ਪੀਟਰ ਮੈਗਯਾਰ ਨੇ ਹੰਗਰੀ ਦੇ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕੀ। ਨਵੀਂ ਸੰਸਦ ਦੇ ਉਦਘਾਟਨੀ ਸੈਸ਼ਨ ਵਿੱਚ ਵੋਟ ਜਿੱਤਣ ਤੋਂ ਬਾਅਦ ਉਨ੍ਹਾਂ ਨੇ ਦੇਸ਼ ਵਿੱਚ “ਸਿਸਟਮ ਨੂੰ ਬਦਲਣ” ਦਾ ਵਾਅਦਾ ਕੀਤਾ। 199 ਮੈਂਬਰੀ ਸੰਸਦ ਵਿੱਚੋਂ 195 ਸੰਸਦ ਮੈਂਬਰਾਂ ਨੇ ਵੋਟ ਦਿੱਤੀ, ਜਿਸ ਵਿੱਚ 140 ਨੇ ਹੱਕ ਵਿੱਚ, 54 ਨੇ ਵਿਰੋਧ ਵਿੱਚ ਵੋਟ ਦਿੱਤੀ ਅਤੇ ਇੱਕ ਗੈਰਹਾਜ਼ਰ ਰਿਹਾ। ਮੈਗਯਾਰ ਨੇ ਬਹੁਮਤ ਪ੍ਰਾਪਤ ਕਰਕੇ ਪ੍ਰਧਾਨ ਮੰਤਰੀ ਅਹੁਦੇ ਲਈ ਜ਼ਰੂਰੀ ਸਮਰਥਨ ਪ੍ਰਾਪਤ ਕੀਤਾ, ਜਿਸ ਨਾਲ ਉਨ੍ਹਾਂ ਦੇ ਚਾਰ ਸਾਲਾਂ ਦੇ ਕਾਰਜਕਾਲ ਦੀ ਰਸਮੀ ਸ਼ੁਰੂਆਤ ਹੋਈ।
ਆਪਣੇ ਸਹੁੰ-ਚੁੱਕ ਭਾਸ਼ਣ ਵਿੱਚ ਮੈਗਯਾਰ ਨੇ ਕਿਹਾ ਕਿ, “ਨਵੀਂ ਸਰਕਾਰ ਨੂੰ ਸਿਰਫ਼ ਸਰਕਾਰ ਬਦਲਣ ਦਾ ਹੀ ਨਹੀਂ ਸਗੋਂ “ਪੂਰੀ ਪ੍ਰਣਾਲੀ ਨੂੰ ਬਦਲਣ” ਦਾ ਫ਼ਤਵਾ ਮਿਲਿਆ ਹੈ। ਸਰਕਾਰ ਦੇਸ਼ ਨੂੰ “ਸ਼ਾਸਨ” ਨਹੀਂ ਦੇਵੇਗੀ, ਸਗੋਂ ਲੋਕਾਂ ਦੀ ਸੇਵਾ ਕਰੇਗੀ। ਨਵੀਂ ਟਿਸਜ਼ਾ ਸਰਕਾਰ ਸਾਰੇ ਹੰਗਰੀ ਵਾਸੀਆਂ ਦੀ ਸਰਕਾਰ ਹੋਵੇਗੀ ਅਤੇ ਹਰ ਨਾਗਰਿਕ ਨਾਲ ਬਰਾਬਰ ਸਤਿਕਾਰ ਨਾਲ ਪੇਸ਼ ਆਵੇਗਾ। ਉਨ੍ਹਾਂ ਨੇ ਰਾਸ਼ਟਰੀ ਏਕਤਾ, ਲੋਕਤੰਤਰੀ ਸੁਧਾਰ ਅਤੇ ਸੁਲ੍ਹਾ-ਸਫ਼ਾਈ ‘ਤੇ ਜ਼ੋਰ ਦਿੱਤਾ।
ਮਾਰਚ 1981 ਵਿੱਚ ਜਨਮੇ ਮੈਗਯਾਰ ਨੇ ਪਾਜ਼ਮਨੀ ਪੀਟਰ ਕੈਥੋਲਿਕ ਯੂਨੀਵਰਸਿਟੀ ਤੋਂ ਕਾਨੂੰਨ ਅਤੇ ਮਨੁੱਖਤਾ ਦੀ ਪੜ੍ਹਾਈ ਕੀਤੀ। ਉਸਨੇ ਇੱਕ ਸਿਖਿਆਰਥੀ ਜੱਜ ਅਤੇ ਵਕੀਲ ਵਜੋਂ ਕੰਮ ਕੀਤਾ। ਬਾਅਦ ਵਿੱਚ ਉਸਨੇ ਵਿਦੇਸ਼ ਮੰਤਰਾਲੇ ਅਤੇ ਹੋਰ ਸਰਕਾਰੀ ਸੰਸਥਾਵਾਂ ਵਿੱਚ ਵੱਖ-ਵੱਖ ਅਹੁਦਿਆਂ ‘ਤੇ ਕੰਮ ਕੀਤਾ। 2024 ਵਿੱਚ ਉਹ ਟਿਸਜ਼ਾ ਪਾਰਟੀ ਦੇ ਨੇਤਾ ਅਤੇ ਯੂਰਪੀਅਨ ਸੰਸਦ ਦੇ ਮੈਂਬਰ ਚੁਣੇ ਗਏ। ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕਣ ਤੋਂ ਬਾਅਦ ਟਿਸਜ਼ਾ ਪਾਰਟੀ ਦੇ ਸਮਰਥਕਾਂ ਨੇ ਬੁਡਾਪੇਸਟ ਦੇ ਕੋਸੁਥ ਸਕੁਏਅਰ ਵਿੱਚ ਜਸ਼ਨ ਮਨਾਇਆ ਜਿੱਥੇ ਮੈਗਯਾਰ ਨੇ ਸਮਰਥਕਾਂ ਨੂੰ ਵੀ ਸੰਬੋਧਨ ਕੀਤਾ।
12 ਅਪ੍ਰੈਲ ਨੂੰ ਹੋਈਆਂ ਸੰਸਦੀ ਚੋਣਾਂ ਵਿੱਚ ਮੈਗਯਾਰ ਦੀ ਅਗਵਾਈ ਵਾਲੀ ਟਿਸਜ਼ਾ ਪਾਰਟੀ ਨੇ ਵਿਕਟਰ ਓਰਬਨ ਦੀ ਅਗਵਾਈ ਵਾਲੇ ਸੱਤਾਧਾਰੀ ਫਿਡੇਜ਼-ਕੇਡੀਐਨਪੀ ਗੱਠਜੋੜ ਨੂੰ ਹਰਾਇਆ ਸੀ। ਪਾਰਟੀ ਨੇ 199 ਸੀਟਾਂ ਵਿੱਚੋਂ 141 ਜਿੱਤ ਕੇ ਸੰਸਦ ਵਿੱਚ ਦੋ-ਤਿਹਾਈ ਬਹੁਮਤ ਪ੍ਰਾਪਤ ਕੀਤਾ। ਸੰਸਦ ਨੇ ਆਪਣੇ ਉਦਘਾਟਨੀ ਸੈਸ਼ਨ ਦੌਰਾਨ ਟਿਸਜ਼ਾ ਪਾਰਟੀ ਦੇ ਉਪ-ਪ੍ਰਧਾਨ ਐਗਨੇਸ ਫੋਰਸਥੋਫਰ ਨੂੰ ਰਾਸ਼ਟਰੀ ਅਸੈਂਬਲੀ ਦਾ ਸਪੀਕਰ ਵੀ ਚੁਣਿਆ। ਉਸਨੂੰ ਦੋ ਗੈਰਹਾਜ਼ਰੀਆਂ ਦੇ ਨਾਲ 193 ਵੋਟਾਂ ਮਿਲੀਆਂ। ਸੰਸਦ ਨੇ ਛੇ ਉਪ-ਪ੍ਰਧਾਨ ਵੀ ਚੁਣੇ ਹਨ।