ਸਿਡਨੀ – ਨਿਊ ਸਾਊਥ ਵੇਲਜ਼ ਦੀ ਪੁਲਿਸ ਮੰਤਰੀ ਕੈਟਲੀ ’ਤੇ ਬੌਂਡੀ ਬੀਚ ਅੱਤਵਾਦੀ ਸਾਜਿਦ ਅਕਰਮ ਦੇ ਫਾਇਰਆਰਮਜ਼ ਲਾਇਸੈਂਸ ਨਾਲ ਜੁੜੇ ਮਹੱਤਵਪੂਰਨ ਸਵਾਲਾਂ ਦੇ ਜਵਾਬ ਨਾ ਦੇਣ ਦੇ ਦੋਸ਼ ਲੱਗੇ ਹਨ।
ਬਜਟ ਐਸਟੀਮੇਟਸ ਦੀ ਸੁਣਵਾਈ ਦੌਰਾਨ ਮੰਤਰੀ ਤੋਂ ਪੁੱਛਿਆ ਗਿਆ ਕਿ ਅਕਰਮ ਦੀ ਹਥਿਆਰਾਂ ਦੇ ਲਾਇਸੈਂਸ ਦੀ ਅਰਜ਼ੀ ਨੂੰ ਮਨਜ਼ੂਰੀ ਮਿਲਣ ਵਿੱਚ ਲਗਭਗ ਤਿੰਨ ਸਾਲ ਕਿਉਂ ਲੱਗੇ। ਮੰਤਰੀ ਇਸ ਦੇ ਕਾਰਨ ਬਾਰੇ ਸਪੱਸ਼ਟ ਜਵਾਬ ਦੇਣ ਵਿੱਚ ਅਸਮਰੱਥ ਰਹੀ ਅਤੇ ਉਨ੍ਹਾਂ ਨੇ ਇਨ੍ਹਾਂ ਸਵਾਲਾਂ ਨੂੰ ਬਾਅਦ ਵਿੱਚ ਲਿਖਤੀ ਜਵਾਬ ਦੇਣ ਲਈ ਵੀ ਦਰਜ ਕਰਨ ਤੋਂ ਇਨਕਾਰ ਕਰ ਦਿੱਤਾ।
ਵਿਰੋਧੀ ਧਿਰ ਮੁਤਾਬਕ, ਮੰਤਰੀ ਪਹਿਲਾਂ ਕਹਿ ਚੁੱਕੀ ਹੈ ਕਿ ਤਿੰਨ ਸਾਲ ਦੀ ਦੇਰੀ ਫਾਇਰਆਰਮਜ਼ ਰਜਿਸਟਰੀ ਵਿੱਚ ਅਰਜ਼ੀਆਂ ਦੇ ਬੈਕਲਾਗ ਕਾਰਨ ਹੋਈ ਸੀ। ਪਰ ਰਜਿਸਟਰੀ ਦੇ ਰਿਕਾਰਡਾਂ ਵਿੱਚ ਇਸ ਦਾਅਵੇ ’ਤੇ ਸਵਾਲ ਖੜ੍ਹੇ ਹੋ ਰਹੇ ਹਨ। ਰਿਕਾਰਡਾਂ ਮੁਤਾਬਕ 2020 ਵਿੱਚ ਨਵੇਂ ਹਥਿਆਰਾਂ ਦੇ ਲਾਇਸੈਂਸ ਦੀ ਅਰਜ਼ੀ ’ਤੇ ਕਾਰਵਾਈ ਕਰਨ ਦਾ ਔਸਤ ਸਮਾਂ 96 ਦਿਨ ਸੀ। ਇਸ ਤੋਂ ਇਲਾਵਾ, Firearms Registry Consultative Council ਦੀ ਇੱਕ ਮੀਟਿੰਗ ਦੇ ਮਿੰਟਾਂ ਮੁਤਾਬਕ ਉਸ ਸਮੇਂ ਸਿਰਫ਼ ਚਾਰ ਅੰਦਰੂਨੀ ਸਮੀਖਿਆਵਾਂ (internal reviews) ਬਕਾਇਆ ਸਨ। ਇਸ ਦੇ ਬਾਵਜੂਦ ਮੰਤਰੀ ਨੇ ਕਮੇਟੀ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਵੱਖਰੇ ਤੌਰ ’ਤੇ ਜਾਣਕਾਰੀ ਦਿੱਤੀ ਗਈ ਸੀ ਕਿ ਉਸ ਸਮੇਂ ਲਗਭਗ 150 ਅਰਜ਼ੀਆਂ ਬਕਾਇਆ ਸਨ। ਮੰਤਰੀ ਇਸ ਅੰਕੜੇ ਅਤੇ ਰਜਿਸਟਰੀ ਦੇ ਉਪਲਬਧ ਰਿਕਾਰਡਾਂ ਵਿਚਕਾਰ ਫਰਕ ਦੀ ਵਿਆਖਿਆ ਨਹੀਂ ਕਰ ਸਕੀ।
ਅਰਜ਼ੀ ਦੀ ਸਮੀਖਿਆ ਹੋਈ ਸੀ ਜਾਂ ਨਹੀਂ?
ਐਕਟਿੰਗ ਸ਼ੈਡੋ ਅਟਾਰਨੀ-ਜਨਰਲ ਸੂਜ਼ਨ ਕਾਰਟਰ ਨੇ ਕਿਹਾ ਕਿ ਲੋਕਾਂ ਨੂੰ ਇਹ ਜਾਣਨ ਦਾ ਹੱਕ ਹੈ ਕਿ ਕੀ ਅਕਰਮ ਦੀ ਲਾਇਸੈਂਸ ਅਰਜ਼ੀ ਦੌਰਾਨ ਕੋਈ ਚੇਤਾਵਨੀ ਜਾਂ ਖ਼ਤਰੇ ਦੇ ਸੰਕੇਤ ਸਾਹਮਣੇ ਆਏ ਸਨ ਅਤੇ ਜੇ ਆਏ ਸਨ ਤਾਂ ਉਨ੍ਹਾਂ ’ਤੇ ਕਾਰਵਾਈ ਕੀਤੀ ਗਈ ਸੀ ਜਾਂ ਨਹੀਂ। ਉਨ੍ਹਾਂ ਕਿਹਾ ਕਿ ਮੰਤਰੀ ਇਹ ਵੀ ਨਹੀਂ ਦੱਸ ਸਕੀ ਕਿ ਸਾਜਿਦ ਅਕਰਮ ਦੀ ਹਥਿਆਰਾਂ ਦੇ ਲਾਇਸੈਂਸ ਦੀ ਅਰਜ਼ੀ ਅੰਦਰੂਨੀ ਸਮੀਖਿਆ ਲਈ ਗਈ ਸੀ ਜਾਂ ਨਹੀਂ ਅਤੇ ਆਖ਼ਰਕਾਰ ਉਸ ਨੂੰ ਲਾਇਸੈਂਸ ਕਿਉਂ ਦਿੱਤਾ ਗਿਆ। ਕਾਰਟਰ ਨੇ ਕਿਹਾ ਕਿ ਮੰਤਰੀ ਵੱਲੋਂ ਤਿੰਨ ਸਾਲ ਦੀ ਦੇਰੀ ਲਈ ਬੈਕਲਾਗ ਨੂੰ ਕਾਰਨ ਦੱਸਿਆ ਗਿਆ ਸੀ, ਪਰ ਉਪਲਬਧ ਰਿਕਾਰਡ ਇਸ ਵਿਆਖਿਆ ਨਾਲ ਮੇਲ ਨਹੀਂ ਖਾਂਦੇ। ਉਨ੍ਹਾਂ ਕਿਹਾ ਕਿ ਲੋਕ ਇਹ ਜਾਣਨਾ ਚਾਹੁੰਦੇ ਹਨ ਕਿ ਸਾਜਿਦ ਅਕਰਮ ਨੂੰ ਹਥਿਆਰਾਂ ਦਾ ਲਾਇਸੈਂਸ ਕਿਵੇਂ ਮਿਲਿਆ, ਕੀ ਉਸ ਦੀ ਅਰਜ਼ੀ ਵਿੱਚ ਕੋਈ ਚੇਤਾਵਨੀ ਦੇ ਸੰਕੇਤ ਮੌਜੂਦ ਸਨ ਅਤੇ ਜੇ ਕੋਈ ਪ੍ਰਬੰਧਕੀ ਕਮੀ ਰਹੀ ਤਾਂ ਕੀ ਉਸ ਨੂੰ ਦੂਰ ਕੀਤਾ ਗਿਆ ਹੈ।ਕਾਰਟਰ ਨੇ ਕਿਹਾ ਕਿ ਇੰਨੇ ਗੰਭੀਰ ਮਾਮਲੇ ਵਿੱਚ ਰਾਜ ਦੀ ਪੁਲਿਸ ਮੰਤਰੀ ਵੱਲੋਂ ਸਵਾਲਾਂ ਦੇ ਜਵਾਬ ਦੇਣ ਜਾਂ ਉਨ੍ਹਾਂ ਨੂੰ ਬਾਅਦ ਵਿੱਚ ਜਵਾਬ ਦੇਣ ਲਈ ਦਰਜ ਕਰਨ ਤੋਂ ਇਨਕਾਰ ਕਰਨਾ ਕਾਫ਼ੀ ਨਹੀਂ ਹੈ। ਇਸ ਮਾਮਲੇ ਨੇ ਹਥਿਆਰਾਂ ਦੇ ਲਾਇਸੈਂਸ ਜਾਰੀ ਕਰਨ ਦੀ ਪ੍ਰਕਿਰਿਆ, ਫਾਇਰਆਰਮਜ਼ ਰਜਿਸਟਰੀ ਦੀ ਕਾਰਗੁਜ਼ਾਰੀ ਅਤੇ ਸੁਰੱਖਿਆ ਜਾਂਚਾਂ ਬਾਰੇ ਮੁੜ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।