ਨਵੀਂ ਦਿੱਲੀ – ਇੰਡੀਅਨ ਪ੍ਰੀਮੀਅਰ ਲੀਗ ਦੇ 46ਵੇਂ ਮੈਚ ‘ਚ ਜਿਵੇਂ ਹੀ ਨਵੇਂ ਕਪਤਾਨ ਧੋਨੀ ਦੀ ਅਗਵਾਈ ‘ਚ ਚੇਨਈ ਦੀ ਟੀਮ ਦਾ ਐਲਾਨ ਹੋਇਆ, ਟੀਮ ‘ਚ ਇਕ ਨਾਂ ਨੇ ਹੈਰਾਨ ਕਰ ਦਿੱਤਾ। ਦਰਅਸਲ ਇਸ ਮੈਚ ‘ਚ ਬ੍ਰਾਵੋ ਦੀ ਬਜਾਏ ਟੀਮ ਨੇ ਸਿਮਰਨਜੀਤ ਸਿੰਘ ਨੂੰ ਮੌਕਾ ਦਿੱਤਾ ਸੀ। ਬ੍ਰਾਵੋ ਇਸ ਸੀਜ਼ਨ ‘ਚ ਚੇਨਈ ਲਈ ਸਭ ਤੋਂ ਸਫਲ ਗੇਂਦਬਾਜ਼ ਰਹੇ ਹਨ। ਉਸ ਨੇ 8 ਮੈਚਾਂ ਵਿਚ 8.73 ਦੀ ਇਕਾਨਮੀ ਰੇਟ ਨਾਲ 14 ਵਿਕਟਾਂ ਲਈਆਂ ਹਨ।
ਬ੍ਰਾਵੋ ਦੀ ਜਗ੍ਹਾ ਹੈਦਰਾਬਾਦ ਖ਼ਿਲਾਫ਼ ਆਪਣਾ ਡੈਬਿਊ ਕਰਨ ਵਾਲੇ ਸਿਮਰਨਜੀਤ ਸਿੰਘ ਮੱਧਮ ਤੇਜ਼ ਗੇਂਦਬਾਜ਼ ਹਨ। ਘਰੇਲੂ ਕ੍ਰਿਕਟ ਦੀ ਗੱਲ ਕਰੀਏ ਤਾਂ ਉਹ ਦਿੱਲੀ ਟੀਮ ਲਈ ਖੇਡਦਾ ਹੈ। ਆਪਣੇ ਟੀ-20 ਕਰੀਅਰ ਦੀ ਗੱਲ ਕਰੀਏ ਤਾਂ ਉਸ ਨੇ 20 ਟੀ-20 ਮੈਚ ਖੇਡੇ ਹਨ, ਜਿਸ ਵਿਚ ਉਸ ਨੇ 20.33 ਦੀ ਔਸਤ, 7.43 ਦੀ ਇਕਾਨਮੀ ਰੇਟ ਅਤੇ 16.3 ਦੀ ਸਟ੍ਰਾਈਕ ਰੇਟ ਨਾਲ 24 ਵਿਕਟਾਂ ਲਈਆਂ ਹਨ।
ਸਿਮਰਜੀਤ ਸਿੰਘ ਪਹਿਲੀ ਵਾਰ ਭਾਰਤੀ ਟੀਮ ਦੇ ਸ਼੍ਰੀਲੰਕਾ ਦੌਰੇ ਦੌਰਾਨ ਸੁਰਖ਼ੀਆਂ ਵਿੱਚ ਆਏ ਸਨ। ਦਰਅਸਲ ਜਦੋਂ ਭਾਰਤੀ ਟੀਮ ਪਿਛਲੇ ਸਾਲ ਸ਼੍ਰੀਲੰਕਾ ਦੇ ਦੌਰੇ ‘ਤੇ ਗਈ ਸੀ, ਤਾਂ ਸਿਮਰਜੀਤ ਸਿੰਘ ਵੀ ਟੀਮ ਦਾ ਸਾਥ ਦੇਣ ਵਾਲੇ ਪੰਜ ਨੈੱਟ ਗੇਂਦਬਾਜ਼ਾਂ ‘ਚੋਂ ਇੱਕ ਸੀ।
ਹੈਦਰਾਬਾਦ ਦੇ ਖ਼ਿਲਾਫ਼ ਚੇਨਈ ਲਈ ਆਈਪੀਐਲ ਦੀ ਸ਼ੁਰੂਆਤ ਕਰਨ ਵਾਲੇ ਸਿਮਰਜੀਤ ਸਿੰਘ ਲਈ ਆਈਪੀਐਲ ਵਿੱਚ ਇਹ ਦੂਜਾ ਸਾਲ ਹੈ। ਇਸ ਤੋਂ ਪਹਿਲਾਂ, 2021 ਆਈਪੀਐਲ ਦੇ ਦੂਜੇ ਪੜਾਅ ਵਿੱਚ, ਉਸ ਨੂੰ ਮੁੰਬਈ ਇੰਡੀਅਨਜ਼ ਨੇ ਸਚਿਨ ਦੇ ਪੁੱਤਰ ਅਰਜੁਨ ਤੇਂਦੁਲਕਰ ਦੇ ਬਦਲ ਵਜੋਂ ਸ਼ਾਮਲ ਕੀਤਾ ਸੀ। ਪਰ ਉਸ ਨੂੰ ਉੱਥੇ ਇੱਕ ਵੀ ਮੈਚ ਖੇਡਣ ਦਾ ਮੌਕਾ ਨਹੀਂ ਮਿਲਿਆ।ਫਰਵਰੀ ‘ਚ ਹੋਈ ਮੈਗਾ ਨਿਲਾਮੀ ‘ਚ ਚੇਨਈ ਦੀ ਟੀਮ ਨੇ ਉਸ ‘ਤੇ ਭਰੋਸਾ ਕੀਤਾ ਅਤੇ 24 ਸਾਲਾ ਗੇਂਦਬਾਜ਼ ਨੂੰ 20 ਲੱਖ ਦੀ ਬੇਸ ਕੀਮਤ ‘ਤੇ ਟੀਮ ‘ਚ ਸ਼ਾਮਲ ਕੀਤਾ ਗਿਆ।