ਮੈਲਬੌਰਨ – ਡੈਂਡੇਨੋਂਗ ਨੌਰਥ ਵਿੱਚ ਮੋਨਾਸ਼ ਫ੍ਰੀਵੇਅ ’ਤੇ ਇੱਕ ਕਾਰ ਨੂੰ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਹੱਦ ਵਾਲੇ ਇਲਾਕੇ ਵਿੱਚ 220 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚਲਾਉਣ ਦਾ ਦੋਸ਼ ਲੱਗਾ ਹੈ।
ਵਿਕਟੋਰੀਆ ਪੁਲਿਸ ਮੁਤਾਬਕ ਨੁਨਾਵਾਡਿੰਗ ਹਾਈਵੇ ਪੈਟਰੋਲ ਦੇ ਅਧਿਕਾਰੀ ਅੱਜ ਸਵੇਰੇ ਕਰੀਬ 12.40 ਵਜੇ ਸਟੱਡ ਰੋਡ ਨੇੜੇ ਫ੍ਰੀਵੇਅ ’ਤੇ ਆਊਟਬਾਊਂਡ ਟ੍ਰੈਫਿਕ ਦੀ ਨਿਗਰਾਨੀ ਕਰ ਰਹੇ ਸਨ। ਇਸ ਦੌਰਾਨ ਉਨ੍ਹਾਂ ਨੇ ਇੱਕ Volkswagen Golf ਨੂੰ ਬਹੁਤ ਤੇਜ਼ ਰਫ਼ਤਾਰ ਨਾਲ ਜਾਂਦੇ ਦੇਖਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਕਾਰ ਦੀ ਰਫ਼ਤਾਰ 220 ਕਿਲੋਮੀਟਰ ਪ੍ਰਤੀ ਘੰਟਾ ਦਰਜ ਕੀਤੀ ਗਈ, ਜਦਕਿ ਉੱਥੇ ਸਪੀਡ ਲਿਮਿਟ 100 ਕਿਲੋਮੀਟਰ ਪ੍ਰਤੀ ਘੰਟਾ ਸੀ। ਕਾਰ ਰਜਿਸਟਰਡ ਵੀ ਨਹੀਂ ਸੀ।
ਵਿਕਟੋਰੀਆ ਪੁਲਿਸ ਨੇ ਕਾਰ ਨੂੰ ਰੋਕ ਕੇ ਡਰਾਈਵਰ ਨਾਲ ਗੱਲ ਕੀਤੀ। ਪੁਲਿਸ ਮੁਤਾਬਕ ਡਰਾਈਵਰ ਨੇ ਆਪਣਾ ਸਸਪੈਂਡ ਕੀਤਾ ਹੋਇਆ ਪ੍ਰੋਬੇਸ਼ਨਰੀ (P-ਪਲੇਟ) ਲਾਇਸੈਂਸ ਪੇਸ਼ ਕੀਤਾ। 20 ਸਾਲਾ ਹਾਲਮ ਵਾਸੀ ਨੌਜਵਾਨ ’ਤੇ ਕਈ ਟ੍ਰੈਫਿਕ ਉਲੰਘਣਾਵਾਂ ਦੇ ਦੋਸ਼ ਲੱਗਣ ਦੀ ਉਮੀਦ ਹੈ। ਇਨ੍ਹਾਂ ਵਿੱਚ ਸਸਪੈਂਡ ਲਾਇਸੈਂਸ ਨਾਲ ਗੱਡੀ ਚਲਾਉਣਾ, P-ਪਲੇਟ ਡਰਾਈਵਰ ਲਈ ਮਨਾਹੀ ਵਾਲੀ ਗੱਡੀ ਚਲਾਉਣਾ, ਬਿਨਾਂ ਰਜਿਸਟ੍ਰੇਸ਼ਨ ਵਾਲੀ ਗੱਡੀ ਚਲਾਉਣਾ, P-ਪਲੇਟ ਨਾ ਲਗਾਉਣਾ ਅਤੇ ਖ਼ਤਰਨਾਕ ਰਫ਼ਤਾਰ ਤੇ ਖ਼ਤਰਨਾਕ ਢੰਗ ਨਾਲ ਗੱਡੀ ਚਲਾਉਣਾ ਸ਼ਾਮਲ ਹਨ। ਪੁਲਿਸ ਨੇ Volkswagen Golf ਨੂੰ 30 ਦਿਨਾਂ ਲਈ ਜ਼ਬਤ (impound) ਕਰ ਲਿਆ ਹੈ। ਇਸ ਦੀ ਫੀਸ 1,091.90 ਡਾਲਰ ਦੱਸੀ ਗਈ ਹੈ। ਮਾਮਲੇ ਵਿੱਚ ਅਗਲੀ ਕਾਰਵਾਈ ਸਮਨ ਰਾਹੀਂ ਕੀਤੇ ਜਾਣ ਦੀ ਉਮੀਦ ਹੈ।