ਮੈਲਬੌਰਨ – RE-Alliance ਨੇ ਕਿਹਾ ਹੈ ਕਿ One Nation ਪਾਰਟੀ ਨੂੰ ਵਿਕਟੋਰੀਆ ਦੇ ਖੇਤਰੀ ਇਲਾਕਿਆਂ ਦੇ ਲੋਕਾਂ ਨੂੰ ਸਪੱਸ਼ਟ ਤੌਰ ’ਤੇ ਦੱਸਣਾ ਚਾਹੀਦਾ ਹੈ ਕਿ ਉਸ ਦੀ ਨਵੀਂ ਊਰਜਾ ਨੀਤੀ ਤਹਿਤ ਪਰਮਾਣੂ ਬਿਜਲੀ ਘਰ ਕਿਹੜੀਆਂ ਕਮਿਊਨਿਟੀਆਂ ਵਿੱਚ ਬਣਾਏ ਜਾਣਗੇ।
One Nation ਨੇ ਸੋਮਵਾਰ ਨੂੰ ਜਾਰੀ ਕੀਤੀ ਆਪਣੀ ਵਿਕਟੋਰੀਆ ਊਰਜਾ ਨੀਤੀ ਵਿੱਚ VNI West, Western Renewables Link ਅਤੇ ਹੋਰ ਵੱਡੇ ਬਿਜਲੀ ਟਰਾਂਸਮਿਸ਼ਨ ਪ੍ਰਾਜੈਕਟ ਰੱਦ ਕਰਨ, ਨੈੱਟ-ਜ਼ੀਰੋ ਟੀਚਿਆਂ ਨੂੰ ਖਤਮ ਕਰਨ ਅਤੇ ਵਿਕਟੋਰੀਆ ਵਿੱਚ ਪਰਮਾਣੂ ਊਰਜਾ ’ਤੇ ਲੱਗੀ ਪਾਬੰਦੀ ਹਟਾਉਣ ਦਾ ਵਾਅਦਾ ਕੀਤਾ ਹੈ।
RE-Alliance ਦੇ ਨੈਸ਼ਨਲ ਡਾਇਰੈਕਟਰ ਐਂਡਰਿਊ ਬਰੇ ਨੇ ਕਿਹਾ ਕਿ ਖੇਤਰੀ ਕਮਿਊਨਿਟੀਆਂ ਨੂੰ ਸਿਰਫ਼ ਉਹ ਪ੍ਰਾਜੈਕਟਾਂ ਦੀ ਸੂਚੀ ਨਹੀਂ ਦਿੱਤੀ ਜਾਣੀ ਚਾਹੀਦੀ ਜਿਨ੍ਹਾਂ ਨੂੰ One Nation ਰੱਦ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਪਾਰਟੀ ਨੂੰ ਇਹ ਵੀ ਦੱਸਣਾ ਚਾਹੀਦਾ ਹੈ ਕਿ ਇਸ ਦੀ ਥਾਂ ਕੀ ਬਣਾਇਆ ਜਾਵੇਗਾ, ਕਿੱਥੇ ਬਣਾਇਆ ਜਾਵੇਗਾ, ਇਸ ਦੀ ਲਾਗਤ ਕਿੰਨੀ ਹੋਵੇਗੀ ਅਤੇ ਬਿਜਲੀ ਕਦੋਂ ਮਿਲਣੀ ਸ਼ੁਰੂ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਵਿਕਟੋਰੀਆ ਦੇ ਲੋਕਾਂ ਨੂੰ ਇਸ ਬਾਰੇ ਇਮਾਨਦਾਰ ਚਰਚਾ ਦੀ ਲੋੜ ਹੈ ਕਿ ਪੁਰਾਣੇ ਹੋ ਰਹੇ ਕੋਲਾ ਬਿਜਲੀ ਘਰਾਂ ਦੀ ਥਾਂ ਭਵਿੱਖ ਵਿੱਚ ਕੀ ਆਵੇਗਾ ਅਤੇ ਖੇਤਰੀ ਕਮਿਊਨਿਟੀਆਂ ਨੂੰ ਨਵੇਂ ਬੁਨਿਆਦੀ ਢਾਂਚੇ ਤੋਂ ਕਿਹੜੇ ਫਾਇਦੇ ਮਿਲਣਗੇ। ਬਰੇ ਨੇ ਕਿਹਾ ਕਿ ਜੇਕਰ One Nation ਮੌਜੂਦਾ ਨਵਿਆਉਣਯੋਗ ਊਰਜਾ ਪ੍ਰਾਜੈਕਟਾਂ ਨੂੰ ਰੱਦ ਕਰਨਾ ਚਾਹੁੰਦੀ ਹੈ ਅਤੇ ਉਨ੍ਹਾਂ ਦੀ ਥਾਂ ਪਰਮਾਣੂ ਊਰਜਾ ਲਿਆਉਣਾ ਚਾਹੁੰਦੀ ਹੈ, ਤਾਂ ਉਸ ਨੂੰ ਇਹ ਵੀ ਦੱਸਣਾ ਚਾਹੀਦਾ ਹੈ ਕਿ ਇਸ ਦੇ ਪ੍ਰਭਾਵ ਕਿਹੜੀਆਂ ਕਮਿਊਨਿਟੀਆਂ ’ਤੇ ਪੈਣਗੇ। ਉਨ੍ਹਾਂ ਮੰਨਿਆ ਕਿ ਵਿਕਟੋਰੀਆ ਵਿੱਚ ਨਵਿਆਉਣਯੋਗ ਊਰਜਾ ਪ੍ਰਾਜੈਕਟਾਂ ਨੂੰ ਲੈ ਕੇ ਕੁਝ ਖੇਤਰਾਂ ਵਿੱਚ ਲੋਕਾਂ ਦੀ ਨਾਰਾਜ਼ਗੀ ਅਸਲ ਹੈ। ਪਰ ਉਨ੍ਹਾਂ ਕਿਹਾ ਕਿ ਜ਼ਰੂਰੀ ਬੁਨਿਆਦੀ ਢਾਂਚਾ ਰੱਦ ਕਰਨ ਨਾਲ ਲੋਕਾਂ ਦੀਆਂ ਜਾਇਜ਼ ਚਿੰਤਾਵਾਂ ਦਾ ਹੱਲ ਨਹੀਂ ਹੋਵੇਗਾ।
RE-Alliance ਮੁਤਾਬਕ ਖੇਤਰੀ ਵਿਕਟੋਰੀਆ ਦੇ ਲੋਕ ਪਹਿਲਾਂ ਤੋਂ ਹੀ ਮੰਗ ਕਰ ਰਹੇ ਹਨ ਕਿ ਵੱਡੇ ਊਰਜਾ ਪ੍ਰਾਜੈਕਟਾਂ ਬਾਰੇ ਉਨ੍ਹਾਂ ਨਾਲ ਪਹਿਲਾਂ ਗੱਲਬਾਤ ਕੀਤੀ ਜਾਵੇ, ਸਥਾਨਕ ਲੋਕਾਂ ਨੂੰ ਵਧੇਰੇ ਆਰਥਿਕ ਲਾਭ ਮਿਲਣ ਅਤੇ ਘਰਾਂ, ਸੜਕਾਂ, ਸਥਾਨਕ ਸੇਵਾਵਾਂ ਅਤੇ ਮਜ਼ਦੂਰਾਂ ’ਤੇ ਪੈਣ ਵਾਲੇ ਦਬਾਅ ਦੀ ਢੰਗ ਨਾਲ ਯੋਜਨਾ ਬਣਾਈ ਜਾਵੇ। ਬਰੇ ਨੇ ਕਿਹਾ ਕਿ ਲੋਕਾਂ ਦੀ ਨਾਰਾਜ਼ਗੀ ਨੂੰ ਸਿਆਸੀ ਲਾਭ ਲਈ ਵਰਤਣਾ ਅਤੇ ਸਮੱਸਿਆਵਾਂ ਦਾ ਅਸਲ ਹੱਲ ਕਰਨਾ ਦੋ ਵੱਖਰੀਆਂ ਗੱਲਾਂ ਹਨ।
RE-Alliance ਨੇ CSIRO ਦੇ ਅਨੁਮਾਨ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਕਾਨੂੰਨੀ ਪਾਬੰਦੀਆਂ ਹਟਾਏ ਜਾਣ ਤੋਂ ਬਾਅਦ ਵੀ ਆਸਟ੍ਰੇਲੀਆ ਵਿੱਚ ਪਹਿਲੀ ਪਰਮਾਣੂ ਬਿਜਲੀ ਪੈਦਾ ਹੋਣ ਵਿੱਚ ਘੱਟੋ-ਘੱਟ 15 ਸਾਲ ਲੱਗ ਸਕਦੇ ਹਨ। CSIRO ਦੀ ਤਾਜ਼ਾ GenCost ਰਿਪੋਰਟ ਮੁਤਾਬਕ ਸੂਰਜੀ ਊਰਜਾ (solar PV) ਅਤੇ ਧਰਤੀ ’ਤੇ ਲਗਾਈ ਜਾਣ ਵਾਲੀ ਹਵਾ ਊਰਜਾ (onshore wind) ਆਸਟ੍ਰੇਲੀਆ ਲਈ ਘੱਟ ਲਾਗਤ ਵਾਲੇ ਬਿਜਲੀ ਉਤਪਾਦਨ ਦੇ ਮੁੱਖ ਸਰੋਤ ਹਨ। Australian Energy Market Operator (AEMO) ਦੀ 2026 Integrated System Plan ਵਿੱਚ ਵੀ VNI West ਦੀ ਲੋੜ ਦੱਸੀ ਗਈ ਹੈ। ਇਸ ਪ੍ਰਾਜੈਕਟ ਰਾਹੀਂ ਪੱਛਮੀ ਵਿਕਟੋਰੀਆ ਵਿੱਚ ਹੋਰ ਨਵਿਆਉਣਯੋਗ ਊਰਜਾ ਨੂੰ ਬਿਜਲੀ ਗ੍ਰਿਡ ਨਾਲ ਜੋੜਨ ਵਿੱਚ ਮਦਦ ਮਿਲੇਗੀ। RE-Alliance ਨੇ ਕਿਹਾ ਕਿ ਵਿਕਟੋਰੀਆ ਦੀ ਚੋਣ ਲੜ ਰਹੀ ਹਰ ਸਿਆਸੀ ਪਾਰਟੀ ਨੂੰ VicGrid ਵੱਲੋਂ ਤੈਅ ਕੀਤੀਆਂ ਕਮਿਊਨਿਟੀ ਨਾਲ ਗੱਲਬਾਤ, ਸਥਾਨਕ ਲਾਭਾਂ ਦੀ ਸਾਂਝ ਅਤੇ ਸਥਾਨਕ ਪ੍ਰਭਾਵਾਂ ਦੇ ਪ੍ਰਬੰਧਨ ਸਬੰਧੀ ਲੋੜਾਂ ਨੂੰ ਲਾਗੂ ਕਰਨ ਅਤੇ ਉਨ੍ਹਾਂ ਦੀ ਪਾਲਣਾ ਯਕੀਨੀ ਬਣਾਉਣ ਦਾ ਵਾਅਦਾ ਕਰਨਾ ਚਾਹੀਦਾ ਹੈ।