ਸਿਡਨੀ – ਨੈਸ਼ਨਲ ਸਟੂਡੈਂਟ ਓਮਬਡਸਮੈਨ (NSO) ਨੇ Crown Institute of Higher Education (CIHE) ਵੱਲੋਂ ਵਿਦੇਸ਼ੀ ਵਿਦਿਆਰਥੀਆਂ ਦੇ ਕੋਰਸ ਛੱਡਣ ਅਤੇ ਫੀਸ ਵਾਪਸੀ ਦੀਆਂ ਬੇਨਤੀਆਂ ਨੂੰ ਸੰਭਾਲਣ ਦੇ ਤਰੀਕੇ ਬਾਰੇ ਗੰਭੀਰ ਚਿੰਤਾਵਾਂ ਜ਼ਾਹਰ ਕਰਦਿਆਂ 13 ਸਿਫਾਰਸ਼ਾਂ ਕੀਤੀਆਂ ਹਨ।
ਦੋ ਵਿਦਿਆਰਥੀਆਂ ਨੇ CIHE ਵਿੱਚ ਆਪਣੀ ਪੜ੍ਹਾਈ ਛੱਡਣ ਅਤੇ ਦਾਖਲਾ ਰੱਦ ਕਰਨ ਦੀ ਕੋਸ਼ਿਸ਼ ਤੋਂ ਬਾਅਦ NSO ਕੋਲ ਸ਼ਿਕਾਇਤਾਂ ਕੀਤੀਆਂ ਸਨ। ਜਾਂਚ ਦੌਰਾਨ NSO ਨੇ ਪਾਇਆ ਕਿ CIHE ਨੇ ਕੁਝ ਮਾਮਲਿਆਂ ਵਿੱਚ ਆਪਣੀਆਂ ਕਾਨੂੰਨੀ ਜ਼ਿੰਮੇਵਾਰੀਆਂ ਅਤੇ National Code of Practice ਦੀ ਪਾਲਣਾ ਨਹੀਂ ਕੀਤੀ। ਜਾਂਚ ਵਿੱਚ ਸਾਹਮਣੇ ਆਏ ਮੁੱਦਿਆਂ ਵਿੱਚ ਵਿਦਿਆਰਥੀਆਂ ਦੀਆਂ withdrawal requests ਨੂੰ ਗਲਤ ਤਰੀਕੇ ਨਾਲ ਰੱਦ ਕਰਨਾ, ਬੇਲੋੜੇ ਸਬੂਤ ਮੰਗਣਾ, academic transcripts ਮੁਹੱਈਆ ਨਾ ਕਰਵਾਉਣਾ, ਵਿਦਿਆਰਥੀਆਂ ਤੋਂ ਫੀਸਾਂ ਦੀ ਗਲਤ ਤਰੀਕੇ ਨਾਲ ਮੰਗ ਕਰਨਾ ਅਤੇ ਕੁਝ ਰਕਮਾਂ ਨੂੰ ਰੋਕ ਕੇ ਰੱਖਣਾ ਸ਼ਾਮਲ ਹਨ।
ਨੈਸ਼ਨਲ ਸਟੂਡੈਂਟ ਓਮਬਡਸਮੈਨ Iain Anderson ਨੇ ਕਿਹਾ ਕਿ ਜਾਂਚ ਤੋਂ ਇਹ ਪਤਾ ਲੱਗਾ ਕਿ CIHE ਆਪਣੀਆਂ ਕਾਨੂੰਨੀ ਜ਼ਿੰਮੇਵਾਰੀਆਂ ਤੋਂ ਜਾਣੂ ਸੀ, ਪਰ ਉਨ੍ਹਾਂ ਦੇ ਅਨੁਸਾਰ ਸੰਸਥਾ ਨੇ ਇਨ੍ਹਾਂ ਦੀ ਪਾਲਣਾ ਕਰਨ ਦੀ ਬਜਾਏ ਅਜਿਹੀਆਂ ਨੀਤੀਆਂ ਅਤੇ ਫੈਸਲੇ ਲਾਗੂ ਕੀਤੇ ਜੋ ਕਾਨੂੰਨ ਦੇ ਉਲਟ ਦਿਖਾਈ ਦਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਅਜਿਹੇ ਫੈਸਲਿਆਂ ਦਾ ਵਿਦਿਆਰਥੀਆਂ ਦੇ ਕਾਨੂੰਨੀ ਹੱਕਾਂ ਅਤੇ ਵਿੱਤੀ ਹਾਲਾਤਾਂ ਉੱਤੇ ਗੰਭੀਰ ਮਾੜਾ ਅਸਰ ਪੈ ਸਕਦਾ ਹੈ। Ombudsman ਦੇ ਅਨੁਸਾਰ, ਜੇ ਕੋਈ ਵਿਦਿਆਰਥੀ tuition fee ਦੀ due date ਤੋਂ ਪਹਿਲਾਂ ਹੀ ਆਪਣਾ ਦਾਖਲਾ ਵਾਪਸ ਲੈ ਲੈਂਦਾ ਹੈ, ਤਾਂ ਉਸ ਤੋਂ ਪੂਰੇ ਸਮੈਸਟਰ ਦੀ ਫੀਸ ਮੰਗਣਾ ਗੈਰ-ਵਾਜਬ ਅਤੇ ਬਹੁਤ ਅਨਿਆਂਪੂਰਨ ਹੈ। ਉਨ੍ਹਾਂ ਦੇ ਵਿਚਾਰ ਵਿੱਚ ਇਹ ਆਸਟ੍ਰੇਲੀਆ ਵਿੱਚ ਆਮ ਸਿੱਖਿਆ ਖੇਤਰ ਦੀ ਪ੍ਰਥਾ ਨਾਲ ਵੀ ਮੇਲ ਨਹੀਂ ਖਾਂਦਾ ਅਤੇ Australian Consumer Law ਦੇ ਉਲਟ ਹੋ ਸਕਦਾ ਹੈ। ਐਂਡਰਸਨ ਨੇ ਕਿਹਾ ਕਿ ਉਹ ਇਸ ਗੱਲ ਨੂੰ ਲੈ ਕੇ ਖਾਸ ਤੌਰ ’ਤੇ ਚਿੰਤਤ ਹਨ ਕਿ CIHE ਉਨ੍ਹਾਂ ਰਿਫੰਡਾਂ ਨੂੰ ਦੇਣ ਤੋਂ ਇਨਕਾਰ ਜਾਂ ਉਨ੍ਹਾਂ ਨੂੰ ਰੋਕ ਰਿਹਾ ਸੀ, ਜਿਨ੍ਹਾਂ ਦੇ ਵਿਦਿਆਰਥੀ ਕਾਨੂੰਨੀ ਤੌਰ ’ਤੇ ਹੱਕਦਾਰ ਹੋ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਜਾਂਚ ਤੋਂ CIHE ਵਿੱਚ ਕਾਨੂੰਨੀ ਜ਼ਿੰਮੇਵਾਰੀਆਂ ਦੀ ਪਾਲਣਾ ਨਾ ਕਰਨ ਦਾ ਇੱਕ ਰੁਝਾਨ ਸਾਹਮਣੇ ਆਇਆ ਹੈ।
ਆਸਟ੍ਰੇਲੀਆ ਵਿੱਚ ਪੜ੍ਹਾਈ ਕਰਨ ਵਾਲੇ ਵਿਦੇਸ਼ੀ ਵਿਦਿਆਰਥੀ ਆਪਣੀ ਸਿੱਖਿਆ ਲਈ ਵੱਡੀ ਰਕਮ ਦੇ ਨਾਲ-ਨਾਲ ਸਮਾਂ ਅਤੇ ਨਿੱਜੀ ਤੇ ਪੇਸ਼ੇਵਰ ਵਚਨਬੱਧਤਾ ਵੀ ਲਗਾਉਂਦੇ ਹਨ। ਕਈ ਵਾਰ ਅਜਿਹੇ ਹਾਲਾਤ ਪੈਦਾ ਹੋ ਜਾਂਦੇ ਹਨ ਜੋ ਵਿਦਿਆਰਥੀ ਦੇ ਕੰਟਰੋਲ ਤੋਂ ਬਾਹਰ ਹੁੰਦੇ ਹਨ ਅਤੇ ਉਨ੍ਹਾਂ ਦੀ ਪੜ੍ਹਾਈ ਸ਼ੁਰੂ ਕਰਨ ਜਾਂ ਜਾਰੀ ਰੱਖਣ ਦੀ ਸਮਰੱਥਾ ਪ੍ਰਭਾਵਿਤ ਹੁੰਦੀ ਹੈ।
NSO ਨੇ ਸਪੱਸ਼ਟ ਕੀਤਾ ਕਿ CIHE ਕੋਲ ਵਿਦਿਆਰਥੀ ਵੱਲੋਂ ਕੋਰਸ ਛੱਡਣ ਦੀ withdrawal request ਨੂੰ ‘refuse’ ਕਰਨ ਦਾ ਅਧਿਕਾਰ ਨਹੀਂ ਹੈ। ਹਾਲਾਂਕਿ, ਵਿਦਿਆਰਥੀ ਦੇ withdrawal ਨਾਲ ਸਿੱਖਿਆ ਸੰਸਥਾ ਨੂੰ ਵਿੱਤੀ ਨੁਕਸਾਨ ਹੋ ਸਕਦਾ ਹੈ ਅਤੇ ਕੁਝ ਫੀਸ ਰੋਕਣਾ ਵਾਜਬ ਹੋ ਸਕਦਾ ਹੈ, ਪਰ ਰੋਕੀ ਜਾਣ ਵਾਲੀ ਰਕਮ ਵਾਜਬ ਹੋਣੀ ਚਾਹੀਦੀ ਹੈ। NSO ਨੇ CIHE ਦੇ 2019 ਵਿੱਚ ਕੰਮ ਸ਼ੁਰੂ ਕਰਨ ਤੋਂ ਬਾਅਦ ਇਸ ਦੇ ਵਿਦਿਆਰਥੀਆਂ ਵੱਲੋਂ NSO ਜਾਂ Overseas Student Ombudsman ਕੋਲ ਕੀਤੀਆਂ ਸਾਰੀਆਂ ਸ਼ਿਕਾਇਤਾਂ ਦੀ ਸਮੀਖਿਆ ਵੀ ਕੀਤੀ।ਸਮੀਖਿਆ ਤੋਂ ਇਹ ਸਾਹਮਣੇ ਆਇਆ ਕਿ CIHE ਵੱਲੋਂ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਦਿੱਤੇ ਜਾਣ ਵਾਲੇ ਰਿਫੰਡ ਨਾਲ ਸਬੰਧਤ ਜ਼ਿੰਮੇਵਾਰੀਆਂ ਦੀ ਨਿਯਮਤ ਤੌਰ ’ਤੇ ਪਾਲਣਾ ਨਾ ਕੀਤੇ ਜਾਣ ਦੀ ਸੰਭਾਵਨਾ ਹੈ ਅਤੇ ਕੁਝ ਮਾਮਲਿਆਂ ਵਿੱਚ ਵਿਦਿਆਰਥੀਆਂ ਵੱਲੋਂ ਪਹਿਲਾਂ ਤੋਂ ਅਦਾ ਕੀਤੀ tuition fee ਰੋਕ ਕੇ ਰੱਖੀ ਗਈ।
NSO ਅਨੁਸਾਰ, CIHE ਦੀ ਕਾਨੂੰਨੀ ਜ਼ਿੰਮੇਵਾਰੀ ਹੈ ਕਿ ਉਹ ਇਨ੍ਹਾਂ ਮਾਮਲਿਆਂ ਨੂੰ ਠੀਕ ਕਰੇ। ਇਹ ਵੀ ਸੰਭਾਵਨਾ ਜ਼ਾਹਰ ਕੀਤੀ ਗਈ ਹੈ ਕਿ ਜਿਨ੍ਹਾਂ ਵਿਦਿਆਰਥੀਆਂ ਨੂੰ ਗਲਤ ਤਰੀਕੇ ਨਾਲ ਰਿਫੰਡ ਤੋਂ ਵਾਂਝਾ ਕੀਤਾ ਗਿਆ ਜਾਂ ਗਲਤ ਰਕਮ ਵਾਪਸ ਕੀਤੀ ਗਈ, ਉਨ੍ਹਾਂ ਦੀ ਗਿਣਤੀ ਉਨ੍ਹਾਂ ਵਿਦਿਆਰਥੀਆਂ ਤੋਂ ਕਾਫੀ ਵੱਧ ਹੋ ਸਕਦੀ ਹੈ ਜਿਨ੍ਹਾਂ ਨੇ Ombudsman ਕੋਲ ਸ਼ਿਕਾਇਤ ਕੀਤੀ ਹੈ। CIHE ਨੇ NSO ਵੱਲੋਂ ਕੀਤੀਆਂ ਸਾਰੀਆਂ 13 ਸਿਫਾਰਸ਼ਾਂ ਨੂੰ ਲਾਗੂ ਕਰਨ ਲਈ ਸਹਿਮਤੀ ਦਿੱਤੀ ਹੈ। ਜਿਨ੍ਹਾਂ ਵਿਦਿਆਰਥੀਆਂ ਨਾਲ CIHE ਦੇ ਕੋਰਸ ਤੋਂ withdrawal ਲੈਣ ਸਮੇਂ ਇਸੇ ਤਰ੍ਹਾਂ ਦੇ ਹਾਲਾਤ ਪੇਸ਼ ਆਏ ਹਨ, ਉਹ National Student Ombudsman ਨਾਲ ਸੰਪਰਕ ਕਰ ਸਕਦੇ ਹਨ। ਇਸ ਲਈ 1300 395 775 ’ਤੇ ਫੋਨ ਕੀਤਾ ਜਾ ਸਕਦਾ ਹੈ ਜਾਂ NSO ਦੀ ਵੈੱਬਸਾਈਟ nso.gov.au ’ਤੇ ਜਾਣਕਾਰੀ ਲਈ ਜਾ ਸਕਦੀ ਹੈ।
ਕਾਨੂੰਨੀ ਢਾਂਚੇ ਵਿੱਚ ਇਹ ਗੱਲ ਮੰਨੀ ਗਈ ਹੈ ਕਿ ਅਜਿਹੇ ਮਾਮਲਿਆਂ ਵਿੱਚ ਵਿਦਿਆਰਥੀਆਂ ਅਤੇ ਸਿੱਖਿਆ ਸੰਸਥਾਵਾਂ ਵਿਚਕਾਰ ਤਾਕਤ ਦਾ ਸੰਤੁਲਨ ਬਰਾਬਰ ਨਹੀਂ ਹੁੰਦਾ। ਇਸ ਲਈ ਸਿੱਖਿਆ ਸੰਸਥਾਵਾਂ ਉੱਤੇ ਵਿਦਿਆਰਥੀਆਂ ਦੇ ਹੱਕਾਂ ਦੀ ਰੱਖਿਆ ਲਈ ਖਾਸ ਕਾਨੂੰਨੀ ਜ਼ਿੰਮੇਵਾਰੀਆਂ ਲਾਗੂ ਕੀਤੀਆਂ ਜਾਂਦੀਆਂ ਹਨ। ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਉੱਚ ਸਿੱਖਿਆ ਖੇਤਰ ਵਿੱਚ ਨਿਆਂ, ਪਾਰਦਰਸ਼ਤਾ ਅਤੇ ਜਵਾਬਦੇਹੀ ਯਕੀਨੀ ਬਣਾਉਣ ਲਈ ਲਾਜ਼ਮੀ ਹੈ।