂ ਆਏ ਨੌਜਵਾਨਾਂ ਨੂੰ ਹੌਰਨਸਬੀ ਸ਼ਾਇਰ ਦੇ ਇੱਕ ਮਹੱਤਵਪੂਰਨ ਵਾਤਾਵਰਣੀ ਪ੍ਰੋਜੈਕਟ ਨਾਲ ਜੋੜਨ ਦਾ ਵਧੀਆ ਮੌਕਾ ਸੀ। ਉਨ੍ਹਾਂ ਨੇ ਵਿਦਿਆਰਥੀਆਂ, ਅਧਿਆਪਕਾਂ ਅਤੇ ਬਾਰਕਰ ਕਾਲਜ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਮਿਹਨਤ ਅਤੇ ਵਾਤਾਵਰਣ ਦੀ ਸੰਭਾਲ ਪ੍ਰਤੀ ਵਚਨਬੱਧਤਾ ਨਾਲ ਹੌਰਨਸਬੀ ਪਾਰਕ ਵਿੱਚ ਇੱਕ ਲੰਬੇ ਸਮੇਂ ਤੱਕ ਯਾਦ ਰਹਿਣ ਵਾਲੀ ਵਿਰਾਸਤ ਬਣੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਪ੍ਰੋਜੈਕਟ ਤਹਿਤ ਲਗਾਏ ਗਏ ਦਰੱਖਤ ਅਤੇ ਪੌਦੇ ਕਾਨਫਰੰਸ ਦੌਰਾਨ ਬਣੇ ਆਪਸੀ ਰਿਸ਼ਤਿਆਂ ਦੀ ਯਾਦ ਦਿਵਾਉਣਗੇ ਅਤੇ ਇਹ ਵੀ ਯਾਦ ਕਰਵਾਉਣਗੇ ਕਿ ਵਾਤਾਵਰਣ ਦੀ ਸੰਭਾਲ ਸਾਡੀ ਸਾਂਝੀ ਜ਼ਿੰਮੇਵਾਰੀ ਹੈ।
ਬਾਰਕਰ ਕਾਲਜ ਦੇ ਮੁਖੀ ਫਿਲਿਪ ਹੀਥ ਏਐਮ ਨੇ ਕਿਹਾ ਕਿ ਦੁਨੀਆ ਦੇ ਵੱਖ-ਵੱਖ ਦੇਸ਼ਾਂ ਤੋਂ ਆਏ ਨੌਜਵਾਨਾਂ ਨੂੰ ਹੌਰਨਸਬੀ ਪਾਰਕ ਦੀ ਸੇਵਾ ਲਈ ਇਕੱਠੇ ਕੰਮ ਕਰਦੇ ਦੇਖਣਾ ਰਾਊਂਡ ਸਕੁਏਅਰ ਦੀ ਭਾਵਨਾ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਉਮੀਦ ਹੈ ਕਿ ਇਸ ਤਜਰਬੇ ਰਾਹੀਂ ਵਿਦਿਆਰਥੀ ਇਹ ਸਮਝਣਗੇ ਕਿ ਸਾਡੇ ਸਾਂਝੇ ਭਵਿੱਖ ਦੀ ਸੰਭਾਲ ਦੀ ਸ਼ੁਰੂਆਤ ਆਪਣੇ ਆਲੇ-ਦੁਆਲੇ ਦੀਆਂ ਥਾਵਾਂ ਅਤੇ ਭਾਈਚਾਰਿਆਂ ਦਾ ਸਤਿਕਾਰ ਕਰਨ ਅਤੇ ਉਨ੍ਹਾਂ ਦੀ ਸੇਵਾ ਕਰਨ ਤੋਂ ਹੁੰਦੀ ਹੈ।
ਰਾਊਂਡ ਸਕੁਏਅਰ ਦੁਨੀਆ ਭਰ ਦੇ 270 ਤੋਂ ਵੱਧ ਸਕੂਲਾਂ ਦਾ ਇੱਕ ਅੰਤਰਰਾਸ਼ਟਰੀ ਨੈੱਟਵਰਕ ਹੈ। ਇਹ ਤਜਰਬੇ ਰਾਹੀਂ ਸਿੱਖਿਆ, ਅੰਤਰਰਾਸ਼ਟਰੀ ਸਾਂਝ, ਲੋਕਤੰਤਰ, ਵਾਤਾਵਰਣ ਸੰਭਾਲ, ਸਾਹਸ, ਲੀਡਰਸ਼ਿਪ ਅਤੇ ਸੇਵਾ ਵਰਗੀਆਂ ਕਦਰਾਂ-ਕੀਮਤਾਂ ਨੂੰ ਉਤਸ਼ਾਹਿਤ ਕਰਦਾ ਹੈ। 2026 ਦੀ ਕਾਨਫਰੰਸ ਇਸ ਨੈੱਟਵਰਕ ਦੀ 60ਵੀਂ ਵਰ੍ਹੇਗੰਢ ਦਾ ਵੀ ਮਹੱਤਵਪੂਰਨ ਮੌਕਾ ਹੈ। ਕਾਨਫਰੰਸ ਦੌਰਾਨ ਕੀਤੀ ਗਈ ਪੌਦੇ ਲਗਾਉਣ ਦੀ ਗਤੀਵਿਧੀ ਹੌਰਨਸਬੀ ਪਾਰਕ ਨੂੰ ਹੋਰ ਬਿਹਤਰ ਬਣਾਉਣ ਦੇ ਚੱਲ ਰਹੇ ਕੰਮ ਵਿੱਚ ਯੋਗਦਾਨ ਪਾਵੇਗੀ। ਇਸ ਨਾਲ ਨਵੇਂ ਜੀਵ-ਜੰਤੂਆਂ ਲਈ ਰਹਿਣ ਵਾਲੀਆਂ ਥਾਵਾਂ ਬਣਾਉਣ, ਜ਼ਮੀਨ ਨੂੰ ਮੁੜ ਸਿਹਤਮੰਦ ਕਰਨ ਅਤੇ ਪਾਣੀ ਦੀ ਗੁਣਵੱਤਾ ਸੁਧਾਰਨ ਵਿੱਚ ਮਦਦ ਮਿਲੇਗੀ। ਇਸ ਦੇ ਨਾਲ ਹੀ ਇੱਥੇ ਆਉਣ ਵਾਲੇ ਭਵਿੱਖ ਦੇ ਸੈਲਾਨੀਆਂ ਲਈ ਵਿਦਿਆਰਥੀਆਂ ਦੀ ਇਹ ਸੇਵਾ ਇੱਕ ਯਾਦਗਾਰ ਵਿਰਾਸਤ ਬਣੀ ਰਹੇਗੀ।