ਨਵੀਂ ਦਿੱਲੀ – ਦਿੱਲੀ ਵਾਸੀਆਂ ਦਾ ਸਾਹ ਪਹਿਲਾਂ ਹੀ ਖ਼ਤਰੇ ਵਿੱਚ ਹੈ। ਯਮੁਨਾ ਨਦੀ ਵਿਚ ਜ਼ਹਿਰੀਲੇ ਝੱਗ ਕਾਰਨ ਪ੍ਰਦੂਸ਼ਨ ਦਾ ਪੱਧਰ ਇੱਕ ਵਾਰ ਫਿਰ ਵੱਧ ਗਿਆ ਹੈ। ਸ਼ੁੱਕਰਵਾਰ ਨੂੰ ਕਾਲਿੰਦੀ ਕੁੰਜ ’ਚ ਯਮੁਨਾ ਨਦੀ ’ਚ ਪਾਣੀ ’ਤੇ ਸਫੇਦ ਝੱਗ ਤੈਰਦੀ ਦਿਖਾਈ ਦਿੱਤੀ। ਦੀਵਾਲੀ ਤੋਂ ਬਾਅਦ ਛੱਠ ਦਾ ਤਿਉਹਾਰ ਮਨਾਉਣ ਲਈ ਦਿੱਲੀ ’ਚ ਤਿਆਰੀਆਂ ਜ਼ੋਰਾਂ ’ਤੇ ਚੱਲ ਰਹੀਆਂ ਹਨ।
ਪਿਛਲੇ ਹਫ਼ਤੇ ਜਦੋਂ ਕਾਲਿੰਦੀ ਕੁੰਜ ’ਚ ਯਮੁਨਾ ਨਦੀ ’ਚ ਜ਼ਹਿਰੀਲੀ ਝੱਗ ਤੈਰਦੀ ਦਿਖਾਈ ਦਿੱਤੀ ਤਾਂ ‘‘ਆਮ ਆਦਮੀ’’ ਪਾਰਟੀ ਨੇ ਯਮੁਨਾ ’ਚ ਪ੍ਰਦੂਸ਼ਨ ਨੂੰ ਲੈ ਕੇ ਭਾਜਪਾ ਦੇ ਪ੍ਰਦਰਸ਼ਨ ’ਤੇ ਹਮਲਾ ਬੋਲਿਆ। ’ਆਪ’ ਨੇਤਾ ਸਤੇਂਦਰ ਜੈਨ ਨੇ ਕਿਹਾ ਸੀ ਕਿ ਨਦੀ ’ਚ ਵਹਿਣ ਵਾਲਾ ਉਦਯੋਗਿਕ ਕੂੜਾ ਦਿੱਲੀ ਤੋਂ ਨਹੀਂ ਆਉਂਦਾ, ਰਾਸ਼ਟਰੀ ਰਾਜਧਾਨੀ ’ਚ ਪਾਣੀ ਨੂੰ ਪ੍ਰਦੂਸ਼ਿਤ ਕਰਨ ਵਾਲੇ ਉਦਯੋਗ ਨਹੀਂ ਹਨ । ਜੈਨ ਨੇ ਦਾਅਵਾ ਕੀਤਾ ਕਿ ਯਮੁਨਾ ਵਿੱਚ ਉਦਯੋਗਿਕ ਕੂੜਾ ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਤੋਂ ਆਉਂਦਾ ਹੈ।ਉਨ੍ਹਾਂ ਕਿਹਾ ਸੀ ਕਿ ਇਹ ਕੂੜਾ ਬਾਦਸ਼ਾਹਪੁਰ ਨਾਲੇ ਰਾਹੀਂ ਨਜਫ਼ਗੜ੍ਹ ਨਾਲੇ ਵਿੱਚ ਜਾਂਦਾ ਹੈ, ਜੋ ਗੁਰੂਗ੍ਰਾਮ ਤੋਂ ਆਉਂਦਾ ਹੈ। ਸੋਨੀਪਤ ਵਿੱਚ, ਉਦਯੋਗਿਕ ਕੂੜਾ ਨਰੇਲਾ ਤੋਂ ਯਮੁਨਾ ’ਚ ਆਉਂਦਾ ਹੈ। ਸ਼ਾਹਦਰਾ ਨਾਲੇ ਵਿੱਚ ਉਦਯੋਗਿਕ ਕੂੜਾ ਉੱਤਰ ਪ੍ਰਦੇਸ਼ ਤੋਂ ਆਉਂਦਾ ਹੈ।
ਉਨ੍ਹਾਂ ਕਿਹਾ ਸੀ ਕਿ ਕਾਲਿੰਦੀ ਕੁੰਜ ਨੇੜੇ ਯੂਪੀ ਜਲ ਨਿਗਮ ਦੁਆਰਾ ਪਾਬੰਦੀਸ਼ੁਦਾ ਬੈਰਾਜ ਹੈ, ਜਿਸ ਦੇ 12 ਗੇਟ ਹਨ । ਜੇਕਰ ਇਹ ਸਾਰੇ ਗੇਟ ਖੋਲ੍ਹ ਦਿੱਤੇ ਜਾਣ ਤਾਂ ਝੱਗ ਨਹੀਂ ਜੰਮੇਗੀ ਪਰ ਆਮ ਤੌਰ ’ਤੇ 2-3 ਗੇਟ ਹੀ ਖੁੱਲ੍ਹਦੇ ਹਨ ।ੳੱੁਥੇ ਹੀ ਦਿੱਲੀ ਦੇ ਵਾਤਾਵਰਣ ਮੰਤਰੀ ਗੋਪਾਲ ਰਾਏ ਨੇ ਭਾਜਪਾ ਦੀ ਆਲੋਚਨਾ ਕਰਦੇ ਹੋਏ ਕਿਹਾ ਸੀ ਕਿ ਭਾਜਪਾ ਅਸਲੀ ਹੱਲ ਦੀ ਬਜਾਏ ਸਿਰਫ ਦਿਖਾਵੇ ’ਤੇ ਧਿਆਨ ਦੇ ਰਹੀ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਭਾਜਪਾ ਪ੍ਰਦੂਸ਼ਣ ਫੈਲਾਉਣ ਵਾਲੀ ਪਾਰਟੀ ਹੈ ਅਤੇ ਮਹਿਸੂਸ ਕਰਦੀ ਹੈ ਕਿ ਡਰਾਮੇ ਰਾਹੀਂ ਪ੍ਰਦੂਸ਼ਣ ਦਾ ਹੱਲ ਕੱਢਿਆ ਜਾ ਸਕਦਾ ਹੈ, ਪਰ ਦਿੱਲੀ ਸਰਕਾਰ ਨੂੰ ਲੱਗਦਾ ਹੈ ਕਿ ਸਾਰੀਆਂ ਸਰਕਾਰਾਂ ਅਤੇ ਪਾਰਟੀਆਂ ਨੂੰ ਮਿਲ ਕੇ ਕੰਮ ਕਰਨਾ ਚਾਹੀਦਾ ਹੈ।
ਦਿੱਲੀ ਦੇ ਕਾਲਿੰਦੀ ਕੁੰਜ ਵਿੱਚ ਯਮੁਨਾ ਨਦੀ ’ਚ ਪ੍ਰਦੂਸ਼ਨ ਦਾ ਪੱਧਰ ਇੱਕ ਵਾਰ ਮੁੜ ਵਧਿਆ
