ਮੈਲਬੌਰਨ – ਆਸਟ੍ਰੇਲੀਆ ਦੀ Independent Health and Aged Care Pricing Authority (IHACPA) ਨੇ 2026–27 ਲਈ ਰਿਹਾਇਸ਼ੀ ਏਜਡ ਕੇਅਰ ਸੇਵਾਵਾਂ ਦੀਆਂ ਕੀਮਤਾਂ ਬਾਰੇ ਆਪਣੀ ਨਵੀਂ ਸਲਾਹ ਜਾਰੀ ਕਰ ਦਿੱਤੀ ਹੈ। ਇਹ ਸਲਾਹ ਲੰਬੇ ਸਮੇਂ ਤੱਕ ਕੀਤੀ ਗਈ ਜਨਤਕ ਸਲਾਹ-ਮਸ਼ਵਰੇ ਦੀ ਪ੍ਰਕਿਰਿਆ ਤੋਂ ਬਾਅਦ ਤਿਆਰ ਕੀਤੀ ਗਈ ਹੈ। ਇਸ ਵਿੱਚ ਏਜਡ ਕੇਅਰ ਸੇਵਾਵਾਂ ਮੁਹੱਈਆ ਕਰਵਾਉਣ ਦੀ ਅਸਲ ਲਾਗਤ ਨੂੰ ਧਿਆਨ ਵਿੱਚ ਰੱਖਿਆ ਗਿਆ ਹੈ। ਇਸ ਲਈ Aged Care Financial Report ਸਮੇਤ ਵੱਖ-ਵੱਖ ਅੰਕੜਿਆਂ ਅਤੇ ਰਿਪੋਰਟਾਂ ਦੀ ਵਰਤੋਂ ਕੀਤੀ ਗਈ ਹੈ।
IHACPA ਦੀ ਕੀਮਤ ਸਬੰਧੀ ਸਲਾਹ ਵਿੱਚ ਕਈ ਮਹੱਤਵਪੂਰਨ ਗੱਲਾਂ ਸ਼ਾਮਲ ਹਨ।
- 1 ਅਕਤੂਬਰ 2026 ਤੋਂ 30 ਸਤੰਬਰ 2027 ਤੱਕ ਲਾਗੂ ਹੋਣ ਵਾਲੀ ਸਿਫਾਰਸ਼ੀ Australian National Aged Care Classification (AN-ACC) ਕੀਮਤ।
- ਵੱਖ-ਵੱਖ AN-ACC ਕਲਾਸਾਂ, ਰੈਸਪਾਈਟ ਕਲਾਸ ਅਤੇ ਬੇਸ ਕੇਅਰ ਟੈਰਿਫ਼ ਸ਼੍ਰੇਣੀਆਂ ਲਈ ਸਿਫਾਰਸ਼ ਕੀਤੇ ਕੀਮਤ ਵਜ਼ਨ।
- ਰਿਹਾਇਸ਼ੀ ਏਜਡ ਕੇਅਰ ਘਰਾਂ ਵਿੱਚ ਰੋਜ਼ਾਨਾ ਜੀਵਨ ਨਾਲ ਜੁੜੀਆਂ ਸੇਵਾਵਾਂ ਦੇਣ ਦੀ ਲਾਗਤ ਅਤੇ ਉਨ੍ਹਾਂ ਨੂੰ ਮਿਲਣ ਵਾਲੀ ਆਮਦਨ ਵਿਚਕਾਰ ਅੰਦਾਜ਼ੇ ਅਨੁਸਾਰ ਫ਼ਰਕ।
IHACPA ਦੇ ਚੇਅਰ ਡੇਵਿਡ ਟਿਊਨ AO PSM ਨੇ ਕਿਹਾ ਕਿ ਨਵੀਂ ਸਲਾਹ ਸਬੂਤਾਂ ’ਤੇ ਆਧਾਰਿਤ ਹੈ ਅਤੇ ਏਜਡ ਕੇਅਰ ਖੇਤਰ ਨਾਲ ਵਿਆਪਕ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਤਿਆਰ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਸੰਸਥਾ ਦੀ ਕੋਸ਼ਿਸ਼ ਹੈ ਕਿ ਰਿਹਾਇਸ਼ੀ ਏਜਡ ਕੇਅਰ ਲਈ ਕੀਮਤਾਂ ਬਾਰੇ ਸਲਾਹ ਪਾਰਦਰਸ਼ੀ ਹੋਵੇ, ਸਬੂਤਾਂ ’ਤੇ ਆਧਾਰਿਤ ਹੋਵੇ ਅਤੇ ਚੰਗੀ ਗੁਣਵੱਤਾ ਵਾਲੀ ਦੇਖਭਾਲ ਮੁਹੱਈਆ ਕਰਵਾਉਣ ਦੀ ਅਸਲ ਲਾਗਤ ਨੂੰ ਦਰਸਾਏ। ਵਿਆਪਕ ਸਲਾਹ-ਮਸ਼ਵਰੇ ਅਤੇ ਡੂੰਘੇ ਵਿਸ਼ਲੇਸ਼ਣ ਰਾਹੀਂ ਤਿਆਰ ਕੀਤੀ ਇਹ ਸਲਾਹ ਇੱਕ ਟਿਕਾਊ ਏਜਡ ਕੇਅਰ ਪ੍ਰਣਾਲੀ ਬਣਾਉਣ ਅਤੇ ਬਜ਼ੁਰਗ ਆਸਟ੍ਰੇਲੀਅਨਾਂ ਨੂੰ ਸੁਰੱਖਿਅਤ ਤੇ ਉੱਚ ਗੁਣਵੱਤਾ ਵਾਲੀ ਦੇਖਭਾਲ ਦੇਣ ਵਿੱਚ ਮਦਦ ਕਰੇਗੀ।
ਨਵੀਂ ਸਲਾਹ ਤਿਆਰ ਕਰਦੇ ਸਮੇਂ IHACPA ਨੇ Fair Work Commission ਦੇ ਹਾਲੀਆ ਫ਼ੈਸਲਿਆਂ ਨੂੰ ਵੀ ਧਿਆਨ ਵਿੱਚ ਰੱਖਿਆ ਹੈ। ਇਸ ਤੋਂ ਇਲਾਵਾ ਸੁਪਰਐਨੂਏਸ਼ਨ ਗਾਰੰਟੀ ਵਿੱਚ ਹੋਏ ਵਾਧੇ ਅਤੇ ਪੁਰਾਣੇ ਖਰਚਿਆਂ ਦੇ ਅੰਕੜਿਆਂ ਵਿੱਚ ਕੀਤੀ ਗਈ ਇੰਡੈਕਸੇਸ਼ਨ ਨੂੰ ਵੀ ਗਿਣਤੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। IHACPA ਵੱਲੋਂ ਆਸਟ੍ਰੇਲੀਆ ਸਰਕਾਰ ਨੂੰ ਦਿੱਤੀ ਜਾਣ ਵਾਲੀ ਇਹ ਕੀਮਤ ਸਬੰਧੀ ਸਲਾਹ ਰਿਹਾਇਸ਼ੀ ਏਜਡ ਕੇਅਰ ਸੇਵਾਵਾਂ ਲਈ ਸਰਕਾਰੀ ਫੰਡਿੰਗ ਸਬੰਧੀ ਫ਼ੈਸਲੇ ਕਰਨ ਵਿੱਚ ਮਦਦ ਕਰਦੀ ਹੈ। ਹਾਲਾਂਕਿ, ਹਰ ਸਾਲ ਦੀ AN-ACC ਕੀਮਤ ਅਤੇ ਵੱਖ-ਵੱਖ AN-ACC ਕਲਾਸਾਂ ਅਤੇ ਬੇਸ ਕੇਅਰ ਟੈਰਿਫ਼ ਸ਼੍ਰੇਣੀਆਂ ਲਈ ਕੀਮਤ ਵਜ਼ਨ ਤੈਅ ਕਰਨ ਅਤੇ ਇਸ ਦਾ ਐਲਾਨ ਕਰਨ ਦੀ ਜ਼ਿੰਮੇਵਾਰੀ Health and Ageing Minister ਦੀ ਹੈ।