ਵਿਸ਼ਾਖਾਪਟਨਮ – ਆਂਧਰਾ ਪ੍ਰਦੇਸ਼ ਦੇ ਅਲੂਰੀ ਸੀਤਾਰਾਮ ਰਾਜੂ ਜ਼ਿਲ੍ਹੇ ’ਚ ਅੱਜ ਤੜਕੇ ਇਕ ਸੜਕ ਹਾਦਸੇ ਵਿਚ ਪੰਜ ਲੋਕਾਂ ਦੀ ਮੌਤ ਹੋ ਗਈ ਤੇ ਸੱਤ ਹੋਰ ਜ਼ਖਮੀ ਹੋ ਗਏ। ਪੁਲਿਸ ਨੇ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜ਼ਿਲ੍ਹੇ ਦੇ ਚਿੰਤਰੂ ਮੰਡਲ ਵਿੱਚ ਨੇੜੇ ਇਕ ਨਿੱਜੀ ਬੱਸ ਪਲਟ ਗਈ। ਬੱਸ 60 ਯਾਤਰੀਆਂ ਨੂੰ ਲੈ ਕੇ ਉੜੀਸਾ ਦੇ ਚਿੰਨਾਪੱਲੀ ਤੋਂ ਵਿਜੈਵਾੜਾ ਜਾ ਰਹੀ ਸੀ। ਇਹ ਹਾਦਸਾ ਉਸ ਸਮੇਂ ਵਾਪਰਿਆ, ਜਦੋਂ ਡਰਾਈਵਰ ਨੇ ਮੋੜ ’ਤੇ ਗੱਲ ਕਰਦੇ ਸਮੇਂ ਗੱਡੀ ਦਾ ਕੰਟਰੋਲ ਗੁਆ ਦਿੱਤਾ।
ਰਾਹਗੀਰਾਂ ਦੀ ਸੂਚਨਾ ’ਤੇ ਪੁਲਸ ਨੇ ਮੌਕੇ ’ਤੇ ਪਹੁੰਚ ਕੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਦੱਸਿਆ ਜਾ ਰਿਹਾ ਹੈ ਕਿ ਤਿੰਨ ਲੋਕਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦੋਂਕਿ ਦੋ ਹੋਰਾਂ ਨੇ ਗੁਆਂਢੀ ਤੇਲੰਗਾਨਾ ਸੂਬੇ ਦੇ ਭਦਰਾਚਲਮ ਦੇ ਸਰਕਾਰੀ ਹਸਪਤਾਲ ’ਚ ਦਮ ਤੋੜ ਦਿੱਤਾ। ਸਾਰੇ ਓਡੀਸਾ ਦੇ ਰਹਿਣ ਵਾਲੇ ਹਨ।
ਮਿ੍ਰਤਕਾਂ ਵਿੱਚੋਂ ਤਿੰਨ ਦੀ ਪਛਾਣ ਧਨੇਸ਼ਵਰ ਦਲਪਤੀ (24), ਜੀਤੂ ਹਰੀਜਨ (5) ਅਤੇ ਨੁਨੇਨਾ ਹਰੀਜਨ (2) ਵਜੋਂ ਹੋਈ ਹੈ। ਬੱਸ ’ਚ ਸਾਰੇ ਲੋਕ ਮਜਦੂਰ ਸਨ। ਉਹ ਕੰਮ ਕਰਨ ਲਈ ਵਿਜੈਵਾੜਾ ਆ ਰਹੇ ਸਨ। ਸੜਕ ਹਾਦਸੇ ’ਚ ਬਚੇ ਲੋਕਾਂ ਨੇ ਦੋਸ਼ ਲਗਾਇਆ ਕਿ ਬੱਸ ਡਰਾਈਵਰ ਸ਼ਰਾਬ ਦੇ ਨਸ਼ੇ ’ਚ ਸੀ ਅਤੇ ਜਲਦਬਾਜ਼ੀ ’ਚ ਗੱਡੀ ਚਲਾ ਰਿਹਾ ਸੀ। ਪੁਲਿਸ ਨੇ ਦੱਸਿਆ ਕਿ ਮਾਮਲਾ ਦਰਜ ਕਰ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।