ਬਾਲ ਕਲਾਕਾਰ ਰਾਹੁਲ ਕੋਲੀ ਦੀ ਰਿਲੀਜ਼ ਤੋਂ ਪਹਿਲਾਂ ਹੀ ਮੌਤ

ਨਵੀਂ ਦਿੱਲੀ – ਮਨੋਰੰਜਨ ਜਗਤ ਤੋਂ ਇੱਕ ਬਹੁਤ ਹੀ ਬੁਰੀ ਖ਼ਬਰ ਸਾਹਮਣੇ ਆ ਰਹੀ ਹੈ। ਇਕ ਤੋਂ ਬਾਅਦ ਇਕ ਸਿਤਾਰਿਆਂ ਦੀ ਮੌਤ ਤੋਂ ਪ੍ਰਸ਼ੰਸਕ ਅਜੇ ਉਭਰ ਵੀ ਨਹੀਂ ਸਕੇ ਸਨ ਕਿ ਇਕ ਹੋਰ ਚਮਕਦਾ ਸਿਤਾਰਾ ਇਸ ਦੁਨੀਆ ਨੂੰ ਅਲਵਿਦਾ ਕਹਿ ਗਿਆ। ਇਸ ਸਾਲ ਭਾਰਤ ਤੋਂ ਆਸਕਰ ਲਈ ਗਈ ਗੁਜਰਾਤੀ ਫਿਲਮ ਚੇਲੋ ਸ਼ੋਅ ਭਾਵ ਆਖਰੀ ਫਿਲਮ ਸ਼ੋਅ ਦੇ ਬਾਲ ਕਲਾਕਾਰ ਰਾਹੁਲ ਕੋਲੀ ਦਾ ਦਿਹਾਂਤ ਹੋ ਗਿਆ ਹੈ। ਰਾਹੁਲ ਦੀ ਕੈਂਸਰ ਕਾਰਨ ਮੌਤ ਹੋ ਗਈ ਹੈ। ਰਾਹੁਲ ਨੂੰ ਲਿਊਕੇਮੀਆ ਨਾਂ ਦਾ ਕੈਂਸਰ ਸੀ। ਫਿਲਮ ‘ਚ ਭਾਵੀਨ ਰਾਬਾਰੀ ਨੇ ਮੁੱਖ ਭੂਮਿਕਾ ਨਿਭਾਈ ਹੈ, ਜਦਕਿ ਰਾਹੁਲ ਉਨ੍ਹਾਂ ਦੇ ਦੋਸਤ ਦੀ ਭੂਮਿਕਾ ‘ਚ ਸਨ। ਇਸ ਖਬਰ ਦੇ ਸਾਹਮਣੇ ਆਉਣ ਤੋਂ ਬਾਅਦ ਹਰ ਕੋਈ ਬਹੁਤ ਦੁਖੀ ਹੈ। ਇਸ ਖਬਰ ਨੇ ਸਭ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ।
ਰਾਹੁਲ ਕੋਲੀ ਦੇ ਪਿਤਾ ਨੇ ਪੁੱਤਰ ਦੀ ਮੌਤ ਤੋਂ ਬਾਅਦ ਦੱਸਿਆ ਕਿ ਉਸ ਨੂੰ ਕਈ ਦਿਨਾਂ ਤੋਂ ਬੁਖਾਰ ਚੱਲ ਰਿਹਾ ਸੀ। ਉਸ ਦਾ ਇਹ ਬੁਖਾਰ ਸਮੇਂ-ਸਮੇਂ ‘ਤੇ ਉਸ ਨੂੰ ਆ ਰਿਹਾ ਸੀ। ਇਸ ਤੋਂ ਬਾਅਦ ਰਾਹੁਲ ਨੇ ਖੂਨ ਦੀਆਂ ਉਲਟੀਆਂ ਵੀ ਕਰ ਦਿੱਤੀਆਂ। ਰਾਹੁਲ ਦੇ ਪਿਤਾ ਨੇ ਅੱਗੇ ਕਿਹਾ, ‘ਉਸਨੇ ਐਤਵਾਰ ਨੂੰ ਨਾਸ਼ਤਾ ਕੀਤਾ ਸੀ। ਇਸ ਤੋਂ ਬਾਅਦ ਉਸ ਨੂੰ ਲਗਾਤਾਰ ਬੁਖਾਰ ਹੋ ਰਿਹਾ ਸੀ ਅਤੇ ਫਿਰ ਉਸ ਨੇ ਤਿੰਨ ਵਾਰ ਖੂਨ ਦੀਆਂ ਉਲਟੀਆਂ ਕੀਤੀਆਂ। ਫਿਰ ਰਾਹੁਲ ਦੀ ਮੌਤ ਹੋ ਗਈ। ਉਸ ਦੀ ਮੌਤ ਨਾਲ ਸਾਡਾ ਪਰਿਵਾਰ ਟੁੱਟ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਰਾਹੁਲ ਕੋਲੀ ਸਟਾਰਰ ਫਿਲਮ ਲਾਸਟ ਫਿਲਮ ਸ਼ੋਅ ਇਸ ਸਾਲ 95ਵੇਂ ਅਕੈਡਮੀ ਅਵਾਰਡਸ ਲਈ ਗਈ ਹੈ। ਫਿਲਮ ਫੈਸਟੀਵਲ ਵਿੱਚ ਪਾਨ ਨਲਿਨ ਦੀ ਫਿਲਮ ਅਤੇ ਰਾਹੁਲ ਕੋਲੀ ਦੇ ਕੰਮ ਦੀ ਕਾਫੀ ਤਾਰੀਫ਼ ਕੀਤੀ ਗਈ ਹੈ। ਰਾਹੁਲ ਅਤੇ ਭਾਵੀਨ ਤੋਂ ਇਲਾਵਾ ਫਿਲਮ ‘ਚ ਰਿਚਾ ਮੀਨਾ, ਭਾਵੇਸ਼ ਸ਼੍ਰੀਮਾਲੀ, ਪਰੇਸ਼ ਮਹਿਤਾ ਅਤੇ ਟੀਆ ਸਬੇਸ਼ਚੀਅਨ ਨੇ ਅਹਿਮ ਭੂਮਿਕਾਵਾਂ ਨਿਭਾਈਆਂ ਹਨ।