ਕਦੋਂ ਤਕ ਅਡਵਾਨੀ ਦੀ ਗ੍ਰਿਫ਼ਤਾਰੀ ਬਦਲੇ ਕੁਰਬਾਨੀ ਦੇਣਗੇ ਮੁਸਲਮਾਨ – ਓਵੈਸੀ

ਪਟਨਾ – ਬਿਹਾਰ ਦੇ ਸੀਵਾਨ ‘ਚ ਆਯੋਜਿਤ ਮਹਾਵੀਰੀ ਮੇਲੇ ਦੇ ਅਖਾੜੇ ਦੀ ਸ਼ੋਭਾਯਾਤਰਾ ਦੌਰਾਨ ਪੱਥਰਬਾਜੀ ਦੀ ਘਟਨਾ ਵਿਰੁੱਧ ਕਾਰਵਾਈ ਜ਼ੋਰ ਫੜਦੀ ਜਾ ਰਹੀ ਹੈ। ਮੈਜਿਸਟਰੇਟ ਦੇ ਬਿਆਨਾਂ ’ਤੇ ਪੁਲੀਸ ਨੇ ਦੋਵਾਂ ਧਿਰਾਂ ਦੇ ਦੋ ਦਰਜਨ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਜੇਲ੍ਹ ਭੇਜ ਦਿੱਤਾ ਹੈ। ਦੋਸ਼ ਹੈ ਕਿ ਇਸ ਵਿੱਚ ਇੱਕ ਅੱਠ ਸਾਲ ਦਾ ਲੜਕਾ ਵੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਬੱਚੇ ਨੂੰ ਬਾਲ ਸੁਧਾਰਘਰ ਭੇਜ ਦਿੱਤਾ ਗਿਆ ਹੈ। ਬਿਹਾਰ ਵਿੱਚ ਇਸ ਘਟਨਾਕ੍ਰਮ ਨੂੰ ਲੈ ਕੇ ਆਲ ਇੰਡੀਆ ਮਜਲਿਸ ਇਤੇਹਾਦੁਲ ਮੁਸਲਿਮੀਨ (ਏਆਈਐੱਮਆਈਐੱਮ) ਦੇ ਪ੍ਰਧਾਨ ਅਤੇ ਸੰਸਦ ਮੈਂਬਰ ਅਸਦੁਦੀਨ ਓਵੈਸੀ ਨੇ ਸਰਕਾਰ ਸਮੇਤ ਰਾਸ਼ਟਰੀ ਜਨਤਾ ਦਲ ਦੇ ਸੁਪਰੀਮੋ ਲਾਲੂ ਪ੍ਰਸਾਦ ਯਾਦਵ ਨੂੰ ਘੇਰਿਆ ਹੈ। ਓਵੈਸੀ ਨੇ ਟਵੀਟ ਕਰ ਕੇ ਪੁੱਛਿਆ ਹੈ ਕਿ ਲਾਲ ਕ੍ਰਿਸ਼ਨ ਅਡਵਾਨੀ ਨੂੰ ਗ੍ਰਿਫ਼ਤਾਰ ਕਰਨ ਬਦਲੇ ਮੁਸਲਮਾਨਾਂ ਨੂੰ ਕਦੋਂ ਤੱਕ ਕੁਰਬਾਨੀ ਕਰਨੀ ਪਵੇਗੀ।
ਅਸਦੁਦੀਨ ਓਵੈਸੀ ਸੀਵਾਨ ਮਾਮਲੇ ‘ਚ ਬਿਹਾਰ ਸਰਕਾਰ ‘ਤੇ ਲਗਾਤਾਰ ਹਮਲੇ ਕਰ ਰਹੇ ਹਨ। ਉਨ੍ਹਾਂ ਨੇ ਪਿਛਲੇ ਚਾਰ ਦਿਨਾਂ ‘ਚ ਕਈ ਟਵੀਟ ਕੀਤੇ। ਮੁੱਖ ਮੰਤਰੀ ‘ਤੇ ਤਨਜ਼ ਕੱਸਦਿਆਂ ਉਨ੍ਹਾਂ ਕਿਹਾ ਸੀ ਕਿ ਨਿਤੀਸ਼ ਕੁਮਾਰ ਦੇ ਸ਼ਾਸਨ ‘ਚ ਬੱਚੇ ਵੀ ਸੁਰੱਖਿਅਤ ਨਹੀਂ ਹਨ। ਐਤਵਾਰ ਨੂੰ ਓਵੈਸੀ ਨੇ ਸਿੱਧੇ ਆਰਜੇਡੀ ਸੁਪਰੀਮੋ ਲਾਲੂ ਪ੍ਰਸਾਦ ਅਤੇ ਬਿਹਾਰ ਦੇ ਡਿਪਟੀ ਸੀਐੱਮ ਤੇਜਸਵੀ ਯਾਦਵ ਨੂੰ ਘੇਰ ਲਿਆ। ਓਵੈਸੀ ਨੇ ਕਿਹਾ ਕਿ ਅੱਠ ਸਾਲਾ ਰਿਜ਼ਵਾਨ ਅਤੇ 70 ਸਾਲਾ ਯਾਸੀਨ ਕੈਦ ਹਨ। ਲਾਲੂ ਪ੍ਰਸਾਦ ਯਾਦਵ ਨੇ 1990 ਵਿੱਚ ਲਾਲ ਕ੍ਰਿਸ਼ਨ ਅਡਵਾਨੀ ਨੂੰ ‘ਗ੍ਰਿਫ਼ਤਾਰ’ ਕਰ ਕੇ ਗੈਸਟ ਹਾਊਸ ਭੇਜ ਦਿੱਤਾ ਸੀ। ਇਸ ਦਾ ਭੁਗਤਾਨ ਕਰਨ ਲਈ ਮੁਸਲਮਾਨਾਂ ਨੂੰ ਕਿੰਨੀਆਂ ਨਸਲਾਂ ਦੀ ਕੁਰਬਾਨੀ ਕਰਨੀ ਪਵੇਗੀ? ਓਵੈਸੀ ਨੇ ਕਿਹਾ ਕਿ ਲਾਲੂ ਆਪਣਾ ਪੱਖ ਪੂਰ ਕੇ ਮੰਤਰੀ ਬਣ ਗਏ ਪਰ ਸਾਡੇ ਬੱਚੇ ਤੇ ਬਜ਼ੁਰਗ…?