ਨਵੀਂ ਦਿੱਲੀ – ਐਮਡੀਐਚ ਅਤੇ ਐਵਰੈਸਟ ’ਤੇ ਇੱਕ ਵਾਰ ਫਿਰ ਤੋਂ ਸਵਾਲ ਉੱਠ ਰਹੇ ਹਨ। ਇਸ ਵਾਰ ਇਹ ਸਵਾਲ ਭਾਰਤ ਵਿੱਚ ਹੀ ਉੱਠੇ ਹਨ। ਰਾਜਸਥਾਨ ਵਿਚ ਦੋਵੇਂ ਮਸਾਲਾ ਕੰਪਨੀਆਂ ਦੇ ਸੈਂਪਲਾਂ ਵਿੱਚ ਸ਼ੱਕੀ ਤੱਤ ਪਾਏ ਗਏ ਹਨ। ਜਿਸ ਕਾਰਨ ਦੋਵਾਂ ਮਸ਼ਹੂਰ ਬ੍ਰਾਂਡਾਂ ਦੇ ਕੁਝ ਮਸਾਲਿਆਂ ਨੂੰ ਗਾਹਕਾਂ ਲਈ ਅਸੁਰੱਖਿਅਤ ਕਰਾਰ ਦਿੱਤਾ ਗਿਆ।ਅਪ੍ਰੈਲ ਦੀ ਸ਼ੁਰੂਆਤ ’ਚ ਹੀ ਹਾਂਗਕਾਂਗ ਦੇ ਫੂਡ ਸੇਫਟੀ ਰੈਗੂਲੇਟਰ ਸੈਂਟਰ ਫਾਰ ਫੂਡ ਸੇਫਟੀ ਦੁਆਰਾ ਦੋਵਾਂ ਭਾਰਤੀ ਮਸਾਲਿਆਂ ’ਤੇ ਸਵਾਲ ਉਠਾਏ ਗਏ ਸਨ। ਉਨ੍ਹਾਂ ਕਿਹਾ ਸੀ ਕਿ ਦੋਵਾਂ ਬਰਾਂਡਾਂ ਦੇ ਕੁਝ ਮਸਾਲਿਆਂ ਦੇ ਨਮੂਨਿਆਂ ਵਿੱਚ ਕੀਟਨਾਸ਼ਕ ਇਥਲੀਨ ਆਕਸਾਈਡ ਦੀ ਵਰਤੋਂ ਨਿਰਧਾਰਤ ਮਾਤਰਾ ਤੋਂ ਵੱਧ ਕੀਤੀ ਗਈ ਸੀ। ਇਸ ਤੋਂ ਬਾਅਦ ਸਿੰਗਾਪੁਰ ਅਤੇ ਹੋਰ ਦੇਸ਼ਾਂ ਨੇ ਵੀ ਦੋਵਾਂ ਮਸਾਲਿਆਂ ਦੇ ਬ੍ਰਾਂਡਾਂ ’ਤੇ ਸਵਾਲ ਖੜ੍ਹੇ ਕੀਤੇ ਹਨ।
ਭਾਰਤ ਵਿੱਚ ਜਾਰੀ ਹੈ ਜਾਂਚ
ਭਾਰਤੀ ਮਸਾਲਿਆਂ ’ਤੇ ਵਿਦੇਸ਼ਾਂ ’ਚ ਉੱਠੇ ਸਵਾਲਾਂ ਤੋਂ ਬਾਅਦ ਦੇਸ਼ ’ਚ ਜਾਂਚ ਸ਼ੁਰੂ ਕੀਤੀ ਗਈ ਸੀ। ਹੁਣ ਰਾਜਸਥਾਨ ’ਚ ਵੀ ਦੋਵਾਂ ਮਸਾਲਾ ਬ੍ਰਾਂਡਾਂ ’ਚ ਸ਼ੱਕੀ ਸਮੱਗਰੀ ਮਿਲਣ ਤੋਂ ਬਾਅਦ ਸਵਾਲ ਖੜ੍ਹੇ ਹੋ ਗਏ ਹਨ। ਸਿਹਤ ਅਧਿਕਾਰੀ ਨੇ ਫੂਡ ਸੇਫਟੀ ਐਂਡ ਸਟੈਂਡਰਡ ਅਥਾਰਟੀ ਆਫ ਇੰਡੀਆ ਨੂੰ ਪੱਤਰ ਭੇਜ ਕੇ ਦੱਸਿਆ ਕਿ ਰਾਜਸਥਾਨ ਵਿੱਚ ਕਈ ਮਸਾਲਿਆਂ ਦੀ ਜਾਂਚ ਕੀਤੀ ਗਈ ਹੈ। ਜਾਂਚ ਤੋਂ ਬਾਅਦ, ਐਵਰੈਸਟ ਸਪਾਈਸ ਮਿਕਸ ਤੋਂ ਇੱਕ ਹੋਰ ਮਸਾਲੇ ਅਤੇ ਐਮਡੀਐਚ ਤੋਂ ਦੋ ਮਸਾਲੇ ਵਰਤੋਂ ਲਈ ਅਸੁਰੱਖਿਅਤ ਪਾਏ ਗਏ।
ਕਾਰਵਾਈ ਦੀ ਮੰਗ
ਸੀਨੀਅਰ ਸਿਹਤ ਅਧਿਕਾਰੀ ਨੇ ਕਿਹਾ ਕਿ ਐਵਰੈਸਟ ਅਤੇ ਐਮਡੀਐਚ ਦੇ ਬੈਚ ਹਰਿਆਣਾ ਅਤੇ ਗੁਜਰਾਤ ਵਿੱਚ ਬਣੇ ਹਨ। ਇਸ ਲਈ ਇਨ੍ਹਾਂ ਦੋਵਾਂ ਰਾਜਾਂ ਦੇ ਅਧਿਕਾਰੀਆਂ ਖ਼ਿਲਾਫ਼ ਵੀ ਤੁਰੰਤ ਕਾਰਵਾਈ ਕਰਨੀ ਚਾਹੀਦੀ ਹੈ। ਤਾਂ ਜੋ ਲੋਕਾਂ ਦੀ ਸਿਹਤ ’ਤੇ ਇਨ੍ਹਾਂ ਦਾ ਕੋਈ ਹੋਰ ਪ੍ਰਭਾਵ ਨਾ ਪਵੇ।
ਸਿਰਫ ਐਮਡੀਐਚ ਅਤੇਐਵਰੈਸਟ ਬ੍ਰਾਂਡ ਦੇ ਮਸਾਲੇ ਹੀ ਨਹੀਂ ਬਲਕਿ ਹੋਰ ਕੰਪਨੀਆਂ ਜਿਵੇਂ ਸ਼ੀਬਾ ਤਾਜਾ, ਗਜਾਨੰਦ ਆਦਿ ਦੇ ਮਸਾਲੇ ਵੀ ਅਸੁਰੱਖਿਅਤ ਪਾਏ ਗਏ ਹਨ।
ਹੁਣ ਭਾਰਤ ’ਚ ਵੀ ਉੱਠੇ ਐਮ.ਡੀ.ਐਚ. ਅਤੇ ਐਵਰੈਸਟ ’ਤੇ ਸਵਾਲ, ਰਾਜਸਥਾਨ ’ਚ ਮਿਲੇ ਸ਼ੱਕੀ ਸੈਂਪਲ
