ਕੈਨਬਰਾ – ਆਸਟ੍ਰੇਲੀਆ ਵਿੱਚ ਫੇਫੜਿਆਂ ਨੂੰ ਹੌਲੀ-ਹੌਲੀ ਸਖ਼ਤ ਅਤੇ ਕਮਜ਼ੋਰ ਕਰਨ ਵਾਲੀ ਬਿਮਾਰੀ ਕਾਰਨ ਹਰ ਸਾਲ ਲਗਭਗ 4,000 ਲੋਕਾਂ ਦੀ ਮੌਤ ਹੋ ਰਹੀ ਹੈ। ਨਵੀਂ ਰਿਪੋਰਟ ਮੁਤਾਬਕ ਦੇਸ਼ ਵਿੱਚ ਲਗਭਗ 22,000 ਲੋਕ ਪਲਮਨਰੀ ਫਾਈਬਰੋਸਿਸ ਨਾਮਕ ਬਿਮਾਰੀ ਨਾਲ ਜੀ ਰਹੇ ਹਨ। ਇਸ ਬਿਮਾਰੀ ਵਿੱਚ ਫੇਫੜਿਆਂ ’ਤੇ ਪੱਕੇ ਦਾਗ਼ ਪੈ ਜਾਂਦੇ ਹਨ ਅਤੇ ਸਾਹ ਲੈਣਾ ਮੁਸ਼ਕਲ ਹੋ ਜਾਂਦਾ ਹੈ।
‘ਬਰਡਨ ਆਫ ਪਲਮਨਰੀ ਫਾਈਬਰੋਸਿਸ: ਹਾਰਡ ਟਰੁੱਥਜ਼ ਆਫ ਲੰਗ ਸਕਾਰਿੰਗ ਇਨ ਆਸਟ੍ਰੇਲੀਆ’ ਨਾਮਕ ਰਿਪੋਰਟ ਕੈਨਬਰਾ ਵਿੱਚ ਜਾਰੀ ਕੀਤੀ ਗਈ। ਇਸ ਨੂੰ ਲੰਗ ਫਾਊਂਡੇਸ਼ਨ ਆਫ ਆਸਟ੍ਰੇਲੀਆ, ਹਾਰਟ ਆਫ ਆਸਟ੍ਰੇਲੀਆ ਅਤੇ ਹੋਰ ਸਿਹਤ ਮਾਹਿਰਾਂ ਦੇ ਸਹਿਯੋਗ ਨਾਲ ਤਿਆਰ ਕੀਤਾ ਗਿਆ ਹੈ।
ਰਿਪੋਰਟ ਅਨੁਸਾਰ ਲਗਭਗ 21 ਫ਼ੀਸਦੀ ਮਾਮਲੇ ਕੰਮ ਵਾਲੀ ਥਾਂ ’ਤੇ ਖ਼ਤਰਨਾਕ ਧੂੜ, ਧੂੰਏਂ, ਭਾਫ਼ਾਂ ਅਤੇ ਰਸਾਇਣਾਂ ਦੇ ਸੰਪਰਕ ਕਾਰਨ ਹੁੰਦੇ ਹਨ। ਖਾਣਾਂ, ਖੇਤੀਬਾੜੀ, ਉਸਾਰੀ ਅਤੇ ਕੁਝ ਹੋਰ ਉਦਯੋਗਾਂ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਨੂੰ ਇਸ ਦਾ ਵਧੇਰੇ ਖ਼ਤਰਾ ਹੈ। ਪਿਛਲੇ ਸਾਲ ਹੀ ਲਗਭਗ 1,600 ਆਸਟ੍ਰੇਲੀਆਈ ਲੋਕਾਂ ਵਿੱਚ ਕੰਮ ਨਾਲ ਸਬੰਧਤ ਫੇਫੜਿਆਂ ਦੇ ਦਾਗ਼ਾਂ ਦੀ ਪਛਾਣ ਹੋਈ। ਰਿਪੋਰਟ ਚੇਤਾਵਨੀ ਦਿੰਦੀ ਹੈ ਕਿ ਜੇਕਰ ਰੋਕਥਾਮ ਲਈ ਹੋਰ ਕਦਮ ਨਾ ਚੁੱਕੇ ਗਏ ਤਾਂ 2030 ਤੱਕ ਕੰਮ ਵਾਲੀ ਥਾਂ ਦੇ ਸੰਪਰਕ ਕਾਰਨ ਹਰ ਸਾਲ ਲਗਭਗ 1,000 ਲੋਕਾਂ ਦੀ ਮੌਤ ਹੋ ਸਕਦੀ ਹੈ। ਮਾਹਿਰਾਂ ਮੁਤਾਬਕ ਇੱਕ ਵਾਰ ਫੇਫੜਿਆਂ ’ਤੇ ਪੱਕੇ ਦਾਗ਼ ਪੈ ਜਾਣ ਤਾਂ ਉਨ੍ਹਾਂ ਨੂੰ ਪੂਰੀ ਤਰ੍ਹਾਂ ਠੀਕ ਕਰਨਾ ਸੰਭਵ ਨਹੀਂ ਹੁੰਦਾ। ਕੁਝ ਦਵਾਈਆਂ ਬਿਮਾਰੀ ਦੀ ਰਫ਼ਤਾਰ ਹੌਲੀ ਕਰ ਸਕਦੀਆਂ ਹਨ, ਪਰ ਹਰ ਮਰੀਜ਼ ਲਈ ਇਹ ਪ੍ਰਭਾਵਸ਼ਾਲੀ ਨਹੀਂ ਹੁੰਦੀਆਂ। ਗੰਭੀਰ ਮਾਮਲਿਆਂ ਵਿੱਚ ਫੇਫੜਿਆਂ ਦਾ ਟ੍ਰਾਂਸਪਲਾਂਟ ਹੀ ਇੱਕ ਵਿਕਲਪ ਹੋ ਸਕਦਾ ਹੈ, ਪਰ ਹਰ ਮਰੀਜ਼ ਇਸ ਦੇ ਯੋਗ ਨਹੀਂ ਹੁੰਦਾ।
ਰਿਪੋਰਟ ਵਿੱਚ ਕੰਮ ਵਾਲੀਆਂ ਥਾਵਾਂ ’ਤੇ ਖ਼ਤਰਨਾਕ ਧੂੜ ਤੋਂ ਬਚਾਅ, ਬਿਮਾਰੀ ਦੀ ਜਲਦੀ ਪਛਾਣ, ਮਾਹਿਰ ਡਾਕਟਰੀ ਸਹੂਲਤਾਂ ਵਿੱਚ ਸੁਧਾਰ ਅਤੇ ਨਵੀਆਂ ਦਵਾਈਆਂ ਦੀ ਪਹੁੰਚ ਵਧਾਉਣ ਦੀ ਸਿਫ਼ਾਰਸ਼ ਕੀਤੀ ਗਈ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਖ਼ਾਸ ਕਰਕੇ ਪੇਂਡੂ ਅਤੇ ਦੂਰ-ਦੁਰਾਡੇ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕਾਂ ਲਈ ਜਾਂਚ ਅਤੇ ਇਲਾਜ ਦੀਆਂ ਸਹੂਲਤਾਂ ਵਧਾਉਣੀਆਂ ਜ਼ਰੂਰੀ ਹਨ। ਰਿਪੋਰਟ ਮੁਤਾਬਕ ਇਸ ਬਿਮਾਰੀ ਕਾਰਨ ਆਸਟ੍ਰੇਲੀਆ ਦੀ ਆਰਥਿਕਤਾ ਅਤੇ ਸਿਹਤ ਪ੍ਰਣਾਲੀ ਨੂੰ ਹਰ ਸਾਲ ਲਗਭਗ 4.2 ਅਰਬ ਡਾਲਰ ਦਾ ਖ਼ਰਚ ਝੱਲਣਾ ਪੈਂਦਾ ਹੈ।