ਕਾਂਗਰਸ ਆਗੂ ਆਸਕਰ ਫਰਨਾਂਡਿਜ਼ ਦਾ ਕਰਨਾਟਕ ਦੇ ਮੈਂਗਲੁਰੂ ‘ਚ ਦੇਹਾਂਤ

ਨਵੀਂ ਦਿੱਲੀ – ਕਾਂਗਰਸ ਦੇ ਸੀਨੀਅਰ ਆਗੂ ਸਾਬਕਾ ਕੇਂਦਰੀ ਮੰਤਰੀ ਆਸਕਰ ਫਰਨਾਡਿਜ਼ ਦਾ ਸੋਮਵਾਰ ਨੂੰ ਦੇਹਾਂਤ ਹੋ ਗਿਆ। ਕਰਨਾਟਕ ਦੇ ਮੈਂਗਲੁਰੂ ‘ਚ ਆਸਕਰ ਫਰਨਾਡਿਜ਼ ਨੇ ਆਖਰੀ ਸਾਹ ਲਏ। ਹਸਪਤਾਲ ਵੱਲੋਂ ਇਸ ਦੀ ਪੁਸ਼ਟੀ ਕਰ ਦਿੱਤੀ ਗਈ ਹੈ। 80 ਸਾਲ ਦੇ ਆਸਕਰ ਫਰਨਾਂਡਿਜ਼ ਲੰਬੇ ਸਮੇਂ ਤੋਂ ਬੀਮਾਰ ਚਲ ਰਹੇ ਸੀ ਤੇ ਕੁਝ ਹਫ਼ਤਿਆਂ ਤੋਂ ਉਨ੍ਹਾਂ ਨੂੰ ਮੈਂਗਲੁਰੂ ਦੇ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ ਸੀ। ਇਸ ਸਾਲ ਯੋਗ ਕਰਦੇ ਹੋਏ ਉਨ੍ਹਾਂ ਨੂੰ ਸੱਟ ਲੱਗ ਗਈ ਸੀ ਇਸ ਤੋਂ ਬਾਅਦ ਉਨ੍ਹਾਂ ਦੀ ਸਿਹਤ ਖਰਾਬ ਹੋ ਗਈ ਸੀ। ਆਸਕਰ ਫਰਨਾਂਡਿਜ਼ ਦੇ ਦੇਹਾਂਤ ਦੀ ਜਾਣਕਾਰੀ ਕਾਂਗਰਸ ਦੇ ਬੁਲਾਰੇ ਲਾਵਨਯਾ ਬਲਾਲ ਨੇ ਟਵੀਟ ਕਰ ਕੇ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਸਾਬਕਾ ਕੇਂਦਰੀ ਮੰਤਰੀ ਆਸਕਰ ਫਰਨਾਂਡਿਜ਼ ਕਰਨਾਟਕ ਦੇ ਮੈਂਗਲੁਰੂ ‘ਚ ਇਕ ਪ੍ਰਾਈਵੇਟ ਹਸਪਤਾਲ ਦੇ ਆਈਸੀਯੂ ਵਾਰਡ ‘ਚ ਭਰਤੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਕੁਝ ਦਿਨ ਪਹਿਲਾਂ ਆਸਕਰ ਫਰਨਾਂਡਿਜ਼ ਯੋਗ ਕਰਦੇ ਸਮੇਂ ਡਿੱਗ ਗਏ ਸੀ। ਫਰਨਾਂਡਿਜ਼ ਦੇ ਡਿੱਗਣ ਕਾਰਨ ਉਨ੍ਹਾਂ ਦੇ ਸਿਰ ‘ਚ ਅੰਦਰੂਨੀ ਸੱਟਾਂ ਆਈਆਂ ਹਨ ਤੇ ਹਸਪਤਾਲ ‘ਚ ਉਨ੍ਹਾਂ ਦਾ ਇਲਾਜ ਕੀਤਾ ਜਾ ਰਿਹਾ ਸੀ। ਜ਼ਿਕਰਯੋਗ ਹੈ ਕਿ ਆਸਕਰ ਫਰਨਾਂਡਿਜ਼ ਕੇਂਦਰ ‘ਚ ਯੂਪੀਏ ਸਰਕਾਰ ਦੌਰਾਨ ਆਵਾਜਾਈ, ਸੜਕ ਤੇ ਰਾਜਮਾਰਗ ਤੇ ਮਜ਼ਦੂਰ ਤੇ ਰੁਜ਼ਗਾਰ ਮੰਤਰੀ ਰਹਿ ਚੁੱਕੇ ਹਨ। ਇਸ ਤੋਂ ਇਲਾਵਾ ਉਹ ਯੂਪੀਏ 1 ਦੌਰਾਨ ਮਜ਼ਦੂਰ ਤੇ ਰੁਜ਼ਗਾਰ ਰਾਜ ਮੰਤਰੀ ਵੀ ਰਹਿ ਚੁੱਕੇ ਸੀ। ਫਿਲਹਾਲ ਉਹ ਕਰਨਾਟਕ ਤੋਂ ਰਾਜ ਸਭਾ ਦੇ ਸੰਸਦ ਮੈਂਬਰ ਸੀ।