ਬੇਗਾ ਵੈਲੀ ਸ਼ਾਇਰ ਕੌਂਸਲ ਦੇ ਪ੍ਰੋਜੈਕਟ ਅਫਸਰ ਡਿਲਨ ਐਲਡਰਿਜ ਨੂੰ 2026 ਦੀ ਮਾਣਯੋਗ ਕ੍ਰਿਸ ਪੈਟ ਡਿਕਸਨ ਮੈਮੋਰੀਅਲ ਸਕਾਲਰਸ਼ਿਪ ਲਈ ਚੁਣਿਆ ਗਿਆ ਹੈ। ਯੂਇਨ ਅਤੇ ਕਮਿਲਰੋਈ ਭਾਈਚਾਰੇ ਨਾਲ ਸਬੰਧਤ ਡਿਲਨ ਨੂੰ ਇਹ ਸਨਮਾਨ ਹਾਲ ਹੀ ਵਿੱਚ ਹੋਏ ਲੋਕਲ ਗਵਰਨਮੈਂਟ ਵੀਕ ਐਵਾਰਡਜ਼ ਦੌਰਾਨ ਦਿੱਤਾ ਗਿਆ। ਇਹ ਸਮਾਗਮ LGNSW ਵੱਲੋਂ ਕਰਵਾਇਆ ਗਿਆ ਸੀ।
ਡਿਲਨ ਨੂੰ ਬੇਗਾ ਵੈਲੀ ਸ਼ਾਇਰ ਕੌਂਸਲ ਪ੍ਰਤੀ ਲੰਬੇ ਸਮੇਂ ਤੋਂ ਨਿਭਾਈ ਜਾ ਰਹੀ ਸੇਵਾ ਅਤੇ ਆਪਣੇ ਭਾਈਚਾਰੇ ਲਈ ਕੁਝ ਚੰਗਾ ਕਰਨ ਦੀ ਵਚਨਬੱਧਤਾ ਲਈ ਇਸ ਸਕਾਲਰਸ਼ਿਪ ਵਾਸਤੇ ਚੁਣਿਆ ਗਿਆ ਹੈ। ਉਹ ਪਿਛਲੇ 14 ਸਾਲਾਂ ਤੋਂ ਵੱਧ ਸਮੇਂ ਤੋਂ ਬੇਗਾ ਵੈਲੀ ਸ਼ਾਇਰ ਕੌਂਸਲ ਨਾਲ ਕੰਮ ਕਰ ਰਹੇ ਹਨ।
ਇਹ ਸਾਲਾਨਾ ਸਕਾਲਰਸ਼ਿਪ ਮਰਹੂਮ ਕੌਂਸਲਰ ਪੈਟ ਡਿਕਸਨ ਦੀ ਯਾਦ ਵਿੱਚ ਦਿੱਤੀ ਜਾਂਦੀ ਹੈ। ਪੈਟ ਡਿਕਸਨ Aboriginal ਅਤੇ Torres Strait Islander ਲੋਕਾਂ ਲਈ ਸਥਾਨਕ ਸਰਕਾਰਾਂ ਵਿੱਚ ਵੱਧ ਮੌਕੇ ਪੈਦਾ ਕਰਨ ਦੀ ਮਜ਼ਬੂਤ ਹਮਾਇਤੀ ਸਨ।
LGNSW ਵੱਲੋਂ ਕ੍ਰਿਸ ਪੈਟ ਡਿਕਸਨ ਮੈਮੋਰੀਅਲ ਟਰੱਸਟ ਦੀ ਤਰਫੋਂ ਚਲਾਈ ਜਾਂਦੀ ਇਹ ਸਕਾਲਰਸ਼ਿਪ ਯੋਗ Aboriginal ਅਤੇ Torres Strait Islander ਕੌਂਸਲਰਾਂ ਅਤੇ ਕੌਂਸਲ ਕਰਮਚਾਰੀਆਂ ਨੂੰ ਪੜ੍ਹਾਈ, ਖੋਜ ਅਤੇ ਪੇਸ਼ੇਵਰ ਵਿਕਾਸ ਲਈ ਵਿੱਤੀ ਸਹਾਇਤਾ ਦਿੰਦੀ ਹੈ। LGNSW ਦੇ ਪ੍ਰਧਾਨ ਮੇਅਰ ਡਾਰਸੀ ਬਾਇਰਨ ਨੇ ਡਿਲਨ ਨੂੰ ਇਸ ਪ੍ਰਾਪਤੀ ਲਈ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਸਥਾਨਕ ਸਰਕਾਰਾਂ ਵਿੱਚ Aboriginal ਨੇਤਾਵਾਂ ਦੀ ਨਵੀਂ ਪੀੜ੍ਹੀ ਨੂੰ ਅੱਗੇ ਲਿਆਉਣਾ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਡਿਲਨ ਦਾ ਆਪਣੇ ਕਰੀਅਰ ਨੂੰ ਅੱਗੇ ਵਧਾਉਣ ਲਈ ਸਮਰਪਣ ਇਸ ਸਕਾਲਰਸ਼ਿਪ ਦੇ ਮਕਸਦ ਨਾਲ ਪੂਰੀ ਤਰ੍ਹਾਂ ਮੇਲ ਖਾਂਦਾ ਹੈ।
ਫਾਰ ਸਾਊਥ ਕੋਸਟ ਦੇ ਡਜਿਰਿੰਗੰਜ ਕੰਟਰੀ ਵਿੱਚ ਰਹਿਣ ਵਾਲੇ ਡਿਲਨ ਹੁਣ ਇਸ ਸਕਾਲਰਸ਼ਿਪ ਦੀ ਮਦਦ ਨਾਲ ਯੂਨੀਵਰਸਿਟੀ ਆਫ ਐਡਿਲੇਡ ਤੋਂ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰਨ ਦੀ ਯੋਜਨਾ ਬਣਾ ਰਹੇ ਹਨ। ਉਨ੍ਹਾਂ ਦਾ ਟੀਚਾ ਖੇਤਰੀ ਭਾਈਚਾਰਿਆਂ ਲਈ ਜ਼ਰੂਰੀ ਜਨਤਕ ਸੇਵਾਵਾਂ ਦੇਣ ਵਾਲੇ ਖੇਤਰ ਵਿੱਚ ਆਪਣਾ ਕਰੀਅਰ ਹੋਰ ਅੱਗੇ ਵਧਾਉਣਾ ਹੈ। ਡਿਲਨ ਨੇ ਕਿਹਾ ਕਿ ਇਹ ਸਕਾਲਰਸ਼ਿਪ ਉਨ੍ਹਾਂ ਲਈ ਸਨਮਾਨ ਦੇ ਨਾਲ-ਨਾਲ ਭਵਿੱਖ ਵਿੱਚ ਨਿਵੇਸ਼ ਵੀ ਹੈ। ਉਨ੍ਹਾਂ ਕਿਹਾ ਕਿ Aboriginal ਲੋਕਾਂ ਦੀ ਫੈਸਲਾ ਲੈਣ ਵਾਲੀਆਂ ਥਾਵਾਂ ’ਤੇ ਵੱਧ ਭਾਗੀਦਾਰੀ ਹੋਣੀ ਚਾਹੀਦੀ ਹੈ ਅਤੇ ਉਹ ਆਪਣੇ ਕਰੀਅਰ ਦੌਰਾਨ Indigenous ਲੋਕਾਂ ਲਈ ਰੋਜ਼ਗਾਰ ਦੇ ਮੌਕਿਆਂ ਨੂੰ ਉਤਸ਼ਾਹਿਤ ਕਰਦੇ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਭਾਈਚਾਰੇ ਲਈ ਇੱਕ ਚੰਗੀ ਮਿਸਾਲ ਬਣਨਾ ਚਾਹੁੰਦੇ ਹਨ ਅਤੇ ਲੋਕਾਂ ਨੂੰ ਉਨ੍ਹਾਂ ਦੀਆਂ ਕਾਬਲੀਅਤਾਂ ਅਤੇ ਸਮਰੱਥਾ ਬਾਰੇ ਸਕਾਰਾਤਮਕ ਸੋਚ ਦੇਣਾ ਚਾਹੁੰਦੇ ਹਨ। ਉਨ੍ਹਾਂ ਮੁਤਾਬਕ ਇੰਜੀਨੀਅਰਿੰਗ ਦੀ ਡਿਗਰੀ ਉਨ੍ਹਾਂ ਨੂੰ ਆਪਣੇ ਤਜਰਬੇ ਨੂੰ ਹੋਰ ਮਜ਼ਬੂਤ ਕਰਨ ਅਤੇ ਸੀਨੀਅਰ ਇਨਫਰਾਸਟਰਕਚਰ ਅਤੇ ਪ੍ਰੋਜੈਕਟ ਮੈਨੇਜਮੈਂਟ ਦੀਆਂ ਭੂਮਿਕਾਵਾਂ ਵੱਲ ਵਧਣ ਵਿੱਚ ਮਦਦ ਕਰੇਗੀ।
ਸਕਾਲਰਸ਼ਿਪ ਟਰੱਸਟੀ ਅਤੇ ਕ੍ਰਿਸ ਪੈਟ ਡਿਕਸਨ ਦੇ ਪਰਿਵਾਰਕ ਨੁਮਾਇੰਦੇ ਵਾਰਨ ਰੌਬਰਟਸ ਨੇ ਵੀ ਡਿਲਨ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਡਿਲਨ ਦੀ ਪ੍ਰਾਪਤੀ NSW ਦੇ Aboriginal ਭਾਈਚਾਰਿਆਂ ਵਿੱਚ ਮੌਜੂਦ ਹੁਨਰ, ਦ੍ਰਿੜਤਾ ਅਤੇ ਨੇਤ੍ਰਿਤਵ ਦੀ ਇੱਕ ਵਧੀਆ ਉਦਾਹਰਨ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਕਾਲਰਸ਼ਿਪ ਡਿਲਨ ਵਰਗੇ ਨੇਤਾਵਾਂ ਵਿੱਚ ਨਿਵੇਸ਼ ਹੈ, ਜੋ ਆਪਣੇ ਕਰੀਅਰ ਨੂੰ ਅੱਗੇ ਵਧਾਉਣ ਦੇ ਨਾਲ-ਨਾਲ ਹੋਰ ਲੋਕਾਂ ਲਈ ਵੀ ਨਵੇਂ ਮੌਕੇ ਪੈਦਾ ਕਰਨ ਵਿੱਚ ਮਦਦ ਕਰ ਰਹੇ ਹਨ। ਉਨ੍ਹਾਂ ਡਿਲਨ ਨੂੰ ਇੰਜੀਨੀਅਰਿੰਗ ਦੀ ਪੜ੍ਹਾਈ ਅਤੇ ਭਵਿੱਖ ਦੇ ਨੇਤ੍ਰਿਤਵ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ।