ਕ੍ਰਾਕਰੀ ਦੀ ਸੰਭਾਲ ਕਿਵੇਂ ਕਰੀਏ

ਅਸਲ ਵਿੱਚ ਕਿਸੇ ਵੀ ਚੀਜ਼ ਦੀ ਕੋਈ ਨਿਸ਼ਚਿਤ ਉਮਰ ਨਹੀਂ ਹੰੁਦੀ । ਇਹ ਤਾਂ ਤੁਹਾਡੀ ਕਲਾ ਉਪਰ ਨਿਰਭਰ ਹੈ ਕਿ ਤੁਸੀਂ ਇਸ ਦੀ ਹਿਫਾਜਤ ਕਿਵੇਂ ਤੇ ਕਿੰਨੀ ਦੇਰ ਤੱਕ ਕਰ ਸਕਦੇ ਹੋ । ਸਭ ਤੋਂ ਪਹਿਲਾਂ ਚੰਗੀ ਤੇ ਟਿਕਾਊ ਕ੍ਰਾਕਰੀ ਹੀ ਖਰੀਦੋ । ਸਸਤੀ ਕ੍ਰਾਕਰੀ ਛੇਤੀ ਟੁੱਟ ਜਾਂਦੀ ਹੈ ਅਤੇ ਉਸ ਦੀ ਸੁੰਦਰਤਾ ਵੀ ਛੇਤੀ ਹੀ ਖਤਮ ਹੋ ਜਾਂਦੀ ਹੈ । ਕੱਚ ਦੀ ਕ੍ਰਾਕਰੀ ਉੱਪਰ ਲੱਗੇ ਦਾਗ ਧੱਬੇ ਦੂਰ ਕਰਨ ਲਈ ਉਸ ਉਪਰ ਕਲੀ (ਚੂਨਾ) ਲਾ ਕੇ ਸਫਾਈ ਕਰੋ । ਇਸ ਨਾਲ ਦਾਗ-ਧੱਬੇ ਤਾਂ ਦੂਰ ਹੋ ਹੀ ਜਾਣਗੇ, ਕ੍ਰਾਕਰੀ ਦੀ ਸੁੰਦਰਤਾ ਵੀ ਵਧੇਗੀ । ਨਾਜ਼ੁਕ ਕ੍ਰਾਕਰੀ ਜਿਵੇਂ ਚਾਹ ਦੀ ਕੇਤਲੀ ਆਦਿ ਨੂੰ ਸਾਫ ਕਰਨ ਸਮੇਂ ਕਿਸੇ ਸਾਫ ਤੇ ਮੁਲਾਇਮ ਕੱਪੜੇ ਦੀ ਹੀ ਵਰਤੋਂ ਕਰੋ । ਕੇਤਲੀ ਨੂੰ ਸਾਫ ਕਰਕੇ ਉਸ ਦੀ ਨਲੀ ਵਿੱਚ ਸਾਫ ਰੂੰ ਫਸਾ ਕੇ ਹੀ ਉਸ ਨੂੰ ਰੱਖੋ । ਕੇਤਲੀ ਵਿੱਚ ਧੂੜ ਨਹੀਂ ਜਾ ਸਕੇਗੀ, ਨਾਲ ਹੀ ਉਸ ਦੀ ਸੁਰੱਖਿਆ ਵੀ ਵਧੇਗੀ ।
ਕ੍ਰਾਕਰੀ ਨੂੰ ਸਾਫ ਕਰਨ ਸਮਂੇ ਇਸ ਗੱਲ ਦਾ ਵਿਸ਼ੇਸ਼ ਧਿਆਨ ਰੱਖਿਆ ਜਾਵੇ ਕਿ ਸਾਫ ਕਰਨ ਲਈ ਲਿਆ ਗਿਆ ਪਾਣੀ ਬਹੁਤਾ ਗਰਮ ਨਾ ਹੋਵੇ । ਜੇਕਰ ਤੁਸੀਂ ਗਰਮ ਪਾਣੀ ਦੀ ਵਰਤੋਂ ਕਰ ਰਹੇ ਹੋ ਤਾਂ ਇਸ ਗੱਲ ਦਾ ਧਿਆਨ ਰੱਖੋ ਕਿ ਕ੍ਰਾਕਰੀ ਨੂੰ ਗਰਮ ਪਾਣੀ ਵਿੱਚੋਂ ਕੱਢਣ ਤੋਂ ਬਾਅਦ ਤੁਰੰਤ ਠੰਢੇ ਪਾਣੀ ’ਚ ਨਾ ਪਾਓ । ਅਜਿਹਾ ਕਰਨ ਨਾਲ ਤੁਹਾਡੀ ਕ੍ਰਾਕਰੀ ਟੁੱਟ ਜਾਵੇਗੀ । ਕ੍ਰਾਕਰੀ ਨੂੰ ਹੋਰਨਾਂ ਭਾਂਡਿਆਂ ਦੇ ਨਾਲ-ਨਾਲ ਨਾ ਰੱਖੋ । ਜੇਕਰ ਅਜਿਹਾ ਕਰਨਾ ਹੀ ਪਵੇ ਤਾਂ ਦੋਹਾਂ ਦਰਮਿਆਨ ਇੱਕ ਮੁਲਾਇਮ ਕੱਪੜਾ ਜ਼ਰੂਰ ਲਾ ਦਿਓ ਤਾਂ ਜੋ ਤੁਹਾਡੀ ਕ੍ਰਾਕਰੀ ਸੁਰੱਖਿਅਤ ਰਹੇ । ਕ੍ਰਾਕਰੀ ਖਰੀਦਣ ਸਮੇਂ ਇਸ ਗੱਲ ਦਾ ਧਿਆਨ ਵੀ ਰੱਖਿਆ ਜਾਵੇ ਕਿ ਉਸ ਦਾ ਤਲ ਸਪਾਟ ਹੋਵੇ ਤਾਂ ਜੋ ਧੋਣ ਤੋਂ ਬਾਅਦ ਸੁਕਾਉਣ ਲਈ ਰੱਖਣ ਸਮੇਂ ਲੁੜਕ ਨਾ ਜਾਵੇ । ਕ੍ਰਾਕਰੀ ਨੂੰ ਸਾਫ ਕਰਨ ਸਮੇਂ ਹਲਕੇ ਗਰਮ ਪਾਣੀ ਵਿੱਚ ਸਿਰਕਾ ਤੇ ਕੋਈ ਵੀ ਬਰਤਨ ਸਾਫ ਕਰਨ ਵਾਲਾ ਪਾਊਡਰ ਜ਼ਰੂਰ ਮਿਲਾ ਲਓ ।
ਸ਼ੀਸ਼ੇ ਦੀ ਗੰਦੀ ਕ੍ਰਾਕਰੀ ਸਾਫ ਕਰਨ ਲਈ ਅਤੇ ਚਮਕ ਲਿਆਉਣ ਵਲੇ ਸਪਿਰਟ ਅਤੇ ਪੈਰਾਫਿਨ ਬਰਾਬਰ ਮਾਤਰਾ ਵਿੱਚ ਮਿਲਾ ਕੇ ਕਿਸੇ ਮੁਲਾਇਮ ਕੱਪੜੇ ਨਾਲ ਰਗੜੋ । ਛੇਤੀ ਹੀ ਕ੍ਰਾਕਰੀ ਵਿੱਚ ਪੂਰੀ ਚਮਕ ਆ ਜਾਵੇਗੀ । ਕ੍ਰਾਕਰੀ ਨੂੰ ਅਜਿਹੀ ਥਾਂ ਰੱਖੋ, ਜਿੱਥੇ ਨਾ ਤਾਂ ਗੈਸ ਜਾਂ ਸਟੋਪ ਦਾ ਸੇਕ ਪਹੁੰਚੇ ਅਤੇ ਨਾ ਹੀ ਤੇਜ਼ ਧੁੱਪ । ਜੇਕਰ ਅਜਿਹਾ ਹੋਵੇ ਤਾਂ ਉਸ ਨੂੰ ਤੁਰੰਤ ਉਥੋਂ ਹਟਾ ਦਿਓ ਨਹੀਂ ਤਾਂ ਕ੍ਰਾਕਰੀ ਟੁੱਟ ਵੀ ਸਕਦੀ ਹੈ ।
ਅੰਜੂ ਬਾਲਾ