ਬਿਹਾਰ ਦੇ ਸ਼ੁਭਮ ਕੁਮਾਰ ਪਹਿਲਾ, ਜਾਗ੍ਰਿਤੀ ਅਵਸਥੀ ਦੂਜਾ ਅਤੇ ਅੰਕਿਤਾ ਜੈਨ ਨੇ ਤੀਜਾ ਸਥਾਨ ਕੀਤਾ ਹਾਸਲ

ਮਲੇਰਕੋਟਲਾ, (ਅਬੂ ਅਨਸ) – ਯੂਪੀਐਸਸੀ ਨੇ ਦੇਸ਼ ਦੇ ਨੀਤੀ ਘਾੜੇ ਸਿਵਲ ਸਰਵਿਸਿਜ਼ ਪ੍ਰੀਖਿਆ 2020 ਦੇ ਨਤੀਜੇ ਦਾ ਐਲਾਨ ਕੀਤਾ ਹੈ । ਬਿਹਾਰ ਦੇ ਕਟਿਹਾਰ ਜ਼ਿਲੇ ਦੇ ਸ਼ੁਭਮ ਕੁਮਾਰ ਨੇ ਇਸ ਇਮਤਿਹਾਨ ‘ਚ ਟਾਪ ਕੀਤਾ ਹੈ ਜਦੋਂਕਿ ਜਾਗ੍ਰਿਤੀ ਅਵਸਥੀ ਨੇ ਦੂਸਰਾ ਅਤੇ ਅੰਕਿਤਾ ਜੈਨ ਨੇ ਤੀਸਰਾ ਸਥਾਨ ਪ੍ਰਾਪਤ ਕੀਤਾ ਹੈ । ਇਸ ਸਾਲ 29 ਮੁਸਲਿਮ ਉਮੀਦਵਾਰ ਵੀ ਪ੍ਰੀਖਿਆ ‘ਚ ਸਫਲ ਹੋਏ ਹਨ ਜਿਨਾਂ ‘ਚ ਉਤਰਾਖੰਡ ਦੀ ਸਦਫ ਚੌਧਰੀ ਨੇ ਟਾਪ 25 ਵਿੱਚੋਂ 23ਵਾਂ ਸਥਾਨ ਹਾਸਲ ਕੀਤਾ ਹੈ । ਜ਼ਿਕਰਯੋਗ ਹੈ ਕਿ ਸਦਫ ਚੌਧਰੀ ਪਹਿਲੀ ਕੋਸ਼ਿਸ਼ ਵਿੱਚ ਮੁੱਢਲੇ ਇਮਤਿਹਾਨ ‘ਚੋਂ ਨਾਕਾਮ ਹੋ ਗਈ ਸੀ । ਸਦਫ ਚੌਧਰੀ ਦੀ ਇਹ ਦੂਜੀ ਕੋਸ਼ਿਸ਼ ਸੀ । ਖਾਸ ਗੱਲ ਇਹ ਹੈ ਕਿ ਸਦਫ ਨੇ ਇਸ ਇਮਤਿਹਾਨ ਲਈ ਕਿਸੇ ਕੋਚਿੰਗ ਸੈਂਟਰ ਦੀ ਮਦਦ ਨਹੀਂ ਲਈ ਬਲਿਕ ਉਸਨੇ ਖੁਦ ਹੀ ਆਪਣੇ ਘਰ ਮਿਹਤਨ ਕਰਕੇ ਇਹ ਮੁਕਾਮ ਹਾਸਲ ਕੀਤਾ ਹੈ । ਉਹ ਰੋਜ਼ਾਨਾ 8 ਤੋਂ 10 ਘੰਟੇ ਪੜਾਈ ਕਰਦੀ ਸੀ । ਸਦਫ ਨੇ ਇੱਕ ਲੋਕਲ ਚੈਨਲ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਸ ਨੂੰ ਪਾਸ ਹੋਣ ਦੀ ਤਾਂ ਉਮੀਦ ਸੀ ਪਰੰਤ ਟਾਪ 25 ‘ਚ ਆਉਣ ਦਾ ਤਸੱਵਰ ਵੀ ਉਸ ਨੇ ਨਹੀਂ ਕੀਤਾ ਸੀ ।
ਸਦਫ ਤੋਂ ਇਲਾਵਾ ਯੂਪੀਐਸਸੀ ਦੇ ਇਮਤਿਹਾਨ ‘ਚ ਸਫਲ ਹੋਣ ਵਾਲੇ ਮੁਸਲਿਮ ਉਮੀਦਵਾਰਾਂ ‘ਚ ਫੈਜ਼ਾਨ ਅਹਿਮਦ ਨੇ 58 ਰੈਂਕ, ਮੰਜਰ ਹੁਸੈਨ ਅੰਜੁਮ 125 ਰੈਂਕ, ਸ਼ਾਹਿਦ ਅਹਿਮਦ 129, ਸ਼ਹਿਨਸ਼ਾਹ ਕੇ.ਐਸ. 142, ਮੁਹੰਮਦ ਆਕਿਬ 203, ਸ਼ਹਿਨਾਜ਼ ਆਈ 217, ਵਸੀਮ ਅਹਿਮਦ ਭੱਟ 225, ਬੁਸ਼ਰਾ ਬਾਨੋ 234, ਰੇਸ਼ਮਾ ਏ.ਐਲ. 256, ਮੁਹੰਮਦ ਹਾਰਿਸ ਸੁਮੇਰ 270, ਅਲਤਮਸ਼ ਗਾਜ਼ੀ 282, ਅਹਿਮਦ ਹਸਉਜ਼ਮਾਨ ਚੌਧਰੀ 283, ਸਾਰਾ ਅਸ਼ਰਫ 316, ਮੁਹਿਬੁਲਾਹ ਅੰਸਾਰੀ 389, ਜ਼ੇਬਾ ਖਾਨ 423, ਫੈਸਲ ਰਾਜਾ 447, ਐਸ. ਮੁਹੰਮਦ ਯਾਕੂਬ 450, ਰੇਹਾਨ ਖੱਤਰੀ 478, ਮੁਹੰਮਦ ਜਾਵੇਦ ਏ. 493, ਅਲਤਾਫ ਮੁਹੰਮਦ ਸ਼ੇਖ 545, ਖਾਨ ਆਸਿਮ ਕਿਫਾਇਤ ਖਾਨ 558, ਸੱਯਦ ਜਾਹਿਦ ਅਲੀ 569, ਸ਼ਕੀਰ ਅਹਿਮਦ ਏ., ਮੁਹੰਮਦ ਰਿਜ਼ਵਾਨ ਆਈ. 589, ਮੁਹੰਮਦ ਸ਼ਾਹਿਦ 597, ਇਕਬਾਲ ਰਸੂਲ ਡਾਰ 611, ਆਮਿਰ ਬਸ਼ੀਰ 625, ਮਾਜਿਦ ਇਕਬਾਲ ਖਾਨ 739
ਜਾਮਿਆ ਕੋਚਿੰਗ ਦੇ 20 ਵਿਦਿਆਰਥੀਆਂ ਨੂੰ ਮਿਲੀ ਕਾਮਯਾਬੀ
ਦਿੱਲੀ ਦੇ ਜਾਮਿਆ ਮਿਲਿਆ ਇਸਲਾਮੀਆ ਕੋਚਿੰਗ ਸੈਂਟਰ ਤੋਂ ਇਸ ਸਾਲ 20 ਉਮੀਦਵਾਰਾਂ ਨੂੰ ਸਿਵਲ ਸਰਵਿਸਿਜ਼ 2020 ਇਮਤਿਹਾਨ ਵਿੱਚ ਸਫਲਤਾ ਮਿਲੀ ਹੈ ਜਿਸ ਵਿੱਚ ਮੁਸਲਿਮ ਵਿਦਿਆਰਥੀਆਂ ਦੇ ਨਾਲ-ਨਾਲ ਗੈਰ ਮੁਸਲਿਮ ਵਿਦਿਆਰਥੀ ਵੀ ਸ਼ਾਮਲ ਹਨ ।
ਕੁੱਲ 761 ਉਮੀਦਵਾਰ ਹੋਏ ਕਾਮਯਾਬ
ਇਸ ਇਮਤਿਹਾਨ ਵਿੱਚ ਕੁੱਲ 761 ਉਮੀਦਵਾਰ ਪਾਸ ਹੋਏ ਹਨ ਜਿਨ੍ਹਾਂ ਵਿੱਚੋਂ 545 ਪੁਰਸ਼ ਅਤੇ 216 ਮਹਿਲਾਵਾਂ ਹਨ । ਸਿਵਲ ਸਰਵਿਸਿਜ਼ ਪ੍ਰੀਖਿਆਵਾਂ ਦਾ ਹਰ ਸਾਲ ਯੂਪੀਐਸਸੀ ਤਿੰਨ ਪੜਾਵਾਂ ਵਿੱਚ ਕਰਦਾ ਹੈ ਜਿਸ ਵਿੱਚ ਮੁੱਢਲੀ ਪ੍ਰੀਖਿਆ, ਮੁੱਖ ਪ੍ਰੀਖਿਆ, ਅਤੇ ਇੰਟਰਵਿਊ ਸ਼ਾਮਲ ਹੈ । ਇਨ੍ਹਾਂ ਪ੍ਰੀਖਿਆਵਾਂ ਦੇ ਮਾਧਿਅਮ ਰਾਹੀਂ ਭਾਰਤੀ ਪ੍ਰਸ਼ਾਸਨਿਕ ਸੇਵਾ (ਆਈ.ਏ.ਐਸ.), ਭਾਰਤੀ ਵਿਦੇਸ਼ ਸੇਵਾ (ਆਈ.ਐਫ.ਐਸ.) ਅਤੇ ਭਾਰਤੀ ਪੁਲਿਸ ਸੇਵਾ (ਆਈ.ਪੀ.ਐਸ.) ਸਹਿਤ ਕਈ ਹੋਰ ਸੇਵਾਵਾਂ ਦੇ ਲਈ ਉਮੀਦਵਾਰਾਂ ਦੀ ਚੋਣ ਕੀਤੀ ਜਾਂਦੀ ਹੈ ।
ਕੈਪਸ਼ਨ: ਸਿਵਲ ਸਰਵਿਸਿਜ਼ ਪ੍ਰੀਖਿਆ ‘ਚ ਸਫਲ ਹੋਈ ਉਤਰਾਖੰਡ ਦੀ ਸਦਫ ਚੌਧਰੀ ਨੂੰ ਮੁਬਾਰਕਬਾਦ ਦਿੰਦੇ ਹੋਏ ਪਰੀਵਾਰ ਮੈਂਬਰ ।