ਨਵੀਂ ਦਿੱਲੀ – ਨੌਤਪਾ ਕਾਰਨ ਛੱਤੀਸਗੜ੍ਹ ਸਮੇਤ ਦੇਸ਼ ਦੇ ਕਈ ਸੂਬਿਆਂ ’ਚ ਗਰਮੀ ਦਾ ਕਹਿਰ ਜਾਰੀ ਹੈ। ਕੁਝ ਦਿਨ ਪਹਿਲਾਂ ਦੇਸ਼ ਦੀ ਰਾਜਧਾਨੀ ਦਿੱਲੀ ’ਚ ਗਰਮੀ ਨੇ ਰਿਕਾਰਡ ਤੋੜ ਦਿੱਤਾ ਸੀ ਤੇ ਪਾਰਾ 52.9 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ ਸੀ। ਹੁਣ ਮਹਾਰਾਸ਼ਟਰ ਦੇ ਨਾਗਪੁਰ ਨੇ ਗਰਮੀ ਦਾ ਦਿੱਲੀ ਦਾ ਰਿਕਾਰਡ ਵੀ ਤੋੜ ਦਿੱਤਾ ਹੈ। ਸ਼ੁੱਕਰਵਾਰ ਇੱਥੇ ਤਾਪਮਾਨ 56 ਡਿਗਰੀ ਸੈਲਸੀਅਸ ਸੀ। ਨਾਗਪੁਰ ’ਚ ਭਾਰਤੀ ਮੌਸਮ ਵਿਭਾਗ ਵਲੋਂ ਸਥਾਪਿਤ ਕੀਤੇ ਗਏ ਚਾਰ ਆਟੋਮੈਟਿਕ ਮੌਸਮ ਸਟੇਸ਼ਨਾਂ ’ਚੋਂ ਦੋ ’ਚ ਹੈਰਾਨ ਕਰਨ ਵਾਲਾ ਉੱਚ ਤਾਪਮਾਨ ਦਰਜ ਕੀਤਾ ਗਿਆ, ਜੋ 56 ਡਿਗਰੀ ਸੈਲਸੀਅਸ ਸੀ। ਰਾਮਦਾਸਪੇਠ ਦੇ ਪੀ. ਡੀ. ਕੇ. ਵੀ. ਵਿਖੇ 24 ਹੈਕਟੇਅਰ ਦੇ ਖੇਤੀਬਾੜੀ ਖੇਤਰ ’ਚ ਸਥਿਤ ਨਾਗਪੁਰ ਏ. ਡਬਲਿਊ.ਐੱਸ. ’ਚ ਵੀ 56 ਡਿਗਰੀ ਸੈਲਸੀਅਸ ਤਾਪਮਾਨ ਦਰਜ ਕੀਤਾ ਗਿਆ।
ਬਿਹਾਰ ’ਚ ਪਿਛਲੇ 24 ਘੰਟਿਆਂ ਦੌਰਾਨ ਗਰਮੀ ਕਾਰਨ 10 ਪੋਲਿੰਗ ਮੁਲਾਜ਼ਮਾਂ ਸਮੇਤ 14 ਵਿਅਕਤੀਆਂ ਦੀ ਮੌਤ ਹੋ ਗਈ। ਓਡਿਸ਼ਾ ’ਚ ਪਿਛਲੇ 24 ਘੰਟਿਆਂ ਦੌਰਾਨ ਹੀਟ ਸਟ੍ਰੋਕ ਕਾਰਨ 12 ਵਿਅਕਤੀਆਂ ਦੀ ਜਾਨ ਚਲੀ ਗਈ।
ਨਾਗਪੁਰ ਨੇ ਤੋੜਿਆ ਦਿੱਲੀ ਦਾ ਰਿਕਾਰਡ, ਪਾਰਾ ਪੁੱਜਾ 56 ਡਿਗਰੀ
