ਮੈਲਬੌਰਨ – ਬੱਚਿਆਂ ਅਤੇ ਪਰਿਵਾਰਾਂ ਲਈ ਮਸ਼ਹੂਰ ਲਾਈਵ ਸ਼ੋਅ Dinosaur World Live ਇਸ ਗਰਮੀ ਆਸਟ੍ਰੇਲੀਆ ਵਿੱਚ ਮੁੜ ਆ ਰਿਹਾ ਹੈ। ਦੁਨੀਆ ਭਰ ਵਿੱਚ ਲੋਕਪ੍ਰਿਯ ਇਹ ਸ਼ੋਅ ਆਪਣੇ ਬੇਹੱਦ ਅਸਲੀ ਦਿਖਾਈ ਦੇਣ ਵਾਲੇ ਡਾਇਨਾਸੌਰਾਂ ਨਾਲ ਦਰਸ਼ਕਾਂ ਨੂੰ ਪੁਰਾਤਨ ਸਮੇਂ ਦੀ ਰੋਮਾਂਚਕ ਦੁਨੀਆ ਵਿੱਚ ਲੈ ਜਾਵੇਗਾ। ਯੂਕੇ, ਅਮਰੀਕਾ, ਕੈਨੇਡਾ ਅਤੇ ਚੀਨ ਵਿੱਚ ਸਫਲ ਟੂਰ ਕਰਨ ਤੋਂ ਬਾਅਦ Olivier Award ਜਿੱਤ ਚੁੱਕਾ ਇਹ ਇੰਟਰਐਕਟਿਵ ਪਰਿਵਾਰਕ ਸ਼ੋਅ ਦਸੰਬਰ 2026 ਤੋਂ ਜਨਵਰੀ 2027 ਤੱਕ ਆਸਟ੍ਰੇਲੀਆ ਦੇ ਕਈ ਸ਼ਹਿਰਾਂ ਵਿੱਚ ਪੇਸ਼ ਕੀਤਾ ਜਾਵੇਗਾ। ਇਸ ਵਿੱਚ ਮੈਲਬੌਰਨ, ਕੈਨਬਰਾ, ਵੋਲੋਂਗੋਂਗ, ਸਿਡਨੀ, ਨਿਊਕੈਸਲ, ਬ੍ਰਿਸਬੇਨ ਅਤੇ ਪਰਥ ਸ਼ਾਮਲ ਹਨ।
ਆਸਟ੍ਰੇਲੀਅਨ ਪ੍ਰੋਡਿਊਸਰ ਐਂਡਰਿਊ ਕੇ ਨੇ ਕਿਹਾ ਕਿ Dinosaur World Live ਪਰਿਵਾਰਾਂ ਨੂੰ ਡਾਇਨਾਸੌਰਾਂ ਨੂੰ ਨੇੜੇ ਤੋਂ ਦੇਖਣ ਦਾ ਅਜਿਹਾ ਤਜਰਬਾ ਦਿੰਦਾ ਹੈ ਜੋ ਸਿਰਫ਼ ਸਕ੍ਰੀਨ ’ਤੇ ਦੇਖਣ ਨਾਲ ਨਹੀਂ ਮਿਲ ਸਕਦਾ। ਉਨ੍ਹਾਂ ਕਿਹਾ ਕਿ ਡਾਇਨਾਸੌਰ ਬੱਚਿਆਂ ਦੀ ਕਲਪਨਾ ਨੂੰ ਬਹੁਤ ਪ੍ਰਭਾਵਿਤ ਕਰਦੇ ਹਨ ਅਤੇ ਜਦੋਂ ਇਹ ਵਿਸ਼ਾਲ ਜੀਵ ਉਨ੍ਹਾਂ ਦੀਆਂ ਅੱਖਾਂ ਸਾਹਮਣੇ ਜਿਉਂਦੇ ਜਾਪਦੇ ਹਨ ਤਾਂ ਬੱਚਿਆਂ ਦੇ ਚਿਹਰਿਆਂ ’ਤੇ ਖੁਸ਼ੀ ਦੇਖਣਾ ਖਾਸ ਤਜਰਬਾ ਹੁੰਦਾ ਹੈ।
ਸ਼ੋਅ ਵਿੱਚ ਸ਼ਾਨਦਾਰ ਪੁਪੇਟਰੀ ਰਾਹੀਂ ਡਾਇਨਾਸੌਰਾਂ ਨੂੰ ਮੰਚ ’ਤੇ ਜ਼ਿੰਦਾ ਕੀਤਾ ਜਾਂਦਾ ਹੈ। ਇਸ ਦੀ ਪੁਪੇਟਰੀ ਮੈਕਸ ਹੰਫਰੀਜ਼ ਵੱਲੋਂ ਤਿਆਰ ਕੀਤੀ ਗਈ ਹੈ। ਸਕੂਲ ਦੀਆਂ ਗਰਮੀਆਂ ਦੀਆਂ ਛੁੱਟੀਆਂ ਨੂੰ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤਾ ਗਿਆ ਇਹ ਸ਼ੋਅ ਬੱਚਿਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਇੱਕ ਰੋਮਾਂਚਕ ਯਾਤਰਾ ’ਤੇ ਲੈ ਜਾਂਦਾ ਹੈ। ਦਰਸ਼ਕ ਸਾਹਸੀ ਖੋਜੀ ਮਿਰਾਂਡਾ ਨਾਲ ਮਿਲ ਕੇ ਇੱਕ ਅਜਿਹੀ ਪੁਰਾਤਨ ਦੁਨੀਆ ਵਿੱਚ ਦਾਖਲ ਹੁੰਦੇ ਹਨ ਜਿੱਥੇ ਵਿਸ਼ਾਲ ਡਾਇਨਾਸੌਰ ਉਨ੍ਹਾਂ ਦੇ ਸਾਹਮਣੇ ਨਜ਼ਰ ਆਉਂਦੇ ਹਨ। ਸ਼ੋਅ ਵਿੱਚ ਪ੍ਰਾਗੈਤਿਹਾਸਿਕ ਦੁਨੀਆ ਦੇ ਕਈ ਮਸ਼ਹੂਰ ਡਾਇਨਾਸੌਰ ਦੇਖਣ ਨੂੰ ਮਿਲਣਗੇ। ਇਨ੍ਹਾਂ ਵਿੱਚ Tyrannosaurus Rex (T-Rex), Triceratops, Giraffatitan, Microraptor ਅਤੇ Segnosaurus ਸ਼ਾਮਲ ਹਨ। ਇੰਟਰਐਕਟਿਵ ਅੰਦਾਜ਼ ਅਤੇ ਸ਼ਾਨਦਾਰ ਪੁਪੇਟਰੀ ਰਾਹੀਂ ਤਿਆਰ ਕੀਤਾ ਇਹ ਸ਼ੋਅ ਬੱਚਿਆਂ ਦੀ ਕਲਪਨਾ ਨੂੰ ਉਤਸ਼ਾਹਿਤ ਕਰਨ ਦੇ ਨਾਲ ਉਨ੍ਹਾਂ ਨੂੰ ਧਰਤੀ ’ਤੇ ਕਦੇ ਘੁੰਮਣ ਵਾਲੇ ਇਨ੍ਹਾਂ ਅਦਭੁੱਤ ਜੀਵਾਂ ਬਾਰੇ ਜਾਣਨ ਦਾ ਮੌਕਾ ਵੀ ਦਿੰਦਾ ਹੈ।
Dinosaur World Live ਲਗਭਗ 55 ਮਿੰਟ ਦਾ ਸ਼ੋਅ ਹੈ ਅਤੇ ਇਸ ਵਿੱਚ ਕੋਈ ਇੰਟਰਵਲ ਨਹੀਂ ਹੋਵੇਗਾ। ਇਹ ਸ਼ੋਅ 3 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਬੱਚਿਆਂ ਲਈ ਸਿਫ਼ਾਰਸ਼ ਕੀਤਾ ਗਿਆ ਹੈ।