ਆਸਟ੍ਰੇਲੀਆ ਦੇ ਮਸ਼ਹੂਰ ਕੁਦਰਤੀ ਸੈਰ-ਸਪਾਟਾ ਸਥਾਨ ਟਵੈਲਵ ਅਪੋਸਲਜ਼ (Twelve Apostles) ਨੂੰ ਦੇਖਣ ਜਾਣ ਵਾਲੇ ਸੈਲਾਨੀਆਂ ਲਈ ਨਵੇਂ ਨਿਯਮ ਪਰਸੋਂ ਸ਼ੁੱਕਰਵਾਰ 16 ਅਕਤੂਬਰ ਤੋਂ ਲਾਗੂ ਕੀਤੇ ਜਾ ਰਹੇ ਹਨ ਅਤੇ ਸੈਲਾਨੀਆਂ ਨੂੰ ਇੱਥੇ ਜਾਣ ਤੋਂ ਪਹਿਲਾਂ ਬੁਕਿੰਗ ਕਰਵਾਉਣੀ ਪਵੇਗੀ। ਇਸ ਤੋਂ ਇਲਾਵਾ ਅਗਲੇ ਸਾਲ ਅਪ੍ਰੈਲ 2027 ਤੋਂ ਇੱਥੇ ਆਉਣ ਲਈ ਐਂਟਰੀ ਫੀਸ ਵੀ ਲਾਗੂ ਕੀਤੀ ਜਾਵੇਗੀ।
16 ਅਕਤੂਬਰ ਤੋਂ ਸੈਲਾਨੀਆਂ ਲਈ ਖੁੱਲ੍ਹੇਗਾ
ਵਿਕਟੋਰੀਆ ਦੇ ਮਸ਼ਹੂਰ ਸੈਰ-ਸਪਾਟਾ ਸਥਾਨ ‘ਟਵੈਲਵ ਅਪੋਸਲਜ਼’ (Twelve Apostles) ਵਿਖੇ ਨਵਾਂ ਅਤੇ ਸ਼ਾਨਦਾਰ ਵਿਜ਼ਟਰ ਸੈਂਟਰ ਤਿਆਰ ਹੋ ਗਿਆ ਹੈ। ਨਵਾਂ ਵਿਜ਼ਟਰ ਸੈਂਟਰ 16 ਅਕਤੂਬਰ 2027 ਤੋਂ ਸੈਲਾਨੀਆਂ ਲਈ ਖੋਲ੍ਹਿਆ ਜਾਵੇਗਾ। ਇੱਥੇ ਆਉਣ ਲਈ ਬੁਕਿੰਗ ਪ੍ਰਣਾਲੀ ਸ਼ੁਰੂ ਹੋ ਚੁੱਕੀ ਹੈ। ਨਵੇਂ ਕੀਰੇ ਵੂਰਰੁੰਗ (Keerray Woorroong) ਵਿਜ਼ਟਰ ਸੈਂਟਰ ਦੇ ਖੁੱਲ੍ਹਣ ਨਾਲ ਨਵੇਂ ਨਿਯਮ ਲਾਗੂ ਹੋ ਰਹੇ ਹਨ। ਸੈਲਾਨੀਆਂ ਲਈ ਅਪ੍ਰੈਲ 2027 ਤੱਕ ਬੁਕਿੰਗ ਮੁਫ਼ਤ ਰਹੇਗੀ। ਇਸ ਤੋਂ ਬਾਅਦ ਬੁਕਿੰਗ ਲਈ ਫੀਸ ਲਾਗੂ ਕੀਤੀ ਜਾਵੇਗੀ। ਹਾਲਾਂਕਿ, ਸਰਕਾਰ ਨੇ ਅਜੇ ਤੱਕ ਇਹ ਨਹੀਂ ਦੱਸਿਆ ਕਿ ਐਂਟਰੀ ਫੀਸ ਕਿੰਨੀ ਹੋਵੇਗੀ। ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਫੀਸ ਬਹੁਤ ਘੱਟ ਰੱਖੀ ਜਾਵੇਗੀ ਅਤੇ ਇਸ ਤੋਂ ਮਿਲਣ ਵਾਲੀ ਸਾਰੀ ਰਕਮ ਗ੍ਰੇਟ ਓਸ਼ਨ ਰੋਡ ਦੇ ਤੱਟਵਰਤੀ ਇਲਾਕਿਆਂ ਅਤੇ ਪਾਰਕਾਂ ਦੀ ਸੰਭਾਲ ਤੇ ਸੁਧਾਰ ਲਈ ਵਰਤੀ ਜਾਵੇਗੀ। ਇਸ ਨਵੇਂ ਸੈਂਟਰ ਦਾ ਨਾਮ ‘ਕੀਰੇ ਵੂਰਰੁੰਗ’ (Keerray Woorroong) ਵਿਜ਼ਟਰ ਸੈਂਟਰ ਰੱਖਿਆ ਗਿਆ ਹੈ। ਇਹ ਸੈਂਟਰ ਵਿਸ਼ਵ ਪ੍ਰਸਿੱਧ ਗ੍ਰੇਟ ਓਸ਼ਨ ਰੋਡ ਦੇ ਨੇੜੇ ਸਥਿਤ ਹੈ। ਇਹ ਇਲਾਕਾ ਆਪਣੀ ਕੁਦਰਤੀ ਸੁੰਦਰਤਾ, ਸਮੁੰਦਰ ਦੀਆਂ ਉੱਚੀਆਂ ਲਹਿਰਾਂ ਅਤੇ ਚੂਨੇ ਪੱਥਰ ਦੀਆਂ ਵਿਸ਼ਾਲ ਚੱਟਾਨਾਂ ਲਈ ਦੁਨੀਆ ਭਰ ਵਿੱਚ ਜਾਣਿਆ ਜਾਂਦਾ ਹੈ। ਇਸ ਪ੍ਰਾਜੈਕਟ ’ਤੇ 126 ਮਿਲੀਅਨ ਡਾਲਰ ਖਰਚ ਕੀਤੇ ਗਏ ਹਨ, ਜਿਸ ਵਿੱਚ ਆਸਟ੍ਰੇਲੀਆ ਦੀ ਫੈਡਰਲ ਸਰਕਾਰ ਨੇ 88 ਮਿਲੀਅਨ ਡਾਲਰ ਅਤੇ ਵਿਕਟੋਰੀਆ ਸਰਕਾਰ ਨੇ 38 ਮਿਲੀਅਨ ਡਾਲਰ ਦਿੱਤੇ ਹਨ। ਇਸ ਦਾ ਮਕਸਦ ਹਰ ਸਾਲ ਇੱਥੇ ਆਉਣ ਵਾਲੇ ਲੱਖਾਂ ਸੈਲਾਨੀਆਂ ਨੂੰ ਬਿਹਤਰ ਸਹੂਲਤਾਂ ਦੇਣਾ, ਸਥਾਨਕ ਕਾਰੋਬਾਰਾਂ ਨੂੰ ਉਤਸ਼ਾਹਿਤ ਕਰਨਾ ਅਤੇ ਵਿਕਟੋਰੀਆ ਦੇ ਸੈਰ-ਸਪਾਟਾ ਖੇਤਰ ਨੂੰ ਹੋਰ ਮਜ਼ਬੂਤ ਕਰਨਾ ਹੈ।
ਦੁਨੀਆ ਭਰ ਦੇ ਸੈਲਾਨੀਆਂ ਲਈ ਖਿੱਚ ਦਾ ਕੇਂਦਰ
ਟਵੈਲਵ ਅਪੋਸਲਜ਼ ਆਸਟ੍ਰੇਲੀਆ ਦੇ ਸਭ ਤੋਂ ਮਸ਼ਹੂਰ ਕੁਦਰਤੀ ਨਜ਼ਾਰਿਆਂ ਵਿੱਚੋਂ ਇੱਕ ਹੈ। ਇਸ ਸਥਾਨ ਦੀ ਖ਼ਾਸ ਪਛਾਣ ਸਮੁੰਦਰ ਵਿੱਚੋਂ ਉੱਠਦੀਆਂ ਚੂਨੇ ਪੱਥਰ ਦੀਆਂ ਵਿਸ਼ਾਲ ਚੱਟਾਨਾਂ ਹਨ। ਸਮੁੰਦਰੀ ਲਹਿਰਾਂ ਅਤੇ ਹਵਾਵਾਂ ਦੇ ਲੰਬੇ ਸਮੇਂ ਤੱਕ ਪੈਣ ਵਾਲੇ ਅਸਰ ਕਾਰਨ ਇਹ ਚੱਟਾਨਾਂ ਬਣੀਆਂ ਹਨ। ਸਮੇਂ ਦੇ ਨਾਲ ਇਨ੍ਹਾਂ ਵਿੱਚੋਂ ਕਈ ਚੱਟਾਨਾਂ ਢਹਿ ਗਈਆਂ ਹਨ ਅਤੇ ਹੁਣ ਇੱਥੇ ਸੱਤ ਵੱਡੀਆਂ ਚੱਟਾਨਾਂ ਬਾਕੀ ਹਨ। ਇਹ ਵਿਕਟੋਰੀਆ ਦੇ ਦੱਖਣ-ਪੱਛਮੀ ਤੱਟ ’ਤੇ ਗ੍ਰੇਟ ਓਸ਼ਨ ਰੋਡ ਦੇ ਨਾਲ ਸਥਿਤ ਹੈ ਅਤੇ ਮੈਲਬੌਰਨ ਤੋਂ ਕਾਰ ਰਾਹੀਂ ਇੱਥੇ ਪਹੁੰਚਣ ਲਈ ਲਗਭਗ ਚਾਰ ਘੰਟੇ ਲੱਗਦੇ ਹਨ। ਹਰ ਸਾਲ 20 ਲੱਖ ਤੋਂ ਵੱਧ ਲੋਕ ਇਸ ਕੁਦਰਤੀ ਨਜ਼ਾਰੇ ਨੂੰ ਦੇਖਣ ਲਈ ਗ੍ਰੇਟ ਓਸ਼ਨ ਰੋਡ ਰਾਹੀਂ ਇੱਥੇ ਪਹੁੰਚਦੇ ਹਨ। ਇਸ ਵੱਡੀ ਗਿਣਤੀ ਨੂੰ ਧਿਆਨ ਵਿੱਚ ਰੱਖਦਿਆਂ ਨਵਾਂ ਵਿਜ਼ਟਰ ਸੈਂਟਰ ਤਿਆਰ ਕੀਤਾ ਗਿਆ ਹੈ। ਇਸ ਵਿੱਚ ਖਾਣ-ਪੀਣ, ਜਾਣਕਾਰੀ, ਪ੍ਰਦਰਸ਼ਨੀਆਂ ਅਤੇ ਆਰਾਮ ਲਈ ਵੱਖ-ਵੱਖ ਸਹੂਲਤਾਂ ਮੁਹੱਈਆ ਕਰਵਾਈਆਂ ਗਈਆਂ ਹਨ। ਸੈਂਟਰ ਦਾ ਉਦੇਸ਼ ਸਿਰਫ਼ ਸੈਲਾਨੀਆਂ ਨੂੰ ਸਹੂਲਤਾਂ ਦੇਣਾ ਹੀ ਨਹੀਂ, ਸਗੋਂ ਉਨ੍ਹਾਂ ਨੂੰ ਇਸ ਇਲਾਕੇ ਦੀ ਕੁਦਰਤੀ ਖੂਬਸੂਰਤੀ, ਇਤਿਹਾਸ ਅਤੇ ਮੂਲ ਨਿਵਾਸੀ ਲੋਕਾਂ ਦੇ ਸੱਭਿਆਚਾਰ ਨਾਲ ਵੀ ਜਾਣੂ ਕਰਵਾਉਣਾ ਹੈ।
ਸੈਂਟਰ ਵਿੱਚ ਮਿਲਣਗੀਆਂ ਆਧੁਨਿਕ ਸਹੂਲਤਾਂ
ਨਵੇਂ ਵਿਜ਼ਟਰ ਸੈਂਟਰ ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਵੱਖ-ਵੱਖ ਉਮਰਾਂ ਦੇ ਲੋਕ ਇੱਥੇ ਆ ਕੇ ਆਰਾਮ ਨਾਲ ਸਮਾਂ ਬਿਤਾਅ ਸਕਣ। ਇਸ ਸੈਂਟਰ ਦੀਆਂ ਮੁੱਖ ਸਹੂਲਤਾਂ ਵਿੱਚ ਸ਼ਾਮਲ ਹਨ:
- 230 ਲੋਕਾਂ ਲਈ ਕੈਫੇ: ਇੱਥੇ ਸੈਲਾਨੀ ਬੈਠ ਕੇ ਖਾਣ-ਪੀਣ ਦਾ ਆਨੰਦ ਲੈ ਸਕਣਗੇ।
- ਕਿਓਸਕ: ਛੋਟੀਆਂ ਦੁਕਾਨਾਂ ਰਾਹੀਂ ਸੈਲਾਨੀਆਂ ਨੂੰ ਲੋੜੀਂਦੀਆਂ ਚੀਜ਼ਾਂ ਮਿਲ ਸਕਣਗੀਆਂ।
- ਪ੍ਰਦਰਸ਼ਨੀ ਹਾਲ: ਇੱਥੇ ਸੱਭਿਆਚਾਰ, ਇਤਿਹਾਸ ਅਤੇ ਇਲਾਕੇ ਨਾਲ ਸਬੰਧਤ ਜਾਣਕਾਰੀ ਪੇਸ਼ ਕੀਤੀ ਜਾਵੇਗੀ।
- ਸੈਲਾਨੀ ਜਾਣਕਾਰੀ ਕੇਂਦਰ: ਇੱਥੇ ਲੋਕਾਂ ਨੂੰ ਇਲਾਕੇ, ਸੈਰ-ਸਪਾਟੇ ਅਤੇ ਉਪਲਬਧ ਸਹੂਲਤਾਂ ਬਾਰੇ ਜਾਣਕਾਰੀ ਮਿਲੇਗੀ।
- ਛੱਤ ਉੱਤੇ ਨਜ਼ਾਰਾ ਦੇਖਣ ਦੀ ਥਾਂ: ਇੱਥੋਂ ਸੈਲਾਨੀ ਆਲੇ-ਦੁਆਲੇ ਦੇ ਸੁੰਦਰ ਦ੍ਰਿਸ਼ ਦੇਖ ਸਕਣਗੇ।
- ਕੁਦਰਤੀ ਬਗੀਚੇ ਅਤੇ ਬੈਠਣ ਦੀਆਂ ਥਾਵਾਂ: ਇਮਾਰਤ ਦੇ ਆਲੇ-ਦੁਆਲੇ ਦੇਸੀ ਪੌਦਿਆਂ ਵਾਲੇ ਬਗੀਚੇ ਅਤੇ ਲੋਕਾਂ ਦੇ ਇਕੱਠੇ ਹੋਣ ਲਈ ਥਾਵਾਂ ਬਣਾਈਆਂ ਗਈਆਂ ਹਨ।
- ਸਮੁੰਦਰੀ ਤੱਟ ਤੱਕ ਜਾਣ ਵਾਲੇ ਰਸਤੇ: ਸੈਲਾਨੀਆਂ ਲਈ ਤੱਟ ਵੱਲ ਜਾਣ ਵਾਸਤੇ ਰਸਤੇ ਤਿਆਰ ਕੀਤੇ ਗਏ ਹਨ।
- 950 ਤੋਂ ਵੱਧ ਵਾਹਨਾਂ ਲਈ ਪਾਰਕਿੰਗ: ਇੱਥੇ ਵੱਡੀ ਗਿਣਤੀ ਵਿੱਚ ਕਾਰਾਂ ਖੜ੍ਹੀਆਂ ਕਰਨ ਦੀ ਸਹੂਲਤ ਹੋਵੇਗੀ।
ਇਨ੍ਹਾਂ ਸਹੂਲਤਾਂ ਨਾਲ ਸੈਲਾਨੀਆਂ ਨੂੰ ਇੱਕੋ ਥਾਂ ’ਤੇ ਕਈ ਲੋੜੀਂਦੀਆਂ ਸੇਵਾਵਾਂ ਮਿਲਣਗੀਆਂ ਅਤੇ ਉਨ੍ਹਾਂ ਦਾ ਦੌਰਾ ਹੋਰ ਆਰਾਮਦਾਇਕ ਹੋ ਸਕੇਗਾ।
‘ਕੀਰੇ ਵੂਰਰੁੰਗ’ ਨਾਮ ਰਾਹੀਂ ਮੂਲ ਨਿਵਾਸੀ ਸੱਭਿਆਚਾਰ ਨੂੰ ਸਨਮਾਨ
ਇਸ ਵਿਜ਼ਟਰ ਸੈਂਟਰ ਦੀ ਇੱਕ ਖ਼ਾਸ ਗੱਲ ਇਸ ਦਾ ਨਾਮ ਹੈ। ‘ਕੀਰੇ ਵੂਰਰੁੰਗ’ ਇਸ ਇਲਾਕੇ ਦੇ ਫਸਟ ਨੇਸ਼ਨਜ਼ ਲੋਕਾਂ ਦੀ ਧਰਤੀ ਅਤੇ ਭਾਸ਼ਾ ਦਾ ਨਾਮ ਹੈ। ਇਹ ਨਾਮ ਰੱਖ ਕੇ ਇਲਾਕੇ ਦੇ ਰਵਾਇਤੀ ਮਾਲਕਾਂ ਅਤੇ ਉਨ੍ਹਾਂ ਦੀ ਸੱਭਿਆਚਾਰਕ ਵਿਰਾਸਤ ਨਾਲ ਜੁੜਾਅ ਨੂੰ ਸਨਮਾਨ ਦਿੱਤਾ ਗਿਆ ਹੈ। ਸੈਂਟਰ ਦੇ ਡਿਜ਼ਾਈਨ ਵਿੱਚ ਮੂਲ ਨਿਵਾਸੀ ਲੋਕਾਂ ਦੇ ਸੱਭਿਆਚਾਰ ਨੂੰ ਵਿਸ਼ੇਸ਼ ਥਾਂ ਦਿੱਤੀ ਗਈ ਹੈ। ਇੱਥੇ ਮਹੱਤਵਪੂਰਨ ਵਸਤਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਵਿਸ਼ੇਸ਼ ਥਾਵਾਂ ਬਣਾਈਆਂ ਗਈਆਂ ਹਨ। ਇਮਾਰਤ ਦੇ ਵਿਚਕਾਰ ਛੱਤ ਵਿੱਚ ਬਣਾਈ ਗਈ ਖਿੜਕੀ ਰਾਹੀਂ ਅਸਮਾਨ ਨਾਲ ਜੁੜਾਅ ਨੂੰ ਦਰਸਾਇਆ ਗਿਆ ਹੈ। ਇਸ ਤੋਂ ਇਲਾਵਾ, ‘ਕੂਯਾਂਗ’ (Kooyang), ਯਾਨੀ ਛੋਟੇ ਖੰਭ ਵਾਲੀ ਈਲ ਮੱਛੀ, ਨਾਲ ਸਬੰਧਤ ਇੱਕ ਕਲਾਕ੍ਰਿਤੀ ਵੀ ਬਗੀਚਿਆਂ ਦੇ ਡਿਜ਼ਾਈਨ ਵਿੱਚ ਸ਼ਾਮਲ ਕੀਤੀ ਗਈ ਹੈ। ਇਨ੍ਹਾਂ ਪ੍ਰਬੰਧਾਂ ਦਾ ਮਕਸਦ ਸੈਲਾਨੀਆਂ ਨੂੰ ਇਸ ਖੇਤਰ ਦੇ ਮੂਲ ਨਿਵਾਸੀ ਲੋਕਾਂ ਦੇ ਸੱਭਿਆਚਾਰ, ਇਤਿਹਾਸ ਅਤੇ ਧਰਤੀ ਨਾਲ ਉਨ੍ਹਾਂ ਦੇ ਡੂੰਘੇ ਰਿਸ਼ਤੇ ਬਾਰੇ ਜਾਣਨ ਦਾ ਮੌਕਾ ਦੇਣਾ ਹੈ। ਇਹ ਸੈਂਟਰ ਸੈਲਾਨੀਆਂ ਵਿੱਚ ਈਸਟਰਨ ਮਾਰ ਲੋਕਾਂ ਦੇ ਸੱਭਿਆਚਾਰ, ਇਤਿਹਾਸ ਅਤੇ ਆਪਣੀ ਧਰਤੀ ਨਾਲ ਜੁੜਾਅ ਬਾਰੇ ਹੋਰ ਜਾਣਨ ਦੀ ਦਿਲਚਸਪੀ ਪੈਦਾ ਕਰੇਗਾ।
ਸਥਾਨਕ ਕਾਰੋਬਾਰਾਂ ਅਤੇ ਰੁਜ਼ਗਾਰ ਨੂੰ ਮਿਲੇਗਾ ਫਾਇਦਾ
ਇਸ ਪ੍ਰਾਜੈਕਟ ਨੂੰ ਵਿਕਟੋਰੀਆ ਦੇ ਖੇਤਰੀ ਇਲਾਕਿਆਂ ਦੀ ਆਰਥਿਕਤਾ ਲਈ ਵੀ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ।
ਵਿਕਟੋਰੀਆ ਦਾ ਸੈਰ-ਸਪਾਟਾ ਖੇਤਰ ਸੂਬੇ ਦੀ ਆਰਥਿਕਤਾ ਵਿੱਚ ਇਹ ਵੱਡਾ ਯੋਗਦਾਨ ਪਾਉਂਦਾ ਹੈ। ਜਾਰੀ ਕੀਤੀ ਗਈ ਜਾਣਕਾਰੀ ਮੁਤਾਬਕ, ਸੂਬੇ ਦੀ ਸੈਲਾਨੀ ਆਰਥਿਕਤਾ ਦਾ ਮੁੱਲ 49.5 ਬਿਲੀਅਨ ਡਾਲਰ ਹੈ ਅਤੇ ਇਹ 3 ਲੱਖ 20 ਹਜ਼ਾਰ ਤੋਂ ਵੱਧ ਨੌਕਰੀਆਂ ਨੂੰ ਸਹਾਰਾ ਦਿੰਦੀ ਹੈ। ਨਵੇਂ ਵਿਜ਼ਟਰ ਸੈਂਟਰ ਦੀ ਉਸਾਰੀ ਦੌਰਾਨ ਸੈਂਕੜੇ ਕਾਰੀਗਰਾਂ, ਉਸਾਰੀ ਕਾਮਿਆਂ ਅਤੇ ਕਾਰੋਬਾਰਾਂ ਨੇ ਕੰਮ ਕੀਤਾ। ਇਸ ਨਾਲ ਸੂਬੇ ਦੇ ਉਸਾਰੀ ਖੇਤਰ ਨੂੰ ਕੰਮ ਮਿਲਿਆ ਅਤੇ ਅਪ੍ਰੈਂਟਿਸਾਂ ਨੂੰ ਸਿਖਲਾਈ ਤੇ ਤਜਰਬਾ ਹਾਸਲ ਕਰਨ ਦੇ ਮੌਕੇ ਵੀ ਮਿਲੇ। ਹੁਣ ਸੈਂਟਰ ਵਿੱਚ ਲਗਭਗ 100 ਸਥਾਨਕ ਲੋਕਾਂ ਨੂੰ ਰੁਜ਼ਗਾਰ ਮਿਲਿਆ ਹੋਇਆ ਹੈ। ਇਸ ਦੇ ਰੋਜ਼ਾਨਾ ਕੰਮਾਂ ਲਈ ਸਥਾਨਕ ਉਤਪਾਦਕਾਂ ਅਤੇ ਕਾਰੋਬਾਰਾਂ ਦੀਆਂ ਸੇਵਾਵਾਂ ਵੀ ਲਈਆਂ ਜਾ ਰਹੀਆਂ ਹਨ। ਉਮੀਦ ਹੈ ਕਿ ਸੈਲਾਨੀਆਂ ਦੀ ਵਧਦੀ ਆਮਦ ਨਾਲ ਨੇੜਲੇ ਕਸਬਿਆਂ ਦੇ ਕੈਫੇ, ਰੈਸਟੋਰੈਂਟਾਂ, ਦੁਕਾਨਾਂ, ਰਹਿਣ ਦੀਆਂ ਥਾਵਾਂ ਅਤੇ ਹੋਰ ਸੈਰ-ਸਪਾਟਾ ਕਾਰੋਬਾਰਾਂ ਨੂੰ ਵੀ ਲਾਭ ਮਿਲੇਗਾ।
676 ਮਿਲੀਅਨ ਡਾਲਰ ਦੇ ਵੱਡੇ ਪ੍ਰਾਜੈਕਟ ਦਾ ਹਿੱਸਾ
ਨਵਾਂ ਵਿਜ਼ਟਰ ਸੈਂਟਰ ‘ਟਵੈਲਵ ਅਪੋਸਲਜ਼ ਪ੍ਰੀਸਿੰਕਟ ਰੀਡਿਵੈਲਪਮੈਂਟ’ ਨਾਮਕ ਵੱਡੇ ਵਿਕਾਸ ਪ੍ਰਾਜੈਕਟ ਦਾ ਹਿੱਸਾ ਹੈ। ਇਸ ਪੂਰੇ ਪ੍ਰਾਜੈਕਟ ਲਈ ਵਿਕਟੋਰੀਆ ਸਰਕਾਰ, ਆਸਟ੍ਰੇਲੀਆ ਦੀ ਫੈਡਰਲ ਸਰਕਾਰ ਅਤੇ ਸਿਟੀ ਆਫ ਗ੍ਰੇਟਰ ਜੀਲੌਂਗ ਵਿਚਕਾਰ 676 ਮਿਲੀਅਨ ਡਾਲਰ ਦੀ ਭਾਈਵਾਲੀ ਕੀਤੀ ਗਈ ਹੈ। ਇਸ ਸੈਂਟਰ ਦਾ ਸੰਚਾਲਨ ਗ੍ਰੇਟ ਓਸ਼ਨ ਰੋਡ ਕੋਸਟ ਐਂਡ ਪਾਰਕਸ ਅਥਾਰਟੀ (GORCAPA) ਵੱਲੋਂ ਕੀਤਾ ਜਾਵੇਗਾ। ਸਰਕਾਰਾਂ ਦਾ ਕਹਿਣਾ ਹੈ ਕਿ ਇਸ ਵਿਕਾਸ ਨਾਲ ਸੈਰ-ਸਪਾਟੇ ਨੂੰ ਉਤਸ਼ਾਹ ਮਿਲਣ ਦੇ ਨਾਲ-ਨਾਲ ਕੁਦਰਤੀ ਵਾਤਾਵਰਣ ਅਤੇ ਤੱਟਵਰਤੀ ਇਲਾਕਿਆਂ ਦੀ ਸੁਰੱਖਿਆ ਵੱਲ ਵੀ ਧਿਆਨ ਦਿੱਤਾ ਜਾਵੇਗਾ।
ਟਵੈਲਵ ਅਪੋਸਲਜ਼ ਪਹਿਲਾਂ ਹੀ ਦੁਨੀਆ ਭਰ ਦੇ ਸੈਲਾਨੀਆਂ ਲਈ ਖਿੱਚ ਦਾ ਕੇਂਦਰ ਹੈ। ਨਵੇਂ ਸੈਂਟਰ ਨਾਲ ਉਮੀਦ ਹੈ ਕਿ ਸੈਲਾਨੀਆਂ ਨੂੰ ਹੋਰ ਚੰਗੀਆਂ ਸਹੂਲਤਾਂ ਮਿਲਣਗੀਆਂ, ਉਹ ਇਲਾਕੇ ਵਿੱਚ ਵਧੇਰੇ ਸਮਾਂ ਬਿਤਾਉਣਗੇ ਅਤੇ ਸਥਾਨਕ ਕਾਰੋਬਾਰਾਂ ਨੂੰ ਵੀ ਲਾਭ ਹੋਵੇਗਾ। ਟਵੈਲਵ ਅਪੋਸਲਜ਼ ਜਾਣ ਤੋਂ ਪਹਿਲਾਂ ਬੁਕਿੰਗ ਕਰਵਾਉਣੀ ਲਾਜ਼ਮੀ ਹੈ। ਪਾਰਕਿੰਗ ਲਈ ਵੀ ਪਹਿਲਾਂ ਤੋਂ ਬੁਕਿੰਗ ਕਰਨੀ ਪਵੇਗੀ। ਵਧੇਰੇ ਜਾਣਕਾਰੀ ਅਤੇ ਬੁਕਿੰਗ ਲਈ ਵੈੱਬਸਾਈਟ ਵੇਖੋ: www.twelveapostles.org.au.