ਬਰਤਾਨੀਆ ਵਿੱਚ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲੇ ਵਧੇ

ਲੰਡਨ – ਲੰਡਨ ਵਿੱਚ ਤਲਵਾਰਾਂ ਅਤੇ ਚਾਕੂਆਂ ਨਾਲ ਹਮਲੇ ਕੀਤੇ ਜਾਣ ਦੀਆਂ ਘਟਨਾਵਾਂ ਵਿੱਚ ਮੁੜ ਵਾਧਾ ਹੋ ਰਿਹਾ ਹੈ।
ਸੋਸ਼ਲ ਮੀਡੀਆ ’ਤੇ ਅਜਿਹੀਆਂ ਘਟਨਾਵਾਂ ਬਾਰੇ ਜਾਣਕਾਰੀ ਹਾਸਲ ਕਰ ਕੇ ਪੂਜਾ ਕਾਂਡਾ ਦਹਿਸ਼ਤ ਵਿੱਚ ਹੈ। ਇੱਕ ਵਿਅਕਤੀ ਨੇ ਸਕੂਲ ਜਾ ਰਹੇ 14 ਸਾਲਾ ਲੜਕੇ ਦੀ ਤਲਵਾਰ ਨਾਲ ਹੱਤਿਆ ਕਰ ਦਿੱਤੀ। 2 ਸਾਲ ਪਹਿਲਾਂ ਪੂਜਾ ਕਾਂਡਾ ਦੇ 16 ਸਾਲਾ ਪੁੱਤਰ ਰੋਨਾਨ ਦੀ ਉਸ ਦੇ ਸਹਿਪਾਠੀਆਂ ਨੇ ਤਲਵਾਰਾਂ ਨਾਲ ਹਮਲਾ ਕਰ ਕੇ ਹੱਤਿਆ ਕਰ ਦਿੱਤੀ ਸੀ ਜਦੋਂ ਉਹ ਆਪਣੇ ਗੁਆਂਢੀ ਦੇ ਘਰ ਜਾ ਰਿਹਾ ਸੀ। ਬਰਮਿੰਘਮ ਵਿੱਚ ਰਹਿੰਦੀ ਪੂਜਾ ਕਾਂਡਾ ਨੇ 30 ਅਪਰੈਲ ਨੂੰ ਲੰਡਨ ਦੇ ਹੈਨੌਲਟ ਜ਼ਿਲ੍ਹੇ ਵਿੱਚ ਇੱਕ ਹਮਲੇ ਵਿੱਚ ਡੈਨੀਅਲ ਅੰਜੋਰਿਨ ਦੀ ਹੱਤਿਆ ਦੇ ਸਬੰਧ ਵਿੱਚ ਕਿਹਾ, ‘ਇਹ ਮੈਨੂੰ ਅਤੀਤ ਵਿੱਚ ਲੈ ਗਿਆ।’ ਇਸ ਹਮਲੇ ਵਿੱਚ 4 ਜਣੇ ਜ਼ਖ਼ਮੀ ਵੀ ਹੋਏ ਸਨ।