ਸਿਡਨੀ – ਸਿਡਨੀ ਦੇ ਦੱਖਣ-ਪੱਛਮੀ ਇਲਾਕੇ ਵਾਈਲੀ ਪਾਰਕ ਵਿੱਚ ਹਾਲ ਹੀ ਵਿੱਚ ਹੋਏ ਘਰ ਨੂੰ ਅੱਗ ਲੱਗਣ ਦੇ ਦਰਦਨਾਕ ਹਾਦਸੇ ਤੋਂ ਬਾਅਦ Fire and Rescue NSW (FRNSW) ਦੇ ਫਾਇਰਫਾਈਟਰ ਅੱਜ ਮੁੜ ਇਲਾਕੇ ਵਿੱਚ ਪਹੁੰਚੇ। ਉਨ੍ਹਾਂ ਨੇ ਲੋਕਾਂ ਦੇ ਘਰਾਂ ਵਿੱਚ ਜਾ ਕੇ ਅੱਗ ਤੋਂ ਬਚਾਅ ਅਤੇ ਸੁਰੱਖਿਆ ਬਾਰੇ ਜ਼ਰੂਰੀ ਜਾਣਕਾਰੀ ਦਿੱਤੀ।
29 ਜੁਲਾਈ ਨੂੰ ਕੋਰਨੇਲੀਆ ਸਟ੍ਰੀਟ ਵਿੱਚ ਇੱਕ ਘਰ ਦੇ ਪਿਛਲੇ ਹਿੱਸੇ ਵਿੱਚ ਬਣੇ ਗ੍ਰੈਨੀ ਫਲੈਟ ਵਿੱਚ ਅੱਗ ਲੱਗ ਗਈ ਸੀ। ਇਸ ਹਾਦਸੇ ਵਿੱਚ ਇੱਕ ਜੋੜੇ ਅਤੇ ਉਨ੍ਹਾਂ ਦੇ 16 ਸਾਲਾ ਪੁੱਤਰ ਦੀ ਮੌਤ ਹੋ ਗਈ ਸੀ। FRNSW ਅਤੇ ਪੁਲਿਸ ਦੀ ਜਾਂਚ ਮੁਤਾਬਕ ਅੱਗ ਦੀਆਂ ਤੇਜ਼ ਲਪਟਾਂ ਕਾਰਨ ਪਰਿਵਾਰ ਘਰ ਦੇ ਸਾਹਮਣੇ ਵਾਲੇ ਦਰਵਾਜ਼ੇ ਰਾਹੀਂ ਬਾਹਰ ਨਹੀਂ ਨਿਕਲ ਸਕਿਆ। ਇਹ ਘਰ ਤੋਂ ਬਾਹਰ ਜਾਣ ਦਾ ਇਕੋ-ਇਕ ਰਸਤਾ ਸੀ। ਅੱਗ ਲੱਗਣ ਦਾ ਕਾਰਨ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ।
ਅੱਜ ਫਾਇਰਫਾਈਟਰਾਂ ਦੇ ਨਾਲ FRNSW ਦੇ ਕਮਿਸ਼ਨਰ ਜੈਰੇਮੀ ਫਿਊਟ੍ਰੈਲ ਵੀ ਮੌਜੂਦ ਸਨ। ਟੀਮ ਨੇ ਇਲਾਕੇ ਦੇ ਘਰਾਂ ਦੇ ਦਰਵਾਜ਼ੇ ਖੜਕਾ ਕੇ ਲੋਕਾਂ ਨੂੰ ਅੱਗ ਤੋਂ ਬਚਾਅ ਬਾਰੇ ਜਾਣਕਾਰੀ ਦਿੱਤੀ। ਫਾਇਰਫਾਈਟਰਾਂ ਨੇ ਘਰਾਂ ਵਿੱਚ ਅੱਗ ਦੇ ਖਤਰਿਆਂ ਦੀ ਜਾਂਚ ਕਰਨ, ਐਮਰਜੈਂਸੀ ਵਿੱਚ ਬਾਹਰ ਨਿਕਲਣ ਦੀ ਯੋਜਨਾ ਬਣਾਉਣ ਅਤੇ ਸਮੋਕ ਅਲਾਰਮ ਠੀਕ ਤਰ੍ਹਾਂ ਕੰਮ ਕਰ ਰਹੇ ਹਨ ਜਾਂ ਨਹੀਂ, ਇਹ ਦੇਖਣ ਦੀ ਪੇਸ਼ਕਸ਼ ਕੀਤੀ।
ਕਮਿਸ਼ਨਰ ਫਿਊਟ੍ਰੈਲ ਨੇ ਕਿਹਾ ਕਿ ਇਸ ਅੱਗ ਵਿੱਚ ਤਿੰਨ ਲੋਕਾਂ ਦੀ ਮੌਤ ਬਹੁਤ ਦੁਖਦਾਈ ਹੈ ਅਤੇ ਇਸ ਦਾ ਅਸਰ ਪੂਰੇ ਵਾਈਲੀ ਪਾਰਕ ਭਾਈਚਾਰੇ ਉੱਤੇ ਪਿਆ ਹੈ। ਉਨ੍ਹਾਂ ਕਿਹਾ ਕਿ ਫਾਇਰਫਾਈਟਰ ਆਪਣੇ ਦੋਸਤਾਂ ਅਤੇ ਗੁਆਂਢੀਆਂ ਨੂੰ ਅੱਗ ਤੋਂ ਸੁਰੱਖਿਅਤ ਰੱਖਣ ਲਈ ਲੋਕਾਂ ਤੱਕ ਪਹੁੰਚ ਕਰ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਇਸ ਸਰਦੀ ਦੌਰਾਨ NSW ਵਿੱਚ ਘਰਾਂ ਅਤੇ ਇਮਾਰਤਾਂ ਵਿੱਚ ਲੱਗੀਆਂ ਅੱਗਾਂ ਕਾਰਨ ਹੁਣ ਤੱਕ 11 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ ਇਸ ਸਾਲ ਹੁਣ ਤੱਕ 24 ਲੋਕ ਜਾਨ ਗੁਆ ਚੁੱਕੇ ਹਨ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਆਪਣੇ ਘਰਾਂ ਵਿੱਚ ਚੱਲਦੇ ਸਮੋਕ ਅਲਾਰਮ ਅਤੇ ਅੱਗ ਲੱਗਣ ਦੀ ਸਥਿਤੀ ਵਿੱਚ ਬਾਹਰ ਨਿਕਲਣ ਦੀ ਯੋਜਨਾ ਜ਼ਰੂਰ ਬਣਾਈ ਜਾਵੇ।
ਫਾਇਰਫਾਈਟਰਾਂ ਨੇ ਖਾਸ ਤੌਰ ’ਤੇ ਖਾਣਾ ਬਣਾਉਂਦੇ ਸਮੇਂ ਰਸੋਈ ਵੱਲੋਂ ਧਿਆਨ ਨਾ ਹਟਾਉਣ ਦੀ ਸਲਾਹ ਦਿੱਤੀ ਹੈ। ਸਰਦੀਆਂ ਵਿੱਚ ਹੀਟਰਾਂ ਦੀ ਵਰਤੋਂ ਕਰਦੇ ਸਮੇਂ ਜਲਣ ਵਾਲੀਆਂ ਚੀਜ਼ਾਂ ਨੂੰ ਹੀਟਰ ਤੋਂ ਘੱਟੋ-ਘੱਟ ਇੱਕ ਮੀਟਰ ਦੂਰ ਰੱਖਣ ਲਈ ਵੀ ਕਿਹਾ ਗਿਆ ਹੈ। ਇਸ ਸਰਦੀ ਵਿੱਚ NSW ਵਿੱਚ ਹੁਣ ਤੱਕ 842 ਘਰਾਂ ਵਿੱਚ ਅੱਗ ਲੱਗ ਚੁੱਕੀ ਹੈ ਅਤੇ ਇਨ੍ਹਾਂ ਘਟਨਾਵਾਂ ਵਿੱਚ 76 ਲੋਕ ਜ਼ਖਮੀ ਹੋਏ ਹਨ। ਸਾਲ ਦੀ ਸ਼ੁਰੂਆਤ ਤੋਂ ਹੁਣ ਤੱਕ FRNSW ਨੇ 2,388 ਘਰਾਂ ਵਿੱਚ ਲੱਗੀਆਂ ਅੱਗਾਂ ’ਤੇ ਕਾਰਵਾਈ ਕੀਤੀ ਹੈ ਅਤੇ 237 ਲੋਕ ਜ਼ਖਮੀ ਹੋਏ ਹਨ। FRNSW ਮੁਤਾਬਕ 46 ਫੀਸਦੀ ਘਰਾਂ ਵਿੱਚ ਕੰਮ ਕਰਦਾ ਸਮੋਕ ਅਲਾਰਮ ਮੌਜੂਦ ਨਹੀਂ ਸੀ। ਇਸ ਸਾਲ ਦੀਆਂ ਕੁੱਲ ਘਰਾਂ ਦੀਆਂ ਅੱਗਾਂ ਵਿੱਚੋਂ 38 ਫੀਸਦੀ ਘਟਨਾਵਾਂ ਰਸੋਈ ਨਾਲ ਸਬੰਧਤ ਰਹੀਆਂ ਹਨ।
ਲੋਕ FRNSW ਦੀ ਵੈੱਬਸਾਈਟ ਰਾਹੀਂ ਮੁਫ਼ਤ Home Fire Safety Visit ਬੁੱਕ ਕਰ ਸਕਦੇ ਹਨ ਜਾਂ ਆਪਣੇ ਨੇੜਲੇ ਫਾਇਰ ਸਟੇਸ਼ਨ ਨਾਲ ਸੰਪਰਕ ਕਰ ਸਕਦੇ ਹਨ। ਫਾਇਰਫਾਈਟਰ ਘਰ ਦੀ ਜਾਂਚ ਕਰਕੇ ਅੱਗ ਦੇ ਖਤਰੇ ਦੱਸਦੇ ਹਨ, ਸੁਰੱਖਿਆ ਸਬੰਧੀ ਸਲਾਹ ਦਿੰਦੇ ਹਨ ਅਤੇ ਲੋੜ ਪੈਣ ’ਤੇ 10 ਸਾਲ ਤੱਕ ਚੱਲਣ ਵਾਲਾ ਸਮੋਕ ਅਲਾਰਮ ਵੀ ਮੁਫ਼ਤ ਲਗਾ ਸਕਦੇ ਹਨ।