ਮੈਲਬੌਰਨ – ਵਿਕਟੋਰੀਆ ਦੇ ਬੈਂਟਲੀ ਈਸਟ (Bentleigh East) ਦੇ ਰਹਿਣ ਵਾਲੇ 32 ਸਾਲਾ ਵਿਅਕਤੀ ’ਤੇ ਵਿਦੇਸ਼ ਤੋਂ 71 ਇਲੈਕਟ੍ਰਿਕ ਝਟਕਾ ਦੇਣ ਵਾਲੇ ਯੰਤਰ ਅਤੇ 30 ਕੈਨਿਸਟਰ ਓਸੀ (OC) ਸਪਰੇਅ ਮੰਗਵਾਉਣ ਦੇ ਦੋਸ਼ ਲੱਗੇ ਹਨ। ਉਸ ਨੂੰ ਅੱਜ, 19 ਅਕਤੂਬਰ 2026 ਨੂੰ ਮੈਲਬੌਰਨ ਮੈਜਿਸਟ੍ਰੇਟ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਣਾ ਹੈ।
ਆਸਟ੍ਰੇਲੀਅਨ ਫੈਡਰਲ ਪੁਲਿਸ (AFP) ਨੇ ਇਸ ਮਾਮਲੇ ਦੀ ਜਾਂਚ 13 ਅਗਸਤ 2026 ਨੂੰ ਸ਼ੁਰੂ ਕੀਤੀ ਸੀ। ਮੈਲਬੌਰਨ ਹਵਾਈ ਅੱਡੇ ਦੇ ਪਾਰਸਲ ਛਾਂਟੀ ਕੇਂਦਰ ਵਿੱਚ ਇੱਕ ਸ਼ੱਕੀ ਪਾਰਸਲ ਮਿਲਣ ਤੋਂ ਬਾਅਦ ਪੁਲਿਸ ਨੂੰ ਇਸ ਬਾਰੇ ਸੂਚਨਾ ਦਿੱਤੀ ਗਈ ਸੀ। ਜਾਂਚ ਦੌਰਾਨ ਪਾਰਸਲ ਵਿੱਚੋਂ ਦੋ ਇਲੈਕਟ੍ਰਿਕ ਝਟਕਾ ਦੇਣ ਵਾਲੇ ਯੰਤਰ ਅਤੇ ਛੇ ਕਾਰਤੂਸ ਮਿਲੇ। AFP ਨੇ ਆਸਟ੍ਰੇਲੀਅਨ ਬਾਰਡਰ ਫੋਰਸ (ABF) ਦੀ ਮਦਦ ਨਾਲ ਹੋਰ ਜਾਂਚ ਕੀਤੀ। ਇਸ ਦੌਰਾਨ ਪਿਛਲੇ ਦੋ ਮਹੀਨਿਆਂ ਵਿੱਚ ਵਿਦੇਸ਼ ਤੋਂ ਆਏ ਕਈ ਹੋਰ ਪਾਰਸਲਾਂ ਨਾਲ ਵੀ ਇਸ ਮਾਮਲੇ ਦੇ ਸਬੰਧ ਸਾਹਮਣੇ ਆਏ। ਇਨ੍ਹਾਂ ਪਾਰਸਲਾਂ ਨੂੰ ABF ਨੇ ਰੋਕ ਕੇ ਜ਼ਬਤ ਕਰ ਲਿਆ ਸੀ।
ਘਰਾਂ ਦੀ ਤਲਾਸ਼ੀ ਦੌਰਾਨ ਨਕਦੀ ਅਤੇ ਸਪਰੇਅ ਬਰਾਮਦ
12 ਅਕਤੂਬਰ 2026 ਨੂੰ AFP ਦੇ ਅਧਿਕਾਰੀਆਂ ਨੇ ਲਿਨਬਰੁੱਕ (Lynbrook) ਅਤੇ ਬੈਂਟਲੀ ਈਸਟ ਸਥਿਤ ਘਰਾਂ ਦੀ ਤਲਾਸ਼ੀ ਲਈ। ਇਸ ਦੌਰਾਨ ਲਗਭਗ 10,000 ਡਾਲਰ ਨਕਦ, ਡਾਕ ਨਾਲ ਸਬੰਧਤ ਰਿਕਾਰਡ, ਓਸੀ ਸਪਰੇਅ ਦੇ 30 ਕੈਨਿਸਟਰ ਅਤੇ ਕਥਿਤ ਤੌਰ ’ਤੇ ਭਵਿੱਖ ਵਿੱਚ ਹੋਰ ਸਮਾਨ ਮੰਗਵਾਉਣ ਨਾਲ ਸਬੰਧਤ ਦਸਤਾਵੇਜ਼ ਜ਼ਬਤ ਕੀਤੇ ਗਏ। ਪੁਲਿਸ ਨੇ ਦੋ ਮੋਬਾਈਲ ਫੋਨ ਅਤੇ ਇੱਕ ਲੈਪਟਾਪ ਵੀ ਆਪਣੇ ਕਬਜ਼ੇ ਵਿੱਚ ਲਿਆ ਹੈ। ਇਨ੍ਹਾਂ ਦੀ ਡਿਜੀਟਲ ਜਾਂਚ ਕੀਤੀ ਜਾਵੇਗੀ।
ਕਿਹੜੇ ਦੋਸ਼ ਲੱਗੇ ਹਨ?
ਵਿਅਕਤੀ ’ਤੇ ਪਾਬੰਦੀਸ਼ੁਦਾ ਯੰਤਰ ਅਤੇ ਓਸੀ ਸਪਰੇਅ ਗੈਰ-ਕਾਨੂੰਨੀ ਤਰੀਕੇ ਨਾਲ ਆਸਟ੍ਰੇਲੀਆ ਮੰਗਵਾਉਣ, ਡਾਕ ਰਾਹੀਂ ਖ਼ਤਰਨਾਕ ਵਸਤੂ ਭੇਜਣ ਅਤੇ ਪਾਬੰਦੀਸ਼ੁਦਾ ਹਥਿਆਰ ਰੱਖਣ ਦੇ ਕੁੱਲ ਪੰਜ ਦੋਸ਼ ਲਗਾਏ ਗਏ ਹਨ। ਇਨ੍ਹਾਂ ਵਿੱਚੋਂ ਕੁਝ ਦੋਸ਼ਾਂ ਲਈ ਵੱਧ ਤੋਂ ਵੱਧ 10 ਸਾਲ ਦੀ ਕੈਦ ਅਤੇ ਪਾਬੰਦੀਸ਼ੁਦਾ ਹਥਿਆਰ ਰੱਖਣ ਦੇ ਦੋਸ਼ਾਂ ਲਈ ਵੱਧ ਤੋਂ ਵੱਧ ਦੋ ਸਾਲ ਦੀ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਵਿਅਕਤੀ ਨੂੰ ਕੁਝ ਸ਼ਰਤਾਂ ’ਤੇ ਜ਼ਮਾਨਤ ਦਿੱਤੀ ਗਈ ਹੈ ਅਤੇ ਉਸ ਨੂੰ ਅੱਜ ਮੈਲਬਰਨ ਮੈਜਿਸਟ੍ਰੇਟ ਅਦਾਲਤ ਵਿੱਚ ਪੇਸ਼ ਹੋਣਾ ਹੈ।
AFP ਨੇ ਲੋਕਾਂ ਦੀ ਸੁਰੱਖਿਆ ਬਾਰੇ ਚਿੰਤਾ ਜਤਾਈ
AFP ਦੀ ਕਾਰਜਕਾਰੀ ਕਮਾਂਡਰ ਡੋਨਾ ਟੈਂਕਾਰਡ ਨੇ ਕਿਹਾ ਕਿ ਪਾਬੰਦੀਸ਼ੁਦਾ ਹਥਿਆਰ ਲੋਕਾਂ ਦੀ ਸੁਰੱਖਿਆ ਲਈ ਵੱਡਾ ਖ਼ਤਰਾ ਹਨ। AFP ਅਤੇ ABF ਮਿਲ ਕੇ ਸਰਹੱਦ ’ਤੇ ਸ਼ੱਕੀ ਪਾਰਸਲਾਂ ਦੀ ਜਾਂਚ ਕਰਦੇ ਹਨ ਅਤੇ ਗੈਰ-ਕਾਨੂੰਨੀ ਸਮਾਨ ਮੰਗਵਾਉਣ ਵਾਲਿਆਂ ਦੀ ਪਛਾਣ ਕਰਨ ਲਈ ਕੰਮ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਹਰ ਉਹ ਪਾਬੰਦੀਸ਼ੁਦਾ ਹਥਿਆਰ, ਜਿਸ ਨੂੰ ਸਰਹੱਦ ’ਤੇ ਰੋਕਿਆ ਜਾਂਦਾ ਹੈ, ਆਸਟ੍ਰੇਲੀਆਈ ਲੋਕਾਂ ਨੂੰ ਨੁਕਸਾਨ ਪਹੁੰਚਾਉਣ ਲਈ ਵਰਤੇ ਜਾਣ ਵਾਲੇ ਇੱਕ ਹੋਰ ਹਥਿਆਰ ਨੂੰ ਰੋਕਣ ਦੇ ਬਰਾਬਰ ਹੈ।
ਪੁਲਿਸ ਨੇ ਲੋਕਾਂ ਨੂੰ ਸ਼ੱਕੀ ਜਾਂ ਅਪਰਾਧਿਕ ਗਤੀਵਿਧੀਆਂ ਬਾਰੇ ਜਾਣਕਾਰੀ ਦੇਣ ਦੀ ਅਪੀਲ ਕੀਤੀ ਹੈ। ਇਸ ਲਈ ਕ੍ਰਾਈਮ ਸਟਾਪਰਜ਼ ਦੇ ਨੰਬਰ 1800 333 000 ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ ਜਾਂ AFP ਦੀ ਵੈੱਬਸਾਈਟ ਰਾਹੀਂ ਜਾਣਕਾਰੀ ਦਿੱਤੀ ਜਾ ਸਕਦੀ ਹੈ।
ਆਸਟ੍ਰੇਲੀਆ ਦੀਆਂ ਸਰਹੱਦਾਂ ਦੀ ਸੁਰੱਖਿਆ ਨੂੰ ਪ੍ਰਭਾਵਿਤ ਕਰਨ ਵਾਲੀਆਂ ਸ਼ੱਕੀ ਗਤੀਵਿਧੀਆਂ, ਖ਼ਾਸ ਕਰਕੇ ਗੈਰ-ਕਾਨੂੰਨੀ ਦਰਾਮਦ ਬਾਰੇ ਜਾਣਕਾਰੀ ਬਾਰਡਰ ਵਾਚ (Border Watch online) ਨੂੰ ਵੀ ਦਿੱਤੀ ਜਾ ਸਕਦੀ ਹੈ।