ਸਿਡਨੀ – ਨੇਪਾਲ ਵਿੱਚ ਭਿਆਨਕ ਹੜ੍ਹਾਂ ਤੋਂ ਬਾਅਦ ਖੋਜ ਅਤੇ ਬਚਾਅ ਕਾਰਜਾਂ ਵਿੱਚ ਮਦਦ ਲਈ ਫਾਇਰ ਐਂਡ ਰੈਸਕਿਊ NSW (FRNSW) ਆਪਣੇ 10 ਮਾਹਿਰ ਕਰਮਚਾਰੀ ਨੇਪਾਲ ਭੇਜ ਰਿਹਾ ਹੈ। ਇਹ ਟੀਮ ਆਸਟ੍ਰੇਲੀਆ ਸਰਕਾਰ ਦੀ ਬੇਨਤੀ ’ਤੇ ਭੇਜੀ ਜਾ ਰਹੀ ਹੈ।
FRNSW ਦੇ 10 ਕਰਮਚਾਰੀਆਂ ਵਿੱਚ 6 ਡਰੋਨ ਆਪਰੇਟਰ ਅਤੇ 4 ਘਟਨਾ ਪ੍ਰਬੰਧਨ ਮਾਹਿਰ ਸ਼ਾਮਲ ਹਨ। ਇਹ ਟੀਮ 15 ਮੈਂਬਰੀ ਆਸਟ੍ਰੇਲੀਅਨ ਡਿਜ਼ਾਸਟਰ ਅਸਿਸਟੈਂਸ ਰਿਸਪਾਂਸ ਟੀਮ (DART) ਦਾ ਹਿੱਸਾ ਹੋਵੇਗੀ। ਮਾਹਿਰ ਡਰੋਨ ਟੈਕਨੋਲੋਜੀ ਦੀ ਮਦਦ ਨਾਲ ਉਨ੍ਹਾਂ ਇਲਾਕਿਆਂ ਵਿੱਚ ਖੋਜ ਕਰਨਗੇ ਜਿੱਥੇ ਜ਼ਮੀਨੀ ਟੀਮਾਂ ਲਈ ਪਹੁੰਚਣਾ ਬਹੁਤ ਮੁਸ਼ਕਲ ਜਾਂ ਖ਼ਤਰਨਾਕ ਹੈ। FRNSW ਕੋਲ ਵੱਖ-ਵੱਖ ਆਕਾਰ ਦੇ ਡਰੋਨਾਂ ਦਾ ਵੱਡਾ ਬੇੜਾ ਹੈ। ਛੋਟੇ ਡਰੋਨ ਤੰਗ ਥਾਵਾਂ ਵਿੱਚ ਜਾ ਕੇ ਫਸੇ ਜਾਂ ਜ਼ਖਮੀ ਲੋਕਾਂ ਦੀ ਭਾਲ ਕਰ ਸਕਦੇ ਹਨ, ਜਦਕਿ ਵੱਡੇ ਡਰੋਨ ਵੱਡੇ ਇਲਾਕਿਆਂ ਦੀ ਜਾਂਚ ਕਰਨ ਲਈ ਵਰਤੇ ਜਾਂਦੇ ਹਨ।
ਨੇਪਾਲ ਦਾ ਪ੍ਰਭਾਵਿਤ ਇਲਾਕਾ ਦੂਰ-ਦਰਾਜ਼ ਅਤੇ ਮੁਸ਼ਕਲ ਪਹੁੰਚ ਵਾਲਾ ਹੈ। ਹੜ੍ਹਾਂ ਕਾਰਨ ਸੜਕਾਂ ਅਤੇ ਹੋਰ ਜ਼ਰੂਰੀ ਬੁਨਿਆਦੀ ਢਾਂਚੇ ਨੂੰ ਵੀ ਭਾਰੀ ਨੁਕਸਾਨ ਪਹੁੰਚਿਆ ਹੈ। FRNSW ਦੀ ਏਵੀਏਸ਼ਨ ਟੀਮ ਬਚਾਅ ਕਾਰਜਾਂ ਲਈ ਹਵਾਈ ਤਸਵੀਰਾਂ, ਨਕਸ਼ੇ ਅਤੇ ਹੋਰ ਮਹੱਤਵਪੂਰਨ ਜਾਣਕਾਰੀ ਮੁਹੱਈਆ ਕਰੇਗੀ। ਇਸ ਵਿੱਚ ਪ੍ਰਭਾਵਿਤ ਇਲਾਕਿਆਂ ਦੀ ਜਾਂਚ, ਰਸਤੇ ਦੀ ਪਛਾਣ ਅਤੇ ਲੋੜ ਵਾਲੀਆਂ ਥਾਵਾਂ ’ਤੇ ਨਿਸ਼ਾਨਾ ਬਣਾਕੇ ਖੋਜ ਸ਼ਾਮਲ ਹੋਵੇਗੀ। ਡਰੋਨਾਂ ਵਿੱਚ ਥਰਮਲ ਇਮੇਜਿੰਗ ਦੀ ਸਹੂਲਤ ਵੀ ਹੈ, ਜਿਸ ਨਾਲ ਗਰਮੀ ਦੇ ਸਰੋਤਾਂ ਅਤੇ ਮਲਬੇ ਵਿੱਚ ਫਸੇ ਲੋਕਾਂ ਦੀ ਪਛਾਣ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ। ਇਸ ਤੋਂ ਇਲਾਵਾ 3D ਮੈਪਿੰਗ, ਲਾਈਵ ਵੀਡੀਓ, ਸਪੌਟਲਾਈਟ ਅਤੇ ਸਪੀਕਰ ਵਰਗੀਆਂ ਸਹੂਲਤਾਂ ਵੀ ਮੌਜੂਦ ਹਨ। ਇਹ ਜਾਣਕਾਰੀ ਨੇਪਾਲ ਸਰਕਾਰ ਨੂੰ ਖੋਜ ਅਤੇ ਬਚਾਅ ਦੀ ਯੋਜਨਾ ਬਣਾਉਣ ਅਤੇ ਖ਼ਤਰੇ ਦਾ ਮੁਲਾਂਕਣ ਕਰਨ ਵਿੱਚ ਮਦਦ ਕਰੇਗੀ।
FRNSW ਅਤੇ Queensland Fire Department (QFD) ਆਸਟ੍ਰੇਲੀਆ ਦੀਆਂ ਸਿਰਫ਼ ਦੋ ਐਮਰਜੈਂਸੀ ਸੇਵਾਵਾਂ ਹਨ ਜਿਨ੍ਹਾਂ ਨੂੰ ਸੰਯੁਕਤ ਰਾਸ਼ਟਰ ਦੀ INSARAG ਅੰਤਰਰਾਸ਼ਟਰੀ ਖੋਜ ਅਤੇ ਬਚਾਅ ਵਰਗੀਕਰਨ ਪ੍ਰਾਪਤ ਹੈ। ਇਸ ਕਾਰਨ ਇਹ ਟੀਮਾਂ ਵਿਦੇਸ਼ਾਂ ਵਿੱਚ ਵੱਡੀਆਂ ਆਫ਼ਤਾਂ ਦੌਰਾਨ ਤਾਇਨਾਤ ਕੀਤੀਆਂ ਜਾ ਸਕਦੀਆਂ ਹਨ।
FRNSW ਦੇ ਕਮਿਸ਼ਨਰ Jeremy Fewtrell ਨੇ ਕਿਹਾ ਕਿ ਟੀਮ ਨੂੰ ਇਸ ਤਰ੍ਹਾਂ ਦੇ ਐਮਰਜੈਂਸੀ ਹਾਲਾਤਾਂ ਲਈ ਸਿਖਲਾਈ ਦਿੱਤੀ ਗਈ ਹੈ। ਟੀਮ ਆਪਣਾ ਖਾਣਾ, ਪਾਣੀ, ਦਵਾਈਆਂ ਅਤੇ ਟੈਂਟ ਆਪਣੇ ਨਾਲ ਲੈ ਕੇ ਜਾਵੇਗੀ, ਤਾਂ ਜੋ ਨੇਪਾਲ ਦੇ ਸਥਾਨਕ ਸਰੋਤਾਂ ’ਤੇ ਵਾਧੂ ਬੋਝ ਨਾ ਪਵੇ। ਡਰੋਨ ਉਨ੍ਹਾਂ ਇਲਾਕਿਆਂ ਵਿੱਚ ਉਡਾਏ ਜਾਣਗੇ ਜਿਨ੍ਹਾਂ ਨੂੰ ਜ਼ਮੀਨੀ ਟੀਮਾਂ ਲਈ ਬਹੁਤ ਖ਼ਤਰਨਾਕ ਮੰਨਿਆ ਗਿਆ ਹੈ ਅਤੇ ਇਨ੍ਹਾਂ ਤੋਂ ਮਿਲਣ ਵਾਲੀ ਜਾਣਕਾਰੀ ਖੋਜ ਤੇ ਬਚਾਅ ਕਾਰਜਾਂ ਲਈ ਮਹੱਤਵਪੂਰਨ ਹੋਵੇਗੀ।
FRNSW ਦੀਆਂ ਟੀਮਾਂ ਪਿਛਲੇ ਸਾਲਾਂ ਵਿੱਚ ਕਈ ਵੱਡੀਆਂ ਵਿਦੇਸ਼ੀ ਆਫ਼ਤਾਂ ਦੌਰਾਨ ਮਦਦ ਕਰ ਚੁੱਕੀਆਂ ਹਨ। ਇਨ੍ਹਾਂ ਵਿੱਚ 2023 ਦਾ ਤੁਰਕੀ ਭੂਚਾਲ, 2022 ਦਾ ਟੋਂਗਾ ਜਵਾਲਾਮੁਖੀ ਧਮਾਕਾ, 2020 ਦੀਆਂ ਇੰਡੋਨੇਸ਼ੀਆਈ ਭੂਸਖਲਨ ਦੀਆਂ ਘਟਨਾਵਾਂ ਅਤੇ 2011 ਵਿੱਚ ਕ੍ਰਾਇਸਟਚਰਚ ਤੇ ਜਾਪਾਨ ਦੇ ਭੂਚਾਲ ਸ਼ਾਮਲ ਹਨ।
ਇਸ ਦੌਰਾਨ ਆਸਟ੍ਰੇਲੀਆ ਦਾ ਵਿਦੇਸ਼ ਮਾਮਲਿਆਂ ਅਤੇ ਵਪਾਰ ਵਿਭਾਗ (DFAT) ਨੇਪਾਲ ਦੇ ਸਥਾਨਕ ਅਧਿਕਾਰੀਆਂ ਨਾਲ ਮਿਲ ਕੇ ਪ੍ਰਭਾਵਿਤ ਆਸਟ੍ਰੇਲੀਅਨ ਨਾਗਰਿਕਾਂ ਦੀ ਸਥਿਤੀ ਅਤੇ ਉਨ੍ਹਾਂ ਦੇ ਟਿਕਾਣੇ ਬਾਰੇ ਜਾਣਕਾਰੀ ਹਾਸਲ ਕਰਨ ਲਈ ਕੰਮ ਕਰ ਰਿਹਾ ਹੈ।