ਵੈਸਟਰਨ ਆਸਟ੍ਰੇਲੀਆ ਵਿੱਚ ਇਸ ਸਮੇਂ ਕੁਆਰੰਟੀਨ ਵਿੱਚ ਰੱਖੇ ਗਏ ਛੇ ਯਾਤਰੀਆਂ ਲਈ ਹਾਂਟਾਵਾਇਰਸ ਟੈਸਟ ਦੇ ਨਤੀਜੇ ਵਾਪਸ ਮਿਲ ਗਏ ਹਨ। ਇੱਕ ਕਰੂਜ਼ ਜਹਾਜ਼ ਦੇ ਵਿੱਚੋਂ ਵਾਪਸ ਆਏ ਛੇ ਯਾਤਰੀ ਜੋ ਘਾਤਕ ਹਾਂਟਾਵਾਇਰਸ ਦੇ ਸੰਪਰਕ ਵਿੱਚ ਆਏ ਸਨ। ਇਹਨਾਂ ਯਾਤਰੀਆਂ ਨੂੰ ਵੈਸਟਰਨ ਆਸਟ੍ਰੇਲੀਆ ਦੇ ਪਰਥ ਤੋਂ 40 ਕਿਲੋਮੀਟਰ ਦੂਰ ਇੱਕ ਕੁਆਰੰਟੀਨ ਸਹੂਲਤ ਵਿੱਚ ਰੱਖਿਆ ਗਿਆ ਸੀ ਜੋ ਕਿ ਕੋਵਿਡ ਟੈਸਟ ਵਾਸਤੇ ਬਣਾਈ ਗਈ ਸੀ।
ਚਾਰ ਆਸਟ੍ਰੇਲੀਅਨ ਨਾਗਰਿਕ, ਇੱਕ ਸਥਾਈ ਨਿਵਾਸੀ ਅਤੇ ਇੱਕ ਨਿਊਜ਼ੀਲੈਂਡਰ ਇਸ ਸਮੇਂ ਬੁੱਲਸਬਰੂਕ ਵਿੱਚ ਇੱਕ ਕੁਆਰੰਟੀਨ ਸਹੂਲਤ ਵਿੱਚ ਹਨ। ਉਨ੍ਹਾਂ ਨੂੰ ਐਮਵੀ ਹੋਂਡੀਅਸ ਕਰੂਜ਼ ਜਹਾਜ਼ ਤੋਂ ਬਾਹਰ ਕੱਢਿਆ ਗਿਆ ਸੀ, ਜੋ ਹਾਂਟਾਵਾਇਰਸ ਦੇ ਸੰਪਰਕ ਵਿੱਚ ਆ ਗਏ ਸਨ। ਇਸ ਵਾਇਰਸ ਦੇ ਨਾਲ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਸੀ ਜਦਕਿ ਕਈ ਹੋਰ ਸੰਪਰਕ ਦੇ ਵਿੱਚ ਆ ਗਏ ਸਨ।
ਸਪੇਨ ਤੋਂ ਨੀਦਰਲੈਂਡ ਲਿਜਾਣ ਤੋਂ ਬਾਅਦ ਵਾਪਸ ਭੇਜੇ ਗਏ ਯਾਤਰੀਆਂ ਦੇ ਸਮੂਹ ਨੂੰ ਆਸਟ੍ਰੇਲੀਆ ਦੀ ਧਰਤੀ ‘ਤੇ ਵਾਪਸ ਭੇਜ ਦਿੱਤਾ ਗਿਆ ਸੀ। ਇਹ ਛੇ ਯਾਤਰੀ ਸ਼ੁੱਕਰਵਾਰ ਨੂੰ ਪਰਥ ਦੇ ਨੇੜੇ ਰੌਇਲ ਆਸਟ੍ਰੇਲੀਅਨ ਏਅਰ ਫੋਰਸ ਬੇਸ ਪੀਅਰਸ ‘ਤੇ ਉਤਰੇ ਸਨ, ਜਿੱਥੇ ਉਨ੍ਹਾਂ ਨੂੰ ਤੁਰੰਤ ਸਖ਼ਤ ਕੁਆਰੰਟੀਨ ਵਿੱਚ ਲਿਜਾਇਆ ਗਿਆ ਸੀ। ਕੋਵਿਡ ਮਹਾਂਮਾਰੀ ਦੇ ਦੌਰਾਨ 500 ਬੈੱਡ ਦੀਆਂ ਸਹੂਲਤਾਂ ਵਾਲੇ ਇਸ ਕੁਆਰੰਟੀਨ ਸਹੂਲਤ ਸੈਂਟਰ ‘ਬੁਲਜ਼ਬਰੁੱਕ ਸੈਂਟਰ ਆਫ਼ ਰੀਜ਼ੀਲੀਐਂਸ’ ਨੂੰ 400 ਮਿਲੀਅਨ ਡਾਲਰ ਨਾਲ ਤਿਆਰ ਕੀਤਾ ਗਿਆ ਸੀ। ਇਹਨਾਂ ਯਾਤਰੀਆਂ ਨੇ ਇਸ ਸਹੂਲਤ ਵਿੱਚ ਤਿੰਨ ਹਫ਼ਤੇ ਬਿਤਾਏ ਜੋ ਸ਼ਾਇਦ ਇਸ ਕਰੂਜ਼ ਜਹਾਜ਼ ਤੋਂ ਯਾਤਰੀਆਂ ਨੂੰ ਵਾਪਸ ਭੇਜਣ ਵਾਲੇ ਕਿਸੇ ਵੀ ਦੇਸ਼ ਦੁਆਰਾ ਸਭ ਤੋਂ ਸਖਤ ਕੁਆਰੰਟੀਨ ਪ੍ਰਤੀਕਿਰਿਆ ਹੈ।
ਆਸਟ੍ਰੇਲੀਆ ਦੇ ਸਿਹਤ ਮੰਤਰੀ ਮਾਰਕ ਬਟਲਰ ਨੇ ਪੁਸ਼ਟੀ ਕਰਦਿਆਂ ਦੱਸਿਆ ਹੈ ਕਿ, “ਸਾਰੇ ਦੇ ਸਾਰੇ ਛੇ ਯਾਤਰੀਆਂ ਦੇ ਵਾਇਰਸ ਲਈ ਖੂਨ ਦੇ ਟੈਸਟ ਕੀਤੇ ਗਏ ਸਨ ਅਤੇ ਸਾਰੇ ਨਕਾਰਾਤਮਕ ਨਤੀਜੇ ਵਾਪਸ ਆ ਗਏ ਹਨ। ਐਮਵੀ ਹੋਂਡੀਅਸ ਦੇ ਸਾਰੇ ਯਾਤਰੀ ਠੀਕ-ਠਾਕ ਹਨ। ਉਨ੍ਹਾਂ ਦੇ ਖੂਨ ਦੇ ਟੈਸਟ ਐਂਡੀਜ਼ ਵਾਇਰਸ ਲਈ ਨਕਾਰਾਤਮਕ ਵਾਪਸ ਆਏ ਹਨ ਅਤੇ ਆਸਟ੍ਰੇਲੀਆ ਪਹੁੰਚਣ ਤੋਂ ਬਾਅਦ ਕਿਸੇ ਵਿੱਚ ਵੀ ਇਸ ਵਾਇਰਸ ਦੇ ਲੱਛਣ ਨਹੀਂ ਮਿਲੇ ਹਨ। ਵਾਪਸ ਆਏ ਯਾਤਰੀਆਂ ਦੇ ਵਿੱਚ ਸ਼ਾਮਲ ਸਾਰੇ ਵਿਅਕਤੀਆਂ ਦਾ ਪ੍ਰਬੰਧਨ ਸਖ਼ਤ ਵਾਇਰਸ ਰੋਕਥਾਮ ਅਤੇ ਕੰਟਰੋਲ ਪ੍ਰੋਟੋਕੋਲ ਅਧੀਨ ਕੀਤਾ ਗਿਆ ਸੀ, ਜਿਸ ਵਿੱਚ ਨਿੱਜੀ ਸੁਰੱਖਿਆ ਉਪਕਰਣਾਂ ਦੀ ਵਰਤੋਂ ਵੀ ਸ਼ਾਮਲ ਹੈ। ਆਸਟ੍ਰੇਲੀਆ ਵਿੱਚ ਹਾਂਟਾਵਾਇਰਸ ਦਾ ਹੁਣ ਕੋਈ ਮਾਮਲਾ ਨਹੀਂ ਹੈ। ਆਸਟ੍ਰੇਲੀਅਨ ਸਰਕਾਰ ਦੀ ਤਰਜੀਹ ਭਾਈਚਾਰੇ ਦੀ ਸਿਹਤ, ਸੁਰੱਖਿਆ ਅਤੇ ਵਾਪਸ ਭੇਜੇ ਗਏ ਯਾਤਰੀਆਂ ਦੀ ਤੰਦਰੁਸਤੀ ਹੈ।”
ਅਸਲ ਦੇ ਵਿੱਚ ਚੂਹੇ ਹਾਂਟਾਵਾਇਰਸ ਨੂੰ ਫੈਲਾਉਂਦੇ ਹਨ ਪਰ ਵਿਸ਼ਵ ਸਿਹਤ ਸੰਗਠਨ ਦਾ ਮੰਨਣਾ ਹੈ ਕਿ ਐਂਡੀਜ਼ ਸਟ੍ਰੇਨ ਇੱਕ ਵਿਅਕਤੀ ਤੋਂ ਦੂਜੇ ਵਿਅਕਤੀ ਵਿੱਚ ਫੈਲ ਸਕਦਾ ਹੈ। ਵਿਸ਼ਵ ਸਿਹਤ ਸੰਗਠਨ ਦੇ ਮਹਾਂਮਾਰੀ ਅਤੇ ਮਹਾਂਮਾਰੀ ਤਿਆਰੀ ਨਿਰਦੇਸ਼ਕ ਮਾਰੀਆ ਵੈਨ ਕੇਰਖੋਵ ਦੇ ਅਨੁਸਾਰ, ਇਹ ਕਰੂਜ਼ ‘ਤੇ ਹਾਂਟਾਵਾਇਰਸ ਦੇ ਫੈਲਣ ਦਾ ਸੰਚਾਰ ਦਾ ਪਹਿਲਾ ਮਾਮਲਾ ਸੀ। ਐਂਡੀਜ਼ ਵਾਇਰਸ ਦੀ ਸਭ ਤੋਂ ਪਹਿਲਾਂ ਪਛਾਣ 31 ਸਾਲ ਪਹਿਲਾਂ ਚਿਲੀ ਅਤੇ ਅਰਜਨਟੀਨਾ ਦੇ ਐਂਡੀਅਨ ਖੇਤਰ ਵਿੱਚ ਫੈਲਣ ਤੋਂ ਬਾਅਦ ਹੋਈ ਸੀ। ਅਗਲੇ ਸਾਲ ਇਸ ਦੇ ਫੈਲਣ ਨਾਲ ਇਹ ਪੁਸ਼ਟੀ ਹੋਈ ਕਿ ਇਹ ਖਾਸ ਵਾਇਰਸ ਇੱਕ ਵਿਅਕਤੀ ਤੋਂ ਦੂਜੇ ਵਿਅਕਤੀ ਵਿੱਚ ਫੈਲ ਸਕਦਾ ਹੈ।
ਡੱਚ ਕਰੂਜ਼ ਸ਼ਿਪ ਐਮਵੀ ਹੋਂਡਿਅਸ ਨੂੰ ਓਸ਼ਨਵਾਈਡ ਐਕਸਪੀਡੀਸ਼ਨ ਕੰਪਨੀ ਦੁਆਰਾ ਚਲਾਇਆ ਜਾਂਦਾ ਹੈ ਜੋ ਅੰਟਾਰਕਟਿਕਾ ਅਤੇ ਆਰਕਟਿਕ ਲਈ ਕਰੂਜ਼ ਚਲਾਉਂਦੀ ਹੈ। ਐਮਵੀ ਹੋਂਡਿਅਸ ਦੇ ਵਿੱਚ ਇਸ ਵਾਇਰਸ ਦੀ ਪਛਾਣ ਤੋਂ ਬਾਅਦ ਇਸ ਵਿੱਚ ਸਵਾਰ ਕੁੱਝ ਯਾਤਰੀਆਂ ਨੂੰ ਨੀਦਰਲੈਂਡਜ਼ ਤੋਂ ਪਰਥ ਦੇ ਕੁਆਰੰਟੀਨ ਸਹੂਲਤ ਸੈਂਟਰ ਵਿੱਚ ਲਿਆਂਦਾ ਗਿਆ ਸੀ। ਆਸਟ੍ਰੇਲੀਆ ਇਸ ਸਮੇਂ ਇੱਕੋ ਇੱਕ ਮਹਾਂਦੀਪ ਹੈ ਜਿੱਥੇ ਮਨੁੱਖਾਂ ਵਿੱਚ ਹਾਂਟਾਵਾਇਰਸ ਦਾ ਕੋਈ ਕੇਸ ਨਹੀਂ ਹੈ। ਇਸ ਸਮੇਂ ਆਸਟ੍ਰੇਲੀਆ ਲਈ ਸਭ ਤੋਂ ਵੱਡਾ ਖ਼ਤਰਾ ਉਨ੍ਹਾਂ ਯਾਤਰੀਆਂ ਤੋਂ ਆਉਂਦਾ ਹੈ ਜੋ ਐਂਡੀਜ਼ ਵਾਇਰਸ ਦੀ ਪੁਸ਼ਟੀ ਹੋਣ ਤੋਂ ਪਹਿਲਾਂ ਕਰੂਜ਼ ਸ਼ਿਪ ਦੇ ਯਾਤਰੀਆਂ ਦੇ ਸੰਪਰਕ ਵਿੱਚ ਆਏ ਸਨ। ਸਭ ਤੋਂ ਪਹਿਲਾਂ 11 ਅਪ੍ਰੈਲ ਨੂੰ ਇੱਕ ਵਿਅਕਤੀ ਦੀ ਤਬੀਅਤ ਵਿਗੜਨ ਨਾਲ ਮੌਤ ਹੋ ਗਈ ਸੀ ਜਦਕਿ ਉਸਦੀ ਪਤਨੀ ਦੀ ਵੀ ਥੋੜ੍ਹੇ ਦਿਨਾਂ ਬਾਅਦ ਮੌਤ ਹੋ ਗਈ। ਇਸੇ ਮਹੀਨੇ ਦੀ 2 ਮਈ ਨੂੰ ਤੀਜੇ ਮਾਮਲੇ ਦੀ ਮੌਤ ਤੋਂ ਬਾਅਦ 22 ਤੋਂ 24 ਅਪ੍ਰੈਲ ਦੇ ਵਿਚਕਾਰ ਸੇਂਟ ਹੇਲੇਨਾ ਵਿੱਚ ਐਮਵੀ ਹੋਂਡੀਅਸ ਤੋਂ ਲਗਭਗ 34 ਯਾਤਰੀ ਅਤੇ ਚਾਲਕ ਦਲ ਦੇ ਮੈਂਬਰ ਉਤਰੇ ਸਨ। ਇਸ ਗਰੁੱਪ ਦੇ ਇੱਕ ਮੈਂਬਰ ਇੰਡੈਕਸ ਕੇਸ ਦੀ ਪਤਨੀ ਦੀ ਸਾਊਥ ਅਫਰੀਕਾ ਦੇ ਜੋਹਾਨਸਬਰਗ ਵਿੱਚ ਉਡਾਣ ਭਰਨ ਤੋਂ ਥੋੜ੍ਹੀ ਦੇਰ ਬਾਅਦ ਹਸਪਤਾਲ ਵਿੱਚ ਮੌਤ ਹੋ ਗਈ। ਇੱਕ ਦੂਜੇ ਵਿਅਕਤੀ ਦਾ ਬਾਅਦ ਵਿੱਚ ਟੈਸਟ ਪੋਜ਼ੀਟਿਵ ਆਇਆ ਅਤੇ ਉਹ ਇਸ ਸਮੇਂ ਸਵਿਟਜ਼ਰਲੈਂਡ ਦੇ ਹਸਪਤਾਲ ਵਿੱਚ ਹੈ। ਇੱਕ ਹੋਰ ਸੰਭਾਵਿਤ ਪੋਜ਼ੀਟਿਵ ਕੇਸ 14 ਅਪ੍ਰੈਲ ਨੂੰ ਟ੍ਰਿਸਟਨ ਦਾ ਕੁੰਹਾ ਵਿੱਚ ਉਤਰਿਆ ਸੀ ਅਤੇ 28 ਅਪ੍ਰੈਲ ਨੂੰ ਉਸ ਵਿੱਚ ਵਾਇਰਸ ਦੇ ਲੱਛਣ ਵਿਕਸਤ ਹੋ ਗਏ ਸਨ।