ਦੋਹਾ – ਦੋਹਾ ਤੋਂ ਬੰਗਲੁਰੂ ਜਾ ਰਹੀ ਇੰਡੀਗੋ ਦੀ ਇੱਕ ਉਡਾਣ ਵਿੱਚ ਪਾਇਲਟ ਦੀ ਸਿਹਤ ਅਚਾਨਕ ਵਿਗੜਨ ਕਾਰਨ ਜਹਾਜ਼ ਨੂੰ ਓਮਾਨ ਦੀ ਰਾਜਧਾਨੀ ਮਸਕਟ ਵੱਲ ਮੋੜਨਾ ਪਿਆ। ਉਡਾਣ ਨੂੰ ਯਾਤਰੀਆਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਮਸਕਟ ਵਿੱਚ ਉਤਾਰਿਆ ਗਿਆ। ਇਹ ਉਡਾਣ 6E 1302 ਸੀ ਅਤੇ ਇਸ ਨੂੰ Airbus A321 ਜਹਾਜ਼ ਰਾਹੀਂ ਚਲਾਇਆ ਜਾ ਰਿਹਾ ਸੀ। ਇੰਡੀਗੋ ਨੇ ਦੱਸਿਆ ਕਿ ਉਡਾਣ ਨੂੰ ਇਸ ਲਈ ਮੋੜਿਆ ਗਿਆ ਕਿਉਂਕਿ ਚਾਲਕ ਦਲ ਦੇ ਇੱਕ ਮੈਂਬਰ ਨੂੰ ਤੁਰੰਤ ਡਾਕਟਰੀ ਸਹਾਇਤਾ ਦੀ ਲੋੜ ਪਈ ਸੀ। ਮਸਕਟ ਵਿੱਚ ਜਹਾਜ਼ ਉਤਰਨ ਤੋਂ ਬਾਅਦ ਸਬੰਧਤ ਚਾਲਕ ਦਲ ਦੇ ਮੈਂਬਰ ਦਾ ਮੈਡੀਕਲ ਟੀਮ ਨੇ ਇਲਾਜ ਕੀਤਾ। ਏਅਰਲਾਈਨ ਮੁਤਾਬਕ ਹੁਣ ਉਸ ਦੀ ਹਾਲਤ ਠੀਕ ਹੈ।
ਇੰਡੀਗੋ ਨੇ ਪਾਇਲਟ ਦੀ ਸਿਹਤ ਵਿਗੜਨ ਦਾ ਕਾਰਨ ਜਾਂ ਉਸ ਨੂੰ ਹੋਈ ਬਿਮਾਰੀ ਬਾਰੇ ਕੋਈ ਹੋਰ ਜਾਣਕਾਰੀ ਨਹੀਂ ਦਿੱਤੀ।
ਮਸਕਟ ਵਿੱਚ ਯਾਤਰੀਆਂ ਨੂੰ ਕੁਝ ਸਮਾਂ ਉਡੀਕ ਕਰਨੀ ਪਈ। ਇੰਡੀਗੋ ਨੇ ਉਨ੍ਹਾਂ ਲਈ ਰਿਫਰੈਸ਼ਮੈਂਟ ਦਾ ਪ੍ਰਬੰਧ ਕੀਤਾ ਅਤੇ ਸਥਿਤੀ ਬਾਰੇ ਸਮੇਂ-ਸਮੇਂ ’ਤੇ ਜਾਣਕਾਰੀ ਦਿੱਤੀ। ਇਸ ਤੋਂ ਬਾਅਦ ਏਅਰਲਾਈਨ ਨੇ ਬਦਲਵਾਂ ਜਹਾਜ਼ ਅਤੇ ਨਵਾਂ ਚਾਲਕ ਦਲ ਮੁਹੱਈਆ ਕਰਵਾਇਆ ਅਤੇ ਯਾਤਰੀਆਂ ਨੂੰ ਮਸਕਟ ਤੋਂ ਬੰਗਲੁਰੂ ਪਹੁੰਚਾਇਆ। ਏਅਰਲਾਈਨ ਨੇ ਕਿਹਾ ਕਿ ਯਾਤਰੀਆਂ ਦੀ ਸੁਰੱਖਿਆ ਸਭ ਤੋਂ ਪਹਿਲੀ ਤਰਜੀਹ ਹੈ ਅਤੇ ਇਸੇ ਕਾਰਨ ਜਹਾਜ਼ ਨੂੰ ਮਸਕਟ ਉਤਾਰਨ ਦਾ ਫੈਸਲਾ ਕੀਤਾ ਗਿਆ। ਇੰਡੀਗੋ ਨੇ ਯਾਤਰੀਆਂ ਨੂੰ ਹੋਈ ਅਸੁਵਿਧਾ ਲਈ ਅਫਸੋਸ ਵੀ ਪ੍ਰਗਟ ਕੀਤਾ।