ਵ੍ਹਾਈਟ ਹਾਊਸ ਨੇ ਵਰਜੀਨੀਆ ਦੇ ਸਾਬਕਾ ਕਾਂਗਰਸਮੈਨ ਡੇਵਿਡ ਬ੍ਰੈਟ ਨੂੰ ਆਸਟ੍ਰੇਲੀਆ ਵਿੱਚ ਅਗਲਾ ਅਮਰੀਕੀ ਰਾਜਦੂਤ ਨਾਮਜ਼ਦ ਕੀਤਾ ਹੈ। ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਾਬਕਾ ਰਿਪਬਲਿਕਨ ਕਾਂਗਰਸਮੈਨ ਨੂੰ ਆਸਟ੍ਰੇਲੀਆ ਵਿੱਚ ਨਵਾਂ ਅਮਰੀਕੀ ਰਾਜਦੂਤ ਨਿਯੁਕਤ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਨਿਯੁਕਤੀ ਨਾਲ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਇਸ ਅਹੁਦੇ ਨੂੰ ਪੂਰਾ ਕਰਨ ਲਈ 15 ਮਹੀਨਿਆਂ ਦੀ ਉਡੀਕ ਖਤਮ ਹੋ ਗਈ ਹੈ। ਕੈਨਬਰਾ ਦੇ ਵਿੱਚ ਰਾਜਦੂਤ ਦਾ ਅਹੁਦਾ ਪਿਛਲੇ ਲਗਭਗ 15 ਮਹੀਨਿਆਂ ਤੋਂ ਖਾਲੀ ਹੈ। ਆਸਟ੍ਰੇਲੀਆ ਵਿੱਚ ਅਹੁਦਾ ਸੰਭਾਲਣ ਤੋਂ ਪਹਿਲਾਂ ਬ੍ਰੈਟ ਨੂੰ ਅਮਰੀਕੀ ਸੈਨੇਟ ਤੋਂ ਸਹਿਮਤੀ ਪ੍ਰਾਪਤ ਕਰਨੀ ਪਵੇਗੀ।
ਡੇਵਿਡ ਬ੍ਰੈਟ 2014 ਵਿੱਚ ਇੱਕ ਟੀ ਪਾਰਟੀ ਵਿਦਰੋਹੀ ਵਜੋਂ ਪ੍ਰਸਿੱਧ ਹੋਏ ਸਨ ਜਦੋਂ ਉਨ੍ਹਾਂ ਨੇ ਹਾਊਸ ਆਫ ਰਿਪ੍ਰਜ਼ੈਂਟੇਟਿਵਜ਼ ਦੇ ਰਿਪਬਲਿਕਨ ਨੇਤਾ ਏਰਿਕ ਕੈਂਟਰ ਨੂੰ ਪ੍ਰਾਇਮਰੀ ਵਿੱਚ ਹਰਾਇਆ ਸੀ ਪਰ 2018 ਵਿੱਚ ਇੱਕ ਡੈਮੋਕ੍ਰੇਟ ਤੋਂ ਹਾਰ ਗਏ ਸਨ। ਬ੍ਰੈਟ ਦਾ ਆਸਟ੍ਰੇਲੀਆ ਨਾਲ ਕੋਈ ਸਪੱਸ਼ਟ ਸਬੰਧ ਨਹੀਂ ਹੈ, ਅਤੇ ਉਸਨੇ ਵਿਦੇਸ਼ੀ ਮਾਮਲਿਆਂ ਨਾਲੋਂ ਅਰਥ ਸ਼ਾਸਤਰ, ਈਸਾਈ ਧਰਮ ਅਤੇ ਅਮਰੀਕੀ ਘਰੇਲੂ ਨੀਤੀਆਂ ‘ਤੇ ਜ਼ਿਆਦਾ ਲਿਖਿਆ ਹੈ। ਹਾਲ ਹੀ ਵਿੱਚ ਬ੍ਰੈਟ ਨੇ ਟਰੰਪ ਦੇ ਟੈਰਿਫ ਅਤੇ ਆਰਥਿਕ ਏਜੰਡੇ ਦਾ ਸਮਰਥਨ ਕਰਦਿਆਂ ਕਿਹਾ ਹੈ ਕਿ ਫਰੀ ਟਰੇਡ ਅਸੰਭਵ ਹੈ ਕਿਉਂਕਿ ਅਮਰੀਕੀ ਕੰਪਨੀਆਂ ਨੇ ਅਮਰੀਕਾ ਨੂੰ ਵੇਚ ਦਿੱਤਾ ਹੈ।