ਲੁਧਿਆਣਾ ਪੱਛਮੀ ਦੀ ਉਪਚੋਣ ਵਿੱਚ ਹਾਰਨ ਅਤੇ ਪਾਰਟੀ ਦੇ ਅਹੁਦਿਆਂ ਤੋਂ ਦਿੱਤੇ ਗਏ ਅਸਤੀਫੇ ਤੋਂ ਬਾਅਦ ਭਾਰਤ ਭੂਸ਼ਨ ਆਸ਼ੂ ਨੇ ਆਪਣਾ ਪੱਖ ਰੱਖਦਿਆਂ ਸਪੱਸ਼ਟ ਕੀਤਾ ਹੈ ਕਿ, ‘ਰਾਜਨੀਤੀ ਵਿੱਚ ਜ਼ਿੰਮੇਵਾਰੀ ਵੀ ਹੋਣੀ ਚਾਹੀਦੀ ਹੈ ਅਤੇ ਇਮਾਨਦਾਰੀ ਵੀ, ‘‘ਜਨਤਕ ਜੀਵਨ ਵਿੱਚ ਸਾਨੂੰ ਸਿਖਾਇਆ ਜਾਂਦਾ ਹੈ ਕਿ ਜਿੱਤ ਅਤੇ ਹਾਰ ਦੋਵੇਂ ਨੂੰ ਬਰਾਬਰੀ ਦੀ ਸ਼ਾਲੀਨਤਾ ਨਾਲ ਸਵੀਕਾਰ ਕਰਨਾ ਚਾਹੀਦਾ ਹੈ। ਮੈਂ ਹਮੇਸ਼ਾ ਵਿਸ਼ਵਾਸ ਕੀਤਾ ਹੈ ਕਿ ਜੇਕਰ ਮੇਰਾ ਅਸਤੀਫਾ ਕਾਂਗਰਸ ਪਾਰਟੀ ਨੂੰ ਵਿਚਾਰ ਕਰਨ, ਮੁੜ ਸੰਗਠਿਤ ਹੋਣ ਅਤੇ ਨਵੀਨਤਾ ਦੀ ਦਿਸ਼ਾ ਦੇਣ ਵਿੱਚ ਮਦਦ ਕਰ ਸਕਦਾ ਹੈ, ਤਾਂ ਇਹ ਕਦੇ ਵੀ ਰੋਕਿਆ ਨਹੀਂ ਜਾਣਾ ਚਾਹੀਦਾ।’
ਭਾਰਤ ਭੂਸ਼ਨ ਆਸ਼ੂ ਨੇ ਹੋਰ ਕਿਹਾ ਕਿ, ‘ਮੇਰਾ ਅਸਤੀਫ਼ਾ ਹੁਣ ਉੱਚ ਕਮਾਨ ਵੱਲੋਂ ਸਵੀਕਾਰ ਕੀਤਾ ਗਿਆ ਹੈ, ਪਾਰਟੀ ਪ੍ਰਤੀ ਮੇਰੀ ਨੇਤਿਕ ਜ਼ਿੰਮੇਵਾਰੀ ਦਾ ਕੰਮ ਹੈ, ਦੋਸ਼ ਮੰਨਣ ਦਾ ਨਹੀਂ। ਲੁਧਿਆਣਾ ਵੈਸਟ ਦੀ ਚੋਣ ਹਾਰ ਨਿਸ਼ਚਤ ਤੌਰ ’ਤੇ ਨਿਰਾਸ਼ਾਜਨਕ ਸੀ, ਪਰ ਇਸ ਨੂੰ ਕੁਝ ਵਿਅਕਤੀਆਂ ਦੀ ਕਾਰਵਾਈ ਤੱਕ ਸੀਮਤ ਕਰ ਦੇਣਾ ਨਾ ਸਿਰਫ਼ ਰਾਜਨੀਤਕ ਤੌਰ ’ਤੇ ਗਲਤ ਹੈ, ਸਗੋਂ ਪਾਰਟੀ ਦੇ ਅੰਦਰੂਨੀ ਢਾਂਚੇ ਲਈ ਵੀ ਹਾਨੀਕਾਰਕ ਹੈ। ਨਾ ਤਾਂ ਮੈਂ ਕੋਈ ਪੈਰਲਲ ਮੁਹਿੰਮ ਚਲਾਈ, ਨਾ ਹੀ ਕਿਸੇ ਗੁੱਟਬਾਜ਼ੀ ਵਿਚ ਸ਼ਾਮਲ ਹੋਇਆ। ਜਿਨ੍ਹਾਂ ਨੇ ਮੇਰੇ ਨਾਲ ਕੰਮ ਕੀਤਾ, ਉਹ ਮੇਰੀ ਨਿਸ਼ਠਾ ਨੂੰ ਜਾਣਦੇ ਹਨ। ਹਾਂ, ਕੋਆਰਡੀਨੇਸ਼ਨ ਦੀ ਘਾਟ ਰਹੀ—ਤੇ ਮੈਂ ਇਸ ਗੱਲ ਦੀ ਜ਼ਿੰਮੇਵਾਰੀ ਲੈਂਦਾ ਹਾਂ ਕਿ ਮੈਂ ਹਾਲਾਤਾਂ ਦੇ ਬਾਵਜੂਦ ਵੀ ਉਸ ਦਰਾਰ ਨੂੰ ਪੂਰਾ ਨਹੀਂ ਕਰ ਸਕਿਆ। ਇਹ ਸਮਾਂ ਇਲਜ਼ਾਮ ਲਾਉਣ ਦਾ ਨਹੀਂ, ਸੋਧ ਅਤੇ ਸੁਧਾਰ ਦਾ ਹੋਣਾ ਚਾਹੀਦਾ ਹੈ। ਸਵਾਲ ਇਹ ਹੈ ਕਿ ਵੋਟਰ ਪਾਰਟੀ ਤੋਂ ਦੂਰ ਕਿਉਂ ਹੋਇਆ? ਮੁਹਿੰਮ ਨੂੰ ਅਸ਼ਾਂਤ ਕਰਨ ਲਈ ਪ੍ਰਾਕਸੀ ਕਿਉਂ ਵਰਤੇ ਗਏ? ਅਤੇ ਚੋਣ ਨੂੰ ਕੁਝ ਲੋਕਾਂ ਨੇ ਨਿੱਜੀ ਹਿਸਾਬ ਚੁੱਕਣ ਦਾ ਮੰਚ ਕਿਉਂ ਬਣਾਇਆ? ਮੈਂ ਦੋ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਕਾਂਗਰਸ ਪਾਰਟੀ ਦੀ ਨਿਸ਼ਠਾ ਨਾਲ ਸੇਵਾ ਕਰ ਰਿਹਾ ਹਾਂ ਕਦੇ ਵੀ ਸੁਵਿਧਾ ਦੀ ਖਾਤਰ ਨਹੀਂ, ਸਿਰਫ਼ ਕਰਤੱਵ ਦੀ ਭਾਵਨਾ ਨਾਲ। ਸਭ ਤੋਂ ਮੁਸ਼ਕਲ ਵੇਲੇ, ਜਦੋਂ ਮੈਂ ਨਿੱਜੀ ਅਤੇ ਕਾਨੂੰਨੀ ਸੰਘਰਸ਼ਾਂ ਵਿੱਚ ਸੀ, ਮੈਂ ਇਕੱਲਾ ਹੀ ਲੜਿਆ, ਪਰ ਕਦੇ ਵੀ ਪਾਰਟੀ ਦੇ ਵਿਰੁੱਧ ਨਹੀਂ ਗਿਆ। ਜਦੋਂ ਹੋਰ ਲਾਭ ਲੈ ਰਹੇ ਸਨ, ਮੈਂ ਪਾਰਟੀ ਦੀ ਸਚਾਈ ਲਈ ਮੁੱਲ ਭਰਿਆ ਤੇ ਇਹ ਸਭ ਸਿਰ ਉੱਚਾ ਰੱਖ ਕੇ ਕੀਤਾ। ਅਤੇ ਅੱਜ ਵੀ, ਮੈਂ ਓਥੇ ਹੀ ਹਾਂ ਜਿੱਥੇ ਹਮੇਸ਼ਾ ਰਹਿਆ: ਜਮੀਨ ਉੱਤੇ, ਲੋਕਾਂ ਦੇ ਨਾਲ। ਪੰਜਾਬ ਨੂੰ ਇੱਕ ਐਸੀ ਕਾਂਗਰਸ ਦੀ ਲੋੜ ਹੈ ਜੋ ਇਕਜੁੱਟ ਹੋਵੇ, ਦਿਸ਼ਾ ਵਿੱਚ ਸਾਫ ਹੋਵੇ, ਅਤੇ ਨੀਤੀਆਂ ਵਿੱਚ ਮਜਬੂਤ ਹੋਵੇ। ਮੈਂ ਇਨਸਾਫ ਦੀ ਉਮੀਦ ਰੱਖਦਾ ਹਾਂ—ਇਨਸਾਫ ਜੋ ਮੁੱਲਾਂ ‘ਤੇ ਆਧਾਰਤ ਹੋਵੇ, ਸਹੂਲਤਾਂ ਤੇ ਨਹੀਂ। ਸੱਚਾਈ, ਵਰਕਰਾਂ ਅਤੇ ਪੰਜਾਬ ਲਈ ਸੰਘਰਸ਼ ਜਾਰੀ ਰਹੇਗਾ ਅਤੇ ਮੈਂ ਇਸ ਦਾ ਹਿੱਸਾ ਬਣ ਕੇ ਰਹਾਂਗਾ।’