ਸਿਡਨੀ – ਕੁੱਲ 15 Aboriginal ਅਤੇ Torres Strait Islander ਉਮੀਦਵਾਰਾਂ ਨੇ Indigenous Fire and Rescue Employment Strategy (IFARES) ਪ੍ਰੋਗਰਾਮ ਸਫਲਤਾਪੂਰਵਕ ਪੂਰਾ ਕਰ ਲਿਆ ਹੈ। ਇਸ ਪ੍ਰੋਗਰਾਮ ਰਾਹੀਂ ਉਨ੍ਹਾਂ ਲਈ Fire and Rescue NSW (FRNSW) ਵਿੱਚ ਫਾਇਰਫਾਈਟਰ ਵਜੋਂ ਕਰੀਅਰ ਬਣਾਉਣ ਦਾ ਰਾਹ ਖੁੱਲ੍ਹਿਆ ਹੈ।
IFARES ਇੱਕ ਸੱਤ ਮਹੀਨਿਆਂ ਦਾ Indigenous ਪਾਥਵੇਅ ਪ੍ਰੋਗਰਾਮ ਹੈ। ਇਸ ਵਿੱਚ ਉਮੀਦਵਾਰਾਂ ਨੂੰ ਆਹਮੋ-ਸਾਹਮਣੇ ਸਿੱਖਿਆ ਦੇ ਨਾਲ ਹਰ ਹਫ਼ਤੇ ਆਨਲਾਈਨ ਸਿੱਖਣ ਦਾ ਮੌਕਾ ਵੀ ਦਿੱਤਾ ਜਾਂਦਾ ਹੈ। ਪ੍ਰੋਗਰਾਮ ਦੌਰਾਨ ਉਮੀਦਵਾਰ TAFE NSW ਦੇ ਸਹਿਯੋਗ ਨਾਲ ਰਾਸ਼ਟਰੀ ਪੱਧਰ ’ਤੇ ਮਾਨਤਾ ਪ੍ਰਾਪਤ Certificate III in Fitness ਵੀ ਕਰਦੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੂੰ ਐਮਰਜੈਂਸੀ ਸਥਿਤੀਆਂ ਨਾਲ ਨਜਿੱਠਣ ਲਈ ਨਕਲੀ ਅਭਿਆਸ, ਕਰੀਅਰ ਤਿਆਰੀ ਵਰਕਸ਼ਾਪਾਂ ਅਤੇ ਫਾਇਰਫਾਈਟਰ ਦੇ ਕੰਮ ਨਾਲ ਜਾਣੂ ਕਰਵਾਉਣ ਵਾਲੇ ਸੈਸ਼ਨਾਂ ਵਿੱਚ ਹਿੱਸਾ ਲੈਣਾ ਪੈਂਦਾ ਹੈ।
ਇਸ ਸਾਲ ਪ੍ਰੋਗਰਾਮ ਪੂਰਾ ਕਰਨ ਵਾਲਿਆਂ ਵਿੱਚ 22 ਸਾਲਾ ਟਾਈਲਰ ਮੂਡੀ ਵੀ ਸ਼ਾਮਲ ਹੈ। ਟਾਈਲਰ ਆਪਣੇ ਪਿਤਾ ਸੀਨੀਅਰ ਫਾਇਰਫਾਈਟਰ ਜੇਸਨ ਮੂਡੀ ਦੇ ਨਕਸ਼ੇ ਕਦਮਾਂ ’ਤੇ ਚੱਲਣਾ ਚਾਹੁੰਦਾ ਹੈ।
ਜੇਸਨ ਮੂਡੀ Charlestown ਫਾਇਰ ਸਟੇਸ਼ਨ ’ਤੇ ਫਾਇਰਫਾਈਟਰ ਹਨ ਅਤੇ ਉਹ ਪਹਿਲਾਂ NSW State of Origin ਰਗਬੀ ਲੀਗ ਟੀਮ ਨਾਲ ਵੀ ਖੇਡ ਚੁੱਕੇ ਹਨ। ਉਨ੍ਹਾਂ ਨੇ 2017 ਵਿੱਚ IFARES ਦਾ ਸਾਲਾਨਾ ਪ੍ਰੋਗਰਾਮ ਪੂਰਾ ਕੀਤਾ ਸੀ। ਜੇਸਨ ਮੂਡੀ ਨੇ ਦੱਸਿਆ ਕਿ ਉਨ੍ਹਾਂ ਦਾ ਪੁੱਤਰ ਲੰਬੇ ਸਮੇਂ ਤੋਂ ਫਾਇਰਫਾਈਟਰ ਬਣਨ ਦੀ ਇੱਛਾ ਰੱਖਦਾ ਹੈ। ਉਨ੍ਹਾਂ ਕਿਹਾ, “ਟਾਈਲਰ ਕਾਫ਼ੀ ਸਮੇਂ ਤੋਂ ਕਹਿੰਦਾ ਆ ਰਿਹਾ ਹੈ ਕਿ ਉਹ ‘ਫਾਇਰੀ’ ਬਣਨਾ ਚਾਹੁੰਦਾ ਹੈ। ਲੋਕਾਂ ਨਾਲ ਜੁੜਨਾ ਅਤੇ ਭਾਈਚਾਰੇ ਦੀ ਸੇਵਾ ਕਰਨਾ ਉਸ ਦਾ ਜਨੂੰਨ ਹੈ।” ਉਨ੍ਹਾਂ ਅੱਗੇ ਕਿਹਾ ਕਿ ਇਹ ਟੀਚਾ ਕਿਸੇ ਲਈ ਵੀ ਹਾਸਲ ਕਰਨਾ ਸੰਭਵ ਹੈ, ਪਰ ਇਸ ਲਈ ਪ੍ਰੋਗਰਾਮ ਨੂੰ ਗੰਭੀਰਤਾ ਨਾਲ ਲੈਣਾ ਅਤੇ ਪੂਰਾ ਧਿਆਨ ਲਗਾਉਣਾ ਜ਼ਰੂਰੀ ਹੈ।
FRNSW ਮੁਤਾਬਕ ਹੁਣ ਤੱਕ 80 ਤੋਂ ਵੱਧ Indigenous ਲੋਕ IFARES ਪ੍ਰੋਗਰਾਮ ਪੂਰਾ ਕਰ ਚੁੱਕੇ ਹਨ। ਇਨ੍ਹਾਂ ਵਿੱਚੋਂ ਕਈ ਉਮੀਦਵਾਰਾਂ ਨੇ ਬਾਅਦ ਵਿੱਚ NSW ਅਤੇ ACT ਵਿੱਚ ਫਾਇਰਫਾਈਟਰ ਵਜੋਂ ਆਪਣਾ ਕਰੀਅਰ ਸ਼ੁਰੂ ਕੀਤਾ ਹੈ।
Emergency Services ਦੀ Parliamentary Secretary Charishma Kaliyanda ਨੇ ਕਿਹਾ ਕਿ IFARES ਉਮੀਦਵਾਰਾਂ ਨੂੰ ਫਾਇਰਫਾਈਟਰ ਭਰਤੀ ਪ੍ਰਕਿਰਿਆ ਲਈ ਜ਼ਰੂਰੀ ਮੁੱਢਲੀ ਤਿਆਰੀ ਦਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਪ੍ਰੋਗਰਾਮ ਪੂਰਾ ਕਰਨ ਤੋਂ ਬਾਅਦ ਜਦੋਂ ਵਿਦਿਆਰਥੀ ਭਰਤੀ ਦੇ ਪੜਾਅ ’ਤੇ ਪਹੁੰਚਦੇ ਹਨ ਤਾਂ ਉਹ ਮੁਕਾਬਲੇ ਵਿੱਚ ਬਿਹਤਰ ਢੰਗ ਨਾਲ ਹਿੱਸਾ ਲੈ ਸਕਦੇ ਹਨ। ਹਰੇਕ ਵਿਦਿਆਰਥੀ ਨੂੰ FRNSW ਦਾ ਇੱਕ Indigenous mentor ਵੀ ਦਿੱਤਾ ਜਾਂਦਾ ਹੈ, ਜੋ ਪੂਰੇ ਪ੍ਰੋਗਰਾਮ ਦੌਰਾਨ ਉਸ ਨੂੰ ਸਲਾਹ ਅਤੇ ਸਹਾਇਤਾ ਦਿੰਦਾ ਹੈ। Kaliyanda ਨੇ ਕਿਹਾ ਕਿ ਇਸ ਸਾਲ ਦੇ ਗ੍ਰੈਜੂਏਟਾਂ ਦੀ ਉਮਰ ਲਗਭਗ 20ਵਿਆਂ ਦੇ ਵਿਚਕਾਰ ਤੋਂ 30ਵਿਆਂ ਦੇ ਅੰਤ ਤੱਕ ਹੈ ਅਤੇ ਇਨ੍ਹਾਂ ਵਿੱਚੋਂ ਕੁਝ ਅਗਲੇ ਸਾਲ ਦੀ ਸ਼ੁਰੂਆਤ ਤੱਕ ਫਾਇਰਫਾਈਟਰ ਬਣ ਸਕਦੇ ਹਨ।
FRNSW ਦੇ Commissioner Jeremy Fewtrell ਨੇ ਕਿਹਾ ਕਿ IFARES ਪ੍ਰੋਗਰਾਮ ਸਥਾਨਕ ਭਾਈਚਾਰਿਆਂ ਨਾਲ ਮਜ਼ਬੂਤ ਸਬੰਧਾਂ ਅਤੇ ਸਥਾਨਕ ਜਾਣਕਾਰੀ ਵਾਲੀ ਫਾਇਰਫਾਈਟਿੰਗ ਸਮਰੱਥਾ ਤਿਆਰ ਕਰਨ ਵਿੱਚ ਮਦਦ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਪ੍ਰੋਗਰਾਮ FRNSW ਦੇ ‘Reflect’ Reconciliation Action Plan (RAP) ਤਹਿਤ ਕੀਤੇ ਜਾ ਰਹੇ ਕੰਮਾਂ ਨੂੰ ਵੀ ਮਜ਼ਬੂਤ ਕਰਦਾ ਹੈ। Fewtrell ਨੇ ਕਿਹਾ ਕਿ ਜਦੋਂ ਕਿਸੇ Indigenous ਭਾਈਚਾਰੇ ਦਾ ਆਪਣਾ ਫਾਇਰਫਾਈਟਰ ਅੱਗ ਬੁਝਾਉਣ ਵਾਲੀ ਗੱਡੀ ਚਲਾਉਂਦਾ ਦਿਖਾਈ ਦਿੰਦਾ ਹੈ ਅਤੇ ਉਸ ਗੱਡੀ ’ਤੇ ਸਥਾਨਕ ਭਾਈਚਾਰੇ ਜਾਂ ‘mob’ ਦਾ ਨਾਮ ਲਿਖਿਆ ਹੁੰਦਾ ਹੈ ਤਾਂ ਇਹ ਪੂਰੇ ਭਾਈਚਾਰੇ ਲਈ ਮਾਣ ਦੀ ਗੱਲ ਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ Indigenous ਫਾਇਰਫਾਈਟਰ ਆਪਣੇ ਨਾਲ ਅੱਗ ਦੇ ਵਿਹਾਰ ਬਾਰੇ ਕੀਮਤੀ ਸਥਾਨਕ ਜਾਣਕਾਰੀ ਵੀ ਲਿਆਉਂਦੇ ਹਨ। ਇਹ ਗਿਆਨ ਕਈ ਵਾਰ ਪੀੜ੍ਹੀ ਦਰ ਪੀੜ੍ਹੀ ਪਰਿਵਾਰਾਂ ਅਤੇ ਭਾਈਚਾਰਿਆਂ ਵਿੱਚ ਸਾਂਝਾ ਹੁੰਦਾ ਆ ਰਿਹਾ ਹੈ।
FRNSW ਨੇ ਦੱਸਿਆ ਹੈ ਕਿ 2027 IFARES ਕੋਰਸ ਲਈ ਅਰਜ਼ੀਆਂ ਸਤੰਬਰ ਦੇ ਮੱਧ ਤੋਂ ਅਖੀਰਲੇ ਹਫ਼ਤੇ ਦੌਰਾਨ ਖੁੱਲ੍ਹਣਗੀਆਂ। ਇਸ ਪ੍ਰੋਗਰਾਮ ਰਾਹੀਂ Aboriginal ਅਤੇ Torres Strait Islander ਲੋਕਾਂ ਨੂੰ ਫਾਇਰਫਾਈਟਿੰਗ ਵਿੱਚ ਕਰੀਅਰ ਬਣਾਉਣ ਲਈ ਸਿਖਲਾਈ, ਮਾਰਗਦਰਸ਼ਨ ਅਤੇ ਭਰਤੀ ਪ੍ਰਕਿਰਿਆ ਲਈ ਤਿਆਰੀ ਦਾ ਮੌਕਾ ਮਿਲਦਾ ਹੈ।